Se Tauiviga Umi Faafaamasinoga na iʻu i le Manumalo!

NA AMATA i le 1995 ma na faaauau mo le 15 tausaga. I lenā taimi atoa, na osofaʻia ai Kerisiano moni i Rusia e tagata sa tetee i le saʻolotoga e tapuaʻi ai. Sa taumafai malosi nei tagata tetee, e faasā Molimau a Ieova i Moscow ma isi vaipanoa. E ui i lea, na finagalo Ieova e tauia le faamaoni pea o nai o tatou uso ma tuafāfine i Rusia, e ala i se manumalo faafaamasinoga. Ae na faapefea ona amata lenei tauiviga?

UA SAʻOLOTO!

I le gasologa o le 1990 seʻia oo i le 1995, na toe maua ai e o tatou uso i Rusia le saʻolotoga e tapuaʻi ai, talu ona taofia mai le 1917. I le 1991, na lesitala ai e le malo o le Iuni faa-Sovieti, Molimau a Ieova o se lotu aloaʻia i Rusia. Ina ua leai le malo o le Iuni faa-Sovieti, sa lesitalaina Molimau a Ieova i le Faigāmalo Soofaatasi a Rusia. E lē gata i lea, o Molimau a Ieova uma na sauāina i le faitau fia sefulu o tausaga ua tuanaʻi, ona o mataupu tau i tapuaʻiga, sa aloaʻia i latou e le Malo o ni tagata ua afāina fua i omiga faapolotiki. I le 1993, na lesitalaina ai e le Matagaluega o Faamasinoga i Moscow, Molimau a Ieova, e pei ona iloa ai i tatou i inā. I lenā lava tausaga, na faatoʻā amata ai le Tulafono Faavae fou a Rusia, e faapea e saʻoloto tagata uma e faatino lana ia lava tapuaʻiga. E lētioa faapea mai se tasi uso: “E matou te leʻi mafaufauina o le a matou maua lenei saʻolotoga!” Na faapea atili mai o ia, “Ua 50 nei tausaga o matou faatalitali mo lenei saʻolotoga!”

Na faaaogā lelei e uso ma tuafāfine i Rusia le “taimi [na] sologa lelei ai,” e faia ai ma le faanatinati la latou galuega talaʻi, ma e toʻatele tagata na tali lelei mai. (2 Timo. 4:2) Na taʻua e se tagata na mātauina lea tulaga: “Na matuā fiafia tagata i lotu.” E leʻi umi ae faateleina le aofaʻi o le ʻautalaʻi, paeonia, ma faapotopotoga. I le 1990 i le 1995, na faateleina ai le aofaʻi o Molimau a Ieova i Moscow, mai le tusa ma le 300 i le silia ma le 5,000! O lenā tulaga na amata ai loa ona popole tagata e tetee i Molimau a Ieova. O le vaitaimi lava lenā na amata ai loa ona tulaʻi mai teteega faasaga i Molimau a Ieova, e ala i le tuuina atu o i latou i le faamasinoga. E fā ni laasaga na uia o lenā tauiviga mo se taimi umi faatoʻā maua se iʻuga.

