Fesili Mai le ʻAufaitau

O le ā e tatau ona ou faia pe a iai saʻu fesili e uiga i se mea na ou faitau ai i le Tusi Paia, pe manaʻomia foʻi se fautuaga e uiga i soʻu faafitauli patino?

O loo uunaʻia i tatou taʻitoʻatasi i le Faataoto 2:1-5, ia “suʻesuʻe” pea mo le malamalama ma le faautaga loloto, e pei o loo tatou saʻilia le “oloa lilo.” O le uiga o lenei manatu, e tatau ona tatou finafinau e saʻili tali o a tatou fesili faale-Tusi Paia, ma maua ni vaifofō i faafitauli e patino iā i tatou. E faapefea ona tatou faia lenei mea?

I le itulau e 33 e oo i le 38 o le tusi Mauaina o Aogā Mai i le Aʻoga o le Faiva Faatiokarate, o loo iloiloina ai “Le Auala e Fai ai Saʻiliʻiliga Loloto,” e ala i le faaaogāina o meafaigaluega ua saunia mai e le “pologa faamaoni ma le faautauta.” (Mata. 24:45) O loo faamatalaina i le itulau e 36 le auala e faaaogā ai lomiga taʻitasi o le Watch Tower Publications Index, ia ua vaevaeina i le faasino mataupu ma le faasino mau. O lenei auala ua faafaigofie ai ona faia saʻiliʻiliga i ni upu autū po o ni mau autū o le Tusi Paia, ona e mauaina ai lea o se lisi o lomiga e te suʻe atu i ai. E lē gata i lea, e mafai ona tatou faaaogā le Mataupu Faasino mo Olomatamata, ia o loo i lomiga o Tesema 15 i tausaga taʻitasi. Ia onosaʻi a o fai au saʻiliʻiliga mo le tali patino po o le taʻiala o loo e manaʻomia. Ia manatua, o loo e saʻilia le “oloa lilo,” lea e manaʻomia ai le taimi ma taumafaiga.

E moni e iai nisi o mataupu ma mau e lē o faamatalaina maʻoti mai i a tatou lomiga. Ma e tusa lava foʻi pe faamatalaina i ni lomiga se mau o le Tusi Paia o loo e mafaufau i ai, ae atonu e lē fetaui ma le fesili tonu lea o loo i lou mafaufau. E lē gata i lea, ua lāgā ni fesili i nisi o tala i le Tusi Paia, talu ai e lē o taʻua auʻiliʻili mai i le Tusi Paia faamatalaga uma. O lea la, e lē mafai ona tatou mauaina ni tali vave i fesili uma e tulaʻi mai. I lenā tulaga, e tatau ona tatou ʻalofia le taumatemate e uiga i mea e lē mafai ona taliina, ina neʻi o tatou aafia i le fefinauaʻi i “fesili lē aogā, nai lo o le faailoa atu o se mea mai i le Atua e tusa ai ma le faatuatua.” (1 Timo. 1:4; 2 Timo. 2:23; Tito 3:9) E lē o se matafaioi a le ofisa o le lālā po o le ofisa ulu, le iloiloina ma tali fesili uma e lē o talanoaina i a tatou lomiga. E mafai ona tatou mautinoa, ua saunia mai e le Tusi Paia faamatalaga lava saunia ina ia taʻitaʻia ai i tatou a o faagasolo le olaga, ae ua lē taʻua foʻi isi faamatalaga, ona e ao ona malosi lo tatou faatuatua i le Tusitala o le Tusi Paia.—Tagaʻi i le itulau e 185 e oo i le 187 o le tusi Faalatalata Atu iā Ieova.

Ae faapefea pe afai ua e faia taumafaiga uma e te mafaia ina ia saʻiliʻili ai i se mataupu o loo aafia patino ai oe, ae e te lē maua lava le taʻiala po o le vaifofō o loo e manaʻomia? E mafai ona e talanoa atu i se uso talitonu e taʻumatuaina, atonu o se tasi o toeaina o le faapotopotoga. O loo iā i latou le tele o le poto o le Tusi Paia faapea le tomai i le olaga faa-Kerisiano. O le a aogā faapitoa lava la latou fesoasoani talafeagai, pe afai e te manaʻomia se fautuaga e uiga i sou faafitauli po o le faia o se filifiliga totino, auā e latou te latalata mai iā te oe, ma iloa oe ma lou tulaga. Ma aua neʻi galo ona tatalo patino atu iā Ieova e uiga i ou popolega, ma ōle atu iā te ia e taʻitaʻia ou mafaufauga e ala i le fesoasoani a lona agaga paia, “auā o Ieova e na te foaʻi mai le atamai . . . ma le faautaga loloto.”—Faata. 2:6; Luka 11:13.