Se Sauniga Iloga

“E OO ane i le taimi e uma ai lenei sauniga, o le a e faapea mai, ʻE moni lava o se sauniga iloga lenei sauniga!’” E ala i na upu, na faatupu ai e Stephen Lett, o se sui mai le Vaega Pule o Molimau a Ieova, le matuā naunau o le toʻatele o le aofia. Sa latou faapotopoto mo le fonotaga faaletausaga lona 126, a le Watch Tower Bible and Tract Society of Pennsylvania, na faia iā Oketopa 2, 2010, i le Maota Fono a Molimau a Ieova i le Aai o Jersey, i New Jersey i Amerika. O ā nisi o manatu tāua o lenei sauniga iloga?

Na faia e le uso o Lett le lauga amata, o se lauga aasa e faatatau i le kariota faalelagi a Ieova, lea e faamatala mai i le Tusi Paia i le tusi o Esekielu. O lenei kariota telē ma mamalu, o loo faaāta mai ai le faalapotopotoga a le Atua o loo pulea atoatoa e Ieova. Na taʻua e le uso o Lett, o le vaega faalelagi o le faalapotopotoga o loo iai foafoaga agaga, o loo vave ona agaʻi i luma e pei o le emo o le uila—e ōgatusa ma le finagalo o Ieova. Ua faapena foʻi ona agaʻi i luma le vaega i le lalolagi o le faalapotopotoga a Ieova le Atua. Na taʻua e le uso o Lett nisi o mea lelei sa tutupu i le faalapotopotoga vaaia a le Atua, i tausaga e leʻi leva tele atu.

O se faaaʻoaʻoga, o nisi o lālā ua tuufaatasi ma faamaopoopo ina ia mafai ai e le toʻatele o i latou na galulue muamua i aiga Peteli i na atunuu, ona taulaʻi atu i le galuega talaʻi. Sa faalaeiau e le uso o Lett le aofia ia tatalo pea mo le Vaega Pule, le sui o le vasega o le pologa, e lē gata ina ia faaauau ona faamaoni, a ia atamamai foʻi pe faautauta.—Mata. 24:45-47.

Lipoti Faalaeiau ma Faatalanoaga e Faamāfanafanaina Ai

Sa faia e Tab Honsberger, o lē o loo auauna i le Komiti o le Lālā i Haiti, se lipoti faamomoiloto e uiga i le taimi ina ua uma le mafuiʻe iā Ianuari 12, 2010, lea na maʻimau ai soifua o tagata pe ā ma le 300,000 i lenā atunuu. Sa ia taʻua o loo taʻu atu e faifeʻau i tagata e faapea, ua faasala e le Atua ē na aafia ona o le lē faatuatua, ae puipuia tagata amiolelei. Peitaʻi, e faitau afe pagota na saʻoloto ina ua malepe pā o se falepuipui i le mafuiʻe. Ae ua faamāfanafanaina le toʻatele o tagata lotofaamaoni o Haiti, ona ua iloa le upu moni e faatatau i le māfuaaga ua tele ai puapuaga i o tatou aso. Na faamatala e le uso o Honsberger se uso faamaoni i Haiti, na maliu lana avā i le mafuiʻe ae ua faapea mai: “E oo mai lava i le aso lenei ou te tagi. Ou te lē iloa po o afea e teʻa ai loʻu faavauvau, ae ou te fiafia e lagona le alofa o le faalapotopotoga a Ieova. Ua iai loʻu faamoemoe, ma ou te fia tufa atu lea faamoemoe.”