AMATA FAI NI SUʻESUʻEGA FAASOLITULAFONO

Na amata le uluaʻi laasaga iā Iuni i le 1995. O se vaega na lagolagoina le Lotu Orthodox i Rusia, na fai sa latou tagi e tuuaʻia ai o tatou uso i le faia o ni gaoioiga faasolitulafono. Na faapea mai lenei vaega, o loo latou gaoioi mo le lelei o tagata o aiga na tetee, i le avea o a latou paaga po o fanau ma Molimau a Ieova. Iā Iuni 1996, na amata ai ona saʻili e tagata na faia suʻesuʻega, ni faamaoniga o ni mea sesē na faia e Molimau a Ieova, ae e latou te leʻi mauaina ni mea sesē. Na toe faia e le vaega lava lenei se isi tagi, e tuuaʻia ai o tatou uso i ni gaoioiga faasolitulafono. Sa toe faia se isi suʻesuʻega, ae na faamaonia e sesē tuuaʻiga uma. E ui i lea, ae na faia e tagata tetee le tagi lona tolu, e faavae i na lava tuuaʻiga. Na toe suʻesuʻeina foʻi Molimau a Ieova i Moscow, ae e tasi lava le faaiʻuga na faia e le lōia a le malo​—e leai ni faavae e toe amata ai se faamasinoga mo se solitulafono. Ona toe fai lea e tagata tetee o le tagi lava lea e tasi, ma o le faafā ai lea ona fai, ae e leʻi maua lava e le lōia a le malo ni faamaoniga. O le mea e ofo ai, na toe talosagaina foʻi e le vaega lava lenā se suʻesuʻega. O le iʻuga, iā Aperila 13, 1998, na tapunia aloaʻia ai le faamasinoga e le vaega fou na faia suʻesuʻega.

Ua taʻua e se lōia na aafia i le faamasinoga: “E oo ane i le taimi lea, ua tupu se mea e lē masani ona tupu.” E ui na faapea mai se sui o le ofisa o  lōia na faia lenei suʻesuʻega lona lima, e leai se faamaoniga e iloa ai na faia e Molimau a Ieova ni gaoioiga faasolitulafono, ae na ia fautuaina pea le faia o se tagi faasaga i o tatou uso. Na tuuaʻia Molimau a Ieova i Moscow e le sui o le ofisa o lōia, i le solia o le tulafono a le atunuu ma le tulafono faavaomalo. Na ioe se lōia o le Northern Administrative Circuit of Moscow, ma faia ai se tagi faasaga i Molimau a Ieova. * Iā Setema 29, 1998, na faia ai le faamasinoga i le Fale Faamasino Faaitumalo i Golovinsky i Moscow. Ua amata le laasaga lona lua o le faamasinoga.

FAAAOGĀ LE TUSI PAIA I LE FALE FAAMASINO

A o tumutumu le fale faamasino i Moscow i mātū, na avatu se tuuaʻiga e le Lōia o Tatyana Kondratyeva, e faaaogā ai se tulafono a le setete na sainia i le 1997, lea e faamatalaina ai o le lotu Orthodox, Isalama, lotu Iutaia ma le lotu Puta, e na o le pau ia o lotu e taliaina. * O le tulafono lava lenā, ua faigatā ai i isi lotu ona maua so latou tulaga e aloaʻia ai faaletulafono. Ua talia ai foʻi e le faamasinoga le faasā o lotu e faatupu vevesi. O lenei tulafono, na tuuaʻia sesē ai e le lōia Molimau a Ieova e faapea, e faatupu vevesi ma faamalepe aiga, ma ua tatau ai ona faasā.

Na fesili atu se lōia na tū mo o tatou uso: “O ai tagata i le Faapotopotoga i Moscow ua molia ona o le solia o le tulafono?” E leʻi mafai e le lōia a le malo ona taʻuina mai se igoa o se tagata se toʻatasi. Ae na faapea mai o ia ua faatupu e lomiga a Molimau a Ieova le feitagaʻi o le va o lotu. Ina ia faamaonia lona manatu, na ia faitau ni manatu mai i mekasini o le Olomatamata, ma le Ala Mai! ma isi lomiga (tagaʻi i le pito i luga). Ina ua fesiligia po o le ā le auala ua faatupu ai e nei lomiga le feitagaʻi, na faapea mai o ia: “Ua aʻoaʻo e Molimau a Ieova e faapea o i latou o le lotu moni.”

