Taʻitaʻia e le Agaga o le Atua i le Uluaʻi Senituri ma Aso Nei

“O nei galuega uma, e faia e lea lava agaga.”—1 KORI. 12:11.

1. O ā manatu o le a tatou iloiloina i lenei mataupu?

O LE Penetekoso 33 T.A. o se aso na tutupu ai ni mea mataʻina. Na liligi ifo ai e le Atua lona agaga i luga o ana auauna! (Galu. 2:1-4) O le liligiina ifo o le agaga paia i lenā aso i le uluaʻi senituri, na faailogaina ai se suiga tāua i feutagaʻiga a le Atua ma ana auauna. I le mataupu ua mavae, na tatou talanoaina ai nisi o auala na mafai ai ona fesoasoani le agaga o le Atua, i tagata faatuatua anamua ina ia faataunuu tofiga tāua ma faigatā. Ae o le ā le eseesega o le auala na galue ai le agaga o le Atua i le taimi a o lumanaʻi le faa-Kerisiano, ma le auala na galue ai i le uluaʻi senituri? Ma e faapefea ona aogā i Kerisiano i aso nei le taʻitaʻiga a le agaga paia o le Atua? Seʻi o tatou iloiloina.

“Faauta! O Aʻu o le Teine Pologa a Ieova!”

2. O le ā na iloa e Maria e faatatau i le agaga o Ieova?

² Sa iai Maria i totonu o lenā potu tele i luga i Ierusalema ina ua liligiina ifo le agaga paia na folafolaina mai. (Galu. 1:13, 14) Peitaʻi, e silia i le 30 tausaga muamua atu a o leʻi tupu lenā  mea, sa ia iloa e mafai e Ieova ona faia mea ofoofogia e ala i lona agaga. Na aumaia e Ieova le soifua o lona Alo mai i le lagi i le lalolagi, ma afuafua i le manava o Maria a o avea pea o ia ma taupou. O le tō a Maria “e mai i le agaga paia.”—Mata. 1:20.

3, 4. O le ā le uiga sa faaalia e Maria, ma e ono mafai faapefea ona tatou faaaʻoaʻo iā te ia?

³ Aiseā na maua ai e Maria lenā faaeaga e lē mafaatusalia? Ina ua uma ona faamatala atu e le agelu iā Maria le finagalo o Ieova e faatatau iā te ia, ona faapea mai lea o Maria: “Faauta! O aʻu o le teine pologa a Ieova! Ia faia iā te aʻu le mea ua e folafolaina mai.” (Luka 1:38) O lenā faamatalaga a Maria, na faaalia ai se ituaiga loto ua uma ona silafia e le Atua. O lana tali vave mai ua faaalia ai sa nofosauni o ia e talia le mea ua finagalo i ai Ieova mo ia. E leʻi fesili atu Maria i le agelu e faatatau i le auala o le a manatu ai tagata o le nuu i lana tō, po o le aafiaga foʻi o le a iai i le la mafutaga ma lana uō tama ua fuafua e faaipoipo i ai. E ala i le taʻua o ia lava o se auauna faatauvaa, na faaalia ai e Maria lona faatuatua atoatoa atu iā Ieova o lona Matai.

⁴ Pe e te lagona i nisi taimi ua lofitūina oe i faigatā po o tiute tauave i le auaunaga i le Atua? E lelei ona fesili ifo le tagata iā te ia lava: ʻPo o oʻu faatuatua atoatoa atu iā Ieova o le a ia taulimaina mea e tusa ai ma lona finagalo? Po o oʻu faaalia moni se uiga usiusitaʻi?’ Ia mautinoa e aumaia e le Atua lona agaga i ē e faatuatua atu ma o latou lotoatoa, ma usiusitaʻi iā te ia o le Pule.—Galu. 5:32.

