ʻIa Faaauau Ona Mataala’ Aiseā e Tāua Tele Ai?

“O LE ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mata. 24:3) Ina ia tali lenā fesili, na taʻu atu e Iesu i ona soo se faailoga manino, auʻiliʻili, iloagofie ma mautinoa, e pei ona faamauina i le Mataio mataupu e 24, Mareko mataupu e 13, ma le Luka mataupu e 21. Na fetalai atili o ia: ʻIa faaauau ona outou mataala.’—Mata. 24:42.

Pe afai na matuā iloatino le faailoga, aiseā la na toe faia ai lenei apoapoaʻiga? Seʻi manatu i tulaga nei e lua. Muamua, atonu o faatosinaga ua uunaʻia ai nisi ia lē amanaʻia le faailoga, ma iʻu ai ina mou atu lo latou tulaga faaleagaga ma le mataala. Lua, e ono mātauina e se Kerisiano vala eseese o le faailoga, ae ona e lē o tele ni mea o tutupu i lona vaipanoa, ua ia faapea ai e lē o aafia tuusaʻo o ia. Atonu e iʻu ai ina manatu o ia e leʻi taitai ona oo mai le “puapuaga tele,” le tumutumuga o le valoaga a Iesu, ma e leai se māfuaaga e tatau ai fua ona ʻfaaauau ona mataala.’—Mata. 24:21.

“Latou te Leʻi Ano i Ai”

Sa faamanatu atu e Iesu i ona soo tagata na ola i aso o Noa. Sa latou mātauina le talaʻiga a Noa, le fauina o le vaa telē, faapea faiga sauā sa iai i na aso. Peitaʻi, o le toʻatele lava e “leʻi ano i ai.” (Mata. 24:37-39) Ua taatele foʻi i aso nei se uiga faapena e faatatau i lapataʻiga. O se faataʻitaʻiga, e manino le feʻau o loo taʻu mai i laupapa faailoilo i le auala mo le saoasaoa faatapulaaina o taavale, peitaʻi e lē amanaʻia e le toʻatele. E masani ona faia e le malo ni patupatu i le auala tele, ina ia faamalosia ai avetaavale e faaalu lemū a latou taavale. E faapena foʻi se Kerisiano, atonu ua ia malamalama lelei i le faailoga o aso e gata ai, ae o loo pupū pea i gaoioiga e māfua ai ona lē uaʻi atu i le faailoga. O le tulaga lenei na oo iā Arielle, o se talavou i Aferika i Sisifo.

Sa fiafia Arielle e matamata i le televise i taaloga handball a tamaʻitaʻi (o se taaloga e talitutusa ma le soka, peitaʻi e faaaogā lima). Ina ua faamaopoopo se ʻau a lana aʻoga, o le faanaunau e fia taalo na faavaivaia ai lona mataala e iloa lamatiaga e iʻu i ai i lona itu faaleagaga. Sa saini lona igoa e avea ma tagata e puipuia le laina sikoa a lana ʻau ina neʻi laasia e le isi ʻau. O le ā na iʻu i ai? Ua ia faamatala mai: “O nisi o teine o laʻu ʻau sa fai a latou uō tama, ma o nei tama sa latou faaaogāina fualaau faasāina ma ulaula. Sa latou ula mai e faapea e ese lava aʻu, ae sa ou manatu e mafai lava ona ou onosaia lenā tulaga. E aunoa ma se faatalitalia, na amata ona faaleagaina ai loʻu tulaga faaleagaga i le taaloga. Sa faatumulia loʻu mafaufau ma le loto i le taaloga. I taimi o sauniga, e masani ona ou nofo i le Maota mo Sauniga, ae taataa solo loʻu mafaufau i le malae taalo. Sa faaleagaina foʻi oʻu uiga faa-Kerisiano. Ua suia loʻu fiafia e taalo, i se uunaʻiga malosi e fia manumalo. Sa ou toleni malosi e faamalie loʻu uiga fou lenei o le agaga tauvā. Sa ou popole i taimi uma. Sa oo lava foʻi ina ou lafoaʻia aʻu uō ona o le taaloga.