Sa faia e Mark Sanderson, lea ua avea nei  ma sui o le aiga Peteli i Brooklyn, se lipoti e faatatau i le galuega i Filipaina. Talu ai na avea muamua ma sui o le Komiti o le Lālā i inā, sa matuā fiafia o ia a o talanoa mai e faatatau i tumutumuga sosoo e 32 o le ʻautalaʻi o le Malo, ma le auala na sili atu ai ona tele le aofaʻi o suʻesuʻega faale-Tusi Paia nai lo le ʻautalaʻi. Sa ia taʻua se uso e igoa iā Miguel, o sē sa tagatavaleina e se tasi le atalii o lona atalii. Sa taumafai malosi Miguel ia faasala ma faafalepuipui lē na fasiotia le atalii o lona atalii. Mulimuli ane, ina ua talaʻi atu Miguel i le falepuipui, sa feiloaʻi ai o ia i le fasioti tagata. E ui sa popole, ae na faamatala atu i ai ma le agamalu ma le agalelei e Miguel o ia. O le iʻuga sa la suʻesuʻe ma le tamāloa, ma na tali lelei ane ma alofa iā Ieova. Ua papatiso nei o ia. Ua avea Miguel ma ana uō mamae, ma o loo taumafai Miguel ia vave ona magalo lona uso fou mai le falepuipui. *

Ona sosoo lea ma se faatalanoaga, na faia e Mark Noumair, o se faiaʻoga i le Matagaluega o Aʻoga Faatiokarate. E toʻatolu ulugalii sa ia faatalanoaina—o Alex ma Sarah Reinmueller, David ma Krista Schafer, ma Robert ma Ketra Ciranko. Na faamatala e Alex Reinmueller, o sē e fesoasoani i le Komiti Lomitusi, le auala sa avea ai le upu moni ma ana meatotino, a o paeonia i Kanata i le faatoʻā 15 o ona tausaga, ma sa masani ona galue na o ia. Ina ua fesiligia po o ai sa telē sana taaʻiga iā te ia i le Peteli, sa taʻua e le uso o Reinmueller ni tane faamaoni se toʻatolu, ma taʻua le auala na fesoasoani ai latou iā te ia ina ia tuputupu aʻe faaleagaga. Sa faamatala e lana avā o Sarah, le la mafutaga ma se tuafafine na onosaia le faitau sefulu o tausaga i le falepuipui i Saina, ona o lona faatuatua. Sa taʻua e Sara, ua aʻoaʻoina o ia e faalagolago iā Ieova e ala i le tatalo.

Sa viiviia e David Schafer, o sē e fesoasoani i le Komiti Tauaʻoaʻoga, lona tinā ona o le malosi o lona faatuatua, ma faamatala uso sa galulue o ni tagata tipi laau, ma fesoasoani iā te ia ina ia paeonia lagolago a o talavou. Sa talanoa fiafia lana avā o Krista, e uiga i le taaʻina o ia e sui matutua o le aiga Peteli, o ē na faamaonia sa talia le fautuaga a Iesu ia “faamaoni i nai mea itiiti.”—Luka 16:10.

Sa faamatala ma le fiafia e Robert Ciranko, o sē e fesoasoani i le Komiti o Tusitusiga, mātua o ona mātua, o ē na aumau i Hagakeri ma o ni Kerisiano faauuina. A o laʻitiiti, sa faagaeetia o ia ina ua auai i tauaofiaga tetele i vaitausaga mai le 1950, ma iloa e sili atu ona telē le faalapotopotoga a Ieova nai lo o lana faapotopotoga. Sa faamatala e lana avā o Ketra, le auala na ia aʻoaʻoina ai le faamaoni, ina ua galue o se paeonia i se faapotopotoga na aafia i ē  na liliuese mai le upu moni, ma isi faafitauli. Sa tumau faamaoni o ia, ma iʻu ai ina tofia o ia e auauna o se paeonia faapito i se faapotopotoga, lea sa matuā pāʻia ai lona loto ona o lo latou autasi.

Ona sosoo lea ma Manfred Tonak, o lē na faia se lipoti e faatatau i Aitiope. O lenei nuu o loo taʻua i le Tusi Paia, ma ua faamanuiaina i aso nei i le silia i le 9,000 tagata talaʻi o le tala lelei. O le toʻatele o i latou e nonofo i le taulaga o Addis Ababa, pe nonofo latalata ane foʻi i ai. E matuā manaʻomia ni tagata talaʻi o le Malo i vaipanoa maotua. Ina ia faia faapea, na valaaulia ai Molimau Aitiope o loo nonofo i isi atunuu, ia asiasi mai ina ia talaʻia nisi o vaipanoa maotua o le atunuu. E toʻatele i latou na ō mai, faalaeiau i Molimau o loo nonofo i le atunuu, ma maua i latou na fiafia e faalogo mai.