Na tuu atu e se lōia, o se tasi o o tatou uso, se kopi o le Tusi Paia i le faamasino ma se kopi i le lōia a le malo, ma faitau le Efeso 4:5: “E tasi le Alii, e tasi le faatuatuaga, e tasi le papatisoga.” Sa tofu le faamasino, le lōia a le malo, ma le lōia a Molimau a Ieova ma le Tusi Paia, ma latou talanoaina ai mau e pei o le Ioane 17:18 ma le Iakopo 1:27. Na fesili le faamasino: “Po o faatupu e nei mau le feitagaʻi i le va o lotu?” Na tali le lōia a le malo e lē afāina po o ā ona manatu, auā e lē o ia o se tagata e poto i le Tusi Paia. Na faaali atu e le lōia a Molimau a Ieova lomiga a le Lotu Orthodox i Rusia, ia e matuā faitioina ai Molimau a Ieova, ma fesili atu: “Po o solia e nei faamatalaga le tulafono?” Na tali le lōia a le malo: “E lē tāua po o ā oʻu manatu, auā e lē o aʻu o se tagata e poto i mea tau lotu.”

MOLIAGA E AUNOA MA NI FAAMAONIGA

Ina ia tuuaʻia Molimau a Ieova i le faamalepeina o aiga, na faapea mai le lōia a le malo e latou te lē faamanatuina aso mālōlō e pei o le Kerisimasi. Peitaʻi, na ia taʻutino mulimuli ane, e lē o talosagaina e le tulafono a Rusia o latou tagatānuu e faamanatu le Kerisimasi. O loo tuu atu i tagata Rusia, e aofia ai ma Molimau a Ieova, le saʻolotoga e filifili ai. Na faapea mai foʻi ua taofiofi e la tatou  faalapotopotoga ʻfanau mai i le mauaina o le fiafiaga masani, ma le faia o mea e maua ai le fiafia.’ Ae ina ua fesiligia, sa ia taʻutino mai e leʻi talanoa lava i se talavou na tausi aʻe e ni mātua Molimau a Ieova. Ina ua fesili atu le lōia a Molimau a Ieova i le lōia a le malo pe na auai i se sauniga a Molimau a Ieova, na tali mai o ia: “E lē manaʻomia fua ona ou alu i na sauniga.”

Na valaaulia e le lōia a le malo se polofesa i mataupu o le mafaufau, e faailoa mai sona manatu i le faamasinoga. Na ia tuuaʻia e faapea o le faitauina o a tatou lomiga, ua māfua ai faafitauli tau i le mafaufau. Ina ua taʻua e le lōia a Molimau a Ieova e faapea, o le tusitusiga a le polofesa i le faamasinoga, e tutusa lelei ma se tusitusiga na faia e Faatamā o le lotu Orthodox i Moscow, na taʻutino le polofesa o nisi vaega e tutusa. Na ia taʻua, “E tasi le mea na maua mai ai a matou faamatalaga.” Ina ua fesiligia atili, na iloa mai ai e na te leʻi togafitia lava se Molimau a Ieova. Ae i le eseesega, na molimau se isi polofesa i mataupu tau i le mafaufau i le faamasinoga, e sili atu i le 100 Molimau i Moscow na ia vaaia. Na ia taʻua o nei Molimau sa lelei o latou mafaufau, ma ina ua avea ma Molimau a Ieova, ua sili atu ai ona latou faaaloalo i lotu i lo o le taimi muamua.

MANUMALO​—AE E LEʻI UMA AI

Iā Mati 12, 1999, na tofia ai e le faamasinoga ni tagata atamamai se toʻalima, e latou te suʻesuʻeina lomiga a Molimau a Ieova, ma taofia le faamasinoga. A o leʻi tupu lenei mea, ua uma ona poloaʻia e le Minisita o Faamasinoga i Rusia, se vaega o tagata atamamai ia suʻesuʻeina a tatou lomiga. Iā Aperila 15, 1999, na lipotia ai e lenei vaega o faamasino na taʻitaʻia e le Minisita e faapea, e leai se mea leaga na latou mauaina e uiga i a tatou lomiga. O lea, iā Aperila 29, 1999, na toe faafou ai e le Minisita o Faamasinoga le lesitalaina faaletulafono o Molimau a Ieova. E ui i lea, na manatu pea le faamasinoga i Moscow e ao ona suʻesuʻe e se vaega fou o faamasino a tatou lomiga. O lenei mea na faapogaia ai se tulaga ese​—na faailoa atu e le Minisita  o Faamasinoga i Rusia i le atunuu, o Molimau a Ieova o se lotu ua faamaonia o loo usitaʻia tulafono, ae i le taimi e tasi, sa suʻesuʻeina i latou e le Matagaluega o Faamasinoga i Moscow, ona na molia e isi e faapea o loo latou solia le tulafono!