Sa Fesoasoani le Agaga Paia iā Peteru

5. O ā auala na fesoasoani ai le agaga paia iā Peteru a o lumanaʻi le Penetekoso 33 T.A.?

⁵ I le pei o Maria, sa tofo totino le aposetolo o Peteru i le mana o le agaga paia o le Atua a o lumanaʻi le Penetekoso 33 T.A. Sa tuu atu e Iesu iā te ia ma isi aposetolo le pule e tutulia ai temoni. (Mare. 3:14-16) Ma e ui lava e lē o tele ni faamatalaga o taʻua i le Tusi Paia, ae e foliga mai sa faaaogā e Peteru lenā pule. Sa faaalia foʻi le mana o le Atua ina ua valaau atu Iesu iā Peteru, e savali mai iā te ia i luga o le Sami o Kalilaia, ma na faia faapea e Peteru. (Faitau le Mataio 14:25-29.) E manino mai, sa faalagolago Peteru i le agaga paia e fesoasoani iā te ia e faia ai galuega mamana. E leʻi umi ae tuu atu e lenā agaga le mana iā Peteru ma ana aumea aposetolo, e faia ai le tele o isi mea.

6. E ala i le agaga o le Atua, o ā mea na mafai ona faia e Peteru a o faagasolo ma ina ua mavae le Penetekoso 33 T.A.?

⁶ I le Tausamiga o le Penetekoso 33 T.A., na tuuina atu ai iā Peteru ma isi le tomai faavavega, e talanoa atu ai i gagana na tautatala ai tagata malaga na asiasi ane i Ierusalema. Mulimuli ane, ona taʻimua lea o Peteru e lauga atu i le motu o tagata na faapotopoto ai i inā. (Galu. 2:14-36) Ioe, o nisi taimi sa osovale ai pe fefe lenei tane, peitaʻi sa ia maua le lototele e molimau atu ai e ui lava i faamataʻuga ma sauāga. (Galu. 4:18-20, 31) Sa mafai ona ia malamalama i le mea moni e ala i se faaaliga mai i le Atua. (Galu. 5:8, 9) Ma sa ia maua foʻi le mana e toe faatū ai se tagata ua oti.—Galu. 9:40.

7. O ā aʻoaʻoga a Iesu na faatoʻā malamalama i ai Peteru ina ua uma ona faauuina o ia?

⁷ E oo foʻi i le taimi a o lumanaʻi le Penetekoso, sa malamalama Peteru i le tele o upu moni na aʻoaʻoina e Iesu. (Mata. 16:16, 17; Ioa. 6:68) Peitaʻi, e iai nisi vala o aʻoaʻoga a Iesu e leʻi manino iā Peteru a o lumanaʻi le Penetekoso. O se faaaʻoaʻoga, e leʻi malamalama Peteru o le a toetū mai Keriso o se agaga i le aso lona tolu, ma e leʻi malamalama foʻi o le a faavaeina i le lagi le Malo. (Ioa. 20:6-10; Galu. 1:6) E leʻi malamalama foʻi Peteru o le a avea tagata ma foafoaga agaga, ma o le a pule i le Malo i le lagi. Ae ina ua papatisoina o ia i le agaga paia ma maua le faamoemoe e ola i le lagi, ona faatoʻā ia malamalama lea i le uiga o aʻoaʻoga a Iesu e faatatau i na mataupu.

8. O le ā le poto ua maua e le ʻaufaauuina ma “isi mamoe”?

⁸ Ina ua maua e soo o Iesu le agaga paia, sa mafai ona latou malamalama i aʻoaʻoga e leʻi  malamalama muamua i ai. O le agaga paia na uunaʻia ai tusitala o Tusitusiga Paia Eleni e faailoa mai vala mataʻina o le finagalo o Ieova, ina ia aogā iā i tatou. (Efe. 3:8-11, 18) I aso nei, e tutusa taumafa faaleagaga o loo fafagaina ai ē ua faauuina ma “isi mamoe,” ma o loo latou malamalama i nei upu moni. (Ioa. 10:16) Po o tāua iā te oe le poto ma le malamalamaga i le Afioga a le Atua, lea ua e maua ona o le fesoasoani a le agaga paia?

