E Saogalemu pe a Faatuatuaina Atoatoa Ieova

“E faafofoga mai foʻi Ieova pe a ou valaau atu iā te ia.”—SALA. 4:3.

1, 2. (a) O ā tulaga mataʻutia na feagai ma Tavita? (e) O ā salamo o le a tatou talanoaina?

NA PULE le tupu o Tavita i Isaraelu mo le tele o tausaga, ae o lea ua feagai nei ma se tulaga mataʻutia. Ua faia e lona atalii fouvale o Apisaloma ia lava ma tupu, ma ua tatau ai ona sola ese Tavita mai Ierusalema. Ua faalataina foʻi o ia e se uō maufaatuatuaina, ma o lea ua savavali faatasi atu ma nai ana uō faamaoni i ui atu i le mauga o Olive, o loo tagi ma e leai ni ona seevae. Mulimuli ane, ua tauʻai atu e se tasi o le aiga o le tupu o Saulo e igoa iā Semi ni maa, ma asu atu pefu iā Tavita, a o fetuu atu iā te ia.​—2 Samu. 15:30, 31; 16:5-14.

² Po o le a faapogai e nei tulaga mataʻutia le alu ifo o Tavita i le tuugamau ma le faanoanoa ma le māsiasi? E leai, ona e na te faatuatuaina Ieova. O loo manino mai lea tulaga i le Salamo e 3 lea na fatu e Tavita e faatatau i lana solaaga. Na ia tusia foʻi le Salamo lona 4. O nei Salamo e lua o loo faamautinoa mai ai, e faafofoga ma tali mai le Atua i tatalo. (Sala. 3:4; 4:3) Ua faamautinoa mai i nei salamo e faatasi Ieova i ana auauna faamaoni i le ao ma le pō, ma faamanuia i latou e ala i lana lagolago, ma latou lagonaina ai le filemu ma le saogalemu. (Sala. 3:5; 4:8) O le a tatou iloiloina salamo nei ma vaai pe faapefea ona faatupuina ai le mautinoa ma le faatuatuaina o le Atua.

Pe a ʻToʻatele e Faasagatau Mai iā i Tatou’

3. O le ā le tulaga o Tavita na iai e pei ona faaalia i le Salamo 3:1, 2?

³ O le tala lenei a se avefeʻau: “Ua liliu atu iā Apisaloma loto o tagata o Isaraelu.” (2 Samu. 15:13) Ua taumānatu Tavita pe aiseā ua toʻatele ai tagata ua lagolagoina Apisaloma, ma fesili ai i le Atua: “Ieova e, aiseā ua toʻatele ai o ē e ita mai iā te aʻu? Aiseā ea ua toʻatele ai o ē e faasagatau mai iā te aʻu? E toʻatele o ē ua faapea ane e uiga iā te aʻu: ʻE lē faaolaina lava o ia e le Atua.’” (Sala. 3:1, 2) Ua manatu le toʻatele o tagata Isaraelu o le a lē laveaʻia e Ieova Tavita mai iā Apisaloma, ma ē e lagolagoina o ia.

4, 5. (a) O le ā o loo mautinoa e Tavita? (e) O le ā le uiga o le faaupuga “o Lē e faaeaina i luga loʻu ulu”?

⁴ E lē o popole Tavita ona e na te faatuatuaina le Atua. Ua pese Tavita: “A o oe Ieova e, e fai oe ma oʻu talita, o loʻu mamalu ma o Lē e faaeaina i luga loʻu ulu.” (Sala. 3:3) Ua mautinoa e Tavita o le a puipuia o ia e Ieova e pei ona puipuia se fitafita e se talita. Ua sola le tupu ua matua, ua ufiufi lona ulu ma punou ona o le māsiasi. Ae o le a suia e le Silisili ese le tulaga o Tavita i le faamamaluina. O le a faatusaʻoina o ia e Ieova, ma toe faaea i luga lona ulu. Ua ōle atu Tavita ma le mautinoa o le a tali mai le Atua iā te ia. Pe e te faatuatuaina faapena Ieova?

