Faitauina o le Tusi Paia le Puna o le Malosi i Loʻu Olaga Atoa

Ua Faamatalaina e Marceau Leroy

“NA FOAFOAINA e le Atua le lagi ma le lalolagi i le amataga.” O upu amata na o le Tusi Paia, lea sa ou faitauina nanā i loʻu potu. Aiseā na ou faitauina nanā ai? Ma le mautinoa e lē fiafia loʻu tamā, o sē e lē talitonu i le Atua, i le tusi lea sa ou faitauina—le Tusi Paia.

Ou te leʻi faitau muamua lava i le Tusi Paia, ae o na upu amata o le Kenese, na aafia ai oʻu faalogona e pei ua taia i se ave o le uila. Na ou manatu ifo, ʻE ōgatusa lelei le faamatalaga lenei, ma tulafono o malosiaga faalenatura ia ou te maofa ai pea!’ Ona o loʻu fiafia, na ou faitauina ai mai le valu i le pō seʻia oo i le fā i le taeao. Ona amata mai ai lea i inā laʻu masaniga i le olaga atoa, o le faitauina o le Afioga a le Atua. Seʻi oʻu faamatala atu le auala ua avea ai le faitauina o le Tusi Paia, o se puna e faamalosia ai aʻu a o faagasolo loʻu olaga.

“Ua Tatau Ona E Faitauina i Aso Uma”

Na ou fanau i le 1926 i Vermelles, o se nuu e eli ai le koale, i le itu i mātū o Falani. I le taimi o le taua lona lua a le lalolagi, sa avea le koale ma oloa e tāua tele i le atunuu. O lea, ona o aʻu o se tagata eli koale, na faasaʻoloto ai aʻu mai le auaunaga faavaegāʻau. Ae ina ia maua se olaga e sili ona lelei, na amata ona ou suʻesuʻeina mea tau leitiō ma eletise, lea na ou maofa ai i le galulue felagolagomaʻi o tulafono o malosiaga faalenatura. I le 21 o oʻu tausaga, na tuu mai ai e se tama e ma te vasega, laʻu uluaʻi kopi o le Tusi Paia ma faapea mai, “O se tusi e tāua ona faitauina.” E oo ane i le taimi ua uma ona ou faitauina ai, ua faatalitonuina aʻu o le Tusi Paia o le Afioga lea a le Atua, ma o se faaaliga i tagata.

Na ou mafaufau o le a fiafia foʻi oʻu tuaoi e faitau le Tusi Paia, o lea na ou tufa atu ai ni kopi se valu. Na faateʻia aʻu, ona na ou fesagaʻi ma tauemuga ma teteega. Na lapataʻi mai oʻu tauaiga e talitonu i mea faanuupō e faapea, “O le taimi lava e amata ai ona e faitauina lenei tusi, ua tatau ona e faitauina i aso uma!” Na ou faitauina, ma ou te leʻi salamō i le faia faapea. Ua avea ma aʻu masaniga i le olaga atoa.

Ina ua iloa e nisi o oʻu tuaoi loʻu naunau i le Tusi Paia, ona latou aumai lea iā te aʻu o lomiga a Molimau a Ieova na latou mauaina. O tamaʻitusi e pei o le One World, One Government * (i le faa-Falani), na faamatala mai ai le pogai ua faasino atu ai le Tusi Paia i le Malo o le Atua, e na o le pau lea o le faamoemoe mo le fanau a tagata. (Mata. 6:10) Na atili ai ona ou naunau e faasoa atu lenei faamoemoe i isi.

O se tasi na muamua ona ia taliaina se Tusi  Paia mai iā te aʻu, o Noël, o sē na ma uō mai lava a o lāiti. Ona o ia o se Katoliko aʻiaʻi, na ia faatulagaina ai e ma te ō e feiloaʻi i se tamāloa, sa aʻoga ina ia avea ma patele. Sa ou popole, ae o le faitauina o le Salamo 115:4-8 ma le Mataio 23:9, 10, na ou iloa ai e inosia e le Atua le faaaogāina o tupua i le tapuaʻiga, ma le taʻua o faifeʻau i faalagiga faalotu. O lea na ou maua ai le lototele e puipuia loʻu talitonuga fou. O le iʻuga, na talia e Noël le upu moni, ma e oo mai lava i aso nei o loo tumau pea o ia o se Molimau faamaoni.

