Mulimuli iā Keriso, lo Tatou Taʻitaʻi Lelei Atoatoa

O I LATOU e mulimuli i taʻitaʻi o malo, e masani ona lagona le lē fiafia. Ae peitaʻi, e telē le eseesega ma i latou e gauaʻi i le taʻitaʻiga a Iesu. Na fetalai Iesu: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou.” (Mata. 11:28, 29) E maua le lotomalie ma le faafouina i le taʻitaʻiga a Iesu. E matuā naunau o ia i ē vaivai ma loto mafatia, ma ua ia valaaulia i latou e amoina faatasi lana amo agalelei. Ae, o le ā o loo aofia i le mulimuli atu i le taʻitaʻiga a Iesu?

Ua faapea mai Peteru, ʻna puapuagatia le Keriso mo outou,’ ma “ua tuuina mai ai le faaaʻoaʻoga mo outou ina ia outou mulimulituʻi ai i ona tulaga aao.” (1 Pete. 2:21) Aiseā e tāua ai le mulimulituʻi i tulaga aao o Iesu? Seʻi faapea o loo tou savavali faatasi ma nisi i se laufanua o loo tatao ai ni maina, ae e na o le tasi lava le tagata i le tou vaega e iloa le mea e savali ai, ina ia sao atu ai mai lenā laufanua. Pe e te lē mulimulituʻi la iā te ia, po o lou laa foʻi i ona tulaga vae? I se auala talitutusa, e faalagolago lo tatou saogalemu i le lumanaʻi, i le faataʻitaʻi atu i le soifuaga o Iesu. O le faia faapea, e aofia ai le faalogo ma le usitaʻi iā te ia, ma felagolagomaʻi ma i latou o loo avea ma Ona sui.

Faalogo ma Usitaʻi

I le faaiʻuga o lana lauga i luga o le mauga, na fetalai Iesu: “O i latou uma e faalogo i aʻu upu ma faia, ua faatusaina i latou i le tagata faautauta, ua na fausia lona fale i luga o le papa. Ona totō mai lea o timuga ma ua oo mai lologa, ma agi mai le matagi ma taia ai le fale, ae e leʻi paʻū, auā ua fausia i luga o le papa.”​—Mata. 7:24, 25.

Ua taʻua e Iesu le tagata e faalogo ma usitaʻi i ana fetalaiga, o le tagata “faautauta.” Po o faaalia lo tatou talisapaia o le faaaʻoaʻoga a Iesu, e ala i le usiusitaʻi ma le lotoatoa, pe e tatou te usiusitaʻi na o faatonuga a Iesu e faigofie ona tatou usitaʻia? Na fetalai Iesu: ʻOu te faia pea mea e fiafia i ai le finagalo o le Tamā.’ (Ioa. 8:29) Seʻi o tatou taumafai e mulimuli i lenā faataʻitaʻiga.

I le uluaʻi senituri, sa faataatia e aposetolo se faataʻitaʻiga lelei o le gauaʻi i le taʻitaʻiga a Iesu. I se tasi taimi, na faapea atu Peteru iā Iesu: “Faauta! Ua matou tuua mea uma ae mulimuli atu iā te oe.” (Mare. 10:28) Ma le mautinoa, sa faatāuaina e aposetolo le taʻitaʻiga a Iesu auā sa lotomalilie e tuua isi mea ina ia mulimuli iā te Ia.​—Mata. 4:18-22.

Felagolagomaʻi ma Sui o Keriso

A o taulata atu i lona maliu, sa taʻua e Iesu se isi auala e tatou te ono mulimuli ai i lana taʻitaʻiga. Na fetalai Iesu: “O lē e talia so o se tasi ou te auina atu, ua ia talia aʻu.” (Ioa. 13:20) O le mea moni, sa taʻua e Iesu ona sui faauuina o ona “uso.” (Mata. 25:40) Ina ua toe faatūina aʻe Iesu i le lagi, na tofia ona “uso” e galulue e avea ma “sui . . . o Keriso” o ni sāvali e valaauliaina isi ina ia toe lelei ma Ieova le Atua. (2 Kori. 5:18-20) O lo tatou amanaʻiaina o le taʻitaʻiga a Keriso, e aofia ai lo tatou gauaʻi i ona “uso.”