⁵ O upu “o Lē e faaeaina i luga loʻu ulu,” o lona uiga ua viiviia e Tavita Ieova mo le fesoasoani e mautinoa na te mauaina. Ua faapea mai se tasi o faaliliuga o le Tusi Paia (Today’s English Version), “Ae o oe LE ALII, o loʻu talita mai lamatiaga; ua e aumai le manumalo ma toe faalototeleina aʻu.” Ua taʻua e se isi tusi e tusa ai ma le faaupuga “o Lē e faaeaina i luga loʻu ulu”: “Pe a faaeaina e le Atua . . . le ʻulu’ o se tasi, e faatumulia se tasi i le faamoemoe  ma le mautinoa.” O le faamalosia ese mai i lona nofoālii, ua alagatatau ai ona faanoanoa Tavita. Ae peitaʻi, ʻo le faaeaina i luga o lona ulu’ o le toe mauaina lea o lona lototele, mautinoa ma le faatuatuaina atoatoa o le Atua.

ʻE Tali Mai Ieova!’

6. Aiseā ua faapea mai ai Tavita ua taliina lana tatalo mai i le mauga paia o Ieova?

⁶ O lona mautinoa ma lona faatuatuaina o Ieova, ua faapea mai ai Tavita: “Ou te valaau leotele atu iā Ieova, ona tali mai lea o ia iā te aʻu mai i lona mauga paia.” (Sala. 3:4) Ona o le faatonuga a Tavita, ua ave ai le atolaau o le feagaiga, lea e faaatagia ai le faatasi mai o le Atua, i le mauga o Siona. (Faitau le 2 Samuelu 15:23-25.) Ua talafeagai ai la le faapea mai o Tavita, ua taliina lana tatalo mai i le mauga paia o Ieova.

7. Aiseā e lē o fefe ai Tavita?

⁷ Ona o lona mautinoa e tali mai le Atua i lana tatalo, ua lē fefe ai Tavita. Nai lo lea ua ia pese: “A o aʻu, ou te taoto ma ou moe; ou te ala mai lava, auā e lagolago mai pea Ieova iā te aʻu.” (Sala. 3:5) E oo lava i le pō, i le taimi e tele ai osofaʻiga faafuaseʻi, e lē o fefe Tavita i le taimi e moe ai. Ua ia iloa e toe ala mai lava, auā e mautinoa e lagolago pea le Atua iā te ia, ona o mea sa tutupu i lona olaga. E faapena foʻi i tatou, pe afai tatou te tausia pea “ala o Ieova,” ma lē ō ese mai ai.​—Faitau le 2 Samuelu 22:21, 22.

8. E faapefea ona faaalia mai i le Salamo 27:1-4 le faatuatuaina e Tavita o Ieova?

⁸ Ua faaalia mai le mautinoa ma le matuā faatuatuaina e Tavita o Ieova, i se isi o ana salamo, o loo maua ai upu nei: “O Ieova o loʻu malamalama ma loʻu faaolataga. O ai ea ou te mataʻu i ai? O Ieova o le malosi ia o loʻu ola. O ai ea ou te fefe i ai? . . . E ui ina tolauapi se ʻau e faasagatau mai iā te aʻu, ae e lē fefe ai loʻu loto. . . . E tasi lava le mea ua ou talosaga atu ai iā Ieova o le mea lea o loo oʻu naunau i ai, ina ia ou nofo i le fale o Ieova i aso uma o loʻu ola, e iloa ai le matagofie o Ieova ma ia ou vaai atu ai ma le fiafia i lona malumalu.” (Sala. 27:1-4) Afai o ou faalogona ia, ma e fetaui ma lou tulaga, o le a e auai atu pea i  sauniga faatasi ma tagata tapuaʻi o Ieova.​—Epe. 10:23-25.

9, 10. E ui lava i faaupuga o loo iai i le Salamo 3:6,7, ae aiseā e tatou te faapea atu ai e lē o fia tauimasui Tavita?

⁹ E ui o loo feagai Tavita ma le faatautee o Apisaloma ma le lē faamaoni o le toʻatele o isi, ae ua ia pese atu: “Ou te lē fefe i le faitau sefulu afe o tagata, o ē ua siʻosiʻo mai e faasagatau mai iā te aʻu. Ieova e, inā e tulaʻi ia! Loʻu Atua e, ia e faaola mai iā te aʻu! E te taia auvae o oʻu fili uma. E te gauia foʻi nifo o ē e amioleaga.”​—Sala. 3:6, 7.

