Po o le a e Utagiaina Lapataʻiga Manino a Ieova?

“O le ala lenei. Ia outou savavali ai.”—ISA. 30:21.

1, 2. O le ā le mea e naunau Satani e fai, ma e faapefea ona fesoasoani le Afioga a le Atua iā i tatou?

O SE faailoilo o le auala e sesē le mea e faasino i ai, e lē gata e taʻitaʻisesē ai, ae e lamatia ai foʻi. Seʻi faapea ua lapataʻia oe e se uō, e faatatau i se tamāloa leaga ua ia suia ma le loto i ai se faailoilo, ina ia lamatia ai tagata malaga e faigofie ona faasesēina. Po o le a e lē utagiaina ea lenā lapataʻiga?

² E mautinoa, o Satani o se fili e naunau ia taʻitaʻisesēina i tatou. (Faaa. 12:9) O taaʻiga leaga uma na talanoaina i le mataupu ua mavae, e pogai mai iā te ia, ma e taulaʻi atu i le taʻitaʻiesea o i tatou mai le ala e tau atu i le ola e faavavau. (Mata. 7:13, 14) Ae e tatou te lotofaafetai ona ua lapataʻi mai lo tatou Atua alofa, ia aua neʻi mulimuli atu i ʻfaailoilo taufaasesē a Satani.’ Seʻi o tatou talanoa nei i isi taaʻiga leaga e tolu a Satani. A o tatou iloiloina le auala e fesoasoani ai le Afioga a le Atua iā i tatou ina ia ʻalofia le faasesēina, ia faaāta i le mafaufau e pei o loo savali Ieova i o tatou tua, ma o loo tusi atu lona aao i le itulagi saʻo, ma faapea mai: “O le ala lenei. Ia outou savavali ai.” (Isa. 30:21) O le manatunatu i lapataʻiga manino a Ieova, o le a faamalosia ai la tatou faaiʻuga e utagia na lapataʻiga.

Aua Neʻi Mulimuli i “Aʻoaʻo Pepelo”

3, 4. (a) Ua faapefea ona pei aʻoaʻo pepelo o ni vaieli mātūtū? (e) O fea e tupuga mai ai aʻoaʻo pepelo, ma o le ā o loo latou mananaʻo ai?

³ Faaāta i lou mafaufau o lea e te faimalaga i se nuu naumati. Ua e iloa mamao atu se vaieli ma ua e agaʻi atu i ai, ma faamoemoe o le a maua ai se vai ona ua e galala i le fia inu. Ae ina ua e taunuu atu, ua e iloa ai ua mātūtū le vaieli. Pagā lou faanoanoa! Ua pei aʻoaʻo pepelo o ni vaieli mātūtū. O so o se tasi e alu atu i ai mo ni vai o le upu moni, o le a lē faamalieina ai. Ua lapataʻia i tatou e Ieova e ala mai i le aposetolo o Paulo ma Peteru, e faatatau i nei aʻoaʻo pepelo. (Faitau le Galuega 20:29, 30; 2 Peteru 2:1-3.) O ai na aʻoaʻo? Ua fesoasoani mai upu faagaeeina a nei aposetolo e toʻalua, e tatou te iloa ai le mea e tupuga mai ai aʻoaʻo pepelo, ma le auala o loo latou gaoioi ai.

⁴ Na faapea atu Paulo i toeaina i le faapotopotoga i Efeso: “E maua foʻi iā te outou ni tane latou te faauiga sesē mea.” Na tusi atu Peteru i uso Kerisiano: “O le a faapena foʻi ona iai aʻoaʻo pepelo iā te outou.” O lea la, o fea e tupuga mai ai aʻoaʻo pepelo? E tupuga mai lava i le faapotopotoga. O i latou ia ua liliuese mai le upu moni. * O le ā o loo mananaʻo i ai nei tagata? E lē o faamalieina i latou i le tau ina ō ese atu ma le faalapotopotoga lea na latou fiafia i ai. O lo latou sini e pei ona faamatalaina e Paulo, ia ʻfetoso ese soo ia mulimuli atu iā i latou.’ O loo talanoa le aposetolo o Paulo e faatatau i soo o Keriso. Nai lo le ō atu e fai ni o latou lava soo, ae ua latou mananaʻo e ō ma ave soo o Keriso. Ua pei aʻoaʻo pepelo o “luko feʻai,” ua taumafai e faaleaga tagata o le faapotopotoga, faaleaga lo latou faatuatua, ma tataʻi ese i latou mai le upu moni.​—Mata. 7:15; 2 Timo. 2:18.

