O Ai e Sili Ona Tāua i Lou Olaga?

“E na o oe lava o Lē e Silisili Ese i le lalolagi uma.”—SALA. 83:18.

1, 2. E tusa ai ma lo tatou faaolataga, aiseā ua lē lava ai le tau ina iloa le suafa o Ieova?

ATONU o le taimi muamua na e vaai ai i le suafa o Ieova, o le taimi lea na faaali atu ai e se tasi iā te oe le Salamo 83:18. Atonu sa fou iā te oe upu o loo taʻua i le mau: “Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.” Talu mai lenā taimi, e mautinoa ua e faaaogāina lenei lava mau, e fesoasoani ai i isi ina ia latou iloa lo tatou Atua alofa o Ieova.​—Roma 10:12, 13.

² E ui e tāua mo tagata ona iloa le suafa o Ieova, ae e lē lava le faia faapea. Ia mātau mai se isi mea moni e manaʻomia mo lo tatou faaolataga, e pei ona faamatilatila mai e le faisalamo e faapea: “E na o oe lava o Lē e Silisili Ese i le lalolagi uma.” Ioe, o Ieova o Lē e silisili ese i le aoao o mea. Ona o Ia na Foafoaina mea uma, ua iā te Ia le aiā tatau e faatalitalia ai le gauaʻi atu o ana foafoaga uma. (Faaa. 4:11) E talafeagai la ona tatou fesili ifo iā i tatou lava, ʻO ai e sili ona tāua i loʻu olaga?’ E tāua tele le iloiloina lelei o le tali i lenā fesili!

Le Luʻi na Lāgā i le Faatoʻaga i Etena

3, 4. Na faapefea ona faasesē e Satani Eva, ma o le ā le iʻuga?

³ Ua manino mai le tāua o le tali i lenei fesili, ona o mea na tutupu i tuā i le faatoʻaga i Etena. O inā sa faatosina ai Eva e le agelu fouvale lea na mulimuli ane avea ma Satani le Tiapolo, ina ia faamuamua ona lava tuʻinanauga i lo le faatonuga a Ieova e aua le ʻaina le fua o se laau i le faatoʻaga. (Kene. 2:17; 2 Kori. 11:3) Na lolo atu Eva i le faatosinaga ma lē faaaloalo ai i le pule silisili ese a Ieova. E leʻi avea Ieova o Lē e sili ona tāua i le olaga o Eva. Ae na faapefea ona faasesēina e Satani Eva?

⁴ Sa faaaogā e Satani ni togafiti iloagatā ina ua talanoa atu iā Eva. (Faitau le Kenese 3:1-5.) Muamua, e leʻi faaaogāina e Satani le suafa o Ieova, ae na ia faaaogā le taʻu, “le Atua.” Peitaʻi, sa faaaogā e le tusitala o le tusi o Kenese le suafa o Ieova i le fuaiupu muamua o lenā lava mataupu. Lona lua, nai lo o le taʻua o upu na fofogaina e Ieova faapea o se “poloaʻiga,” ae sa na ona ia fesili atu po o le ā na “fetalai” mai ai le Atua. (Kene. 2:16) I lenei auala iloagatā, atonu sa taumafai Satani e faamāmā le tāua o lenā poloaʻiga. Lona tolu, e ui e na o Eva o loo la talatalanoa, ae na faaaogā e Satani le suinauna, “lua.” O lona faia faapea, atonu na ia taumafai ai e faagaee faalogona faamaualuga o Eva, ma manatu ai faapea o ia e tāua—e peiseaʻī ua avea o ia ma sui o lana tane. O le ā na iʻu i ai? I lona faamaualuga, na tali atu ai Eva mo ia ma lana tane: “O fua o laau o le faatoʻaga, e mafai ona ma aai ai.”

5. (a) O le ā sa uaʻi atu i ai Eva, ona o faamatalaga a Satani? (e) O le ā ua faaalia i le ʻaina e Eva o le fua o le laau faasāina?

