Aua Neʻi Mou Atu Lou Olioli Ona o Maʻi

SEʻI faaāta i lou mafaufau ua e ala aʻe ma moomoo e faapea, maʻimau pe ana ou lē feagai ma tulaga tigā i lenei aso. E te feagai ma tigā i le tino ma faalogona mai lea aso i lea aso. Atonu e oo lava foʻi ina pei ou lagona o Iopu, o lē na faapea mai: “E sili iā te aʻu le oti nai lo o le feagai ma mafatiaga.” (Iopu 7:15, The New English Bible) E faapefea pe afai e iai pea lenā tulaga mo le tele o tausaga?

O le tulaga lenā sa iai Mefiposeta, le atalii o Ionatana le uō o le tupu o Tavita. Ina ua lima tausaga o Mefiposeta, ʻna paʻū o ia ma pipili ai.’ (2 Samu. 4:4) Sa matuā mafatia o ia ina ua mulimuli ane tuuaʻia sesē i le faalataina o le tupu ma le aveesea o le tele o ana meatotino, ma na atili ai ona faigatā ona ia onosaia le tulaga lē lelei atoatoa o le tino. Peitaʻi, sa avea pea o ia ma faaaʻoaʻoga lelei i le onosaia o toʻatugā o le tino, tala taufaaleaga ma mea e faanoanoa ai. E leʻi mou atu lona olioli ona o na tulaga.—2 Samu. 9:6-10; 16:1-4; 19:24-30.

O le aposetolo o Paulo le isi faaaʻoaʻoga. I se tasi taimi na tusi ai o ia e faatatau i se “mea matuitui i le tino” sa tatau ona ia onosaia. (2 Kori. 12:7) O le mea matuitui na ia taʻua, atonu o se maʻi faaumiumi, po o tagata na fesiligia lona tofiga o se aposetolo. Po o le ā lava le tulaga, sa tumau pea le faafitauli, ma sa tatau ona ia feagai ma tigā i le tino ma faalogona na oo iā te ia ona o lea tulaga.—2 Kori. 12:9, 10.

O loo mafatia nisi o auauna a le Atua i aso nei ona o maʻi tigā faaumiumi po o mafatiaga i faalogona. I le 18 o tausaga o Matalena, na maua ai o ia i le maʻi tugā e taʻu o le systemic lupus erythematosus, o se faamaʻi e foliga mai e nai lo o le puipuia e sela o le tino mai i maʻi, ae ua faapogaia ai le faafitauli. Ua faapea mai o ia, “Sa ou matuā popolevale. A o faagasolo taimi, na matuā leaga ma faateteleina loʻu tulaga lea na iʻu ai i ni faalētonu i loʻu manava, gutu papala, ma faafitauli i le fatupuipui tairo (thyroid).” I le isi itu, e tatau ona onosaia e Isapela tulaga e lē malamalama lelei i ai tagata. Ua ia faamatala mai: “Mai lava i loʻu laʻitiiti ou te feagai ma lagona mafatia. O lenei tulaga ua iʻu ai i le popolevale, faafitauli i le mānava, ma le manava tigā. O le iʻuga, e masani lava ona ou lagona le lē lavā.”

Fesagaʻia o le Mea Moni

E mafai e maʻi ma toʻatugā i le tino ona aumaia ai le mafatia i lou olaga. Pe a tupu lenā mea, o se mea lelei le faaalu o se taimi e iloilo totoʻa ai lou tulaga. Atonu e lē faigofie ona e taliaina le tapulaa o mea ua gata mai ai lou mafai. Ua faapea mai Matalena: “Ua faasolo ina leaga loʻu maʻi. E masani ona ou matuā lē lavā e alu ese mai le moega. Ona o tulaga fesuisuiaʻi o loʻu maʻi, ua faigatā tele ai ona fai ni fuafuaga mo le lumanaʻi. O le mea e sili ona ou lotovaivai ai, ona ua lē mafai ona ou toe faia le tele o mea sa masani ona ou faia i le auaunaga iā Ieova.”

