ʻMaʻeu le Tele o le Atamai o le Atua!’

“Maʻeu le tele o le tamaoaiga, ma le atamai atoa ma le silafaga a le Atua! E lē masuʻesuʻeina ana faamasinoga, ma e lē mafai foʻi ona iloa ona ala!” —ROMA 11:33.

1. O le ā le faaeaga sili ua maua e Kerisiano papatiso?

O LE ā le faaeaga sili ua e maua? Atonu e te manatu i se tofiga po o se faailoga aloaʻia ua e maua. Ae peitaʻi, mo Kerisiano papatiso uma, o le faaeaga sili o le maua lea o se faiā vavalalata ma le Atua moni e toʻatasi, o Ieova. Ona o lea tulaga, ua Ia “silafia” lelei i tatou.​—1 Kori. 8:3; Kala. 4:9.

2. Aiseā ua avea ai o se faaeaga sili le iloaina o Ieova, faapea ma lona silafiaina o i tatou?

² Aiseā ua avea ai o se faaeaga sili le iloa o Ieova, faapea ma lona silafia o i tatou? E lē gata o ia o Lē e silisili ese i le aoao o mea, ae o ia foʻi e Puipuia i latou e alolofa iā te ia. Sa faagaeeina le perofeta o Nauma e tusia: “O Ieova e lelei o ia, o le lafitaga malosi i aso o le puapuaga. E na te silafia i latou o loo sulufaʻi atu iā te ia.” (Nau. 1:7; Sala. 1:6) O le mea moni, e faalagolago lo tatou faamoemoe mo le ola e faavavau, i lo tatou iloaina o le Atua moni ma lona Alo o Iesu Keriso.​—Ioa. 17:3.

3. O le ā o loo aofia ai i lo tatou iloa o le Atua?

³ E sili atu mea e tatau ona tatou iloa e uiga i le Atua, nai lo le tau ina iloa o lona suafa. E tatau ona tatou iloa o ia e pei o se Uō, ma e tatou te malamalama ai i mea e fiafia i ai, ma mea e ʻinoʻino i ai o ia. O lo tatou ola e tusa ai ma lenā poto, e faaalia ai ua tatou iloa lelei le Atua. (1 Ioa. 2:4) Ae e iai se isi mea o loo manaʻomia, ina ia tatou iloa moni ai Ieova. E lē gata e manaʻomia ona tatou iloa mea ua ia faia, ae e ao foʻi ona tatou iloa le auala ma le māfuaaga o ana gaoioiga uma. O le tele o lo tatou malamalama lelei i fuafuaga a Ieova, o le tele foʻi lea o lo tatou maofa i le ʻtele o le atamai o le Atua.’​—Roma 11:33.

E Faataunuu e le Atua Lona Finagalo

4, 5. (a) E pei ona faaaogā i le Tusi Paia, o le ā o loo faasino atu i ai le upu “finagalo”? (e) Faataʻitaʻi mai le auala e tatou te iloa ai, e lē tasi se auala e faataunuu ai se fuafuaga.

⁴ E faataunuu e Ieova lona finagalo po o ana fuafuaga, ma ua taʻua i le Tusi Paia lona “finagalo e faavavau.” (Efe. 3:10, 11) O le ā le uiga moni o lea faaupuga? O le uiga o le upu “finagalo,” e pei ona faaaogāina i lenei mau, e faasino atu i se sini patino, po o se fuafuaga o taulaʻi atu i ai, lea e lē tasi se auala e mafai ona faataunuuina ai.

⁵ O se faataʻitaʻiga: Atonu e fia malaga atu se tagata i se nofoaga patino. O lana fuafuaga, ia oo atu i lenā nofoaga. Atonu e eseese ni auala e mafai ai ona ia taunuu atu i inā. Ma a o malaga atu la i le auala ua ia filifilia, atonu e feagai o ia ma mea e ono suia ai lona auala, e pei o le leaga o le tau, le pisi tele o taavale, po o le tapunia o nisi auala. Ae peitaʻi, po o le ā le tele o ana fetuutuunaʻiga ua faia, ae e faataunuuina lava lona sini, pe a taunuu i le nofoaga o loo malaga atu i ai.