Sa ou asiasi atu foʻi i loʻu tuafafine matua. Sa iai ni tusi a lona toʻalua e faatatau i faiga faaagaga, ma na faataugā e temoni. E ui lava na ou lagona i le taimi muamua e leai soʻu malosi, ae o mau o le Tusi Paia e pei o le Eperu 1:14, na ou mautinoa ai e fesoasoani mai agelu a Ieova iā te aʻu. Ina ua faatatauina e le toʻalua o loʻu tuafafine mataupu silisili o le Tusi Paia, ma aveesea mea uma e fesootaʻi atu i faiga faataulāitu, sa mafai ai loa ona saʻoloto o ia mai i aafiaga faatemoni. Ua avea i laʻua uma ma loʻu tuafafine ma Molimau maelega.

I le 1947, na asiasi mai ai i loʻu aiga se Molimau mai i Amerika, o Arthur Emiot. Sa ou matuā fiafia, ma fesili atu iā te ia po o fea e feiloaʻi ai Molimau a Ieova. Sa ia taʻu mai e iai se vaega i Liévin, pe tusa ma le ono maila (10 km) le mamao. Talu ai e oo lava i uilavilivae sa faigatā ona faatau i na aso, o lea mo ni nai masina, na ou savali ai i le sauniga ma toe foʻi mai i le fale. E valu tausaga na faasā ai le galuega a Molimau a Ieova i Falani. E na o le toʻa 2,380 Molimau a Ieova i le atunuu atoa, ma o le toʻatele lava o tagata aumau mai Polani. Ae iā Setema 1, 1947, na toe amanaʻia ai faaletulafono la tatou galuega i Falani. Na toe tatala se ofisa o le lālā i Pale i Villa Guibert. Talu ai e leʻi iai se paeonia i Falani, o lea, i le Informant (lea ua taʻua nei o La Tatou Faiva o le Malo) o Tesema 1947, na aumaia ai se talosaga mo ni paeonia sauatoa, o ē e talaʻi mo le 150 itula i le masina. (I le 1949, na faaitiitia ai i le 100 itula.) I le ioe atoatoa i fetalaiga a Iesu o loo i le Ioane 17:17 e faapea, ʻo le afioga a le Atua o le upu moni lea,’ na ou papatiso ai loa i le 1948, ae iā Tesema 1949, na avea ai aʻu ma paeonia.

Mai le Falepuipui ae Toe Foʻi Atu i Dunkerque

O loʻu tofiga muamua o Agen, i le itu i saute o Falani, ma e leʻi umi. Talu ai e leʻi toe avea aʻu ma tagata eli koale, na filifilia ai aʻu i le auaunaga faavaegāʻau. Na ou musu e auai i le vaegaʻau, o lea na tuuina ai aʻu i le falepuipui. E ui lava e leʻi faatagaina aʻu e iai saʻu Tusi Paia, ae sa mafai lava ona ou aveina ni nai itulau o le tusi o Salamo. O le faitauina o nei itulau na faalaeiauina ai aʻu. Ina ua faasaʻoloto aʻu, e iai se filifiliga sa tatau ona ou faia: Pe e tatau ona ou lē toe auai i le auaunaga faataimi atoa, ae suʻe se galuega ma se mea e nofo ai? Sa toe fesoasoani foʻi iā te aʻu mea na ou faitauina i le Tusi Paia. Na ou manatunatu loloto i upu a Paulo o loo i le Filipi 4:11-13: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” Na ou filifili ai loa e faaauau pea laʻu paeonia. I le 1950, na ou maua ai se tofiga fou—i Dunkerque, o se taulaga na ou talaʻi muamua ai.

Ina ua ou taunuu i inā, sa leai ni mea na iā te aʻu. Na matuā faaleagaina le taulaga i le taimi o le Taua Lona Lua a le Lalolagi, ma sa faigatā ona maua ni fale e nonofo ai. Na ou filifili e asiasi atu i se aiga sa masani ona matou talanoa faale-Tusi Paia, ma na matuā fiafia le fafine e ona le fale ma faapea mai: “Auoi, ua faasaʻoloto oe, Leroy! Fai mai loʻu toʻalua ana toʻatele ni tamāloloa e pei o oe, semanū e faapenei e leai se taua.” Sa iai sa latou faletalimālō, ma na ofo mai ou te nofo ai seʻia oo i le taimi e ō mai ai turisi. O le aso lava foʻi lenā na ofo mai ai e le uso o Arthur Emiot, o Evans, se galuega iā te aʻu. * O ia o se faamatala upu i le taulaga e taula ai vaa, ma sa ia suʻeina se leoleo pō e na te leoleoina se vaa. Sa ia faailoa atu aʻu i se tasi o tagata ofisa o le vaa. Ina ua ou magalo mai le falepuipui, sa ou paee e pei o se tuāniu. Ina ua faamatala atu e Evans le māfuaaga, na faapea mai le taʻitaʻi, e pule aʻu i meaʻai o loo i le pusaʻaisa. I lenā lava aso e tasi, na ou maua ai se mea ou te nofo ai, se galuega ma meaʻai. Na matuā faamalosia loʻu talitonuga i fetalaiga a Iesu o loo i le Mataio 6:25-33.