 “Na ou iloa le leaga na ou oo iai, ina ua faasala la matou ʻau i se tasi o taaloga. Sa ou sauni e puipuia le laina sikoa. Ae e aunoa ma loʻu mafaufauina, sa ou tatalo iā Ieova ia fesoasoani mai iā te aʻu e poloka le polo! O lenei mea na tupu, na ou iloa ai le telē o le faalētonu i loʻu tulaga faaleagaga. Na faapefea ona ou toe faaleleia?

“Sa ou matamata i le DVD o le Young People Ask—What Will I Do With My Life? * Sa ou filifili e toe matamata i ai, ma i le taimi lea sa ou uaʻi atoatoa atu i ai. Auā foʻi, sa tutusa lelei o ma tulaga ma André, le tama talavou i le tala. Sa ou mātauina faapitoa le mea na fautua atu ai se toeaina iā André e fai—ia faitau ma manatunatu loloto i le Filipi 3:8. Na matuā pāʻia ai loʻu loto. Sa ou faamavae loa mai le ʻau.

“O lenei mau na fesoasoani iā te aʻu e faia ai se suiga tele! Sa mou atu loʻu agaga tauvā ma le popole sa iai. Sa ou matuā fiafia ma māfana atu i aʻu uō Kerisiano. Sa matuā tāua iā te aʻu galuega faaleagaga. Sa ou uaʻi atu i sauniga ma toe fiafia e auai i ai. Sa faaleleia foʻi laʻu faiva. I le taimi nei, e masani ona ou auauna o se paeonia lagolago.”

Pe afai o loo taaʻina oe i se faatosinaga ina ia lē amanaʻia le faailoga na tuuina mai e Iesu, ia faia ni laasaga maʻoti e pei ona sa faia e Arielle. Atonu e te faataʻitaʻia nisi o mea o loo mulimuli mai. Ia saʻili i le Watch Tower Publications Index, lea ua taʻua o se faafanua e suʻe ai oloa lilo. O loo faasino oe i ni fautuaga aogā, ma tala moni o loo faamatala mai ai le auala na fesagaʻia ai e isi ni tofotofoga. Ia e maua aogā atoatoa mai i sauniga faa-Kerisiano e ala i le sauniuni lelei ma fai ni faamaumauga. Ua iloa e nisi e telē le aogā o le nonofo latalata i luma o le pulelaa. Pe a iai se vaega e fai ai sao o le aofia, taumafai e fai se tali i le amataga o le mataupu. E lē gata i lea, ia faaauau ona mataala faaleagaga e ala i le faatusatusa o mea ua tutupu o loo taʻua i tala fou, ma vala o le faailoga faapea isi valoaga e faatatau i “aso e gata ai.”—2 Timo. 3:1-5; 2 Pete. 3:3, 4; Faaa. 6:1-8.

“Ia Outou Nofosauni”

Ua aafia le “lalolagi atoa” i le faailoga o aso e gata ai. (Mata. 24:7, 14) E faitau miliona tagata o loo nonofo i vaipanoa ua matuā aafia i faamaʻi, oge, mafuiʻe ma isi mea na valoia o le a tutupu. E ese mai i lea, e toʻatele isi o loo nonofo i vaipanoa o loo filemu ma toʻafilemu. Pe afai e te leʻi tofo totino i nisi o vala o le faailoga, pe e tatau ai ona e manatu e leʻi taitai lava ona oo mai le puapuaga tele? E lē atamai ona manatu faapena.