I le toetoe lua tausaga mulimuli ane ai, na toe amata ai le faamasinoga. Iā Fepuari 23, 2001, na faia ai le iʻuga faafaamasinoga e le Faamasino o Yelena Prokhorycheva e faapea, e leai se māfuaaga e tatau ai ona faasā Molimau a Ieova i Moscow. Ina ua uma ona faia se iloiloga i faamatalaga na maua mai i suʻesuʻega a le vasega o faamasino na ia tofia, na ia taʻua e faapea: “E leai se faavae e soloia pe faasā ai le galuega a Molimau a Ieova i Moscow.” O le iʻuga, na filifili ai le faamasinoga, e sesē tuuaʻiga uma na faia faasaga i o tatou uso! Ae peitaʻi, na teena e le lōia a le malo le iʻuga o le faamasinoga, ae toe fai le apili i le Moscow City Court. I le tolu masina mulimuli ane ai, iā Me 30, 2001, na faalēaogāina ai e lenā faamasinoga le faaiʻuga a le Faamasino o Prokhorycheva. Na faatonu le faia o se isi faamasinoga e faia e le lōia lava lenā a le malo, ae pulea e se isi faamasino e ese mai. O le a amata le laasaga lona tolu o le faamasinoga.

TOʻILALO​—AE E LEʻI MUTA AI

Iā Oketopa 30, 2001, na amata faia ai e le Faamasino o Vera Dubinskaya le isi faamasinoga. * Na faitioina e le lōia a le malo, o Kondratyeva, ia Molimau a Ieova faapea ua latou faatupuina le feitagaʻi, ae na ia toe faapea mai, e ao ona faasā Molimau a Ieova mo lo latou lava puipuiga! Ina ua faalogo i ai Molimau a Ieova e toʻa 10,000 i Moscow, na vave ona latou sainia se pepa e talosagaina ai le faamasino, e latou te lē manaʻomia se “puipuiga” e pei ona taʻua e le lōia a le malo.

Na taʻua e le lōia a le malo, e lē manaʻomia ona ia saunia se faamaoniga e iloa ai e solitulafono Molimau a Ieova. Na ia taʻua, e lē ona o galuega a Molimau a Ieova ua toe faia ai le faamasinoga, ae ona o a latou lomiga ma talitonuga. O lea, na ia faasilasila atu ai o le a ia aumaia se sui mai le Lotu Orthodox i Rusia, e fai ma molimau i le faamasinoga. Ioe, o lenā faasilasilaga ua faamautinoa ai e moni o loo uunaʻia e taʻitaʻi o le Lotu Orthodox i Rusia, le faasāina o Molimau a Ieova. Iā Me 22, 2003, na poloaʻia ai e le faamasino se vasega o tagata atamamai i mataupu faalotu, e latou te toe suʻesuʻeina lomiga a Molimau a Ieova.

Iā Fepuari 17, 2004, na toe iloilo ai iʻuga o suʻesuʻega na faia e tagata suʻesuʻe. Na iloa mai i suʻesuʻega na faia e tagata atamamai i mataupu faalotu, o loo faalaeiau e a tatou lomiga le ʻaufaitau ia “tausi lelei i o latou aiga ma le faatulagaga o le faaipoipoga,” ma o le tuuaʻiga e faapea o a tatou lomiga o loo uunaʻia ai le feitagaʻi, e “leai ni faamaoniga.” Na ioe foʻi i ai isi tagata atamamai. Na fesiligia se polofesa o talafaasolopito o lotu: “Pe aiseā e talaʻi ai Molimau a Ieova?” Na tali o ia i le faamasinoga: “O le galuega talaʻi o se galuega e tatau ona faia e se Kerisiano. O le manatu lenā o loo taʻua i Evagelia ma o le poloaʻiga a Keriso i ona soo​—ʻia ō e talaʻi i nuu uma.’” E ui i nei faamaoniga uma, ae iā Mati 26, 2004, na faasā ai e le faamasino galuega a Molimau a Ieova i Moscow. Iā Iuni 16, 2004, na lagolagoina ai e le Moscow City Court lenā faaiʻuga. * Na faapea mai se Molimau e tusa ai o le faaiʻuga a le faamasino: “I taimi o le faa-Sovieti, e talitonu se tagata Rusia e leai se Atua. Ae i aso nei, e ao ona avea se tagata Rusia ma Orthodox.”