5. O ā auala ua faaaogā e aʻoaʻo pepelo?

⁵ Ua faapefea ona gaoioi aʻoaʻo pepelo? E iloa i a latou gaoioiga lo latou atamamai i faiga faatogafiti. Ua “aumaia faalilolilo i totonu” e i latou ua liliuese mai le upu moni, manatu e faaleagaina ai. E pei o tagata solitulafono e faia  mea i se auala faalilolilo, ua faapena foʻi ona latou aumaia i se auala faalilolilo ma iloagatā, aʻoaʻoga e feteenaʻi ma le upu moni. E pei lava ona tomai se tagata taufaasesē i le faaooina atu o ni tusitusiga lē saʻo, ua faapena foʻi ona faaaogā e tagata ua liliuese mai le upu moni, “upu taufaasesē” po o faamatalaga lē saʻo, ina ia foliga mai ai e saʻo o latou manatu. Ua latou faasalalau atu “aʻoaʻoga taufaasesē,” ma “mimilo sesē . . . Tusitusiga Paia” ina ia fetaui ma o latou lava manatu. (2 Pete. 2:1, 3, 13; 3:16) O le mea moni, e lē naunau ē ua liliuese mai le upu moni mo so tatou lelei. O le mulimuli atu iā i latou, e taʻitaʻisesēina ai i tatou mai le ala e tau atu i le ola e faavavau.

6. O le ā le fautuaga manino ua aumaia i le Tusi Paia e faatatau i aʻoaʻo pepelo?

⁶ E faapefea ona puipuia i tatou mai i aʻoaʻo pepelo? O loo manino le fautuaga a le Tusi Paia i le auala e feagai ai ma i latou. (Faitau le Roma 16:17; 2 Ioane 9-11.) Ua faapea mai le Afioga a le Atua, “ia ʻaloese mai iā i latou.” Ua faaupu e isi faaliliuga lea fuaitau e faapea “ia liliu ese mai iā i latou,” ma ia “taumamao mai iā i latou!” E leai se mea e nenefu i lenā fautuaga faagaeeina. Seʻi faapea na taʻu atu e se fomaʻi iā te oe, ia ʻalofia le fesootaʻi atu i se tagata o loo maua i se faamaʻi pipisi e mafai ona oti ai. Ua e iloa le uiga o le tala a le fomaʻi, ma o le a e matuā utagia lana lapataʻiga. O tagata ua liliuese mai le upu moni, ua ʻmamaʻi o latou mafaufau,’ ma ua taumafai ia aafia isi i a latou aʻoaʻoga lē faamaoni. (1 Timo. 6:3, 4) Ua taʻu mai e le Fomaʻi Sili o Ieova, ia ʻalofia le fesootaʻi ma i latou. Ua tatou iloa lona finagalo, ae po o tatou taumafai e utagia ana lapataʻiga i vala uma o le olaga?

7, 8. (a) O le ā e aofia ai i le ʻalofia o aʻoaʻo pepelo? (e) Aiseā ua e filifili ai e maumauaʻi e teena aʻoaʻo pepelo?

