ʻE Mafai Faapefea Ona Ou Talaʻi?’

I le lalolagi aoao, e tele ni faaaʻoaʻoga mataʻina e faatatau i o tatou uso ma tuafāfine o loo galulue ma le faamaoni i le faia o se sao i le galuega talaʻi, e ui ina feagai ma faafitauli matuiā o le soifua mālōlōina. O se faataʻitaʻiga, o Dalia o lē e nofo i Vilnius, le laumua o Lithuania.

O Dalia o se tuafafine e tusa ma le 35 ona tausaga. Talu ona fanau mai, sa mafatia o ia i se maʻi (cerebral apoplexy) na aafia ai lona faiʻai, lea na pē ai lona tino ma matuā faafaigatā ai ona tautala. E na o tagata lava o lona aiga e malamalama lelei iā te ia. O loo nofo Dalia ma lona tinā o Galina, o lē o loo tausia o ia. E ui o loo faatumulia le olaga o Dalia i tigā ma popolega, ae e iai pea iā te ia se vaaiga mautinoa. E mafai faapefea ona ia faia faapea?

Na faamatala mai e Galina: “I le 1999, na asiasi mai ai soʻu tausoga e igoa iā Apolonija. O Apolonija o se Molimau a Ieova, ma na ma mātauina lona malamalama lelei i le Tusi Paia, ma e tele ni fesili a Dalia na fai atu iā te ia. E leʻi umi, ae amata loa ona ia suʻesuʻeina le Tusi Paia ma Dalia. O nisi taimi ou te auai ai i le la suʻesuʻega e avea ma faamatala upu a Dalia. Na ou mātauina le matuā aogā iā Dalia o mea na ia aʻoaʻoina, ma e leʻi pine ae ou talosagaina foʻi le faia o saʻu suʻesuʻega faale-Tusi Paia.”

A o amata ona malamalama Dalia i upu moni o le Tusi Paia, sa iai se fesili sa naunau lava o ia e na te fia iloa le tali. Na iʻu ina fesili atu o ia iā Apolonija: “E mafai faapefea e se tasi e pei o aʻu e pē le tino ona talaʻi?” (Mata. 28:19, 20) Na faamautinoa atu ma le agalelei e Apolonija iā Dalia e faapea: “Aua e te fefe. O le a fesoasoani Ieova iā te oe.” O le mea moni, e faia faapea e Ieova.

E faapefea la ona talaʻi Dalia? E tele auala. E fesoasoani tuafāfine Kerisiano iā te ia e tusia ni tusi o loo iai se feʻau o le Tusi Paia. Muamua, e faaali atu e Dalia ona manatu i tuafāfine, ona latou tusia lea o ona manatu i se tusi. E molimau atu foʻi Dalia e ala i le lafo atu o feʻau tusitusia e faaaogā ai lana telefoni feaveaʻi. Pe afai e lelei le tau, e ave o ia e se tasi o le faapotopotoga i le paka ma auala tetele ina ia feiloaʻi ai ma tagata.

O loo faaauau pea ona agaʻigaʻi i luma faaleagaga Dalia ma lona tinā. Na tuuina atu o la ola iā Ieova ma papatisoina iā Novema i le 2004. I le 2008 iā Setema, na faatūina ai i Vilnius se vaega e tautatala i le gagana Polani. Sa auai atu Dalia ma lona tinā i lenā vaega ona sa latou manaʻomia ni tagata talaʻi o le Malo. Ua faapea mai Dalia: “A o faagasolo nisi o masina ou te popole ai pe a leai se taimi ou te auai ai i le galuega talaʻi. Ae pe a uma ona ou tatalo iā Ieova e faatatau i lea tulaga, mulimuli ane ona sau lea o se tasi o le ʻautalaʻi ma faia se ma fuafuaga e galulue faatasi i le faiva.” O ā faalogona o si o tatou tuafafine pele o Dalia e tusa ai ma lona tulaga? Ua ia taʻua e faapea: “Na pē loʻu tino ona o le maʻi, ae e lē o pē ai loʻu mafaufau. Ua ou matuā fiafia lava ona ua mafai ona ou talanoa atu i isi e uiga iā Ieova!”