Sa ʻFaatumuina Paulo i le Agaga Paia’

9. O ā mea na mafai ona faia e Paulo ona o le fesoasoani a le agaga paia?

⁹ Pe tusa o se tausaga talu ona mavae le Penetekoso 33 T.A., na maua ai e se isi foʻi tagata le meaalofa a le Atua o le agaga paia. O ia lenā o Saulo, o lē na igoa mulimuli ane iā Paulo. Sa fesoasoani le agaga paia iā te ia e faia ai mea o loo aogā pea iā i tatou i aso nei. Sa faagaeeina le aposetolo o Paulo e tusia tusi e 14 o le Tusi Paia. Ma e pei ona faia iā Peteru, o le agaga paia o le Atua na mafai ai ona malamalama Paulo, ma tusi ma le manino e faatatau i le faamoemoe o le ola i le lagi e lē mafai ona oti ma le tino e lē pala. E ala foʻi i le agaga paia, na mafai ai e Paulo ona faia faamālōlōga, tutuli temoni, ma toe faatutū ē ua feoti! Peitaʻi, na maua e Paulo le mana e ala mai i le agaga paia ina ia faia ai se mea e sili atu ona tāua. E maua foʻi e auauna a le Atua le mana e faia ai le mea lava lenā e tasi i aso nei, e ui lava e lē mafai ona latou mauaina faavavega le agaga paia.

10. Na faapefea ona fesoasoani le agaga paia iā Paulo ina ia tautala atu ai?

¹⁰ Sa talanoa atu ma le lototele Paulo, o lē na ʻfaatumulia i le agaga paia,’ i se faataulāitu. Maʻeu se aafiaga na iai i le suikonesula o Kuperu, lea sa faalogologo atu i le talanoaga atoa! Sa talia e lenā suikonesula le upu moni, ma na “ofo ai i aʻoaʻoga a Ieova.” (Galu. 13:8-12) E manino mai, sa iloa lelei e Paulo le tāua o le agaga paia o le Atua pe a oo i taimi e faailoa atu ai le upu moni. (Mata. 10:20) Sa mulimuli ane ia ʻaiʻoi atu i le faapotopotoga i Efeso ia faatoga atu mo ia, ina ia tuuina mai iā te ia le tomai e “tautala atu” ai.—Efe. 6:18-20.

11. Na faapefea ona taʻitaʻia Paulo e le agaga o le Atua?

¹¹ E lē gata o le agaga paia na mafai ai ona tautala atu Paulo, ae o nisi taimi na faasā ai foʻi o ia e talaʻi atu i nisi o nofoaga. A o alu malaga faamisionare a Paulo, sa taʻitaʻia o ia e le agaga o le Atua. (Galu. 13:2; faitau le Galuega 16:6-10.) O loo faaauau ona taʻitaʻia e Ieova le galuega talaʻi e ala i lona agaga paia. I le pei o Paulo, o loo taumafai auauna usiusitaʻi uma a Ieova e lototetele ma maelega e taʻu atu le upu moni. E ui lava e ese le auala o loo taʻitaʻia ai i tatou e le agaga o le Atua i aso nei, mai i le auala na taʻitaʻia ai Paulo, ae e mafai ona tatou mautinoa o loo faaaogā e Ieova lona agaga paia, ina ia faamautinoa ai ua faalogo ē e lotofaamaoni i le upu moni.—Ioa. 6:44.

“E Eseese Foʻi Galuega e Fai”

12-14. Pe e tutusa le auala e galue ai le agaga o le Atua i ana auauna uma? Faamatala.

¹² Po o avea tala e faatatau i le auala na faamanuia ai e Ieova le faapotopotoga a le ʻaufaauuina i le uluaʻi senituri, o se matuā faalaeiauga mo auauna tuuina atu a le Atua i aso nei?  E mautinoa o le mea moni lenā! Ia manatua upu faagaeeina a Paulo i le faapotopotoga i Korinito, e tusa ai o meaalofa faavavega a le agaga i ona aso: “O lenei, e eseese meaalofa, a o le agaga lava e tasi; ma e eseese foʻi auaunaga, a o le Alii lava e tasi; e eseese foʻi galuega e fai, ae peitaʻi o le Atua lava e tasi, o lē o loo faatinoina galuega uma i tagata uma.” (1 Kori. 12:4-6, 11) Ioe, e eseese auala e mafai ona galue ai le agaga paia i auauna eseese a le Atua mo se fuafuaga patino. O loo taʻitaʻia uma e le agaga paia le “lafu mamoe itiiti” a Keriso ma “isi mamoe.” (Luka 12:32; Ioa. 10:16) Peitaʻi, e lē faapea ai o le a tutusa i taimi uma le auala e galue ai le agaga paia i sui taʻitasi o le faapotopotoga.

