Pe E te Maua le Fiafia i le ʻFaaeaga o le Foaʻi Atu ma le Agalelei’?

SA LAUILOA uluaʻi Kerisiano i Filipi i lo latou lagolagosua ma le limafoaʻi i le tapuaʻiga moni. I le tusi faagaeeina a Paulo na avatu iā i latou, na tusi atu ai e faapea: “Ou te faafetai pea i loʻu Atua ona o mea uma ua ou manatua iā te outou i aʻu talosaga uma mo outou uma, a o oʻu ofo atu ma le olioli aʻu talosaga, ona o le fesoasoani ua outou faia i le tala lelei mai lava i le uluaʻi aso seʻia oo mai i le asō.” (Fili. 1:3-5) Sa manatua lelei e Paulo, ina ua papatiso Litia ma lona aiga, sa tauanau atu Litia e talimālō iā te ia ma ana aumea talaʻi ina ia nonofo i lona fale.—Galu. 16:14, 15.

E leʻi leva ona mavae lenā taimi, ae faalua ona foaʻi atu e le faapotopotoga fou faatoʻā faavaeina i Filipi, mea na manaʻomia e Paulo a o nonofo faatasi ma uso talitonu i Tesalonia mo ni nai vaiaso, e lata i le 100 maila (160 km) le mamao. (Fili. 4:15, 16) I ni nai tausaga mulimuli ane ai, a o feagai uso i Filipi ma isi uso i Maketonia ma mafatiaga ma le “matuā mativa,”  sa latou faalogo na iai mea na manaʻomia e Kerisiano na sauāina i Ierusalema, ma na mananaʻo e fesoasoani atu iā i latou. Sa taʻutino atu e Paulo, o lenei mea e matuā “sili atu i lo mea na latou mafaia.” Peitaʻi, na tusi o ia: ʻNa latou matuā ʻaiʻoi mai iā i matou mo se faaeaga e foaʻi atu ma le agalelei.’—2 Kori. 8:1-4; Roma 15:26.

Pe tusa ma le sefulu tausaga mulimuli ane ina ua talia e tagata Filipi le faa-Kerisiano, sa latou faaalia pea le uiga lava lea o le lagolagosua ma le limafoaʻi. Ina ua faalogo ua faafalepuipui Paulo i Roma, sa latou auina atu Epaferoti e faimalaga i le laueleele ma le sami i le mamao e 800 maila (1,287 km), ina ia avatu mea na manaʻomia mo le aposetolo. E manino mai, sa mananaʻo Kerisiano i Filipi ia saunia mea mo Paulo, ina ia mafai ai ona ia faamalosia pea uso ma faaauau ona talaʻi, e tusa lava pe sa faafalepuipui o ia.—Fili. 1:12-14; 2:25-30; 4:18.

I aso nei, ua manatu Kerisiano o se faaeaga le lagolagoina o le galuega talaʻi o le Malo ma le faia o isi ma soo. (Mata. 28:19, 20) O loo latou faaauiluma mea e fesootaʻi atu i le Malo e ala i le ofo atu o lo latou taimi, malosi ma alagāʻoa. O loo taʻua i le pusa nisi o auala e mafai ona faia ai sou sao i le lagolagoina o lenei galuega mai i le Atua.

[Pusa i le itulau 22]

AUALA UA FILIFILIA E NISI E FOAʻI AI

MEAALOFA MO LE GALUEGA I LE LALOLAGI AOAO

E toʻatele i latou ua faaagaga se vaega tupe e lafo i pusa o loo faailogaina, “Galuega i le Lalolagi Aoao.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina atu meaalofa o tupe i le Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, po o le ofisa o le lālā o Molimau a Ieova o loo vaavaaia lou atunuu. (O foaʻi tauofo o loo taʻua i lalo, e mafai foʻi ona auina atu i le lālā o Molimau a Ieova o loo vaavaaia lou atunuu.) E ao ona tusia le igoa “Watchtower” i se siaki pe a fia faia se foaʻi i lenā auala. E mafai foʻi ona foaʻi atu mea tāua e pei o filifili, tautaliga, taulima auro, ma mea faapena. E tatau ona auina atu faatasi ma na foaʻi se tusi puupuu e faailoa atu ai, o na mea ua foaʻi atu i le lālā e aunoa ma ni tuutuuga.