O le mea na matilatila i le polokalame, o se lauga faasolo e faatatau i Molimau a Ieova i Rusia ma a latou tauiviga faaletulafono. Na faamatala e Aulis Bergdahl o le Komiti o le Lālā i Rusia, se talafaasolopito o sauāga i Molimau i Rusia, aemaise lava i Moscow. Na taʻua e Philip Brumley o le Matagaluega Tau Tulafono i le lālā i le Iunaite Setete, ni mea mataʻina na tutupu i ni nai masina talu ai, ina ua avatu i le Faamasinoga o Aiā Tatau a Tagata i Europa, ni tuuaʻiga se iva e faasaga i Molimau. Na autasi le Faamasinoga e leai se tuuaʻiga o nei tuuaʻiga e iva e talafeagai, ma o nisi o moliaga na taumafai le faamasinoga e faamatala auʻiliʻili mai māfuaaga e sesē ai. A o faatalitalia iʻuga maʻoti, na taʻua e le uso o Brumley, e faamoemoe i le iʻuga o le Faamasinoga, e ono iai se aafiaga i faamasinoga i isi atunuu.

Ina ua uma lenei tala fiafia, ona faasilasila lea e le uso o Lett e faapea, sa poloaʻia e le Faamasinoga o Aiā Tatau a Tagata i Europa, e tatau ona faaauau le mataupu ua leva ona tulaʻi mai e faatatau i lafoga, i le va o le malo o Falani ma Molimau a Ieova. O lenei Faamasinoga e matuā aloaʻia, e seāseā talia ni mataupu faapenei e tuuina atu i ai. E oo ane i le taimi lea, e 39 faamasinoga ua aafia ai Molimau a Ieova, na iloiloina i le Faamasinoga o Aiā Tatau a Tagata i Europa, ma na latou manumalo i faamasinoga e 37. Sa faalaeiau e le uso o Lett tagata uma o le Atua, ia tuu atu pea lenei mataupu iā Ieova e ala i le tatalo.

O le lipoti mulimuli, na faia e Richard Morlan, o se faiaʻoga o le Aʻoga mo Toeaina o le Faapotopotoga. Na talanoa o ia ma lagona faagaeetia, e faatatau i le aʻoga ma le tali fiafia mai o toeaina na auai i le aʻoga.

 Isi Lauga na Faia e Sui o le Vaega Pule

Na faia e Guy Pierce, o se sui o le Vaega Pule se lauga na pāʻia ai loto, na taulaʻi atu i le mau mo le tausaga 2011, “Sulufaʻi atu . . . i le suafa o Ieova.” (Sefa. 3:12) Na ia taʻua, e ui o se taimi fiafia mo tagata o Ieova i le tele o auala, ae o se taimi foʻi e mafaufau loloto i ai. Ua lata mai le aso tele o Ieova; ae o loo faaauau pea ona sulufaʻi atu tagata i lotu sesē, faalapotopotoga faapolotiki, ʻoa faaletino, lē popole i le tulaga o le lalolagi ua iai, ma mea faapena. Ina ia maua le sulufaʻiga moni, e ao ona tatou valaau atu i le suafa o Ieova, lea e aofia ai le iloa, faaaloalo loloto, ma faatuatuaina Lē e ona lea suafa, ma alolofa atu iā te ia i mea uma ua iā i tatou.

Ona sosoo lea ma le lauga maumauaʻi ma faatupu manatu a David Splane, o se sui mai le Vaega Pule, e faamatuaina “Po ua E Ulu Atu i le Mālōlōga a le Atua?” Na ia taʻua o le mālōlōga a le Atua e lē uiga atu i le lē faia o ni gaoioiga, auā o loo ʻgalulue pea’ Ieova ma lona Alo seʻia oo atu i lenā aso faafaatusa o le mālōlōga, ina ia faataunuu ai ma le manuia le finagalo o le Atua mo mea na faia i le lalolagi. (Ioa. 5:17) E faapefea la ona tatou ulu atu i le mālōlōga a le Atua? O se tasi o auala, o le ʻalofia lea o le faia o le agasala ma galuega e taʻutonuina ai i tatou lava. E ao ona tatou faatuatua ma teu i o tatou mafaufau le finagalo o le Atua, ma faia so o se mea e tatou te mafaia ina ia lagolagoina ai. Atonu o se luʻi i nisi taimi le faia faapea, ae e ao ona tatou talia fautuaga ma lagolagosua i le taʻitaʻiga mai le faalapotopotoga a Ieova. Sa talosaga atu le uso o Splane i le aofia, ia faia mea uma e mafai ina ia ulu atu ai i le mālōlōga a le Atua.