6. E faapefea ona faaalia e Ieova e fetuutuunaʻi i le faataunuuina o lona finagalo?

⁶ E faapena foʻi ona faaalia e Ieova le  fetuutuunaʻi i le faataunuuina o lona finagalo e faavavau. Ona o loo ia amanaʻiaina le saʻolotoga e fai ai filifiliga a ana foafoaga atamamai, ua ia nofosauni e fetuutuunaʻi le auala e faataunuu ai lona finagalo. O se faataʻitaʻiga, seʻi tatou iloiloina le auala ua faataunuu ai e Ieova lona finagalo, e tusa ai ma le Fanau folafolaina. I le amataga, na fetalai atu Ieova i le uluaʻi ulugalii: “Ia fanafanau ma ia matuā faatoʻateleina, ia tumu ai le lalolagi ma ia galueaʻiina.” (Kene. 1:28) Pe na taofia lenā fuafuaga ona o le fouvalega lea na tupu i le faaatoaga i Etena? E matuā leai lava! Na vave lava ona gaoioi Ieova e faaaogā se isi “auala” e faataunuu ai lona finagalo. Na ia valoia le oo mai o se “fanau,” o lē o le a faaleleia mea ua faaleagaina e ē na fouvale.​—Kene. 3:15; Epe. 2:14-17; 1 Ioa. 3:8.

7. O le ā ua tatou aʻoaʻoina mai le fetalaiga a Ieova e uiga iā te ia lava, i le Esoto 3:14?

⁷ O le tomai o Ieova e fetuutuunaʻi ai i tulaga eseese e tulaʻi mai a o faagasolo le faataunuuina o lona finagalo, e ōgatusa lea ma lana fetalaiga e uiga iā te ia lava. Ina ua taʻu atu e Mose māfuaaga e faigatā ai ona ia faataunuu lona tofiga lea sa avatu e Ieova iā te ia, na faamalosia e Ieova o ia e ala i lona faapea mai: “ʻE avea aʻu ma lē ou te loto i ai.’ Ma sa ia toe faapea mai: ʻIa faapenei ona e fai atu i le fanauga a Isaraelu, “E avea aʻu ma lē ou te loto i ai, o ia lea ua na auina mai aʻu iā te outou.”’” (Eso. 3:14) Ioe, e mafai ona avea Ieova ma so o se mea e finagalo i ai, ina ia faataunuu atoatoa lona finagalo! Ua faataʻitaʻia lelei mai e le aposetolo o Paulo lenei mea i le mataupu e 11 o le tusi o Roma. I lenā tusi, ua ia talanoaina ai le laau o le olive faafaatusa. O se iloiloga o lenei talafaatusa, o le a faatuputeleina ai lo tatou talisapaia o le tele o le atamai o Ieova, e tusa lava po o lo tatou faamoemoe e mo le lagi po o le ola e faavavau i inei i le lalolagi.

Le Finagalo o Ieova e Tusa ai ma le Fanau Folafolaina

8, 9. (a) O ā mea moni e fā, e fesoasoani ina ia tatou malamalama ai i le talafaatusa i le laau o le olive? (e) O le tali i le ā le fesili e iloa ai e fetuutuunaʻi Ieova i le faataunuuina o lona finagalo?

⁸ Ina ia tatou malamalama i le talafaatusa o le laau o le olive, e fā ni mea moni e ao ona tatou iloa muamua, e tusa ai ma le faataunuuina o le finagalo o le Atua i le fanau folafolaina. Muamua, na folafola atu e Ieova iā Aperaamo, “e maua . . . e nuu uma o le lalolagi faamanuiaga” e ala i lana fanau po o ē e tupuga mai iā te ia. (Kene. 22:17, 18) Lona lua, sa avatu i le nuu o Isaraelu lea na tupuga mai iā Aperaamo, le avanoa e avea ai o se “malo o ositaulaga.” (Eso. 19:5, 6) Lona tolu, ina ua teena e le toʻatele o tagata Isaraelu le Mesia, sa gaoioi Ieova ina ia suia le auala e maua ai se “malo o ositaulaga.” (Mata. 21:43; Roma 9:27-29) Ma lona fā, e ui o Iesu o le vaega autū o le fanau a Aperaamo, ae ua maua e isi le avanoa e avea ai ma vaega o lenei fanau.​—Kala. 3:16, 29.