Na faapefea ona tali atu le ʻauuso i nei faasāaga? E pei lava o le tulaga na oo iā Neemia. Ina ua taumafai fili o tagata o le Atua e tetee atu i ana taumafaiga e toe atiaʻe pa o Ierusalema, e leʻi avea lenā ma mea e tosina ese ai mafaufau o Neemia ma ona tagata mai le galuega e ao ona faataunuu. Nai lo lenā, na  latou “fausia pea” ma ʻloto i ai e faia le galuega.’ (Nee. 4:1-6) I se tulaga tutusa, e leʻi faatagaina e o tatou uso i Moscow teteega mai tagata, e tosina ese ai mai le galuega e ao ona latou faia i aso nei​—o le talaʻia o le tala lelei. (1 Pete. 4:12, 16) Na latou mautinoa o le a tausia i latou e Ieova, ma ua latou nofosauni e feagai ma le laasaga lona fā o lenei tauiviga umi.

FAATETELEINA TETEEGA

Iā Aokuso 25, 2004, na tuuina atu ai e o tatou uso se pepa talosaga i le malo o Rusia i le Kremlin, ae faatuātusi iā Vladimir Putin, a o avea ma peresitene o Rusia i lenā taimi. O loo faamatalaina i le pepa se popolega tele e faatatau i le faasāaga, ma e tusa ma le 76 tusi ae i totonu o nei tusi, e silia ma le 315,000 saini a tagata o loo iai. I le taimi lea, ua matuā manino le mata o le vai, i le tulaga moni o taʻitaʻi lotu Orthodox i Rusia. Na taʻutino e sē na avea ma fofoga fetalai mo Faatamā o le lotu i Moscow: “E matou te matuā teena lava gaoioiga a Molimau a Ieova.” Ua faapea mai se taʻitaʻi o le lotu Musalimi, o le faamalosia o le faasāaga o se “mea iloga ua mafai ona faataunuuina.”

Na talitonu nisi tagata Rusia i tuuaʻiga sesē faasaga i Molimau a Ieova, ma amata loa ona latou osofaʻia i latou. O nisi o Molimau na auai i le galuega talaʻi i Moscow, na tatuʻi ma ta kiki e tagata tetee. Na tuli i fafo o se fale se tuafafine e se tamāloa na matuā ita i le talaʻiga, ma ia kiki lona papatua ma paʻū ai, ma manuʻa ai lona ulu. Na manaʻomia ona togafitia o ia i le falemaʻi, ae e leʻi faia e leoleo na iai se gaoioiga i lē na osofaʻia o ia. Na puʻea e leoleo isi Molimau, ma faailoga ia tosi o latou tamaʻi lima, tapuʻe o latou ata, ma loka i le ofisa o leoleo i le pō atoa. Na faamataʻuina pule o fale na faaaogā e Molimau mo a latou sauniga i Moscow, ma faapea atu o le a tutuli pe a faaauau ona lisi e Molimau a Ieova o latou fale. E leʻi umi, ae tele faapotopotoga ua leai ni fale e fai ai a latou sauniga. O se faataʻitaʻiga,  e 40 faapotopotoga na faaaogāina ni Maota mo Sauniga se fā e pipii faatasi. O se tasi o faapotopotoga e faaaogāina lenā maota, e faia a latou Sauniga i le ʻafa o le fitu i le taeao. Na taʻua e se ovasia femalagaaʻi, “Ina ia auai i le sauniga, e tatau ona ala i le lima i le taeao, peitaʻi, na latou lotomalilie e faia faapea mo le sili atu i le tausaga.”