 E lelei ona tatou iloiloina le auala e tatou te tali atu ai i fautuaga faale-Tusi Paia o loo maua i lomiga. E ala i le suʻesuʻeina o le Tusi Paia ma auai i sauniga a le faapotopotoga, e faamanatu mai ai iā i tatou fetalaiga a Keriso. (2 Pete. 3:1, 2) E iloa lo tatou talisapaia ma le lotoatoa o nei meaʻai faaleagaga, e ala i le faatatauina pea. Ae, e ao faapefea ona tatou tali atu pe afai e aumaia faalausosoo se fautuaga patino? O se faataʻitaʻiga, ua fautuaina Kerisiano i le Afioga a le Atua ina ia faaipoipo “tau lava o lē ua i le Alii.” (1 Kori. 7:39) Ua sili atu i le selau tausaga o talanoaina lenei mataupu mai lea taimi i lea taimi i Le Olomatamata. E mautinoa le alofa naunau o uso o Keriso mo lo tatou lelei faaleagaga, e ala i le lomiaina o fautuaga i lenei mataupu ma le tele o isi fautuaga e uunaʻia ai i tatou. O le usitaʻia o nei faamanatu o se tasi lea o auala e tatou te faaalia ai o loo tatou mulimuli i lo tatou Taʻitaʻi lelei atoatoa, o Iesu Keriso.

Ua faapea mai le Faataoto 4:18: “O le ala o ē e amiotonu ua pei o le susulu o le malamalama lea e atili ai ona malamalama ma malamalama pea, seʻia oo ina matuā ao lelei le aso.” Ioe, e agaʻigaʻi pea i luma le taʻitaʻiga a Iesu ae e lē alu ma mālōlō. O se isi auala e tatou te felagolagomaʻi ai ma “uso” o Keriso, o le iai lea o se vaaiga mautinoa, i so o se malamalamaga fou o upu moni faale-Tusi Paia ua lomia e le “pologa faamaoni ma le faautauta.”​—Mata. 24:45.

E faaalia foʻi lo tatou gauaʻi i “uso” o Keriso e ala i lo tatou felagolagomaʻi ma ovasia ua tofia i le faapotopotoga Kerisiano. Sa taʻua e le aposetolo o Paulo: “Ia usiusitaʻi i ē o taʻimua iā te outou ma ia gauaʻi iā i latou, auā o loo leoleoina e i latou o outou ola.” (Epe. 13:17) O se faataʻitaʻiga, atonu e faalaeiauina i tatou e se toeaina e uiga i le faatāuaina o le Tapuaʻiga a le Aiga i le afiafi, po o ni fautuaga e faatatau i ni vala o la tatou faiva i le fanua. Atonu e aumai e se ovasia femalagaaʻi se fesoasoani e ala i se fautuaga faale-Tusi Paia, i se tasi o vala o o tatou olaga faa-Kerisiano. Afai tatou te lotomalilie e faatatauina na fautuaga, o lona uiga o loo tatou mulimuli iā Keriso lo tatou Taʻitaʻi.

Ae pagā lea, ua leai se taʻitaʻiga lelei i le lalolagi. Ae maʻeu le faafouina, i le mulimuli atu i le taʻitaʻiga alofa a Keriso! O lea la, ia tatou usiusitaʻi i lo tatou Taʻitaʻi, ma felagolagomaʻi ma i latou o loo ia faaaogāina i aso nei.

[Ata i le itulau 27]

Pe e te utagia le fautuaga a le Tusi Paia e aua neʻi amo faalēgatasi ma sē e lē talitonu?