Pe E te Manatua?

Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

• O ā mea tāua e tolu e mafai ona fesoasoani iā i tatou, e teena ai so o se faanaunauga ia lē faamaoni?

(1) Atiaʻe se mataʻu tatau i le Atua. (1 Pete. 3:12) (2) Atiaʻe se lotofuatiaifo ua aʻoaʻoina i le Tusi Paia. (3) Taumafai malosi ia maua le lotomalie.—4/15, itulau e 6-7.

• E faapefea ona tatou iloa o le faatāua o le auaunaga i le Atua, e lē uiga ai faapea o le a tatou matapaū i taimi uma, pe ʻalofia faafiafiaga?

E mafai ona tatou iloiloina le faaaʻoaʻoga a Iesu. Sa fiafia o ia e faiʻaiga faatasi ma isi i taimi e tafafao ai. E tatou te iloa e leʻi inainā pe matapaū o ia. Sa latalata atu isi, e oo lava foʻi i tamaiti, iā te ia.—4/15, itulau e 10.

• O le ā e fai e se ulugalii pe afai e foliga mai, ua lē toe tutusa le māfana o le la mafutaga ina ua fai le fanau?

E ao ona la faailoa atu pea le alofa o le tasi i le isi. E mafai ona taumafai se tane e faaitiitia ni lagona lē mautonu atonu o loo iai i lana avā. Ma e ao iā i laʻua uma, ona taumafai ia lelei a la fesootaʻiga e faatatau i o la faalogona ma manaʻoga faaletino.—5/1, itulau e 12-13.

• O le ā na faaāta mai i le laau o le olive o loo taʻua i le Roma mataupu e 11?

O loo faatatau tonu atu le laau o le olive, i le vaega lona lua o le fanau a Aperaamo, le Isaraelu faaleagaga. O aa o lenei laau o le olive faafaatusa ua faaāta mai ai Ieova, a ua faaāta mai e le ogālaau atoa Iesu. Ina ua teena e le toʻatele o tagata Iutaia Iesu, sa mafai ona faapipii atu i ai tagata mai Nuu Ese, o ē na avea ma tagata talitonu, ma maua ai loa le aofaʻiga atoa o le vaega lona lua o le fanau a Aperaamo.—5/15, itulau e 22-25.

• O le ā le tala lelei e sili ona tāua e tatou te taʻu atu i ē matitiva?

O le tala lelei e faapea: Ua tofia e le Atua Iesu e avea ma Tupu. O ia o le Pule e sili ona lelei e aveesea le mativa. Aiseā? Talu ai o le a pule o ia i tagata uma lava, ma e iā te ia le mana e faatino ai mea; e alofa mutimutivale o ia i ē matitiva; ma e mafai ona ia faaiʻuina le pogai o le mativa, lo tatou uiga manatu faapito na fananau mai ma i tatou.—6/1, itulau e 7.

• O le ā na uiga i ai Iesu ina ua fetalai atu iā Kaiafa: “O lenā tonu lava ua e tali mai ai”?​—Mata. 26:63, 64.

O le faaupuga “o lenā tonu lava ua e tali mai ai,” e foliga mai o se faaupuga e masani ai Iutaia, e iloa ai e moni se faamatalaga. Sa fesili le Ositaulaga Sili o Kaiafa, po o Iesu o le Keriso, le Alo o le Atua. O le tali atu la a Iesu: “O lenā tonu lava ua e tali mai ai,” o se tali mautinoa lea i le ositaulaga sili.—6/1, itulau e 18.

• Pe na mafai ona avea ē atonu na tupuga mai iā Iesu, ma vaega o le togiola?

E leai. E ui sa mafai ona tupuga mai iā Iesu le faitau piliona o tagata lelei atoatoa, ae e leʻi iai se vaega a tagata na ono tupuga mai iā te ia, i le togiola. Sa fetaui lelei le soifua lelei atoatoa o Iesu ma le ola lelei atoatoa o Atamu. (1 Timo. 2:6)—6/15, itulau e 13.

• E faaalia faapefea e Kerisiano, e latou te utagiaina le lapataʻiga e faatatau i aʻoaʻo pepelo, o loo taʻua i le Galuega 20:29, 30?

E latou te lē taliaina aʻoaʻo pepelo i o latou fale pe faafeiloaʻia foʻi. (Roma 16:17; 2 Ioa. 9-11) E ʻalofia e Kerisiano lomiga a ē ua liliu ese mai le upu moni, pe matamata i polokalame i le TV pe tilotilo i la latou tuatusi o faamatalaga i le Initaneti, ia o loo faaalia mai ai a latou aʻoaʻoga.—7/15, itulau e 15-16.

• O ai e tatau ona aʻoaʻoina fanau e uiga i le Atua?

O le tamā ma le tinā, o i laʻua uma e tatau ona iai se vaega i le faia faapea, i le ōgatusa ai ma fautuaga a le Tusi Paia. (Faata. 1:8; Efe. 6:4) Ua faaalia i suʻesuʻega e faapea, pe a galulue faatasi le tinā ma le tamā e aʻoaʻo le fanau e uiga i le Atua, o le a iai ni aafiaga lelei i le fanau.—8/1, itulau e 6-7.