⁷ O le ā e aofia ai i le ʻalofia o aʻoaʻo pepelo? E tatou te lē taliaina i latou i o tatou fale pe faafeiloaʻia foʻi. E tatou te lē faitauina foʻi a latou lomiga, matamata i polokalame i le TV o loo faaali mai ai a latou aʻoaʻoga, faitau pe avatu ni o tatou manatu i la latou tuatusi o faamatalaga i le Initaneti. Aiseā e tatou te matuā tutumau ai? Ona o le alofa. E tatou te alolofa i “le Atua faamaoni,” e tatou te lē fiafia la i aʻoaʻoga ua mimilo sesē, ia e feteenaʻi ma lana Afioga le upu moni. (Sala. 31:5; Ioa. 17:17) E tatou te fiafia i le faalapotopotoga a Ieova, lea ua aʻoaʻoina ai upu moni mataʻina​—e aofia ai le suafa o Ieova ma le uiga o lona suafa, le finagalo o le Atua mo le lalolagi, le tulaga o le tagata ua oti, ma le faamoemoe i le toetū. Po o e toe manatua ou faalogona ina ua e faatoʻā iloa nei aʻoaʻoga ma isi upu moni tāua? Aiseā la e faataga ai oe e faaleagaina e se tasi e faitioina ma le lē saʻo le faalapotopotoga, lea na e aʻoaʻoina ai na upu moni?​—Ioa. 6:66-69.

⁸ Po o ā lava tala a aʻoaʻo pepelo, e tatou te lē mulimuli i ai! Aiseā e tatou te ō atu ai i na vaieli mātūtū, e na ona faasesēina ma faanoanoa ai? Nai lo lenā, seʻi o tatou maumauaʻi e tumau faamaoni iā Ieova ma le faalapotopotoga, lea ua loa ona iai sona talaaga o le faamalieina o lo  tatou galala i vai mamā e faafouina ai, o upu moni mai le Afioga a le Atua.​—Isa. 55:1-3; Mata. 24:45-47.

Aua Neʻi Taaʻina i “Tala Sesē”

9, 10. O le ā le lapataʻiga na avatu e Paulo iā Timoteo e tusa ai ma “tala sesē,” ma o le ā atonu sa i le mafaufau o Paulo? (Tagaʻi i le faaopoopoga i le pito i lalo.)

⁹ E iai taimi e faigofie ai ona iloa se faailoilo ua fai i ai se suiga, ma ua faasino atu i se itulagi sesē. I nisi taimi, e ono faigatā ona iloa mea ua faasesēina. E faapena foʻi taaʻiga leaga a Satani; e faigofie ona iloa isi nai lo o isi. Ua lapataʻi mai le aposetolo o Paulo i se tasi o faufauga taufaasesē a Satani​—o “tala sesē.” (Faitau le 1 Timoteo 1:3, 4.) Ina ia tatou lē sē ese mai le ala e tau atu i le ola, e manaʻomia ona tatou iloa tala sesē ma le auala e ʻalofia ai le uaʻi atu i na tala.

¹⁰ O le lapataʻiga a Paulo e faatatau i tala sesē, o se vaega o lana uluaʻi tusi iā Timoteo, o se ovasia Kerisiano sa tuu atu i ai le vaaiga o le mamā o le faapotopotoga, ma fesoasoani i uso talitonu ia tumau i le faatuatua. (1 Timo. 1:18, 19) Na faaaogā e Paulo se upu Eleni e mafai ona faasino atu i talafatu, talatuu, po o tala e lē moni. E tusa ai ma le tusi The International Standard Bible Encyclopaedia, o loo faasino atu lenei upu i “se tala (faalelotu) e leai sona sootaga ma mea moni.” Atonu sa mafaufau Paulo i talapepelo a lotu ua uunaʻia e talafaafagogo po o talafatu. * O na tala “e iʻu ai i le tele o fesili lē aogā”​—o lona uiga, o fesili e lē tāua tele e taʻitaʻia atu ai i saʻiliʻiliga e lē aogā. O tala sesē, o faufauga faalilolilo ia a le taufaasesē sili o Satani, o lē e na te faaaogā talapepelo faalotu ma talatuu e faasesē ai ē e lē mataala. E manino le fautuaga a Paulo: Aua neʻi uaʻi atu i tala sesē!

11. Ua faapefea ona faaaogā ma le poto e Satani lotu sesē e taʻitaʻisesē ai tagata, ma o le ā le lapataʻiga e ao ona tatou utagia ina ia ʻalofia ai le taʻitaʻisesēina?

