Aiseā e Tatau ai ona Taʻitaʻia e le Agaga o le Atua?

“O oe o loʻu Atua. E lelei lou agaga; ia taʻitaʻia ai aʻu.”—SALA. 143:10.

1. Faataʻitaʻi mai le tāua o se taʻitaʻiga lelei pe afai o loo malaga atu se tasi i se nofoaga e lē masani ai.

SEʻI faapea o loo e malaga atu i se nofoaga e te lē masani ai. O loo lua faimalaga faatasi ma se tasi e te maufaatuatuaina sa iai muamua i lenā nofoaga. Pe afai e masani lelei o ia i le auala e agaʻi atu i lenā nofoaga, o le a ia taʻitaʻia la oe. Afai e te usitaʻi i lana taʻitaʻiga, o le a e lē sē i lenā nofoaga.

2, 3. (a) O le ā le mana e sili ona malosi sa faaaogā e Ieova anamuā? (e) Aiseā e tatau ai ona tatou faatalitalia le malosi lē vaaia o le Atua e taʻitaʻia ai o tatou olaga i aso nei?

² O loo iai se malosi lē vaaia e sili atu ona tāua mo lo tatou taʻitaʻiga. O le ā lenā malosi lē vaaia? O loo faamatalaina i fuaiupu amata o le Tusi Paia. Ua taʻua i le Kenese e faatatau i mea na foafoaina e Ieova anamuā: “Na foafoaina e le Atua le lagi ma le lalolagi i le amataga.” A o ia faia faapea, sa ia auina mai se mana e sili ona malosi, auā ua faapea mai le tala o le foafoaga: “Na fegaoioiaʻi foʻi le mana o le Atua.” (Kene. 1:1, 2) O le ā le mana sa faaaogā e le Atua? O le agaga paia—le malosi galue lea sa faia ai le foafoaga. E tatou te lotofaafetai ona na faaaogā e Ieova lona agaga paia e foafoaina ai i tatou ma isi mea uma.—Iopu 33:4; Sala. 104:30.

³ E tatou te iloa na faaaogā e Ieova lona malosi galue e foafoaina ai i tatou, ae pe e mafai e lenei malosi ona taaʻina ai nisi o vala o o tatou olaga? Sa iloa e le Alo o le Atua e tatau ona tatou faatalitalia le mea lenā, auā na fetalai Iesu i ona soo: ʻE taʻitaʻia e le agaga outou i upu moni uma.’ (Ioa. 16:13) O le ā le agaga paia, ma aiseā e tatau ai ona taʻitaʻia i tatou e le agaga paia?

O le ā le Agaga Paia?

4, 5. (a) O le ā le manatu sesē o ē e talitonu i le Tolutasi e faatatau i le agaga paia? (e) E faapefea ona e faamatala le uiga moni o le agaga paia?

⁴ Atonu o nisi o tagata ua e talanoa i ai i le talaʻiga, e lē faale-Tusi Paia lo latou manatu e faatatau i le agaga paia. O tagata e talitonu i le Tolutasi, ua manatu sesē e faapea o le agaga paia o se foafoaga agaga e tutusa ma le Atua le Tamā. (1 Kori. 8:6) Ae e manino le mata o le vai, e feteenaʻi le aʻoaʻoga o le Tolutasi ma le manatu o le Tusi Paia.

⁵ O le ā moni lava la le agaga paia? O le upu Eperu o le ruʹach lea o loo faaaogā i le Kenese 1:2, e mafai ona faaliliuina i le upu “mana,” ae ua faaliliuina foʻi i le upu “matagi” ma isi upu ina ia faamatala ai se mana galue lē vaaia. (Faatusatusa i le Kenese 3:8; 8:1.) E pei lava ona lē vaaia le matagi ae e tatou te vaaia aafiaga o lona malosi, e faapena foʻi ona lē vaaia le agaga paia ae e tatou te mātauina ona aafiaga. O lenei agaga e lē o se peresona, ae o le malosiaga mai i le Atua e tuuina atu i tagata po o ni mea ina ia faataunuu ai lona finagalo. Pe e faigatā ona talitonu o lenā malosi ofoofogia e mai i le Atua, o Lē e ona le malosi uma lava? E leai!—Faitau le Isaia 40:12, 13.

