O i Tatou o Ni Ē e “Aumau” e se Lalolagi Amioleaga
O i Tatou o Ni Ē e “Aumau” i se Lalolagi Amioleaga
ʻO i latou uma nei, o le faatuatua na latou folafola atu ai i le lautele e faapea, o i latou o tagata ese ma aumau i nuu na latou nonofo ai.’—EPE. 11:13.
1. O le ā na taʻua e Iesu e faatatau i le tulaga o ona soo ma la latou vaaiga agaʻi i le lalolagi?
NA FETALAI Iesu e faatatau i ona soo: “E i le lalolagi lava i latou.” Ae na ia taʻua e faapea: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioa. 17:11, 14) O lea la, sa manino ona faailoa mai e Iesu le tulaga o ona soo moni ma la latou vaaiga i “lenei faiga o mea a le lalolagi,” lea ua fai Satani ma ona atua. (2 Kori. 4:4) E ui lava o loo nonofo i lenei lalolagi amioleaga, ae e lē o i latou o ni tagata o le lalolagi. O lo latou tulaga i lenei lalolagi, e tatau ona avea ma “tagata ese ma ē e aumau.”—1 Pete. 2:11.
Na Latou Ola o Ni Ē e “Aumau”
2, 3. Aiseā e faapea atu ai na ola Enoka, Noa, Sara ma Aperaamo o ni “tagata ese ma aumau”?
2 Talu mai anamua, ua tu ese auauna faamaoni a Ieova mai i tagata o le lalolagi faalēmataʻu. A o lumanaʻi le Lolo, “sa savavali [Enoka ma] Noa ma le Atua moni.” (Kene. 5:22-24; 6:9) Sa avea i laʻua uma o ni ē e talaʻia atu ma le lototele faamasinoga a Ieova faasaga i le lalolagi amioleaga a Satani. (Faitau le 2 Peteru 2:5; Iuta 14, 15.) Talu ai na la savavali ma le Atua i se lalolagi faalēmataʻu, o lea “na matuā finagalo malie [ai] le Atua” iā Enoka, ma na ʻlē ponā Noa i ē na latou ola faatasi.’—Epe. 11:5; Kene. 6:9.
3 Ina ua valaaulia e le Atua Aperaamo ma Sara, sa la tuua le olaga tamaoaiga sa iai i le aai o Uro i Kaletaia, ae talia le luʻi o le ola o ni ē e maumausolo i se nuu ese. (Kene. 11:27, 28; 12:1) Na tusi le aposetolo o Paulo: “O le faatuatua na usiusitaʻi ai Aperaamo ina ua valaauina o ia, ma alu ai i se nofoaga na folafola atu e fai ma ona tofi; ona alu lea o ia, e ui lava e lē iloa le mea o loo alu i ai. O le faatuatua na aumau ai o ia e pei o se tagata ese i le nuu o le folafolaga e lē o sona nuu, na nonofo i faleʻie faatasi ma Isaako, ma Iakopo, o suli faatasi ma ia o lea lava folafolaga.” (Epe. 11:8, 9) Na taʻua e Paulo e faatatau i na auauna faamaoni a Ieova: “Na feoti i latou uma nei a o faatuatua pea, e ui lava e leʻi faataunuuina folafolaga i o latou aso, ae na latou iloa mamao atu nei mea, ma talia ma le fiafia, ma folafola atu i le lautele e faapea, o i latou o tagata ese ma aumau i nuu na latou nonofo ai.”—Epe. 11:13.