¹⁰ E leai se agaga fia tauimasui iā Tavita. O lea, pe a “taia auvae” o ona fili, o se gaoioiga e faia e le Atua. Ua tusia e Tavita lana lava kopi o le Tulafono ma ua ia iloa lelei le fetalaiga a Ieova: “O aʻu e faia le tauimasui ma taui atu.” (Teu. 17:14, 15, 18; 32:35) O Ieova foʻi e na te ʻgauia nifo o ē e amioleaga.’ O le uiga o le gauia o o latou nifo, o le aveesea lea o lo latou malosi e faia ai se mea leaga. E silafia e Ieova ē amioleaga, auā “o Ieova e vaai i le loto.” (1 Samu. 16:7) Maʻeu lo tatou lotofaafetai ona ua foaʻi mai e le Atua le faatuatua ma le malosi e tatou te tutū mausalī ai, ma faasagatau atu i lē e sili ona amioleaga o Satani. Ua lē o toe umi ae lafoina o ia i le tō, o pei o se leona tagi ua gauia ona nifo, ma ua tatau i ai le faaumatiaga!​—1 Pete. 5:8, 9; Faaa. 20:1, 2, 7-10.

“E iā Ieova le Faaolataga”

11. Aiseā e tatau ai ona tatou tatalo mo o tatou uso talitonu?

¹¹ Ua iloa e Tavita, e na o Ieova lava e mafai ona aumaia le faaolataga o loo ia matuā manaʻomia. Peitaʻi e lē o manatu le faisalamo iā te ia lava. Ae faapefea le toʻatele o isi tagata faamaoni o Ieova? Ua talafeagai ai upu faaiʻu o le pese a Tavita: “E iā Ieova le faaolataga. Ua e faamanuia i ou tagata.” (Sala. 3:8) E matuiā faafitauli o Tavita, ae na te manatua tagata uma o Ieova, ma ua ia mautinoa e faamanuia e le Atua i latou uma. Pe e lē tatau foʻi ona tatou manatua o tatou uso talitonu? Seʻi tatou manatua i latou pe a tatalo, ma talosagaina le agaga paia mai iā Ieova ina ia latou maua le lototele e talaʻia ai le tala lelei ma le mautinoa.​—Efe. 6:17-20.

12, 13. O le ā le mea ua oo iā Apisaloma, ma o ā lagona o Tavita?

¹² E matagā le auala ua oti ai Apisaloma—ua avea ai ma lapataʻiga iā i latou uma e faileagaina isi, aemaise lava ē ua faauuina e le Atua e pei o Tavita. (Faitau le Faataoto 3:31-35.) Ua tau le taua, ma ua faatoʻilaloina le ʻautau a Apisaloma. A o tiʻetiʻe atu o ia i se miula, ona lāvea lea o lona lauulu uumi i se lālā felefele o se laau telē. Ona tautau ai lea o ia i inā, o loo ola, ae ua leai se mea e mafai ona ia toe fai, ona alu atu ai lea o Ioapo ma tutuʻi le fatu o Apisaloma i ni tao se tolu ma oti ai.​—2 Samu. 18:6-17.

¹³ Po ua fiafia Tavita ina ua faalogo i le mea ua tupu i lona atalii? E leai. Nai lo lea, ua ia savali solo ma tagi auēuē ma faapea atu: “Loʻu atalii e, Apisaloma, loʻu atalii e, loʻu atalii e, Apisaloma! Ta fia oti e sui ai oe, loʻu atalii e, Apisaloma, loʻu atalii e!” (2 Samu. 18:24-33) Ua na o upu lava a Ioapo ua mafai ona faateʻa ese ai le faanoanoa o Tavita. Pagā se iʻuga leaga ua oo iā Apisaloma, ona o lona faasausili ma faasagatau i lona lava tamā​—o lē ua faauuina e Ieova—​ma malaia ai!​—2 Samu. 19:1-8; Faata. 12:21; 24:21, 22.

Ua Toe Faaalia e Tavita Lona Faatuatuaina o le Atua

14. O le ā se faamatalaga e uiga i le tusiaina o le Salamo lona 4?

¹⁴ E pei o le Salamo lona 3, o loo iai foʻi i le salamo lona 4 se tatalo faatauanau a Tavita e faaalia ai lona faatuatuaina atoatoa o Ieova. (Sala. 3:4; 4:3) Atonu na tusia e Tavita lenei pese ina ia faaalia ai lona lotofaafetai i le Atua, ona sa lē taulau le fouvalega a Apisaloma. Pe atonu na tusia e Tavita mo le ʻaupepese a sa Levī. Po o le ā lava le tulaga na iai, ae o lo tatou mafaufau loloto i ai, e faamalosia ai lo tatou faatuatuaina o Ieova.