Ua faamatala mai e Sepulona: “A o faagasolo  tausaga, ua mou atu loʻu malosi ona ua ou aafia i le gugu o sooga o ponaivi. I nisi taimi, pe a faateteleina le leaga o loʻu gugu, e oo lava i feʻau faigofie ua lē mafai ona ou faia. O lenā tulaga ou te lagona ai le matuā mafatia.”

I ni nai tausaga ua mavae, na maua ai Barbara i le tuma o le faiʻai. Ua ia faapea mai: “Na faafuaseʻi ona iai suiga i loʻu tino. Ou te lagona le ivā, fai ma tigā soo le ulu, ma faafitauli o le uaʻi atu i mea. Ona o le suiga fou ua iai, ua tapulaa mea e gata mai ai loʻu mafai, o lea sa tatau ai ona ou toe iloilo mea e mafai ona ou faia.”

O i latou uma nei o auauna tuuina atu a Ieova. O le mea e sili ona tāua iā i latou o le faia o lona finagalo. Ua latou faatuatua atoatoa atu i le Atua ma maua aogā mai i lana fesoasoani.—Faata. 3:5, 6.

E Faapefea Ona Fesoasoani Mai Ieova?

E lē tatau ona tatou manatu e faapea ua oo se toʻatugā i se tasi, ona o le lē fiafia o le Atua iā te ia. (Aue. 3:33) Manatu i tulaga na oo iā Iopu e ui lava o ia o sē “e lē taʻuleagaina ma amio saʻo.” (Iopu 1:8) E lē faaosoosoina e le Atua se tasi i mea leaga. (Iako. 1:13) O maʻi uma e aofia ai maʻi faaumiumi ma maʻi tau faalogona, o āuga ia ua oo mai ona o o tatou uluaʻi mātua, o Atamu ma Eva.—Roma 5:12.

Peitaʻi, o le a lē tuua e Ieova ma Iesu ē e amiotonu e aunoa ma se fesoasoani. (Sala. 34:15) E tatou te talisapaia le Atua o ʻlo tatou sulufaʻiga ma lo tatou ʻolo malosi,’ aemaise lava i taimi e tutupu ai faafitauli i o tatou olaga. (Sala. 91:2) O lea, pe a feagai ma tulaga e lē faigofie se vaifofō, o le ā e mafai ona fesoasoani iā te oe ina ia tumau ai ona olioli?

Tatalo: O le mulimuli i le faaaʻoaʻoga a auauna faamaoni a le Atua i aso anamua, e mafai ai ona e tuu atu ou popolega uma i lo tatou Tamā i le lagi, e ala i le tatalo. (Sala. 55:22) O le faia faapea, e te tofo ai i le “filemu mai i le Atua, e silisili i mea uma lava e manatu i ai.” O lenā filemu o le a “leoleoina ai . . . o outou loto ma mafaufau.” (Fili. 4:6, 7) O le faalagolago atu i le Atua e ala i le tatalo, ua mafai ai ona onosaia e Matalena lona maʻi tugā. Ua ia faapea mai: “O le sasaa atu o loʻu loto iā Ieova, ua aumaia ai le mapusaga ma toe faafoʻisia ai loʻu olioli. Ua ou malamalama  nei i le uiga o le manatu ia faalagolago i le Atua i aso uma.”—2 Kori. 1:3, 4.

Ina ia tali mai Ieova i au tatalo, e mafai ona ia aumaia iā te oe le malosi e ala i lona agaga paia, lana Afioga, ma le ʻauuso Kerisiano. E te lē faatalitalia le Atua e na te aveesea faavavega lou maʻi. Peitaʻi, e mafai ona e faalagolago atu iā te ia e aumaia iā te oe le atamai ma le malosi, ina ia feagai ai ma mafatiaga taʻitasi. (Faata. 2:7) E mafai ona ia faamalosia oe, ma aumaia iā te oe “le mana lea e sili atu i le malosi o tagata.”—2 Kori. 4:7.