Se Lapataʻiga i Tagata Isaraelu
4. O le ā le lapataʻiga na tuu atu i tagata Isaraelu a o leʻi nofoia lo latou laueleele?
4 Sa matuā faatoʻateleina tagata Isaraelu, o ē na tupuga mai iā Aperaamo, ma na mulimuli ane faamaopoopo i se nuu na tuu atu i ai se tulafono ma se laueleele. (Kene. 48:4; Teu. 6:1) Sa lē tatau ona galo i tagata Isaraelu o Ieova o ia moni e Ona le laueleele na latou nonofo ai. (Levi. 25:23) Sa pei i latou o ni tagata nofo lisi na tatau ona usitaʻia mea e manaʻo i ai Lē e ona le fanua. E lē gata i lea, na tatau ona latou manatua “e lē na o meaʻai e ola ai le tagata”; sa lē tatau ona avea le tulaga lelei tau tamaoaiga ma pogai e latou te faagaloina ai Ieova. (Teu. 8:1-3) A o leʻi nofoia e tagata Isaraelu lo latou laueleele, sa tuu atu iā i latou le lapataʻiga lenei: “Pe a avatu oe e Ieova lou Atua i le laueleele na ia tautō ai i ou augātamā o Aperaamo, o Isaako, ma Iakopo e tuuina atu iā te oe, o le mea ua iai aai tetele ma le matagofie e te leʻi fausiaina, ma fale ua tumu i mea lelei uma e te leʻi faatumuina, o vaieli na eliina ae e te leʻi elia, o togāvine ma laau olive e te leʻi totōina, e te ʻai ma e maʻona ai, ia e leoleo iā te oe lava neʻi e faagaloina Ieova.”—Teu. 6:10-12.
5. Aiseā na teena ai e Ieova Isaraelu, ma o ai le nuu fou na tuu atu i ai lona finagalo malie?
5 Sa talafeagai lelei lenei lapataʻiga. I aso o Neemia, sa māsiasi se vaega o tagata sā Levī ina ua latou manatua le mea na tupu ina ua uma ona nofoia e tagata Isaraelu le Nuu Folafolaina. Ina ua maua e tagata Isaraelu fale lelei ma maua le anoanoaʻi o meaʻai ma uaina, na ʻlatou aai ma ua maoona ai, ma ua puputa.’ Na latou fouvale i le Atua, ma iʻu lava ina latou fasiotia perofeta na Ia auina mai e lapataʻia i latou. O lea na tuu atu ai e Ieova i latou i lima o o latou fili. (Faitau le Neemia 9:25-27; Ho. 13:6-9) Mulimuli ane, i lalo o le pulega a Roma, na faia ai e tagata Iutaia lē faamaoni se mea e sili ona leaga, o le fasiotia lea o le Mesia na folafolaina mai! Na teena e Ieova i latou, ae tuu atu lona finagalo malie i se nuu fou, o le Isaraelu faaleagaga.—Mata. 21:43; Galu. 7:51, 52; Kala. 6:16.
“E lē o Ni Tagata o le Lalolagi”
6, 7. (a) O le a faapefea ona e faamatala le fetalaiga a Iesu e faatatau i le tulaga ma le vaaiga a ona soo agaʻi i le lalolagi? (e) Aiseā na lē avea ai Kerisiano moni ma tagata o le lalolagi a Satani?
6 E pei ona faaalia i le amataga o lenei mataupu, na taʻu manino mai e le Ulu o le faapotopotoga Kerisiano, o Iesu Keriso, o le a vavaeese ona soo mai le lalolagi, o le faiga o mea amioleaga a Satani. A o lata i lona maliu, na taʻu atu e Iesu i ona soo: “Afai o ni tagata o le lalolagi outou, e alofa mai le lalolagi iā te outou auā o ona tagata. A o lenei, e lē o ni tagata o le lalolagi outou, a ua ou filifilia outou mai i le lalolagi, o le mea lea e ʻinoʻino ai le lalolagi iā te outou.”—Ioa. 15:19.
7 A o salalau atu le faa-Kerisiano, pe sa tatau ona talia e Kerisiano le lalolagi ma faataʻitaʻi i ana faiga, ma avea o ni tagata o le lalolagi? E leai. Po o fea lava na latou nonofo ai, sa tatau ona manino atu e ese i latou mai le lalolagi a Satani. Pe tusa o le 30 tausaga talu ona mavae le maliu o Keriso, na tusi atu ai le aposetolo o Peteru i Kerisiano na nonofo i vaipanoa eseese na pulea e Roma: “Le ʻaupele e, ou te ʻaiʻoi atu iā te outou o tagata ese ma ē e aumau, ina ia faamamao pea mai i tuʻinanauga o le tino, o mea lava ia e feteenaʻi ma le loto. Ia outou tausisi i le amiolelei i luma o tagata o le lalolagi.”—1 Pete. 1:1; 2:11, 12.