O se faaaʻoaʻoga, manatunatu i mea na valoia e Iesu e faatatau i “faamaʻi ma oge.” (Luka 21:11) Muamua, e leʻi fetalai o ia e faapea o le a aafia vaipanoa uma i nei mea i le taimi e tasi, pe e tutusa foʻi le auala e ono aafia ai. Nai lo o lea, na ia taʻua o nei mea o le a tutupu “i lea mea ma lea mea.” O lea la, e tatou te lē faatalitalia o le a tutusa mea uma e tutupu i vaipanoa uma i le taimi e tasi. Lua, ina ua faatoʻā uma ona taʻua oge, na faaalia e Iesu e tatau i nisi o ona soo ona mataala ia aua neʻi aai tele: “Ia outou uaʻi atu iā te outou lava, ina neʻi faamamafaina o outou loto i le ʻai tele.” (Luka 21:34) O lea la, e lē tatau i Kerisiano uma ona faatalitalia e tofo i vala uma o le faailoga. Nai lo o lea, na fetalai Iesu: “Pe a outou vāai ua tutupu nei mea, ia outou iloa ua  latalata mai le malo o le Atua.” (Luka 21:31) O auala faaonapōnei mo fesootaʻiga ua mafai ai ona tatou vāai i vala uma o le faailoga, e tusa lava po o ā mea o loo tutupu i o tatou vaipanoa.

Ia manatua foʻi, ua uma ona faatulagaina e Ieova le ʻaso ma le itula’ e amata ai le puapuaga tele. (Mata. 24:36) E lē avea le faagasologa o mea e tutupu i le lalolagi ma itu o le a suia ai lenei aso.

Ua apoapoaʻia e Iesu Kerisiano i so o se mea e faapea: “Ia outou nofosauni.” (Mata. 24:44) E tatau ona tatou nofosauni pea. E moni e lē mafai ona tatou auai i galuega faatiokarate i le aso atoa i aso uma o le vaiaso. Aemaise foʻi, e tatou te lē iloa le gaoioiga o le a tatou faia, pe a oo i le taimi e amata ai le puapuaga tele. O nisi atonu o loo faigaluega pe faia ni feʻau i le aiga. (Mata. 24:40, 41) O le ā la e mafai ona tatou faia ina ia nofosauni ai?

O Emmanuel ma Victorine ma le la fanau teine e toʻaono, e nonofo i se vaipanoa o Aferika e lē o matuā aafia atoatoa i vala uma e iloa ai le faailoga. O lea na latou filifili ai e faia se talanoaga faaleagaga i aso uma ina ia fesoasoani iā i latou e nofosauni ai. Ua faamatala mai e Emmanuel: “Sa faigatā ona maua se taimi e matou te avanoa uma ai. Na matou filifilia ai loa le ʻafa itula, i le va o le ono ma le ʻafa o le ono i le taeao. Pe a uma ona talanoaina le mau o le aso, e matou te saunia ni nai palakalafa i se tasi o lomiga ua faatulagaina mo le suʻesuʻega a le faapotopotoga a o faagasolo le vaiaso.” Po o fesoasoani lenei polokalame iā i latou e mataala ai pea? O le mea moni lenā! O Emmanuel o le sooupu a le ʻautoeaina i le faapotopotoga. E masani ona galue Victorine o se paeonia lagolago, ma e toʻatele i latou ua ia fesoasoani i ai ina ia talia le upu moni. O loo lelei le agaʻigaʻi i luma faaleagaga o le la fanau teine.

Ua apoapoaʻi mai Iesu iā i tatou: “Ia vaavaai pea, ia mataala pea.” (Mare. 13:33) Aua neʻi avea se faatosinaga ma mea e faavaivaia ai lou mataala faaleagaga. Nai lo o lea, ia mātau fautuaga aogā mai i a tatou lomiga ma sauniga a le faapotopotoga, e pei ona faia e Arielle. I le pei o le aiga o Emmanuel, taumafai e fai se mea i aso uma ina ia e nofosauni ai ma ʻfaaauau ona mataala.’

[Faaopoopoga i lalo]

[Ata i le itulau 4]

O talanoaga faaleagaga i aso taʻitasi, ua fesoasoani iā Emmanuel ma lona aiga ina ia “nofosauni” ai