¹¹ O ā nisi o tala pepelo e taʻitaʻisesē ai ē e faigofie ona faasesēina? O le manatu tāua, o “tala sesē” e mafai ona faatatau atu i so o se tala pepelo a lotu, po o talatuu ia e mafai ona tatou ʻliliuese ai mai i le upu moni.’ (2 Timo. 4:3, 4) O Satani lea e faafoliga mai o se “agelu o le malamalama,” ua ia faaaogāina ma le poto lotu sesē e taʻitaʻisesē ai tagata. (2 Kori. 11:14) I lalo o le igoa o le Faa-Kerisiano, ua aʻoaʻo ai e Lotu ua faapea mai o Kerisiano, aʻoaʻoga e aofia ai le Tolutasi, ma le ola e lē mafai ona oti​—ia ua faatumulia i talatuu ma tala sesē. Ua faaauiluma e lotu ua faapea mai o Kerisiano, aso mālōlō e pei o le Kerisimasi ma le Eseta, ia e foliga mai o ni faiga masani e lelei, ae e mautinoa e tupuga mai i talatuu ma mea faapaupau. O le utagiaina o lapataʻiga a le Atua ia vavaeese ma ʻaua tatou te toe papaʻi atu i se mea e lē mamā,” o le a lē faasesēina ai i tatou i tala sesē.​—2 Kori. 6:14-17.

12, 13. (a) O ā pepelo ua faaauiluma e Satani, ma o le ā le mea moni e tusa ai ma na pepelo? (e) E faapefea ona tatou ʻalofia le taʻitaʻisesēina e Satani i tala pepelo?

¹² Ua faaauiluma e Satani isi pepelo ia e taʻitaʻisesēina ai i tatou, pe a tatou lē faaeteete. Seʻi manatu i nisi o faataʻitaʻiga. E taga mea uma​—e tusa pe e saʻo pe sesē. E faalagolago lava i ou lagona. Ua faaauilumaina lenei manatu e ala i faasalalauga ma faafiafiaga. O lenā manatu sesē e uiga i tapulaa a le Atua, e luʻia ai i tatou ia lafoaʻia tapulaa tau amio. O le mea moni, e tatou te matuā manaʻomia lava le taʻitaʻiga a le Atua i tulaga tau amio, lea e na o ia e mafai ona faatulagaina mai. (Iere. 10:23) O le a lē faalaa mai le Atua i mataupu fai a le lalolagi. O le taaʻina i le agaga o le tau ina ola mo le asō, ae aua le popole mo a taeao, e faapogaia ai i tatou e “paiē ma lē fua mai.” (2 Pete. 1:8) O le mea moni, ua televave le oo mai o le aso o Ieova, ma e tatau ona tatou nofosauni i ai. (Mata. 24:44) E lē o manatu alofa mai le Atua iā te oe. O le talitonu i lenei pepelo a Satani, e iʻu ai ina tatou faavaivai ma lagona e faapea, e lē talafeagai iā i tatou le alofa o le Atua. O le mea moni, e alofa ma tāua iā Ieova ona tagata tapuaʻi taʻitoʻatasi.​—Mata. 10:29-31.

¹³ E manaʻomia ona puipuimalu i tatou, ona  e ono faafoliga mai e manaia i le vaai mafaufauga ma uiga o le lalolagi a Satani. Ae ia manatua, o Satani o le sifi o taufaasesē. O le utagiaina o fautuaga ma faamanatuga mai le Afioga a le Atua, e tatou te ʻalofia ai le faasesēina i “tala sesē na fatuina ma le poto [tala o le vavau ua fatuina ma le poto,” The New American Bible].”​—2 Pete. 1:16.

Aua Neʻi “Mulimuli iā Satani”

14. O le ā le lapataʻiga na avatu e Paulo i nisi o fafine lāiti ua oti a latou tane, ma aiseā e ao ai iā i tatou uma ona utagia ana upu?