8. Na faapefea ona faamatala e se tasi tusitala o talafaasolopito le tulaga o uluaʻi Kerisiano i le lalolagi?
8 Na faamaonia e le tusitala o talafaasolopito o Kenneth Scott Latourette, na amioaʻi uluaʻi Kerisiano o ni “tagata ese ma aumau” i le pulega a Roma, ina ua ia tusia: “O se tasi o mea na lauiloa i le talafaasolopito, o le feagai o Kerisiano ma sauāga faifai pea ma ogaoga, i uluaʻi senituri e tolu o le faa-Kerisiano . . . E eseese ituaiga tuuaʻiga. Na tuuaʻia Kerisiano e faapea e lē talitonu i le Atua, ona e leʻi auai i aso faamanatu faapaupau. E ala i lo latou lē auai i mea e masani ai olaga o tagata—o tausamiga faapaupau, faafiafiaga i le lautele lea sa manatu i ai Kerisiano o ni talitonuga, faiga ma amioga lē mamā e matuā faapaupau—na faifaia ai i latou o ni ē e ʻinoʻino i tagata.”
Ia Lē Faaaogā Atoatoa le Lalolagi
9. I le avea ai ma Kerisiano moni, e faapefea ona tatou faamaonia atu e lē o i tatou “o ni ē e ʻinoʻino i tagata”?
9 O le ā le tulaga ua iai i aso nei? I le pei o uluaʻi Kerisiano, o loo tumau ona lē avea i tatou ma tagata o “le faiga leaga o mea o loo iai nei.” (Kala. 1:4) Ona o lenei tulaga, e toʻatele tagata ua lē malamalama iā i tatou ma ua iʻu lava ina ʻinoʻino isi iā i tatou. Peitaʻi, e mautinoa e lē o i tatou “o ni ē e ʻinoʻino i tagata.” O lo tatou alolofa i tagata ua tatou ō atu ai mai lea fale i lea fale, ma faia taumafaiga uma ina ia faaoo atu ai i tagata uma le “tala lelei o le malo [o le Atua].” (Mata. 22:39; 24:14) Ua tatou faia faapea ona ua tatou talitonu, ua lē o toe umi ona faaumatia lea e le pulega o le Malo o Ieova lea e pule ai Keriso, pulega a tagata lē lelei atoatoa, ae suia i se faiga fou amiotonu o mea.—Tani. 2:44; 2 Pete. 3:13.
10, 11. (a) E faapefea ona tatou faaaogāina le lalolagi? (e) O ā nisi o auala ua taumamao ai Kerisiano mataala mai le faaaogāina atoatoa o le lalolagi?
10 Ona ua matuā lalata mai le iʻuga o lenei faiga amioleaga o mea, ua tatou iloa ai e lē o le taimi lenei e tuliloa ai se olaga faifaimālie i lenei lalolagi o le a mavae atu. E tatou te utagia upu a le aposetolo o Paulo: “Ou te fai atu iā te outou le ʻauuso e, ua itiiti le taimi o totoe. O i latou . . . o faatau mai, ia peiseaʻī e leai ni mea, ma o i latou o faaaogāina mea a le lalolagi, ia peiseaʻī e lē o faaaogāina atoatoa; auā o loo suia le tulaga o mea a lenei lalolagi.” (1 Kori. 7:29-31) Ae e faapefea ona faaaogā e Kerisiano i aso nei le lalolagi? E ala i le faaaogāina o tekinolosi faaonapōnei ma auala o fesootaʻiga, ina ia faasalalau atu ai i le lalolagi aoao le poto faale-Tusi Paia i le faitau selau o gagana. E latou te galulue ma suʻe tupe ina ia ola ai, ma e latou te faatauina foʻi mea e manaʻomia mo aso taʻitasi. Peitaʻi, e latou te ʻalofia le faaaogāina atoatoa o le lalolagi, e ala i le tuu o meafaitino ma galuega totogi faalelalolagi, i le tulaga talafeagai e tatau ona iai.—Faitau le 1 Timoteo 6:9, 10.
