Pe E te Manatua?

Pe sa e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

• O ai Olivétan, ma aiseā e tatau ai ona tatou naunau i ana galuega?

O le igoa lenā sa iloa ai se tagata Falani e igoa iā Pierre Robert. I le taimi o le Toefuataʻiga i le senituri lona 16, sa ia faaliliuina ai le Tusi Paia i le gagana Falani. Sa sili iā te ia le faaaogā o le upu “ovasia” i lo o le “epikopo,” ma le upu “faapotopotoga” i lo o le “lotu.” I nisi vaega o lana faaliliuga, sa ia faaliliuina le suafa o le Atua, o “Ieova.”—9/1, itulau e 18-20.

• O le ā sa uiga iai le Atua ina ua fetalai i le ʻau sa Levī: “E fai aʻu ma au vaega”?

Sa tofu isi ituaiga uma o Isaraelu ma se tofi o le laueleele, ae o le ʻau sa Levī sa fai Ieova ma a latou “vaega” po o tofi. (Nu. 18:20) E latou te leʻi mauaina se tofi o le laueleele, ae sa latou maua se faaeaga faapitoa o le auaunaga. Ae na saunia e Ieova mea na latou manaʻomia ina ia ola ai. I aso nei, o i latou ua maua le faaeaga i le faaauilumaina o manaʻoga o le Malo, e mafai ona mautinoa o le a saunia e Ieova mea e latou te manaʻomia i le olaga.—9/15, itulau e 7-8, 13.

• E faapefea ona tatou iloa le tausaga tonu na faatoʻilaloina ai e Papelonia Ierusalema anamua?

E eseese ma feteenaʻi faamatalaga a tusitala o talafaasolopito anamua, e faatatau i tupu o Papelonia ma a latou nofoaiga. Peitaʻi, e ioe tagata atamamai na faatoʻilalo e Kuresa II Papelonia i le 539 T.L.M., o se tausaga iloga. Na faasaʻolotoina tagata Iutaia, ma na taunuu i lo latou nuu i le 537 T.L.M. Ua taʻua i le Tusi Paia e 70 tausaga na ave faatagataotauaina ai i latou. O lona uiga la, sa faaumatia Ierusalema i le 607 T.L.M. (2 No. 36:21, 22; Iere. 29:10; Tani. 9:1, 2)—10/1, itulau e 26-31.

• O le ā e fesoasoani i se Kerisiano ina ia filifilia ai po o aogā se ituaiga o faafiafiaga pe leai?

Ina ia filifilia le ituaiga faafiafiaga e aogā ma e tusa ma le finagalo o le Atua, e lelei pe a fesili ifo: O ā mea o loo aofia ai? O le ā le tele o le taimi ou te faaalu ai? O ai e matou te iai faatasi?—10/15, itulau e 9-12.

• Aiseā e sesē ai le faapaʻū tama?

E manatu le Atua i le ola o se mea e paia, ma e silasila i se pepe faatoʻā afuafua o se tagata ola. (Sala. 139:16) Na fetalai le Atua e faasalaina se tagata i lalo o le Tulafono e na te faamanuʻalia se pepe e leʻi fanau mai. O le fasioti tagata le faapaʻū tama. (Eso. 21:22, 23)—11/1, itulau e 6.

• E faapefea ona fesoasoani le tala o loo taʻua i le Faataoto 7:6-23, iā i tatou e ʻalofia ai le matamata i ata matagā tau feusuaʻiga?

I lenā tala, o loo faamatalaina ai se tauleʻaleʻa o loo savali i se auala o loo nofo ai se fafine sa lauiloa i amioga lē mamā. Sa faatosina e le fafine o ia i ana tala taufaasee. I aso nei, e ao foʻi ona tatou ʻalofia tuatusi i Initaneti o loo iai ni ata ma ni vitiō faatosina. E tāua foʻi ona saʻili mo le fesoasoani a le Atua e ala i le tatalo a o leʻi faaaogāina tuatusi i luga o le Initaneti.—11/15, itulau e 9-10.

• E faapefea ona tatou iloa o le a iai pea le lalolagi i le 2012?

Ona o le faataamilosaga i le kalena anamua a tagata Maya, ua manatu ai nisi o le a faaumatia le lalolagi i le tausaga 2012. Peitaʻi e lē mafai auā o Ieova na foafoaina le lalolagi ina ia aināina. Ua faapea mai le Tusi Paia o le a tumau le lalolagi e faavavau. (Fai. 1:4; Isa. 45:18)—12/1, itulau e 10.

• O ai tusitala o le Tusi Paia sa iai i le Penetekoso 33 T.A.?

E foliga mai e na o le toʻaono tusitala o le Tusitusiga Paia Eleni sa iai. Sa iai aposetolo e toʻatolu—o Mataio, Ioane, ma Peteru. Sa iai foʻi ʻafa uso e toʻalua o Iesu, o Iakopo ma Iuta, ma e foliga mai sa iai foʻi le tauleʻaleʻa o Mareko.—12/1, itulau e 22.