¹³ O se faaaʻoaʻoga, ua tofia toeaina e le agaga paia. (Galu. 20:28) Ae e lē o Kerisiano faauuina uma e auauna o ni ovasia i le faapotopotoga. O le ā ua taʻu mai ai e lenei mea iā i tatou? O lona uiga, e eseese auala e galue ai le agaga o le Atua i sui o le faapotopotoga.

¹⁴ O le agaga lea e faatupuina i le ʻaufaauuina “le agaga o ataliifai,” po o se lagona e faapea o i latou o atalii o le Atua, o le agaga lava foʻi lenā na toe faatūina ai e Ieova lona Alo pele e toʻatasi, mai le oti i le ola e lē mafai ona oti i le lagi. (Faitau le Roma 8:11, 15.) O le agaga lava foʻi lenā na foafoaina ai e Ieova le vateatea aoao. (Kene. 1:1-3) E ala foʻi i lenā agaga paia, na tuu atu ai e Ieova le tomai iā Pesaleli ina ia agavaa ai e faia galuega faapitoa i le faleʻie paia, na maua ai e Samasoni le malosi e faia ai gaoioiga na manaʻomia ai se malosi e sili atu, ma na mafai ai e Peteru ona savali i luga o le vai. O lea la, o le taʻitaʻia e le agaga o le Atua e ese mai i le faauuina i le agaga o le Atua. O le faauuina i le agaga paia ua na o se tasi lea o auala faapitoa e galue ai le agaga o le Atua. O le Atua o ia lea e filifilia i latou o ē e faauuina i lona agaga.

15. Po o le a faaauau e faavavau le papatisoina i le agaga paia? Faamatala.

¹⁵ E eseese auala e galue ai le agaga paia o le Atua i ana auauna faamaoni. Sa taʻitaʻia i latou e le agaga o le Atua mo le faitau afe o tausaga a o leʻi amata ona faauuina tagata i le agaga. Na amata ona faauuina tagata i le agaga paia i le Penetekoso 33 T.A., ae o le a lē faaauau ai pea e faavavau. O le a muta le papatisoina i le agaga, ae o le a faaauau ona galue le agaga paia i tagata o le Atua ina ia mafai ona latou faia lona finagalo e faavavau.

16. O le ā o loo faia e auauna a le Atua i aso nei e ala i le taʻitaʻiga a lona agaga?

¹⁶ O le ā le mea patino o loo faataunuuina i le lalolagi i aso nei e ala i le taʻitaʻiga a le agaga paia o Ieova? Ua taʻua i le Faaaliga 22:17: “Ua fai mai pea le agaga ma le tamaʻitaʻi faaipoipo: “Inā sau ia!” Ia fai atu foʻi so o se tasi e faalogo: “Inā sau ia!” Ia sau foʻi so o se tasi e fia inu; ma o so o se tasi e manaʻo i ai, ia ave fua le vai o le ola.” E ala i le agaga o le Atua, ua uunaʻia ai Kerisiano i aso nei ia faalautele atu le valaaulia a Ieova e maua ai le ola, i “so o se tasi e manaʻo i ai” ina ia talia le vai o le ola. O loo taʻimua Kerisiano faauuina i le faia o lenei galuega. Peitaʻi, o loo aufaatasi atu isi mamoe i le tufaina atu o lenei valaaulia. E tasi le agaga paia o loo galue i nei vaega e lua ina ia faataunuuina lenei galuega. Ua faailogaina le tuuina atu iā Ieova o sui o na vaega uma e lua, e ala i le papatisoina “i le suafa o le Tamā, ma le Atalii, ma le agaga paia.” (Mata. 28:19) Ma o loo faaalia e i latou uma le fua o le agaga o le Atua i o latou olaga. (Kala. 5:22, 23) I le pei o le ʻaufaauuina, e faataga e isi mamoe le agaga o le Atua ina ia fesoasoani iā i latou. E ala i le fesoasoani a le agaga paia, ua latou faia ai le mea sili e latou te mafaia ina ia ola e tusa ai ma tapulaa mamā a Ieova.—2 Kori. 7:1; Faaa. 7:9, 14.