⁹ Pe a fua i nei mea moni e fā, ua tatou iloa mai le tusi o Faaaliga, e 144,000 i latou o le a pule faatasi ma Iesu o ni tupu ma ositaulaga i le lagi. (Faaa. 14:1-4) O loo taʻua foʻi i latou nei o “atalii o Isaraelu.” (Faaa. 7:4-8) Peitaʻi, po o faia uma aʻe le 144,000 i tagata Isaraelu ma tagata Iutaia? O le tali i lenā fesili, e tatou te iloa ai le fetuutuunaʻi o Ieova ina ia faataunuu lona finagalo. Seʻi o tatou iloiloina le tali i lenā fesili, e ala i le fesoasoani mai o le tusi a Paulo i tagata i Roma.

“Malo o Ositaulaga”

10. O le ā le avanoa e na o le nuu o Isaraelu na latou maua?

¹⁰ E pei ona taʻua muamua, sa na o le nuu o Isaraelu na filifilia e faia aʻe ai le “malo o ositaulaga ma le nuu paia.” (Faitau le Roma 9:4, 5.) Ae o le ā le mea e tupu pe a taunuu  mai le Fanau folafolaina? Po o le a maua mai i le nuu o Isaraelu faaletino le aofaʻiga atoa o le 144,000 o le Isaraelu faaleagaga, lea o le a avea ma vaega lona lua o le fanau a Aperaamo?

11, 12. (a) O anafea na amata ai ona filifilia ē e avea ma Malo i le lagi, ma o le ā le tali o le toʻatele o tagata Iutaia? (e) Na faapefea ona faaatoaina e Ieova le “aofaʻiga atoa” o ē e avea ma le fanau a Aperaamo?

¹¹ Faitau le Roma 11:7-10. Na teena Iesu e tagata Iutaia i le uluaʻi senituri. Na muta ai i inā le avanoa, e maua ai le fanau a Aperaamo mai iā i latou. Ae i le Penetekoso o le 33 T.A. ina ua amata ona filifilia ē o le a avea o se “malo o ositaulaga” i le lagi, sa iai nisi tagata Iutaia amiotonu na taliaina lea valaaulia. E ui e sili atu i le toʻaafe lo latou aofaʻi, ae ua na o se “vaega totoe” pe a faatusatusa atu i le nuu atoa o Iutaia.​—Roma 11:5.

¹² O le a faapefea la ona faaatoa e Ieova le “aofaʻiga atoa” o i latou e avea ma fanau a Aperaamo? (Roma 11:12, 25) Ia mātau mai le tali a le aposetolo o Paulo: “E leʻi faapea ua iʻuvale le afioga a le Atua. Auā o i latou na tupuga mai i Isaraelu [faaletino], e lē o ni ʻIsaraelu’ i latou uma. E lē faapea o le fanau i latou uma [o ē o le a avea ma fanau folafolaina a Aperaamo] ona na tutupu mai iā Aperaamo, . . . O lona uiga la, o le fanau i le tino, e lē o le fanau moni lea a le Atua, a o le fanau o le folafolaga, ua taʻua o le fanau.” (Roma 9:6-8) O lona uiga la, o i latou o le a avea ma vaega o le fanau, e lē tau manaʻomia ona fanau mai i le gafa o Aperaamo.

Le Laau o le Olive Faafaatusa

13. O le ā ua faaata mai e (a) le laau o le olive, (e) le aa, (i) le ogālaau atoa, ma (o) lālā?

¹³ I le faamatalaga a Paulo na ia faatusatusa ai i latou ua avea ma vaega o le fanau a Aperaamo, i lālā o se olive. * (Roma 11:21) O lenei olive na totō, ua faaata ai le faataunuuga o le finagalo o le Atua e tusa ai ma le feagaiga ma Aperaamo. E paia le aa o le laau, ma ua faaata ai Ieova, o lē na te foaʻiina le ola i le Isaraelu faaleagaga. (Isa. 10:20; Roma 11:16) E faaata mai e le ogālaau Iesu, o le vaega autū lea o le fanau a Aperaamo. O lālā uma e faaata ai le “aofaʻiga atoa” o i latou o loo aofia i le vaega lona lua o le fanau a Aperaamo.