¹⁴ Seʻi manatu i se faailoilo o le auala o loo faapea mai: “O le Auala Lenei e Mulimuli ai iā Satani.” O ai o i tatou o le a utagiaina lea faailoilo? Ua lapataʻi mai Paulo iā i tatou i auala e mafai ai e nisi o Kerisiano tuuina atu, ona “liliuese . . . ma mulimuli iā Satani.” (Faitau le 1 Timoteo 5:11-15.) O loo taulaʻi atu upu a Paulo i nisi o “fafine lāiti ua oti a latou tane,” ae o mataupu silisili na ia taʻua e faatatau iā i tatou uma. O na fafine Kerisiano i le uluaʻi senituri, atonu e latou te leʻi manatu ua mulimuli atu iā Satani, ae o a latou gaoioiga na iloa ai o le tulaga moni lenā. E faapefea ona puipuia i tatou mai le mulimuli atu ma le lē iloa iā Satani? Seʻi o tatou iloiloina le lapataʻiga a Paulo e faatatau i le faitala e faatigā ai.

15. O le ā le sini o Satani, ma ua faapefea ona faailoa mai e Paulo togafiti a Satani?

¹⁵ O le sini o Satani, ia taofia i tatou mai le talanoa atu e uiga i o tatou talitonuga​—ia taofia lo tatou talaʻia o le tala lelei. (Faaa. 12:17) Ona o lenā tulaga, ua ia taumafai ai ia tatou tuliloaina mea e faamaʻimau ai le taimi, pe faatupu ai feeseeseaʻiga i lo tatou va. Mātau le auala o loo faailoa mai ai e Paulo togafiti a Satani. E “leai ni a latou mea e fai, ae e feoaʻi solo.” I lenei vaitaimi o faiga faatekinolosi, e faigofie lava ona faamaʻimau lo tatou taimi faapea le taimi o isi, e ala i le feaveaʻi o imeli, talanoa pe lafo atu feʻau tusitusia i telefoni feaveaʻi, e uiga i mea e lē aogā ma e lē moni. “Faitatala.” O le faitala faatigā e oo atu ai i le faia o tala taufaaleaga lea e iʻu ai ina vevesi. (Faata. 26:20) Pe latou te iloa pe leai, ae o le faia o tala taufaaleaga o le faataʻitaʻi atu lea iā Satani le Tiapolo. * “Isuisu fua i mataupu a isi tagata.” E lē o sa tatou pisinisi le taʻu atu i isi o le auala e faatulaga ai a latou mea e fai. O le nofonofo e leai se mea e fai ma uiga faatupu vevesi, e taofia ai i tatou mai le taulaʻi atu i le galuega a le Atua ua tofia ai i tatou, o le talaʻia o le Malo. Afai e tatou te lē lagolagoina atoatoa le galuega a Ieova, o le a amata la ona tatou mulimuli atu iā Satani. E tatau ona fai sa tatou filifiliga po o fea le itu e tatou te iai.​—Mata. 12:30.

16. O le ā le fautuaga e ao ona tatou utagia ina ia ʻalofia ai le “liliuese . . . ma mulimuli iā Satani”?

¹⁶ O le utagiaina o le fautuaga a le Tusi Paia, e fesoasoani iā i tatou e ʻalofia ai le “liliuese . . . ma mulimuli iā Satani.” Seʻi manatu i nisi o fautuaga atamai a Paulo. “Ia tele pea mea e fai i le galuega a le Alii.” (1 Kori. 15:58) O le tele o mea e fai i le galuega o le Malo, o le a puipuia ai i tatou mai i lamatiaga o le nofonofo e leai se mea e fai, ma le faia o gaoioiga e faamaʻimau ai le taimi. (Mata. 6:33) Tautala i upu “lelei e atiaʻe ai.” (Efe. 4:29) Ia maumauaʻi e aua neʻi faalogo atu i faitala e faatigā ai, ma aua neʻi faasalalauina atu. * Ia atiaʻe lo tatou maufaatuatuaina ma le faaaloalo i uso talitonu. Pe a faia faapea, o le a tatou tautatala i upu e atiaʻe ai nai lo le faalotovaivaia o i latou. “Ia fai ma o outou sini le . . . aua le isuisu fua i mea a isi.” (1 Tesa. 4: 11) Ia naunau totino i isi, ae ia faia i se auala e faaalia ai le faaaloalo i mataupu e fitoitonu iā i latou lava, ma taumafai ia faamamaluina pea i latou. Ia manatua foʻi, e lē tatau ona faamalosi atu ni o tatou manatu, i mataupu e ao ona fai i ai sa latou lava filifiliga.​—Kala. 6:5.