⁵ Na faauigasesē foʻi e Satani mea moni. Ua ia faafoliga atu e lē faimeatonu Ieova i le faatonu o Atamu ma Eva ia “aua neʻi lua aai mai i fua o laau uma o le faatoʻaga.” Ona faapogaia loa lea e Satani Eva e manatu i lona lava lelei, ma e mafai ona faaleleia lona tulaga  i le olaga ma avea o ia e ʻpei o le Atua.’ Na faapogaia ai e Satani Eva e uaʻi atu i le laau ma ona fua, nai lo o lana faiā i Lē sa avatua iā te ia mea uma. (Faitau le Kenese 3:6.) Pagā lea, ona o lona ʻaina o le fua o le laau, ua faaalia ai e leʻi avea Ieova o Lē e sili ona tāua i lona olaga.

Le Luʻi na Lāgā i Aso o Iopu

6. O le ā le auala na fesiligia ai e Satani le faamaoni o Iopu, ma o le ā le avanoa na maua e Iopu?

⁶ I senituri mulimuli ane, na maua ai e le tagata faamaoni o Iopu le avanoa e faaalia ai po o ai sa sili ona tāua i lona olaga. Ina ua fetalai atu Ieova iā Satani e uiga i le faamaoni o Iopu, na finau atu Satani faapea: “Po ua mataʻu fua ea Iopu i le Atua?” (Faitau le Iopu 1:7-10.) E leʻi faafitia e Satani le usiusitaʻi o Iopu i le Atua. Nai lo lea, sa ia fesiligia māfuaaga o gaoioiga a Iopu. Sa lē tautala saʻo Satani i lona tuuaʻia o Iopu e faapea, o loo auauna iā Ieova ona o faanaunauga manatu faapito. E na o Iopu lava e mafai ona taliina lenā tuuaʻiga, ma sa ia maua le avanoa e tali ai.

7, 8. O ā puapuaga na feagai ma Iopu, ma o le ā ua faaalia i lona tutumau faamaoni?

⁷ Na faataga e Ieova Satani e taia Iopu i se faasologa o mala. (Iopu 1:12-19) Na faapefea ona tali atu Iopu i lenei suiga i lona olaga? Ua taʻu mai iā i tatou, “e leʻi agasala Iopu i nei mea uma pe taʻuleagaina foʻi le Atua i se mea.” (Iopu 1:22) Ae e leʻi taofia ai i inā tala a Satani. Na ia toe faitio atu: “O le paʻu e sui ai le paʻu, o mea uma foʻi ua iai i le tagata e avatu e ia e sui ai lona ola.” * (Iopu 2:4) O le tuuaʻiga a Satani, afai e oo puapuaga i le tino o Iopu, o le a ia manatu ai, e lē sili ona tāua Ieova i lona olaga.

⁸ Na matuā faaleagaina le tino o Iopu ona o se maʻi leaga, ma sa tauanau o ia e lana avā e faifai i le Atua ma oti ai. Mulimuli ane, na tuuaʻia o ia i le amio sesē e le ʻaufaamāfanafana pepelo e toʻatolu. (Iopu 2:11-13; 8:2-6; 22:2, 3) E ui lava i nei mafatiaga uma, ae na taofimau pea Iopu i lona faamaoni. (Faitau le Iopu 2:9, 10.) Sa ia faaalia, o Ieova o Lē e sili ona tāua i lona olaga e ala i lona tutumau faamaoni. Na faataʻitaʻia mai foʻi e Iopu, e mafai e se tagata lē lelei atoatoa ona avatu se tali i tuuaʻiga sesē a le Tiapolo, e ui lava e gata mai mea e mafai ona ia fai.—Faatusatusa i le Faataoto 27:11.

Le Tali Atoatoa a Iesu

9. (a) Na faapefea ona faaaogā e Satani faanaunauga o Iesu e faaosooso ai o ia? (e) O le ā le tali a Iesu i na faaosoosoga?