15. Aiseā e mafai ai ona tatou tatalo iā Ieova ma le mautinoa e ala i lona Alo?

 ¹⁵ Ua toe faaalia e Tavita lona faatuatuaina atoatoa o le Atua, ma lona mautinoa o le aogā o le tatalo. O lana pese lenei: “Loʻu Atua amiotonu e, ia e tali mai iā te aʻu pe a ou valaau atu. Ia e laveaʻi mai iā te aʻu i oʻu puapuaga. Ia e agalelei mai ma faafofoga i laʻu tatalo.” (Sala. 4:1) E mafai foʻi ona iā i tatou lea mautinoa, pe afai e tatou te faia le amiotonu. O le iloaina e faamanuia mai e Ieova le “Atua amiotonu” ona tagata amio saʻo, e mafai ai ona tatou tatalo atu ma le mautinoa iā te ia, e ala i lona Alo ma le faatuatua i le taulaga togiola na faia e Iesu. (Ioa. 3:16, 36) Maʻeu le filemu e tatou te mauaina!

16. Aiseā atonu ua lotovaivai ai Tavita?

¹⁶ I nisi taimi, e tatou te feagai ai ma tulaga e lotovaivai ai, ma lē mautonu ai. Atonu ua oo lenei mea iā Tavita mo sina taimi, auā ua ia pese: “O outou le fanau a tagata, tou te faalumaina ea loʻu mamalu seʻia afea, a o outou fiafia pea i mea e lē aogā, a o outou saʻili pea foʻi i mea pepelo?” (Sala. 4:2) E foliga mai e faasino atu le faaupuga “fanau a tagata,” i tagata ua vavaeese mai le Atua. E fiafia tele fili o Tavita i “mea e lē aogā.” O le auala lenei e faaupu ai e se isi faaliliuga o le Tusi Paia: “O le ā le umi e tou te naunau ai i mea pepelo ma saʻili atu i atua sesē?” (New International Version) E ui tatou te lotovaivai ona o mea e faia e isi, ae ia faaauau pea ona tatou tatalo faatauanau ma faatuatuaina atoatoa le Atua moni e toʻatasi.

17. Faamatala le auala e tatou te gaoioi ai e tusa ma le Salamo 4:3.

¹⁷ Ua iloa le faatuatuaina e Tavita o le Atua i upu nei: “Ia outou iloa e faamamaluina lava e Ieova o lē e faamaoni iā te ia; e faafofoga mai foʻi Ieova pe a ou valaau atu iā te ia.” (Sala. 4:3) E manaʻomia le lototele ma le faatuatuaina atoatoa o Ieova ina ia faamaoni ai pea iā te ia. O se faataʻitaʻiga, e tatau ona faaalia nei uiga e se aiga Kerisiano pe a faateʻaina se tasi o le aiga ua lē salamo. Ua faamamaluina e le Atua i latou e faamaoni iā te ia ma ona ala. O lea, o le faamaoni ma le faatuatuaina atoatoa o Ieova, e faatupu ai le olioli i ona tagata.​—Sala. 84:11, 12.

18. E pei ona taʻua i le Salamo 4:4, o le ā e ao ona tatou faia pe a fai mai e nisi ni upu po o ni gaoioiga lē alofa?

¹⁸ Ae faapefea pe a faia e se tasi se tala po o se gaoioiga e tatou te lē fiafia ai? E tumau pea lo tatou olioli pe a tatou faia le mea o loo taʻua e Tavita: “Pe a outou atuatuvale, aua neʻi agasala ai. Ia outou fai ifo i o outou loto i luga o o outou moega, ma ia fifilemu.” (Sala. 4:4) Pe a fai mai e nisi ni upu po o ni gaoioiga lē alofa, ia aua neʻi agasala e ala i le toe taui atu. (Roma 12:17-19) E mafai ona tatou taʻu atu nei mea i le tatalo i luga o o tatou moega. Pe a tatou tatalo atu e faatatau i nei mea, atonu o le a suia o tatou manatu ma faamagalo atu ma le alofa. (1 Pete. 4:8) E mataʻina le fautuaga a Paulo e faatatau i lenei mea lea e foliga mai e faavae i le Salamo 4:4: “Pe a outou ita, aua neʻi agasala ai, aua neʻi goto le lā o tumau pea lo outou ita, aua foʻi neʻi tuua e outou se mea e mautū ai le Tiapolo.”​—Efe. 4:26, 27.