14, 15. O ai i latou na “gauia ese” mai le olive na totō, ma o ai i latou sa faapipii atu i ai?

 ¹⁴ I le talafaatusa i le laau o le olive, ua faaata tagata Iutaia sa teena Iesu, i lālā o le olive na “gauia ese.” (Roma 11:17) Na latou melea ai le avanoa e avea ma vaega o le fanau a Aperaamo. Ae o ai o le a sui aʻi i latou nei? E tusa ai ma le manatu o tagata Iutaia, o ē sa faamaualuluga ona e tupuga mai iā Aperaamo, e lē mafai ona iai se isi e sui aʻi i latou. Ae peitaʻi, ua uma ona lapataʻia i latou e Ioane le papatiso, pe afai e finagalo i ai Ieova, e mafai ona ia faia mai i maa ni fanau mo Aperaamo.​—Luka 3:8.

¹⁵ O le ā la sa faia e Ieova ina ia faataunuu lona finagalo? Ua faamatala mai e Paulo, ua faapipii lālā mai le olive vao i le olive na totō, e sui aʻi lālā ia ua gauia ese. (Faitau le Roma 11:17, 18.) O lona uiga, o Kerisiano mai nuu ese ua faauuina i le agaga, e pei o nisi o i latou i le faapotopotoga i Roma, sa faapipii faafaatusa atu i lenei laau o le olive. Ma o lea ua avea ai i latou ma vaega o le fanau a Aperaamo. Muamua sa pei i latou o lālā mai se olive vao, e aunoa ma se faamoemoe e avea ai ma vaega o lenei feagaiga faapitoa. Ae o lea ua tatalaina e Ieova le avanoa mo i latou e avea ai ma Iutaia faaleagaga.​—Roma 2:28, 29.

16. Na faapefea ona faamatala e Peteru lenei malo fou faaleagaga?

¹⁶ Ua faamatalaina faapenei e Peteru lenei tulaga: “O le mea lea, e tāua ai o ia [Iesu Keriso] iā te outou [Isaraelu faaleagaga e aofia ai ma Kerisiano o Nuu Ese], auā ua outou talitonu; a o i latou o ē e lē talitonu ʻo le maa lea na tuulafoaʻiina e tufuga, ua avea ma maa tulimanu sili,’ ma ʻmaa e tausuai ai, ma papa e tautevateva ai.’ . . . A o outou o ʻse vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua, ina ia outou faalauiloa atu uiga silisili ona lelei’ o lē na valaauina outou mai i le  pōuliuli i lona malamalama ofoofogia. Auā e leʻi avea muamua outou ma nuu, a ua avea nei outou ma nuu o le Atua; o ē e leʻi maua le alofa mutimutivale, a ua outou maua nei le alofa mutimutivale.”​—1 Pete. 2:7-10.

17. Aiseā e manatu ai o le mea sa faia e Ieova, “e lē o se mea e masani ai”?

¹⁷ Sa faia e Ieova se mea e leʻi faatalitalia e le toʻatele o tagata. Na faapea mai Paulo, “e lē o se mea e masani ai.” (Roma 11:24) I le ā le itu? Auā foʻi e lē o se mea masani pe lē talafeagai ma le tulaga faalenatura, le faapipii o se lālā mai se olive vao i se olive na totō, ae, o le mea lenā sa faia e nisi o faifaatoʻaga i le uluaʻi senituri. * I se tulaga talitutusa, sa faia e Ieova se mea uigaese. I le vaaiga masani a tagata Iutaia, e lē mafai e ni tagata o nuu ese ona fua mai ni fua lelei. Ae peitaʻi, sa faaaogā e Ieova i latou e avea o se vaega o “se nuu” e fua mai ai fua o le Malo. (Mata. 21:43) Talu mai le faauuina o Konelio​—o le tagata muamua o nuu ese lē peritomeina na liliu—​i le 36 T.A., sa tatala ai le avanoa mo tagata e lē o ni Iutaia ma e leʻi peritomeina, ina ia faapipii atu i latou i le olive faafaatusa.​—Galu. 10:44-48. *