“E FAI MA MOLIMAU”

Ina ia faamaonia e lē talafeagai ma le tulafono le faasāaga a Moscow, o lea, iā Tesema i le 2004, na saʻilia ai e a tatou lōia se fesoasoani mai le Faamasinoga o Aiā Tatau i Europa. (Tagaʻi i le pusa “Le Pogai ua Toe Iloilo ai i Falani le Iʻuga a le Faamasinoga i Rusia,” i le itulau e 6.) I le ono tausaga mulimuli ane ai, iā Iuni 10, 2010, na tuuina mai ai e le Faamasinoga se faaiʻuga autasi na matuā taʻutonuina ai Molimau a Ieova! * Na iloilo e le Faamasinoga tuuaʻiga uma na faia faasaga iā i tatou, ma iloa ai e matuā leai se faavae o ia tuuaʻiga. Na taʻua ai foʻi, ua iai se matafaioi faaletulafono a Rusia, i le “faamutaina o le solitulafono ua maua e le Faamasinoga, ma toe faasaʻo aafiaga leaga ua tulaʻi mai i le tele e mafai ai.”​—Tagaʻi i le pusa “Le Iʻuga a le Faamasinoga,” i le itulau e 8.

Na filifili le Faamasinoga ia puipuia gaoioiga a Molimau a Ieova, e le Faalapotopotoga o Maliega mo Aiā Tatau a Tagata i Europa. O lenei faaiʻuga e lē gata e faatatau i Rusia, ae faapea foʻi isi atunuu e 46 o loo i totonu o le Faalapotopotoga o le Fono a Europa. O le a fiafia foʻi le toʻatele o faamasino, le ʻaufaitulafono, ma tagata e suʻesuʻea aiā tatau a tagata i le faaiʻuga ua fai. Aiseā? Auā ina ua fai e faamasino o le Faamasinoga la latou faaiʻuga, sa latou faaaogā isi iʻuga faafaamasinoga e valu na faia muamua atu e le Faamasinoga, ia na manumalo ai Molimau a Ieova. Sa latou faaaogā foʻi iʻuga faafaamasinoga e iva na manumalo ai Molimau a Ieova i faamasinoga maualuluga i Aferika i Saute, Anitenitina, Iapani, Iunaite Setete, Peretania, Sepania, Kanata ma Rusia. Ua mafai nei e Molimau a Ieova i le lalolagi aoao, ona faaaogā le faaiʻuga a le Faamasinoga ina ia puipuia ai la latou tapuaʻiga.

Na fetalai Iesu i ona soo: “O le a molia foʻi outou i luma o kovana ma tupu ona o aʻu, e fai ma molimau iā i latou atoa ma atunuu.” (Mata. 10:18) O nei faamasinoga uma na faia i Rusia a o faagasolo le 15 tausaga ua tuanaʻi, na maua ai e tagata i Moscow ma isi atunuu le avanoa e faalogo ai e faatatau iā Ieova, i se tulaga e leʻi tupu muamua. O mea uma na tutupu i nei faamasinoga na “fai ma molimau,” ma na fesoasoani ina ia “agaʻigaʻi ai i luma le tala lelei.” (Fili. 1:12) Pe a talaʻi atu Molimau a Ieova i Moscow i aso nei, o le toʻatele lava o tagata o aiga e faapea mai, “Pe na leʻi faasā e le Faamasinoga outou?” O lenā fesili e masani ona maua ai e o tatou uso se avanoa, e avatu ai i tagata o aiga ni faamatalaga atili e uiga i o tatou talitonuga. E manino mai, e leai se malosi o i teteega e mafai ona taofia ai i tatou mai i la tatou galuega talaʻi o le Malo. E tatou te tatalo ia faaauau ona faamanuia mai Ieova, ma ia faatumauina o tatou uso ma tuafāfine pele ma lototetele i Rusia.