 Ina ua amata le vaitaimi e asiasi mai ai turisi, sa tatau loa ona ma saʻilia ma laʻu paga paeonia, o Simon Apolinarski, se isi fale e ma te nonofo ai, ae na ma naunau lava e tumau pea i lo ma tofiga. Sa ofo mai iā i maʻua se mea e ma te nonofo ai, i se fale tuai e tuu ai solofanua, lea na ma momoe ai i ni moega e fai i vaovao. Sa faaalu lo ma taimi i le galuega talaʻi. Sa ma molimau atu i lē e ona le fale e tuu ai solofanua, ma na avea o ia o se tasi o le toʻatele o ē na taliaina le upu moni. O le taimi lea e leʻi leva atu ona lomia ai se mataupu i le nusipepa mo le lautele, na lapataʻia ai tagata e nonofo i Dunkerque, e faatatau i le “salalau atu o le galuega a Molimau a Ieova i le vaipanoa.” Ae e na o le pau Molimau na iai i inā, o i maʻua ma Simon ma se ʻautalaʻi toʻaitiiti! A o feagai ma faafitauli, sa faalaeiauina i maʻua e ala i le manatunatu loloto i lo ma faamoemoe faa-Kerisiano, ma le iloiloina o le auala o loo tausia ai i maʻua e Ieova. Ina ua suia loʻu tofiga i le 1952, pe tusa ma le 30 tagata talaʻi sa i ai i Dunkerque.

Faamalosia mo Tiute Tauave Fou

Ina ua mavae sina taimi puupuu i le aai o Amiens, na tofia ai aʻu o se paeonia faapito e galue i Boulogne-Billancourt, o se pitonuu o Pale. Sa tele ni aʻu suʻesuʻega faale-Tusi Paia, ma o nisi o i latou na mulimuli ane auai i le auaunaga faataimi atoa ma le galuega faamisionare. Na talia e se tasi o tauleʻaleʻa, o Guy Mabilat, le upu moni ma oo ina galue o se ovasia matagaluega, ona galue lea o se ovasia itumalo. Mulimuli ane, sa ia vaavaaia le fausiaina o le fale lomitusi o loo i le Peteli i aso nei i Louviers, e lē mamao tele mai i Pale. O talanoaga faale-Tusi Paia e lē aunoa i le talaʻiga, na ou manatua ai pea le Afioga a le Atua, faatumulia ai i le olioli ma mafai ai ona faaleleia loʻu tomai e aʻoaʻo atu.

Ae e aunoa ma se faatalitalia, i le 1953, na tofia ai aʻu e avea ma ovasia matagaluega i Alsace-Lorraine, o se vaipanoa na pulea faalua e Siamani i le va o le 1871 ma le 1945. O lea, sa tatau ona toe aʻo laʻu tautala faa-Siamani. Ina ua ou amata i le galuega matagaluega, e itiiti ni taavale, televise po o ni masini lomitusi sa iai i lenā vaipanoa, ma e leai ni leitiō po o ni komepiuta a le tagata lava ia. Peitaʻi, e leʻi faanoanoa pe mativa ai loʻu olaga. O le mea moni, o se taimi sa sili ona ou olioli ai. O le mulimuli i le fautuaga a le Tusi Paia ia faaauau ona ʻlelei le vaai,’ o lona uiga na itiiti ni mea na faalavelavea ai le auaunaga iā Ieova, nai lo o mea ua iai i aso nei.—Mata. 6:19-22.

E lē mafai ona galo iā te aʻu le Fonotaga na faia i Pale i le 1955, na faamatuaina “Le Malo Manumalo.” O i inā na ou feiloaʻi ai i lē na avea mulimuli ane ma aʻu avā, o Irène Kolanski, o lē na amata lana auaunaga faataimi atoa i le tausaga muamua atu, a o leʻi amata laʻu paeonia. O ona mātua e mai i Polani, o ni Molimau maelega mo le tele o tausaga. Na asia i laʻua e Adolf  Weber i Falani. Sa avea o ia ma faitogālaau a le uso o Russell, ma na malaga atu i Europa ina ia folafola atu le tala lelei. Na ma faaipoipo ma Irène i le 1956, ma na ma auai faatasi i le galuega o le matagaluega. Maʻeu lona lagolagosua iā te aʻu a o faagasolo tausaga!