Aiga: E mafai ona fesoasoani se siʻomaga alofa ma māfana i le aiga e te onosaia ai maʻi. Ae ia manatua, o loo mafatia foʻi ē e pele iā te oe. Atonu o loo latou lagona e leai se mea e mafai ona latou faia i lou maʻi, e pei foʻi o ou lagona. Peitaʻi, e mafai ona latou lagolago atu iā te oe, e oo lava i taimi faigatā. O le tatalo faatasi, o le a fesoasoani iā te oe e iai pea se loto toʻafilemu.—Faata. 14:30.

Ua taʻua e Barbara e faatatau i lana tama teine ma isi tuafāfine talavou i le faapotopotoga: “E latou te lagolagosua mai iā te aʻu i le galuega talaʻi. Ua māfanafana loʻu loto ona o lo latou maelega.” Ua iloa e Sepulona le tāua tele o le fesoasoani a lana avā. “E na te faia le tele o feʻau i le fale. E fesoasoani mai foʻi iā te aʻu e fai oʻu lavalava, ma e masani ona ia uuina laʻu ato i sauniga faa-Kerisiano ma le talaʻiga.”

Uso tapuaʻi: E mafai ona tatou maua faalaeiauga ma faamāfanafanaga pe a faatasitasi ma o tatou uso tapuaʻi. Ae faapefea pe afai e lē mafai ona e auai i sauniga ona o lou maʻi? Na faapea mai Matalena: “E faamautinoa e le faapotopotoga ua ou maua aogā mai i sauniga, e ala i le puʻeina o vaega o le sauniga i se lipine po o se CD. E masani ona vili mai uso ma tuafāfine iā te aʻu pe e iai se isi mea e mafai ona latou fesoasoani mai ai. E latou te aumaia foʻi ni tusi faalaeiau. O le iloaina o loo latou manatua aʻu ma manatu mamafa mo loʻu lelei, ua fesoasoani iā te aʻu e onosaia ai tigā ona o loʻu maʻi.”

Na faapea mai Isapela o lē ua pagatia i mafatiaga: “I totonu o le faapotopotoga, e tele oʻu ʻtamā’ ma ʻtinā’ e latou te faalogologo ma taumafai ia malamalama i loʻu tulaga. Ua avea le faapotopotoga ma oʻu aiga—o i inā ou te maua ai le filemu ma le olioli.”

 E tatau i ē o loo aafia i mafatiaga eseese ona ʻalofia le ʻfaaesea o i latou.’ Ae e tāua tele ona latou faatasitasi ma le faapotopotoga. (Faata. 18:1) E avea i latou ma puna o faalaeiauga i isi i le faapotopotoga. Atonu i le taimi muamua e te faatalatū e faailoa atu ou manaʻoga i uso ma tuafāfine. Peitaʻi, e talisapaia tele e ou uso tapuaʻi lou faailoa atu o le mea saʻo. O le a latou maua ai se avanoa e faalautele atu ai le “alofa faamaoni o uso.” (1 Pete. 1:22) Aiseā e le faailoa atu ai iā i latou o loo e manaʻomia se auala e te alu ai i le sauniga, e te fia galulue faatasi ma i latou i le talaʻiga, pe faia foʻi se talanoaga e pāʻia ai le loto? Ioe, e lē tatau ona tatou tagisā ae ia talisapaia a latou galuega fesoasoani.

Ia iai se vaaiga saʻo: E masani lava, o le auala sili e onosaia ai maʻi faaumiumi e aunoa ma le mou atu o le olioli, e faalagolago iā te oe lava. O foliga faasiasia ma faalogona mafatia, e mafai ona iʻu ai i ni mafaufauga lē saʻo. Ua taʻua i le Tusi Paia: “E mafai e le agaga o le tagata ona onosaia lona maʻi; ae o ai e mafai ona lavātia le agaga ua momomo?”—Faata. 18:14.