FUAFUAGA O FOAʻI E IAI TUUTUUGA

E mafai ona foaʻi atu se tupe mo le galuega i le lalolagi aoao, e teuina i se āiāiga faapitoa ma le Watch Tower Bible and Tract Society of Pennsylvania. Ae e mafai ona toe faafoʻi atu lenā foaʻi i lē e ana le tupe pe a ia talosagaina. Mo nisi faamatalaga, faamolemole faafesootaʻi le Treasurer’s Office (Ofisa o le Teutupe), i le tusi atu i le tuatusi o loo taʻua i luga pe telefoni foʻi i ai i le (718) 560-7500.

FUAFUAGA O FOAʻI FAAMEAALOFA

E lē gata i foaʻi tautupe, ae e iai isi auala e faia ai foaʻi mo le galuega o le Malo i le lalolagi aoao. E aofia ai mea nei:

Inisiua: E mafai ona tusia le Watch Tower Bible and Tract Society of Pennsylvania, e uili i ai le inisiua o le ola o se tasi, po o tupe e maua pe a litaea, po o penisione.

Teugātupe i le Faletupe: O teugātupe i le faletupe, pepa o teugātupe, po o tupe e maua e le tagata pe a litaea, e mafai ona tuu faamavaega pe totogi atu pe a maliu, mo le Watch Tower Bible and Tract Society of Pennsylvania, ma ia faia e tusa ma faatulagaga a faletupe o le atunuu.

Tupe Faafaigaluega ma Pepa Faamaonia mo Tupe: O nei mea e mafai ona foaʻi faameaalofa tuusaʻo atu i le Watch Tower Bible and Tract Society of Pennsylvania, pe tusi i lalo le Watch Tower Bible and Tract Society of Pennsylvania, o lē e mauaina mea pe a maliu se tasi.

Fanua ma Fale: E mafai ona foaʻi atu au meatotino e pei o fanua po o fale, pe tuu le fale po o le fanua e nofo ai pea lē e ana seʻia oo ina maliu, ona faatoʻā maua lea e le lālā. Ia faafesootaʻi le ofisa o le lālā i lou atunuu, a o leʻi faia pepa e foaʻi atu se fanua.

Tupe Faameaalofa e Iai Tuutuuga: O nei tupe, o se meaalofa ua faatulaga e avatu i se faalapotopotoga faaletulafono o loo faaaogāina e Molimau a Ieova. Ae e maua e lē e ana le foaʻi po o se tasi ua ia tofia, se tino i tupe i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga na faamautūina ai lea fuafuaga.

Uili ma Mavaega: E mafai ona foaʻi atu meatotino po o se vaega tupe i le Watch Tower Bible and Tract Society of Pennsylvania, e ala i se uili ua faia e tusa ai ma le tulafono, pe avea foʻi le Watch Tower Bible and Tract Society of Pennsylvania ma lē e mauaina le taui o se teugātupe ua tuu faamavaega. O se teugātupe ua tuu faamavaega mo se faalapotopotoga faalelotu, e mafai ona faaitiitia ai lafoga e totogi.

E pei ona faailoa mai i le faaupuga “fuafuaga o foaʻi faameaalofa,” o nei foaʻi, e manaʻomia ona fuafua lelei e lē e ana le foaʻi. Ina ia fesoasoani i ē o loo fia faia ni meaalofa tauofo i le galuega a Molimau a Ieova i le lalolagi aoao, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Ua saunia i le polosiua faamatalaga i auala eseese e faia ai foaʻi faameaalofa i le taimi nei, ma pe a maliu lē e ana le foaʻi. Pe a uma ona faitau le toʻatele i le polosiua ma talanoa ma a latou lōia po o tagata faufautua e faatatau i lafoga, ua mafai loa ona latou lagolagoina galuega a Molimau a Ieova i le lalolagi aoao, ma maua ai foʻi le fesoasoani i le faaitiitia o lafoga e totogi. E maua se kopi o lenei polosiua mai le Charitable Planning Office.

Mo nisi faamatalaga, faafesootaʻi le Charitable Planning Office, e ala i lou tusi atu i le tuatusi pe telefoni atu foʻi i le numera o loo taʻua i lalo, pe faafesootaʻi le ofisa o le lālā o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefoni: (845) 306-0707