17. (a) Aiseā ua lapataʻia ai i tatou e Ieova i mea e lē tatau ona mulimuli i ai? (e) O le ā lou naunautaʻiga e tusa ai o le auala o loo finagalo Ieova e tatou te mulimuli i ai?

¹⁷ Maʻeu lo tatou lotofaafetai, ona ua taʻu manino mai e Ieova iā i tatou le mea e lē tatau ona mulimuli i ai! Ae ia aua neʻi galo, o lapataʻiga a Ieova o loo talanoaina i lenei mataupu ma le mataupu ua mavae atu, ua uunaʻia e lona alofa tele mo i tatou. O lona finagalo, ia tatou ʻalofia puapuaga ma tigā tatou te oo i ai, i le mulimuli atu i ʻfaailoilo’ taufaasesē a Satani. O le ala e finagalo Ieova e tatou te ui ai, atonu e vaiti ae e tau atu i se taunuuga e sili ona lelei​—le ola e faavavau. (Mata. 7:14) Tau ina ia tatou maumauaʻi e utagia le timaʻiga a Ieova: “O le ala lenei. Ia outou savavali ai.”​—Isa. 30:21.

[Faaopoopoga i lalo]

O le ā Lau Tali?

E faapefea ona e faatatauina e oe lava lapataʻiga o loo i mau nei?

• 2 Peteru 2:1-3

• 1 Timoteo 1:3, 4

• 1 Timoteo 5:11-15

[Fesili mo le Suʻesuʻega]

[Pusa/Ata i le itulau 19]

 Ua Salalau Solo Fulu i le Matagi

Ua faataʻitaʻia lelei mai e se talafatu faa-Iutaia le aafiaga o le faasalalau atu o tala e faatigā ai. E eseese auala ua faamatalaina ai, ae o le ʻauga o le tala o loo mulimuli mai.

Sa iai se tamāloa na faia ni tala taufaaleaga e uiga i se tamāloa poto i se aai. Mulimuli ane, sa iloa e le tamāloa lenei le sesē o ana tala taufaaleaga, ma sa ia talosaga atu i le tamāloa poto mo se faamagaloga, ma sa manaʻo e faia so o se mea e toe faaleleia ai lo la va. E tasi lava le talosaga a le tamāloa poto: Sa faatonu le tamāloa faitala taufaaleaga ia ʻoti se aluga e fai i fulu manu ma faasalalau solo i le matagi. E ui lava sa lē malamalama i le talosaga, ae sa faia e le tamāloa faitala taufaaleaga e pei ona faatonuina o ia e fai, ma toe foʻi atu i le tamāloa poto.

Na fesili atu le tamāloa faitala, “Po ua e faamagaloina aʻu?”

Na tali mai le tamāloa poto, “Alu muamua e ao uma mai fulu manu.”

“E faapefea ona ou faia? Ua salalau solo i le matagi.”

“E pei lava ona faigatā ona toe ao uma mai fulu manu ua salalau solo, e faapena foʻi ona faigatā ona toe faaleleia le tigā o au upu taufaaleaga.”

Ua manino le lesona. O le taimi lava e fai ai se tala taufaaleaga, e lē mafai ona toe faafoʻi mai, ma atonu e lē mafai ona toe faaleleia le tigā ua tupu. A o leʻi faasalalauina atu se tala e faatigā ai, ia manatua o lea o le a e faasalalauina solo fulu i le matagi.

[Ata i le itulau 16]

E ono valaaulia faapefea e nisi i o latou fale, tagata ua liliuese mai le upu moni?