Ua taʻua e Matalena: “Ou te taumafai malosi e ʻalofia le uaʻi atu i oʻu faafitauli. Ou te taumafai e olioli i aso e feoloolo ai tigā o loʻu maʻi. Ou te maua faalaeiauga e ala i le faitau i talaaga o soifuaga o ē o loo tumau ma le faamaoni, e ui o loo feagai ma maʻi faaumiumi.” Ua faamalosia Isapela e ala i le iloaina e alofa Ieova iā te ia ma tāua o ia i lana silafaga. Ua ia faapea mai: “Ua ou iloa e talisapaia e Ieova mea ua ou faia i le auaunaga iā te ia, ma ua iai foʻi soʻu faamoemoe matagofie mo le lumanaʻi.”

Ua faapea mai Sepulona: “O loʻu maʻi ua aʻoaʻoina ai aʻu ia lotomaulalo ma usitaʻi. Ua ou iloa ai e tatau ona ou faaalia le tofā mamao ma le mafaufau lelei, ma ia faamagalo mai le loto. Ua aʻoaʻoina ai aʻu ia olioli i le auaunaga iā Ieova e aunoa ma ni lagona faanoanoa. O le mea moni, ua uunaʻia aʻu ia faaauau ona agaʻigaʻi i luma faaleagaga.”

Ia manatua o loo silafia lelei e Ieova tulaga o loo e onosaia. O loo tigā alofa o ia i ou mafatiaga, ma o loo manatu mai iā te oe. O le a ia ʻlē faagalogalo lau galuega, ma le alofa ua e faaalia mo lona suafa.’ (Epe. 6:10) Ia teuloto le folafolaga ua ia aumaia i ē uma e matataʻu iā te ia: “Ou te lē tuua lava oe, ma ou te lē tuulafoaʻia lava oe.”—Epe. 13:5.

Pe a iai ni taimi e te lagona ai le lotovaivai, ia taulaʻi atu i le faamoemoe matagofie o le ola i se lalolagi fou. Ua lē o toe umi ona e vaaitino lea i le lalolagi i faamanuiaga e aumaia e le Malo o le Atua!

[Pusa/Ata i le itulau 28]

O Loo Latou Talaʻi Pea e ui i Maʻi Faaumiumi

“Ua lē o toe mafai ona ou savali na o aʻu, o lea, e fesoasoani mai laʻu avā ma isi uso ma tuafāfine ina ia matou ō faatasi i le talaʻiga. Ou te taulotoina taulimaga ma mau o le Tusi Paia.”—Jerzy, puaoa le vaai.

“E lē gata i le molimau atu i le telefoni, ae ou te tusia foʻi ni tusi ma fesootaʻi atu pea i nisi o ē e naunau fiafia. A o iai i le falemaʻi, ou te tuu i taimi uma i autafa o loʻu moega le Tusi Paia ma lomiga faale-Tusi Paia a Molimau a Ieova. O lenā auala ua fesoasoani iā te aʻu e amata ai ni talanoaga mananaia.”—Matalena, e maua i le maʻi tugā e taʻu o le systemic lupus erythematosus.

“Ou te fiafia i le talaʻiga mai lea fale i lea fale, ae pe a ou lagona e lē lava le malosi e auai ai, ona ou molimau atu lea e ala i le telefoni.”—Isapela, o loo feagai ma mafatiaga o le mafaufau.

“Ou te fiafia e fai toe asiga ma fesoasoani i le faia o suʻesuʻega faale-Tusi Paia. Pe a oo i aso e tau feoloolo ai loʻu maʻi, ou te manaʻo e auai i le talaʻiga mai lea fale i lea fale.”—Barbara, o lē e maua i le tuma o le faiʻai.

“Ou te aveina se ato mekasini e māmā. Ou te galue seʻia oo ina lē mafai ona ou onosaia le tigā o sooga o oʻu ponaivi.”—Sepulona, e maua i le maʻi o le gugu o sooga o ponaivi.

[Ata i le itulau 30]

E mafai ona avea ē iti ma ē matutua o ni puna o faalaeiauga