11 O Kerisiano mataala e taumamao mai le faaaogāina atoatoa o le lalolagi e tusa ai o aʻoaʻoga maualuluga. O le toʻatele o tagata o lenei lalolagi e manatu i aʻoaʻoga maualuluga, e na o le pau lea o le auala e maua ai se olaga manuia ma taualoa. Peitaʻi o i tatou o Kerisiano e ola o ni ē e aumau, ma e ese sini e tatou te tuliloaina. E tatou te ʻalofia le “manatu i mea silisili.” (Roma 12:16; Iere. 45:5) Talu ai o i tatou o soo o Keriso, o lea e tatou te utagia ai lana lapataʻiga lenei: “Ia outou mataala pea ma leoleo iā te outou i le manaʻo tele, auā e lē ola se tasi i le tele o ana mea ua iā te ia.” (Luka 12:15) O lea la, ua faalaeiauina Kerisiano talavou ia tuliloa sini faaleagaga. E ao ona maua aʻoaʻoga e manaʻomia ina ia mafai ona saʻilia ai mea e ola ai, a o taulaʻi atu i le sauniunia o i latou e auauna atu iā Ieova ʻma o latou lotoatoa, ola atoa, malosi atoa, ma le mafaufau atoa.’ (Luka 10:27) O le faia faapea e mafai ai ona latou “mauʻoa i le silafaga a le Atua.”—Luka 12:21; faitau le Mataio 6:19-21.
ʻAlofia le Popole i Mea o le Olaga Nei
12, 13. E faapefea i le utagiaina o fetalaiga a Iesu o loo i le Mataio 6:31-33, ona faaesea ai i tatou mai i tagata o le lalolagi?
12 E ese auauna a Ieova mai i tagata o le lalolagi, i le auala e latou te manatu ai i meafaitino. E tusa ai o lenei tulaga, na fetalai Iesu i ona soo: “Ia aua lava neʻi outou popole ma faapea ane, ʻO le ā se mea tatou te aai ai?’ ʻO le ā se mea tatou te inu ai?’ ʻO le ā foʻi se mea tatou te oofu ai?’ Auā o mea uma ia o loo saʻilia ma le naunau e tagata o nuu ese. Ae ua silafia e lo outou Tamā o i le lagi, o mea uma ia o loo outou manaʻomia. O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.” (Mata. 6:31-33) Ua iloa e le toʻatele o o tatou uso talitonu mai i mea na tutupu iā i latou, e saunia e lo tatou Tamā i le lagi mea e tatou te manaʻomia.
13 “E tele mea e maua mai le faamaoni i le Atua ma le lotomalie.” (1 Timo. 6:6) E matuā tuufaafeagai lenei manatu ma le vaaiga a tagata i le lalolagi i aso nei. O se faaaʻoaʻoga, pe a faaipoipo ni tagata talavou, o le toʻatele o i latou e faatalitalia ia maua i le taimi lava lea mea uma e latou te mananaʻo i ai—se fale lelei e tumu i meafale taugatā ma anagatā, se taavale manaia ma masini fou faaonapōnei. Peitaʻi, o Kerisiano o loo ola o ni ē e aumau, e latou te lē naunau i ni mea e sili atu nai lo o mea o loo manaʻomia ma mafai ona latou mauaina. O lea la, o se fiafiaga le vaai atu ua faataulaga e le toʻatele le mauaina o ni meafaitino se tele, ina ia mafai ona faaalu le tele o le taimi ma le malosi i le auaunaga iā Ieova o ni tagata talaʻi maelega o le Malo. O isi ua auauna o ni paeonia, galulue i le Peteli, le galuega femalagaaʻi po o ni misionare. Ua tatau ai iā i tatou uma ona matuā talisapaia le auaunaga ma le lotoatoa a o tatou uso tapuaʻi iā Ieova!
14. O le ā le lesona e tatou te aʻoaʻoina mai le talafaatusa a Iesu e faatatau i le tagata lūlū fatu?
14 I le talafaatusa a Iesu e faatatau i le tagata lūlū fatu, na taʻua ai e Iesu “o le popole i mea a lenei lalolagi ma le malosi taufaasesē o le ʻoa,” e mafai ona fetinaʻiina ai le upu a le Atua i o tatou loto ma tatou lē fua mai ai. (Mata. 13:22) O lo tatou lotomalilie e ola o ni ē e aumau i lenei faiga o mea, e fesoasoani iā i tatou ia ʻalofia ai le paʻuʻū atu i lenei mailei. Nai lo o lea, e mafai ai ona “lelei” la tatou vaai, pe “taulaʻi” le vaai “i le mea e tasi,” o le Malo lea o le Atua ma faamuamua i o tatou olaga mea e fesootaʻi atu i le Malo.—Mata. 6:22, fpl.