I le lua tausaga mulimuli ane, na faateʻia ai aʻu i se isi mea—na tofia aʻu e avea ma ovasia itumalo. Peitaʻi, ona e toʻaitiiti ni uso agavaa na iai, sa faaauau ai ona ou asia nisi o faapotopotoga, o se ovasia o le matagaluega. O se taimi pisi tele! E faaopoopo atu i le saʻilia o itula e 100 i le masina, o vaiaso taʻitasi e fai ai ni aʻu lauga, e tolu ni suʻesuʻega tautusi ou te asia, siaki faamaumauga ma saunia lipoti. O le a faapefea ona ou maua se taimi e faitau ai le Afioga a le Atua? E na o le tasi le auala na ou iloa—na ou ʻoti ese ni itulau o se Tusi Paia tuai, ma ou fealuaʻi ma ave. O so o se taimi lava ou te faatalitali ai mo se feiloaʻiga ma se tasi, ou te ave ifo nei itulau ma faitau. O na avanoa pupuu o le faafouina faaleagaga, na faamalosia ai laʻu faaiʻuga ia faaauau loʻu tofiga.

I le 1967, na valaaulia ai i maʻua ma Irène ina ia nonofo mau o ni sui i le aiga Peteli i Boulogne-Billancourt. Na amata ona ou galue i le Matagaluega o le Auaunaga, ma i le silia ma le 40 tausaga mulimuli ane ai, o loo ou galue pea i lenā faaeaga. O le vala e sili ona ou olioli ai i laʻu galuega, o le taliina lea o tusi e faatatau i fesili faale-Tusi Paia. O se fiafiaga tele iā te aʻu le saʻiliʻili loloto i le Afioga a le Atua, ma “tū . . . mo le tala lelei”! (Fili. 1:7) Ou te fiafia foʻi i le faia o talanoaga faale-Tusi Paia, i taimi o tapuaʻiga i le taeao a o leʻi faia le mālū taeao. I le 1976, na tofia ai aʻu o se sui o le Komiti o le Lālā i Falani.

Le Olaga e Sili Ona Lelei

E ui sa iai taimi na feagai ai ma tulaga faigatā, ae ua sili ona faigatā le taimi lenei i loʻu olaga, ina ua matutua ma iai faafitauli i le soifua mālōlōina, ma ua tapulaa mea e mafai ona ma faia ma Irène. Peitaʻi, o le faitauina ma le suʻesuʻeina faatasi o le Tusi Paia, ua olaola ai pea lo ma faamoemoe. E ma te fiafia lava e puʻe le pasi e ma te ō ai i le oganuu a la ma faapotopotoga, ina ia tufa atu lenei faamoemoe i isi. E silia i le 120 tausaga, pe a tuufaatasi tausaga na ma auai ai i le auaunaga faataimi atoa. Ma ua uunaʻia ai i maʻua e matuā fautuaina lenei ituaiga olaga, i ē uma o loo mananaʻo e tuliloa se olaga fiafia, olioli ma aogā. Ina ua tusia e le tupu o Tavita upu o loo i le Salamo 37:25, o le taimi lea ua “toeaina” o ia, ae i le pei o ia, “ou te leʻi iloa [foʻi] se tagata amiotonu ua tuulafoaʻiina.”

A o faagasolo loʻu olaga, ua faamalosia aʻu e Ieova e ala mai i lana Afioga. Na valoia e oʻu tauaiga i le silia i le 60 tausaga ua mavae e faapea, o le a avea le faitauina o le Tusi Paia ma masaniga i le olaga atoa. E saʻo lelei i latou. Ua avea o se masaniga i aso taʻitasi e lē taitai ona ou salamō ai!

[Faaopoopoga i lalo]

[Ata i le itulau 5]

I maʻua ma Simon

[Ata i le itulau 5]

Ina ua galue o se ovasia itumalo

[Ata i le itulau 5]

Se Tusi Paia e talitutusa ma laʻu uluaʻi Tusi Paia na iai

[Ata i le itulau 6]

Le aso o la ma faaipoipoga

[Ata i le itulau 6]

E ma te fiafia tele ma Irène e faitau ma suʻesuʻele Afioga a le Atua