O le lauga faaiʻu, na faia e Anthony Morris o le Vaega Pule, sa faamatuaina “O ā Mea o Loo Tatou Faatalitalia?” I se auala faanatinati ma pei o se tamā alofa, na faamanatu e le uso o Morris i le aofia mea na valoia o le a tutupu, ia o loo faatalitali ma le naunautaʻi i ai tagata faamaoni uma. E aofia ai i nei mea le alaga o le “Filemu ma Saogalemu!” ma le faaumatiaga o lotu sesē. (1 Tesa. 5:2, 3; Faaa. 17:15-17) Na lapataʻi atu le uso o Morris e faatatau i le faapea ifo, “Ua oo mai Amaketo,” ona o mea ua tutupu o loo taʻua i tala fou, ae e lē o le faataunuuga lea o na valoaga. Sa ia fautuaina ia iai le uiga olioli, onosaʻi ma faatalitali, lea e faamatalaina i le Mika 7:7. Ae i le taimi e tasi, sa ia uunaʻia tagata uma ia mafuta vavalalata faatasi ma le Vaega Pule, e pei o ni fitafita ua ulu atu i le lotolotoi o le taua. Na faapea atu o ia: “Tau ina ia malolosi o outou loto, o outou uma o ē o loo faatalitali iā Ieova.”—Sala. 31:24.

I le faaiʻuga, sa faia ai ni faasilasilaga tāua ma mataʻina. Na faasilasila e Geoffrey Jackson o le Vaega Pule, fuafuaga o le a faataʻitaʻi se lomiga mo suʻesuʻega o Le Olomatamata, ua faaupuina faafaigofie, mo ē e lē lelei la latou faitau i le faa-Peretania. Ona sosoo ai lea ma le faasilasila e Stephen Lett e faapea, o le a faatulaga e le Vaega Pule ni asiasiga faaleoleo mamoe, mo ovasia itumalo ma a latou avā i le Iunaite Setete. Ona ia faailoa mai lea e faapea, o le a taʻu le Aʻoga mo Toleniga i le Faiva, o le Aʻoga Faale-Tusi Paia mo Uso Nofofua. Ma na ia faasilasila foʻi se aʻoga fou, e taʻu o le Aʻoga Faale-Tusi Paia mo Ulugalii Kerisiano. O lenei aʻoga o le a toleniina atili ai ulugalii, ina ia matuā aogā i latou i le faalapotopotoga a Ieova. Na faasilasila foʻi e le uso o Lett, o le a lua vasega i le tausaga mo le Aʻoga mo Ovasia Femalagaaʻi ma a Latou Avā, ma le Aʻoga mo Sui o Komiti o Lālā ma a Latou Avā, i Patterson, ma ua faatulaga foʻi e mafai ona toe auai mo le taimi lona lua, i latou na auai muamua.

O se iʻuga faagaeeloto na iai i le polokalame, ina ua faia e John E. Barr, o lē ua 97 ona tausaga ma o se sui ua loa tausaga o iai i le Vaega Pule, se tatalo mai le loto na faia ma le lotomaulalo. * Na taape tagata uma ma le lagona e faapea, e moni o se aso iloga lenei aso.

[Faaopoopoga i lalo]

[Faamatalaga faaopoopo i le itulau 19]

Sa fiafia tagata uma na auai i faatalanoaga na faia ai

[Faamatalaga faaopoopo i le itulau 20]

Ua faamanuia Ieova i le galuega talaʻi i Aitiope