⁹ I leʻi leva talu ona papatiso Iesu, ae taumafai loa Satani e faatosina Iesu e faamalie ona faanaunauga faaletino, nai lo le avea o Ieova o Lē e sili ona tāua iā te ia. Sa tuu atu e le Tiapolo ni tofotofoga se tolu. Muamua, sa  taumafai e faatosina Iesu i faanaunauga faaletino o le tagata, e ala i le taumafai e faaoso o ia e faaliliu maa e avea ma falaoa. (Mata. 4:2, 3) E mautinoa sa fia taumafa Iesu, ona e 40 aso o anapogi. Sa taumafai la le Tiapolo e uunaʻia o ia e faaaogā lona mana faivavega e faamalie ai lona fia taumafa. Na faapefea ona tali atu Iesu? I le lē pei o Eva, sa uaʻi atu Iesu i le Afioga a Ieova ma vave ona teena le faaosoosoga.​—Faitau le Mataio 4:4.

10. Aiseā na luʻia ai e Satani Iesu e oso ifo i lalo mai le pā o le malumalu?

¹⁰ Na taumafai foʻi Satani e faaoso Iesu ina ia gaoioi ma le manatu faapito. Na ia luʻia Iesu e oso ifo i lalo mai le pā o le malumalu. (Mata. 4:5, 6) O le ā le mea sa mafaufau i ai Satani? Na manatu Satani, afai e lē afāina Iesu i lona oso ifo i lalo mai le pā o le malumalu, e faamaonia ai o ia o le “atalii o le Atua.” E manino mai, na manaʻo le Tiapolo ia manatu mamafa Iesu iā te ia lava, ma faia ai se gaoioiga fia faalialia. Na iloa lelei e Satani e mafai e se tagata ona talia se luʻi e ono lamatia ai, ona o le faamaualuga ma le lē manaʻo e faamāsiasi o ia i luma o isi tagata. Sa mimilo sesē e Satani upu mai le Tusi Paia, ae na faaalia e Iesu lona malamalama atoatoa i le Afioga a Ieova. (Faitau le Mataio 4:7.) E ala i le teena o lenā luʻi, na toe faamaonia ai e Iesu, o Ieova o Lē e sili ona tāua i lona olaga.

11. Aiseā na teena ai e Iesu le ofo atu e le Tiapolo o malo uma o le lalolagi?

¹¹ I lona toe taumafai atili e faaosooso Iesu, na ofo atu ai e Satani malo uma o le lalolagi iā te ia. (Mata. 4:8, 9) Na vave lava ona teena e Iesu. Sa silafia e ia o le taliaina o lenā ofo, e tutusa lea ma le teena o le pule silisili ese a Ieova​—e na o ia e iai lenā aiā. (Faitau le Mataio 4:10.) I na tulaga uma, sa tali atu Iesu e ala i le faaaogā o mau o loo taʻua ai le suafa o Ieova.

12. O le ā le filifiliga faigatā na feagai ma Iesu a o lata i lona maliu, ma o le ā e tatou te aʻoaʻoina mai le auala sa ia tali atu ai?

¹² A o latalata i le iʻuga o lona soifuaga i le lalolagi, na feagai Iesu ma se filifiliga faigatā. I lana auaunaga atoa, sa faaalia lona lotomalie e tuu atu lona ola e fai ma taulaga. (Mata.  20:17-19, 28; Luka 12:50; Ioa. 16:28) Ae peitaʻi, na silafia e Iesu o le a molia sesē o ia ma faasalaina i le faamasinoga a tagata Iutaia, ma fasiotia ai o ia o sē e upuleaga i le Atua. E leʻi manatu māmā Iesu i lea tulaga. Na tatalo Iesu: “Loʻu Tamā e, afai e mafai, ia aveese lenei ipu iā te aʻu.” Ae sa ia toe faapea atu: “Ae aua le faia loʻu loto a o lou finagalo.” (Mata. 26:39) Ioe, o le faamaoni o Iesu e oo i lona maliu, sa matuā faamaonia ai po o ai Lē e sili ona tāua iā te ia!