19. E faapefea ona fesoasoani iā i tatou le Salamo 4:5 e tusa ai ma a tatou taulaga faaleagaga?

¹⁹ Ina ia faamamafa le manaʻomia o le faatuatuaina o le Atua, ua pese Tavita: “Ia fai taulaga i taulaga o le amiotonu, ma ia outou faatuatua iā Ieova.” (Sala. 4:5) O taulaga na faia e tagata Isaraelu, e faatoʻā aogā pe a saʻo le  māfuaaga e fai ai. (Isa. 1:11-17) Ina ia talia e le Atua a tatou taulaga faaleagaga, e ao foʻi ona saʻo māfuaaga e fai ai, ma faatuatuaina atoatoa o ia.​—Faitau le Faataoto 3:5, 6; Eperu 13:15, 16.

20. O le ā le uiga o le faaupuga ʻle malamalama o fofoga o Ieova’?

²⁰ Ua faaauau le faamatalaga a Tavita: “E toʻatele ua faapea ane: ʻO ai e na te faailoa mai iā i matou mea lelei?’ Ieova e, ia faasaga mai iā i matou le malamalama o ou fofoga.” (Sala. 4:6) Ua faaalia mai le finagalo malie o Ieova i le faaupuga ʻle malamalama o ona fofoga.’ (Sala. 89:15) O lea, ina ua tatalo Tavita: “Ia faasaga mai iā i matou le malamalama o ou fofoga,” o le uiga o lana faamatalaga ia ʻfinagalo malie mai iā i matou.’ Ona o le faatuatuaina o Ieova, tatou te maua ai lona finagalo malie ma le olioli a o faia lona finagalo.

21. O le ā e tatou te maua pe a fai so tatou sao atoatoa i le seleselega faaleagaga i aso nei?

²¹ A o tulimataʻia e Tavita le olioli e maua mai le Atua lea e sili atu i mea e maua mai le seleselega, ona ia pese atu lea iā Ieova: “E tele lava le fiafia ua e tuuina i loʻu loto, e sili atu i le taimi na tele ai a latou saito ma uaina fou.” (Sala. 4:7) E tatou te maua le fiafiaga moni, pe afai tatou te faia se sao atoatoa i le seleselega faaleagaga i aso nei. (Luka 10:2) Ua tatou olioli ona ua faatuputeleina le aofaʻi o ʻtagata faigaluega o le seleselega,’ a o taʻimua ē ua faauuina, o se ʻnuu e toʻatele.’ (Isa. 9:3) Po o fai sou sao lea e maua ai le faamalieina moni i lenei seleselega fiafia?

Agaʻi i Luma ma le Mautinoa ma Faatuatuaina Atoatoa Ieova

22. E tusa ai ma le Salamo 4:8, o le ā na oo i tagata Isaraelu ina ua latou tausia tulafono a le Atua?

²² O upu faaiʻu nei o le salamo a Tavita: “Ou te taoto ma ou moe ma le filemu, auā e na o oe Ieova e, ou te nofo ai ma le saogalemu.” (Sala. 4:8) Sa maua e tagata Isaraelu le filemu ma le saogalemu, a o latou tausia tulafono a Ieova. O se faataʻitaʻiga, ʻsa filemu Iuta ma Isaraelu’ i le nofoaiga a Solomona. (1 Tu. 4:25) Sa maua pea le filemu e i latou na faatuatuaina Ieova, e ui sa faasagatau mai isi nuu e latalata ane. E tatou te momoe ma le filemu e pei o Tavita ona o le saogalemu mai iā Ieova.

23. O le ā o le a oo iā i tatou pe afai tatou te faatuatuaina atoatoa Ieova?

²³ Seʻi o tatou agaʻigaʻi pea i luma ma le mautinoa i la tatou auaunaga iā Ieova. Ia tatou tatalo foʻi ma le faatuatua, ma maua ai le ʻfilemu mai le Atua, e leoleoina ai o tatou loto ma mafaufau.’ (Fili. 4:6, 7) Maʻeu le olioli e tatou te maua mai ai! E tatou te vaai atu ai i le lumanaʻi ma le mautinoa, pe afai tatou te faatuatuaina atoatoa Ieova.

O le ā Lau Tali?

• O ā faafitauli na oo iā Tavita ona o Apisaloma?

• E faapefea ona faatupuina le mautinoa e le Salamo 3?

• O ā auala e faamalosia ai e le Salamo 4 lo tatou faatuatuaina o Ieova?

• O ā aogā tatou te maua mai le faatuatuaina atoatoa o le Atua?

[Fesili mo le Suʻesuʻega]

[Ata i le itulau 29]

Sa iai pea le mautinoa o Tavita iā Ieova, a o sola ese mai iā Apisaloma

[Ata i le itulau 32]

Po o e faatuatuaina atoatoa Ieova?