6. O le ā le mea na ʻaiʻoi atu ai Tavita iā Ieova?

⁶ Pe e mafai ona faaaogā pea e Ieova lona  agaga ina ia taʻitaʻia ai i tatou i le olaga atoa? Na folafola mai e Ieova i le faisalamo o Tavita: “Ou te foaʻi atu iā te oe le tofā mamao, ma faatonu oe i le ala e ao ona e savali ai.” (Sala. 32:8) Pe na manaʻo ai Tavita? Ioe, auā sa ia ʻaiʻoi atu iā Ieova: “Ia e aʻoaʻo mai iā te aʻu e faia lou finagalo, auā o oe o loʻu Atua. E lelei lou agaga; ia taʻitaʻia ai aʻu.” (Sala. 143:10) E tatau foʻi ona iā i tatou lenā faanaunauga ma ia lotomalilie e taʻitaʻia e le agaga o le Atua. Aiseā? Seʻi o tatou iloiloina māfuaaga e fā.

E lē Mafai Ona Tatou Taʻitaʻia i Tatou Lava

7, 8. (a) Aiseā e lē mafai ai ona tatou taʻitaʻia i tatou lava e aunoa ma le taʻitaʻiga a le Atua? (e) Faataʻitaʻi mai le māfuaaga e lē tatau ai ona tatou taumafai e taʻitaʻia i tatou lava i lenei faiga amioleaga o mea.

⁷ Muamua, e tatau ona tatou mananaʻo e taʻitaʻia e le agaga o le Atua, ona e lē mafai ona tatou taʻitaʻia i tatou lava. O le “taʻitaʻia,” o lona uiga “ia faasino atu i se ala pe faailoa atu le auala e ao ona mulimuli i ai.” Peitaʻi, e leʻi foafoaina e Ieova i tatou ma le tomai e faia ai faapena iā i tatou lava, aemaise lava i lo tatou tulaga lē lelei atoatoa. Na tusi lana perofeta o Ieremia: “Ieova e, ua ou iloa lelei, e lē o i le tagata lona ala. E lē o i le tagata foʻi e savali, ona faatonuina le mea e ui ai o ia.” (Iere. 10:23) Aiseā? Na taʻu mai e Ieova iā i tatou le māfuaaga e ala mai iā Ieremia. Na fetalai Ieova e faatatau i lo tatou tagata i totonu: “E sili ona faaʻoleʻole le loto nai lo o mea uma, ma e matuā leaga lava. O ai sē e mafai ona iloa?”—Iere. 17:9; Mata. 15:19.

⁸ Seʻi faapea o loo savalia e se tasi se nofoaga e lē saogalemu ma e lē masani ai, e pei o se vaomatua po o se toafa. E lē o se mea atamai ona alu na o ia, e aunoa ma se tagata e masani i lea nofoaga ina ia taʻitaʻia o ia. Pe afai e lē iloa e le tagata le auala e faasaoina ai i se nofoaga faapena ma le auala e taunuu saogalemu ai, o le a lamatia la lona ola. E faapena foʻi le tagata e manatu e mafai ona ia taʻitaʻia o ia lava i lenei lalolagi amioleaga, e aunoa ma le faalagolago atu i le Atua e faailoa mai iā te ia le ala saʻo, e lamatia foʻi lona ola. E pau le auala e mafai ona tatou taulau manuia ai i la tatou faigāmalaga i lenei faiga o mea, o le tatalo atu lea iā Ieova e pei ona faia e Tavita: “Ia savali oʻu vae i ou ala, e lē tautevateva lava oʻu vae.” (Sala. 17:5; 23:3) E mafai faapefea ona tatou maua lenā taʻitaʻiga?

9. E pei ona faaalia i le ata i le itulau e 17, e mafai faapefea ona avea le agaga o le Atua o se taʻiala mautinoa mo i tatou?