La Tatou Tali i le Fesili

13. O ā lesona ua tatou aʻoaʻoina mai le faaaʻoaʻoga a Eva, Iopu, ma Iesu Keriso?

¹³ O ā mea ua tatou aʻoaʻoina? O le tala iā Eva, ua tatou aʻoaʻoina ai, o i latou e lolo atu i tuʻinanauga manatu faapito po o le fiatagata, e faailoa ai le lē avea o Ieova o Lē e sili ona tāua i o latou olaga. Ae o le eseesega, sa tausisi atu pea Iopu i lona faamaoni, ma e tatou te aʻoaʻoina ai e mafai e tagata lē lelei atoatoa ona faamuamua pea Ieova, e ala i le tutumau ma le faamaoni i taimi o puapuaga​—e ui lava latou te lē malamalama atoatoa i le pogai o na puapuaga. (Iako. 5:11) O le manatu mulimuli, ua aʻoaʻoina i tatou e le faaaʻoaʻoga a Iesu ina ia onosaia tulaga e māsiasi ai, ma ia lē soona faatāuaina i tatou lava. (Epe. 12:2) Ae e faapefea ona tatou faatatauina nei lesona?

14, 15. O le ā le eseesega i le tali atu a Iesu i faaosoosoga ma le tali atu a Eva, ma e faapefea ona tatou faataʻitaʻi atu iā Iesu? (Faamatala le ata i le itulau e 18.)

¹⁴ Aua neʻi avea faaosoosoga ma mea e galo ai iā te oe Ieova. Sa uaʻi atu Eva i le faaosoosoga. Sa ia manatu i le fua o le laau ua “lelei i le ʻai [ma] ua manaʻo foʻi i ai auā ua manaia i le vaai, e matuā matagofie lava.” (Kene. 3:6) E matuā eseese mamao ma le auala na tali atu ai Iesu i faaosoosoga e tolu! E leʻi taulaʻi Iesu i le faaosoosoga, ae sa manatu i le iʻuga o ana gaoioiga. Sa ia faalagolago atu i le Afioga a le Atua, ma taʻua le suafa o Ieova.

¹⁵ Pe a faaosoosoina i tatou e faia ni mea e lē fiafia i ai Ieova, o le ā e tatou te uaʻi atu i ai? O le tele o lo tatou uaʻi i le faaosoosoga, o le a atili ai ona malosi le tuʻinanauga sesē. (Iako. 1:14, 15) E tatau ona tatou gaoioi vave e liaʻi ese lenā tuʻinanauga, e tusa lava pe e foliga mai ua pei lenā gaoioiga o le tipieseina o se vaega o le tino. (Mata. 5:29, 30) I le pei o Iesu, e ao ona tatou uaʻi atu i le iʻuga o a tatou gaoioiga, ma le auala e aafia ai la tatou faiā ma Ieova. E tatau ona tatou manatua mea ua taʻua i lana Afioga le Tusi Paia. E pau lea o le auala e tatou te faaalia ai, o Ieova o Lē e sili ona tāua i o tatou olaga.

16-18. (a) O le ā e ono māfua ai ona tatou lotomafatia? (e) O le ā e fesoasoani iā i tatou ina ia lavātia tulaga e mafatia ai?

¹⁶ Aua neʻi avea puapuaga e oo iā te oe, ma mea e te ita ai iā Ieova. (Faata. 19:3) A o lata tele mai le iʻuga o lenei lalolagi leaga, ua atili ai ona aafia tagata o Ieova i mala ma puapuaga. E tatou te lē faatalitalia se puipuiga faavavega i aso nei. Ae i le pei o Iopu, e tatou te lotomafatia foʻi pe a maliu sē e pele iā i tatou, ma taimi e oo mai ai faigatā.

¹⁷ E leʻi malamalama Iopu i le māfuaaga na faataga ai e Ieova mea na tutupu, ma i nisi taimi e tatou te lē malamalama ai foʻi i le māfuaaga e tutupu ai mea leaga. Atonu ua tatou faalogo ua maliliu nisi uso faamaoni i se mafuiʻe, e pei o le mea na tupu i Haiti, pe ona o se isi mala faalenatura. Atonu ua tatou iloa foʻi, ua maliu se uso faamaoni ona o se gaoioiga sauā na tupu, po o se faalavelave faafuaseʻi. E tatou te lagona foʻi le lotomafatia ona o ni tulaga faigatā ua tutupu, po o ni tulaga e foliga mai e lē tonu ua oo iā i tatou. E tatou te ono faapea atu ma o tatou loto faanoanoa: ʻIeova e, aiseā ua tupu ai lenei mea iā te aʻu? O le ā le mea sesē ua ou faia?’ (Sapa. 1:2, 3) O le ā e mafai ona fesoasoani iā i tatou i taimi faapena?