[Faaopoopoga i lalo]

[Pusa/Ata i le itulau 6]

Le Pogai ua Toe Iloilo ai i Falani le Iʻuga a le Faamasinoga i Rusia

Iā Fepuari 28, 1996, na sainia ai e Rusia le Maliega mo Aiā Tatau a Tagata i Europa. (Na faamautūina e Rusia le Maliega iā Me 5, 1998.) O le sainia o lenā maliega, na faalauiloa atu ai e le malo o Rusia e faapea, e tatau ona iai i ona tagatānuu

ʻle aiā i le saʻolotoga o lotu ma le aiā e faia ai la latou tapuaʻiga i le fale ma nofoaga faitele, ma suia la latou tapuaʻiga pe a mananaʻo ai.’​—Mataupu 9.

ʻle aiā e faaalia pe tusitusia ai ni manatu i se auala logolelei e latou te manatu i ai, ma avatu faamatalaga i isi tagata.’​—Mataupu 10.

ʻle aiā e faia ai se vaega i se talanoaga toʻafimālie.’​—Mataupu 11.

O tagata po o faalapotopotoga ua afāina fua ona o le solia e nisi o le feagaiga, ma ua uma ona latou uia auala uma faaletulafono, e mafai ona avatu la latou tagi i le Faamasinoga a Europa mo le Aiā Tatau a le Tagata, i Strasbourg i Falani (e pei ona faaalia i luga). O loo faia aʻe lea faamasinoga i faamasino e toʻa 47—o se fuainumera e tutusa ma le aofaʻi o atunuu na sainia le Maliega mo Aiā Tatau a Tagata i Europa. E faamalosia e le Faamasinoga iʻugāfono ua uma ona pāsia. O atunuu ua uma ona sainia le maliega, e ao ona usitaʻia tulafono tau faamasinoga.

[Pusa/Ata i le itulau 8]

Le Iʻuga a le Faamasinoga

O ni vaega pupuu nei se tolu o le filifiliga na faia e le Faamasinoga o Aiā Tatau i Europa.

O se tasi o tuuaʻiga e faapea o Molimau a Ieova e faamalepe aiga. Na filifili le Faamasinoga e lē saʻo lenei tuuaʻiga. Na taʻua e faapea:

“O le tetee ma le lē fiafia o tagata o aiga e lē ō i ni lotu, e talia ma faaaloalo i le saʻolotoga o tagata lolotu o o latou aiga, e faaalia ma faatino ai lana ia lava tapuaʻiga, o le pogai lenā o feteenaʻiga.”​—Pala. 111.

E leʻi maua foʻi e le Faamasinoga se faamaoniga e lagolagoina ai le tuuaʻiga e faapea, ua “pulea mafaufauga” o tagata e Molimau a Ieova. Ua taʻua e faapea:

“O le mea mataʻina na iloa e le Faamasinoga, e leʻi mafai e faamasinoga i [Rusia] ona taʻua se igoa o se tagata se toʻatasi, na faaleagaina lana aiā tatau e filifili ai, ona o na auala.”​—Pala. 129.

O le isi tuuaʻiga e faapea ua faaleagaina e Molimau a Ieova soifua mālōlōina lelei o o latou tagata talitonu, e ala i le lē taliaina o tuigātoto. E leʻi taliaina e le Faamasinoga lea tuuaʻiga, ma taʻua e faapea:

“O le saʻolotoga e talia pe e lē talia ai togafitiga faafomaʻi, pe filifili se isi togafitiga e suia ai, e tāua tele i taʻiala e faatatau i le filifiliga saʻoloto a le tagata lava ia. O se faaaʻoaʻoga, e saʻoloto se tagata matua e filifili pe fai pe lē faia sona taotoga po o se togafitiga, e faapena foʻi la i le tuiina o le toto.”​—Pala. 136.