Ia Talosaga Atu Pea mo le Agaga Paia

17. E faapefea ona tatou faamaonia atu o loo iā i tatou le agaga o le Atua?

¹⁷ E tusa lava la pe e te faamoemoe e ola e faavavau i le lagi pe i le lalolagi, ae e mafai ona aumaia e Ieova iā te oe “le mana lea e sili atu i le malosi o tagata,” ina ia e tumau faamaoni ai  ma maua lou taui. (2 Kori. 4:7) A o faaauau ona e talaʻia atu le tala lelei o le Malo, atonu e aumaia ai tauemuga. Ae ia manatua, “afai e faalumaina outou ona o le suafa o Keriso, ua outou fiafia, auā ua iā te outou le agaga mamalu, o le agaga lea o le Atua.”—1 Pete. 4:14.

18, 19. O le a faapefea ona fesoasoani Ieova iā te oe e ala i lona agaga paia, ma o le ā e tatau ona faaauau ona e faia?

¹⁸ O le agaga paia o le meaalofa foaʻi fua lea a le Atua mo ē e saʻili ma le faamaoni ia maua le agaga. E lē gata e mafai ona faaleleia ai ou tomai, ae faapea foʻi lou faanaunauga e faia le mea sili e te mafaia i le auaunaga i le Atua. “O le Atua, o lē o loo galue i totonu iā te outou, e tusa ma lona finagalo malie, ina ia outou lotomalilie ma galulue i ai.” O le meaalofa matagofie o le agaga paia, faatasi ai ma a tatou taumafaiga fitā ia faaauau ona “taofimau i le upu o le ola,” o le a mafai ai ona “faaauau ona [tatou] galulue mo lo [tatou] faaolataga, i le mataʻu ma le gatete.”—Fili. 2:12, 13, 16.

¹⁹ O lea la, ia e maumauaʻi e fai le mea sili e te mafaia ma faalagolago i le agaga o le Atua, ina ia e tomai ai i le faia o tofiga uma ua tuuina mai iā te oe, ma ia faalagolago atu iā Ieova mo le fesoasoani. (Iako. 1:5) O le a ia tuuina mai iā te oe le fesoasoani ina ia malamalama ai i lana Afioga, fesagaʻia ai faafitauli o le olaga, ma talaʻia ai le tala lelei. “Ia talosaga atu pea, ona foaʻiina mai lea iā te outou. Ia saʻili atu pea, ona outou maua ai lea. Ia tuʻituʻi atu pea, ona tatalaina mai lea iā te outou,” ma e aofia ai i lenei mea le mauaina o le agaga paia. (Luka 11:9, 13) O lea la, ia faaauau ona faatoga atu iā Ieova ina ia e pei o auauna faatuatua anamua ma aso nei, o ē na taʻitaʻia e le agaga paia o le Atua.

Pe Mafai Ona E Faamatala?

• O le ā le uiga e mafai ona tatou faaalia e pei o Maria, o le a aumaia ai faamanuiaga?

• O le ā le auala na taʻitaʻia ai Paulo e le agaga o le Atua?

• Ua faapefea ona taʻitaʻia auauna a le Atua e lona agaga paia i aso nei?

[Fesili mo le Suʻesuʻega]

[Ata i le itulau 24]

O le agaga o le Atua na mafai ai ona talanoa atu Paulo ma le lototele i se faataulāitu

[Ata i le itulau 26]

E mafai ona fesoasoani le agaga paia i Kerisiano i aso nei, e tusa lava po o le ā lo latou faamoemoe