 ¹⁸ E ao ona faaeteete ina neʻi o tatou manatu, ua tutupu nei mea ona e lē o finagalo malie mai Ieova iā i tatou. Sa faamatilatila e Iesu le mea moni lenei i lona faasino atu i ni faalavelave se lua na tutupu i ona aso. (Faitau le Luka 13:1-5.) O le tele o mala, e māfua ona “e tutupu faafuaseʻi mea . . . i le taimi e leʻi faatalitalia.” (Fai. 9:11) Ae po o le ā lava le māfuaaga, e mafai ona tatou lavātia nei mafatiaga eseese, pe a tatou faalagolago i “le Atua o faamāfanafanaga uma.” E na te aumaia le malosi tatou te manaʻomia ina ia faaauau ai pea ma le faamaoni.​—2 Kori. 1:3-6.

19, 20. O le ā na fesoasoani iā Iesu e tumau ai i tulaga e māsiasi ai, ma e faapefea ona tatou faia faapea?

¹⁹ Aua neʻi avea ma ou popolega autū le faamaualuga po o le fefe neʻi māsiasi. Ona o lona lotomaulalo, sa mafai ai e Iesu ona “tuua e ia o mea uma lava ma fai o ia ma pologa.” (Fili. 2:5-8) Sa mafai ona tumau Iesu i le tele o tulaga e māsiasi ai, ona o lona faalagolago atu iā Ieova. (1 Pete. 2:23, 24) O lona faia faapea, sa faamuamua ai e Iesu le finagalo o Ieova, ma sa faaeaina o ia i se tulaga e sili ona maualuga. (Fili. 2:9) Sa faailoa atu e Iesu i ona soo, o le olaga sili lea e ola ai.​—Mata. 23:11, 12; Luka 9:26.

²⁰ E iai taimi e tatou te ono māsiasi ai ona o nisi o tofotofoga i lo tatou faatuatua. Ae e ao pea ona tatou mautinoa e pei o Paulo, o lē na faapea mai: “O le māfuaaga foʻi lea ua ou tigā ai i mea nei, ae ou te lē mā ai. Auā ua ou iloa lē ua ou talitonu i ai, ma ua ou mautinoa foʻi na te mafai ona leoleoina le mea ua ia teuina mo aʻu, seʻia oo i lea aso.”​—2 Timo. 1:12.

21. E ui i le uiga manatu faapito o lenei lalolagi, o le ā ua e maumauaʻi e fai?

²¹ Na valoia mai i le Tusi Paia, o le a avea tagata ma ē e “alolofa iā i latou lava” i o tatou aso. (2 Timo. 3:2) E lētioa la siʻomia i tatou e se tupulaga e manatu e faamuamua i latou lava i taimi uma. Ia aua lava neʻi tatou pisipisia i lea uiga manatu faapito! Nai lo lea, pe a tatou fesagaʻi ma faaosoosoga, lutia i puapuaga, po o taumafaiga e faamāsiasi i tatou, seʻi tatou maumauaʻi e faamaonia o Ieova o Lē e silisili ona tāua iā i tatou!

[Faaopoopoga i lalo]

O le ā e Tatou te Aʻoaʻoina Mai . . .

• le auala na faasesēina ai e Satani Eva?

• le tali atu a Iopu i puapuaga na oo iā te ia?

• le popolega autū sa iā Iesu?

[Fesili mo le Suʻesuʻega]

[Ata i le itulau 17]

E leʻi uaʻi Eva i lana faiā iā Ieova

[Ata i le itulau 18]

Na teena e Iesu faaosoosoga a Satani, ma taulaʻi atu i le faia o le finagalo o Ieova

[Ata i le itulau 20]

Talaʻi atu i tagata o loo nonofo i faleʻie ina ua uma le mafuiʻe i Haiti

Pe a oo i taimi o faigatā, e tatou te faalagolago i le “Atua o faamāfanafanaga uma”