18. O le ā le avanoa na maua pea e tagata Iutaia faaletino talu mai le 36 T.A.?

¹⁸ Po o lona uiga la, talu mai le 36 T.A., ua lē toe iai se avanoa mo tagata Iutaia faaletino e avea ai ma vaega o le fanau a Aperaamo? Leai. Na faamatala e Paulo: “E faapea foʻi i latou [tagata Iutaia faaletino], afai e toe faatuatua, e toe faapipiiina i ai, auā e mafai e le Atua ona toe faapipiiina i latou. Afai e salaeseina oe mai i le olive vao, ma faapipiiina i le olive moni na totō e ui e lē o se mea e masani ai, e sili atu ona faapipiiina lālā moni i lo latou lava laau olive!” *—Roma 11:23, 24.

ʻE Faaolaina Isaraelu Uma’

19, 20. O le ā ua faataunuuina e Ieova, e pei ona faaataina mai i le olive faafaatusa?

¹⁹ Ioe, o le finagalo o Ieova e tusa ai ma “le Isaraelu a le Atua,” ua faataunuuina i se auala matagofie. (Kala. 6:16) E pei ona taʻua e Paulo, ʻe faaolaina Isaraelu uma.’ (Roma 11:26) I le taimi atofaina a Ieova, o le a auauna “Isaraelu uma”—o lona uiga, o le aofaʻiga atoa o le Isaraelu faaleagaga, o ni tupu ma ositaulaga i le lagi. E leai se māfuaaga e lē taulau ai le finagalo o Ieova!

²⁰ E pei ona valoia mai, o le fanau a Aperaamo​—o Iesu Keriso lea, faatasi ma le 144,000—​o le a aumaia ai faamanuiaga i “tagata o nuu ese.” (Roma 11:12; Kene. 22:18) O le auala lea e maua ai e tagata uma o le Atua, aogā mai lenei faatulagaga. O le mea moni, pe a tatou mafaufau loloto i le faataunuuina o le finagalo e faavavau o Ieova, e tatou te matuā maofa i “le tele o le tamaoaiga, ma le atamai atoa ma le silafaga a le Atua.”​—Roma 11:33.

[Faaopoopoga i lalo]

Pe E te Manatua?

• O le ā ua tatou aʻoaʻoina mai iā Ieova e uiga i le auala e faataunuu ai lona finagalo?

• I le Roma mataupu e 11, o le ā ua faatusa i ai . . .

le laau o le olive?

lona aa?

le ogālaau atoa?

ona lālā?

• Aiseā “e lē o se mea e masani ai” le faapipii atu o ni lālā?

[Fesili mo le Suʻesuʻega]

[Pusa/Ata i le itulau 24]

 Aiseā e Faapipii Atu ai Lālā o le Olive Vao?

▪ Na ola Lucius Junius Moderatus Columella, o se fitafita Roma ma o se faifaatoʻaga foʻi i le uluaʻi senituri T.A. E lauiloa i ana tusi e 12 sa tusia e uiga i le olaga o se faifaatoʻaga.

I lana tusi lona lima, ua ia sii mai le alagāupu lenei: “O lē e faamalūina le palapala i autafa o olive, ua fai atu i le laau e fua mai; o lē e tuuina i ai mea faalelei eleele, ua augani atu i le laau e fua mai; ae o lē e sala ma teu lālā, ua faamalosia le laau e fua mai.”

Ina ua oo ana faamatalaga i laau e ola lelei ae e lē fua mai, na ia faamatala le mea e ao ona fai: “E lelei ona vili se pu i le laau e lē o fua, ma fafao ai i totonu se lālā mai se olive vao; o le iʻuga, e fua tele mai lenei laau, ona ua faaaogā se lālā o loo ola lelei e faatupu ai fua o lea laau.”

[Ata i le itulau 23]

Po o e malamalama i le talafaatusa i le laau o le olive?