⁹ Pe afai e tatou te lotomaulalo ma lotomalilie e faalagolago atu iā Ieova, o le a ia foaʻi mai lona agaga paia o se taʻiala mautinoa mo o tatou ala. E faapefea ona fesoasoani lenā mana galue iā i tatou? Na faamatala atu e Iesu i ona soo: “O le fesoasoani, o le agaga paia lea e auina mai e le Tamā i loʻu igoa, e aʻoaʻo iā te outou i mea uma, ma faamanatu atu i o outou mafaufau mea uma na ou taʻu atu.” (Ioa.  14:26) A o tatou tatalo ma suʻesuʻeina e lē aunoa le Afioga a le Atua, e aofia ai ma fetalaiga uma a Keriso, o le a faateleina e le agaga paia lo tatou malamalama e faatatau i le loloto o le atamai o Ieova, ona mafai lea ona tatou matuā usiusitaʻi i lona finagalo. (1 Kori. 2:10) E lē gata i lea, pe a tutupu ni mea e leʻi faatalitalia i o tatou olaga, o le a faasino mai e le agaga paia le ala e ao ona tatou ui ai. O le a fesoasoani mai foʻi le agaga paia iā i tatou e manatua mataupu silisili o le Tusi Paia ua uma ona tatou aʻoaʻoina, ma fesoasoani ia iloa le auala e faatatau ai na mataupu silisili ina ia faia ni filifiliga lelei.

Sa Taʻitaʻia Iesu e le Agaga o le Atua

10, 11. O le ā na faatalitalia e le Alo e toʻatasi o le Atua e tusa ai o le agaga paia, ma o le ā na tupu iā te ia?

¹⁰ O le māfuaaga lona lua e tatau ai ona tatou mananaʻo e taʻitaʻia e le agaga paia, ona sa taʻitaʻia e le Atua lona Alo i le agaga paia. A o leʻi afio mai le Alo e toʻatasi o le Atua i le lalolagi, sa ia iloaina le valoaga lenei: “O le a oo iā te ia le agaga o Ieova ma tumau ai, o le agaga o le atamai ma le malamalama, o le agaga o le fautuaga ma le mana, o le agaga o le poto ma le mataʻu iā Ieova.” (Isa. 11:2) Seʻi manatu i le matuā naunau o Iesu e maua le fesoasoani a le agaga o le Atua, a o soifua i se siʻomaga faigatā i inei i le lalolagi!

¹¹ Sa taunuu moni afioga a Ieova. O loo taʻua i le Evagelia a Luka le mea na tupu i le taimi lava na uma ai le papatisoga o Iesu: “Ua maliu ese Iesu mai Ioritana, ua tumu o ia i le agaga paia, ma ua taʻitaʻiina o ia e le agaga i le toafa.” (Luka 4:1) I inā, a o anapogi, tatalo ma manatunatu loloto Iesu, e foliga mai na faatonu ma faamanino e Ieova lona Alo e faatatau i mea o le a tutupu iā te ia i le lumanaʻi. Sa fesoasoani le mana galue o le Atua i le mafaufau ma le loto o Iesu, ma na taʻitaʻia ai ona mafaufauga ma ana filifiliga. O le iʻuga, sa silafia e Iesu le mea e ao ona fai i tulaga taʻitasi, ma sa ia faia le mea tonu na finagalo lona Tamā e na te faia.

12. Aiseā e ao ai ona tatou ōle atu mo le agaga o le Atua ina ia taʻitaʻia ai i tatou?

¹² O le iloaina o le tāua o aafiaga o le agaga o le Atua i lona olaga, na matuā faalaeiau ai e Iesu ona soo ia ōle atu mo le agaga paia ma ia taʻitaʻia ai i latou. (Faitau le Luka 11:9-13.) Aiseā e tatau ai ona tatou faia faapea? Talu ai e mafai ona suia ai o tatou mafaufauga ina ia ōgatusa ma le finagalo o Keriso. (Roma 12:2; 1 Kori. 2:16) E ala i le taʻitaʻia o o tatou olaga e le agaga o le Atua, o le a mafai ai ona tatou mafaufau e pei o Keriso ma faataʻitaʻi i lana faaaʻoaʻoga.—1 Pete. 2:21.