ʻE Mavae Atu le Lalolagi’
15. O le ā na taʻua e le aposetolo o Ioane e faatatau i lenei lalolagi?
15 O se tasi o māfuaaga autū ua ola ai Kerisiano moni o ni “tagata ese ma ē e aumau” i lenei lalolagi, ona ua latou talitonu ua lē o toe umi ona mavae atu lea o lenei lalolagi. (1 Pete. 2:11; 2 Pete. 3:7) E faamaonia lenei tulaga e ala i a tatou filifiliga i le olaga, o tatou faanaunauga ma moomooga. Na fautuaina e le aposetolo o Ioane ona uso talitonu ia aua neʻi mananaʻo i le lalolagi po o mea o iai i le lalolagi, auā “e mavae atu . . . le lalolagi faapea ma ona tuʻinanauga, a o lē e faia le finagalo o le Atua e tumau e faavavau.”—1 Ioa. 2:15-17.
16. E faapefea ona faaalia ua tatou vavae ese o ni tagata e matuā ese mai i tagata o le lalolagi?
16 Na taʻu atu i tagata Isaraelu afai e usiusitaʻi iā Ieova, o le a avea i latou ma ana “oloa tāua i lo o isi nuu uma.” (Eso. 19:5) Ina ua faamaoni tagata Isaraelu, sa ese i latou mai i isi nuu uma i le auala e tapuaʻi ma ola ai. I aso foʻi nei, ua vavae ese e Ieova mo ia lava ni tagata, o ē ua matilatila mai e matuā ese mai i tagata o le lalolagi a Satani. Ua taʻu mai i le Tusi Paia iā i tatou: “Ia teena amioga faalēmataʻu ma tuʻinanauga o le lalolagi, ma ia ola ma le mafaufau lelei, ma le amiotonu, ma le faamaoni i le Atua i le faiga o mea a lenei lalolagi, a o tatou faatalitali i le faamoemoe fiafia ma le faaali mai i le mamalu o le Atua sili, atoa ma lo tatou Faaola o Keriso Iesu, o lē na foaʻi mai o ia lava mo i tatou ina ia laveaʻiina i tatou mai so o se solitulafono, ma faamamāina i tatou mo ia lava e fai ma ona tagata, o ē e maelega i galuega lelei.” (Tito 2:11-14) O nei “tagata” ua faia aʻe i Kerisiano faauuina ma le faitau miliona o “isi mamoe” a Iesu, o ē o loo fesoasoani ma lagolago atu i le ʻaufaauuina.—Ioa. 10:16.
17. Aiseā o le a lē taitai ai ona faanoanoa le ʻaufaauuina ma a latou aumea, ona o le ola o ni ē e aumau i lenei lalolagi amioleaga?
17 O “le faamoemoe fiafia” o Kerisiano faauuina, ia nofotupu faatasi ma Keriso i le lagi. (Faaa. 5:10) Pe a faataunuuina le faamoemoe o le ola e faavavau i le lalolagi mo isi mamoe, o le a lē toe avea i latou o ni ē e aumau i se lalolagi amioleaga. O le a latou maua ni fale mananaia, ma le anoanoaʻi o meaʻai ma vaiinu. (Sala. 37:10, 11; Isa. 25:6; 65:21, 22) I le lē pei o tagata Isaraelu, o le a lē taitai ona galo i isi mamoe, o nei mea uma e mai iā Ieova “le Atua o le lalolagi uma.” (Isa. 54:5) O le a lē taitai ona faanoanoa le ʻaufaauuina ma isi mamoe, ona o le ola o ni ē e aumau i lenei lalolagi amioleaga.
O le ā Lau Tali?
• O le ā le auala na ola ai tane faamaoni i aso anamua o ni ē e aumau?
• Na faapefea ona amioaʻi uluaʻi Kerisiano e tusa ai o le lalolagi?
• E faapefea ona lē faaaogāina atoatoa e Kerisiano le lalolagi?
• Aiseā o le a lē taitai ai ona tatou faanoanoa ona o le ola o ni ē e aumau i lenei lalolagi amioleaga?
[Fesili mo le Suʻesuʻega]
[Ata i le itulau 18]
E leʻi auai uluaʻi Kerisiano i faafiafiaga sauā ma lē mamā