O le a Taʻitaʻisesēina i Tatou e le Agaga o le Lalolagi

13. O le ā le agaga o le lalolagi, ma o ā mea e na te faapogaia tagata e fai?

¹³ O le māfuaaga lona tolu e tatau ai ona tatou mananaʻo e taʻitaʻia e le agaga o le  Atua, ona a aunoa ma lenā taʻitaʻiga, o le a taʻitaʻisesēina i tatou e le agaga o le lalolagi lea ua pulea olaga o le toʻatele o tagata i aso nei. O lenei agaga o le lalolagi, o se uunaʻiga malosi e faapogaia ai tagata e faia mea e matuā tuufaafeagai ma mea e taʻitaʻia i tatou e le agaga paia e fai. Nai lo o le fesoasoani i tagata ia maua le finagalo o Keriso, ua faapogaia e le agaga o le lalolagi tagata ia mafaufau ma gaoioi e pei o le pule o le lalolagi, o Satani. (Faitau le Efeso 2:1-3; Tito 3:3.) Pe a lolo atu se tagata e pulea o ia e le agaga o le lalolagi ma amata ona ia faia galuega a le tino, e mataʻutia āuga e iʻu i ai, ma taofia ai o ia mai le avea o le Malo o le Atua e fai ma ona tofi.—Kala. 5:19-21.

14, 15. E mafai faapefea ona tatou taulau i le teenaina o le agaga o le lalolagi?

¹⁴ Ua faaauupegaina e Ieova i tatou ina ia teena le agaga o le lalolagi. Na faapea mai le aposetolo o Paulo ia “maua pea e outou le mana mai i le Alii, ma le tele o lona malosi . . . ina ia mafai ona outou tetee atu pe a oo i le aso leaga.” (Efe. 6:10, 13) E aumaia e Ieova iā i tatou le malosi e ala i lona agaga, ina ia teena ai taumafaiga a Satani e taʻitaʻisesēina i tatou. (Faaa. 12:9) E malosi tele le agaga o le lalolagi, ma e lē mafai ona tatou matuā ʻalofiaina. Peitaʻi, e mafai ona tatou teena lenā agaga. E sili atu ona malosi le agaga paia, ma o le a fesoasoani mai iā i tatou!

¹⁵ Na taʻua e le aposetolo o Paulo e faatatau i ē na tuua le faa-Kerisiano i le uluaʻi senituri: “Ua lafoaʻi le ala saʻo, ma ua faasesēina foʻi i latou.” (2 Pete. 2:15) Maʻeu lo tatou lotofaafetai ona e tatou te leʻi maua “le agaga o le lalolagi, a o le agaga mai i le Atua”! (1 Kori. 2:12) E ala i le taʻitaʻia e le agaga paia ma faaaogā sauniuniga uma a Ieova ina ia ui ai pea i le ala saʻo i le itu faaleagaga, e mafai ai ona tatou taulau i le teenaina o le agaga faasatani o lenei lalolagi amioleaga.—Kala. 5:16.

E Fua Mai e le Agaga Paia Fua Lelei

16. O le ā le fua e mafai e le agaga paia ona fua mai i totonu o i tatou?

¹⁶ O le māfuaaga lona fā e tatau ai ona tatou mananaʻo e taʻitaʻia e le agaga o le Atua, ona o ē o loo taʻitaʻia e le agaga, e latou te fuaina mai fua lelei. (Faitau le Kalatia 5:22, 23.) O ai o i tatou e lē manaʻo ia atili ona alofa, olioli ma filemu? O ai o i tatou e lē manaʻo ia matuā faapalepale, agalelei ma mataalofa? O ai o i tatou o le a lē mauaina ni aogā pe a atiaʻe atili le faatuatua, agamalu ma le amio pulea? E fua mai e le agaga o le Atua uiga lelei e aogā iā i tatou, ma ē o loo tatou nonofo ma auauna faatasi. E ao ona faaauau ona tatou taumafai malosi ia faaalia atu lenei fua, auā e lē tapulaa le telē o le fua o le agaga e tatou te manaʻomia ma fuaina atu.

17. E mafai faapefea ona tatou atiaʻe atili se vala o le fua o le agaga?

¹⁷ O se mea atamai mo i tatou ona iloilo ifo le tagata iā te ia lava, ina ia faamautinoa o loo faamaonia atu i a tatou upu ma gaoioiga, o loo taʻitaʻia i tatou e le agaga paia ma fuaina atu le fua o le agaga. (2 Kori. 13:5a; Kala. 5:25) Pe afai ua tatou iloa e manaʻomia ona atiaʻe nisi o vala o le fua o le agaga, e mafai ona faia faapea faatasi ma le fesoasoani a le agaga paia ina ia tatou matuā fuaina atu na uiga. E tatou te faia faapea e ala i le suʻesuʻeina o vala taʻitasi e pei ona faaalia mai i le Tusi Paia ma a tatou lomiga faa-Kerisiano. Ona mafai lea ona tatou iloa le auala e tatau ona faaalia atu ai le fua o le agaga i o tatou olaga i aso taʻitasi, ma taumafai malosi loa e atiaʻe atili. * A o mātauina aafiaga o le taʻitaʻiga a le agaga o le Atua i o tatou lava olaga, faapea olaga o o tatou uso Kerisiano, o le a iloa manino ai le māfuaaga e tatau ai ona taʻitaʻia i tatou e le agaga paia.

 Po o Taʻitaʻia Oe e le Agaga o le Atua?

18. Ua faapefea ona avea Iesu ma faaaʻoaʻoga mo i tatou i le taliaina o le taʻitaʻiga a le agaga o le Atua?

¹⁸ Ua taʻu mai e le Tusi Paia, a o avea Iesu ma tagata, sa ia iloaina le taaʻiga malosi a le agaga paia o le Atua i lona olaga. Sa taʻitaʻia o ia e le agaga paia, ma pe a uunaʻia o ia e le agaga e faia se mea, sa ia talia ma faia. (Mare. 1:12, 13; Luka 4:14) Po o faapena oe?

19. O ā mea e tatau ona tatou faia ina ia avea ai le agaga paia ma malosiaga e taʻitaʻia ai o tatou olaga?

¹⁹ E galue pea le malosi galue o le Atua i mafaufau ma loto o ē e mananaʻo ia uunaʻia ma taʻitaʻia e le agaga paia. E faapefea ona e tuu atu i le agaga paia e taʻitaʻia oe i le ala saʻo? Ia tatalo e lē aunoa iā Ieova e auina mai lona agaga, ma fesoasoani mai iā te oe ia talia le taʻitaʻiga a lona agaga. (Faitau le Efeso 3:14-16.) Ia gaoioi e tusa ai ma au tatalo e ala i le saʻili atu i fautuaga o loo i le Afioga tusia a le Atua, le Tusi Paia, lea na tusia e ala i le taʻitaʻiga a le agaga paia. (2 Timo. 3:16, 17) Ia usitaʻia fautuaga atamai ua aumaia i le Tusi Paia, ma ia matuā naunau e talia le taʻitaʻiga a le agaga paia. Ia gaoioi ma le faatuatua e mafai e Ieova ona taʻitaʻia oe, i le ala e sili ona lelei i lou olaga atoa i lenei lalolagi amioleaga.

[Faaopoopoga i lalo]

Pe E te Manatua Manatu Autū?

• E mafai faapefea ona taaʻina o tatou olaga e le agaga paia?

• O ā māfuaaga e fā e tatau ai ona tatou mananaʻo e taʻitaʻia e le agaga o le Atua?

• O le ā la tatou vaega e fai ina ia maua atoatoa ai aogā mai i le taʻitaʻiga a le agaga paia?

[Fesili mo le Suʻesuʻega]

[Ata i le itulau 15]

Sa avea le agaga o le Atua ma uunaʻiga malosi i le olaga o Iesu

[Ata i le itulau 17]

E galue le agaga o le Atua i mafaufau ma loto ina ia uunaʻia ma taʻitaʻia ai