Mea Iloga o lo Tatou Talafaasolopito

Le Faasaoina o Mea Tautele Mai Taimi ua Tuanaʻi

MAʻEU le tautele o le tofi faaleagaga ua maua e tagata o Ieova. O le talaaga matagofie o lenā tofi e mafai ona maua mai i a tatou lomiga, ata, tusi, tala moni o mea na tutupu, ma mea tāua mai taimi ua teʻa e fesootaʻi i la tatou tapuaʻiga, la tatou galuega talaʻi ma lo tatou talafaasolopito. Ae o le ā le aogā e maua mai le faasaoina o mea ua leva, ma le iloilo o mea mai lo tatou talafaasolopito? Na faatonuina ulu o aiga i le nuu anamua o Isaraelu ina ia faamatala i a latou fanau tulafono ma gaoioiga ofoofogia na faia e Ieova, “ina ia latou faatuatua ai i le Atua.”—Sala. 78:1-7.

E iai le vaega o le faia o saʻiliʻiliga loloto i faamaumauga o talafaasolopito i le faataunuuina o le finagalo o Ieova. Ina ua taumafai tagata tetee e taofia le galuega i le malumalu i Ierusalema, na faia ai se saʻiliʻiliga māeʻaeʻa lelei o faamaumauga o talafaasolopito i le laumua o Akemeta i le itumalo o Metai, ma na latou maua le faamaoniga aloaʻia a le tupu o Kuresa ina ia fausia le malumalu. (Esera 6:1-4, 12) O le iʻuga, na toe fausia le malumalu e tusa ma le finagalo o le Atua. Na faaaogā foʻi e le tusitala o Evagelia o Luka faamaumauga na teu lelei, ina ia mafai ona ia “matuā suʻesuʻe ma le faamaoni i mea uma lava mai i le amataga.”—Luka 1:1-4.

E matuā naunau tele le Vaega Pule i talafaasolopito o galuega a Molimau a Ieova. Na faapea mai se tasi sui o le Vaega Pule e uiga i le manaʻomia ona faasaoina o mea ua leva, faamau i lalo faamatalaga, ma le taʻu atu  i isi o lo tatou tofi faaleagaga, ʻPe a tatou malamalama i lo tatou talafaasolopito faaleagaga, o le a aumaia iā i tatou le malosi ma le mautinoa e faaauau ai.’ Ona o lenā manaʻoga, ua faavae ai se matagaluega fou e taʻua o le matagaluega e Teuina Faamaumauga mo Tusitusiga, i lalo o le vaaiga o le Komiti o Tusitusiga i le ofisa ulu i Brooklyn i Niu Ioka.

O A TATOU “PUSA O TALAAGA” MA “MAVAEGA” UA TUUFAASOLO MAI

A o faasolosolo mai taimi, o le toʻatele o i tatou e toe manatu ifo, maʻimau pe ana ou teu faalelei faamaumauga o le gafa ma le talafaasolopito o lo matou aiga. I le matagaluega e Teuina Faamaumauga mo Tusitusiga, o loo faia se taumafaiga filigā ina ia faasao ma faamau lelei i lalo lo tatou talafaasolopito tautele faaleagaga. O ata ua teu faalelei i lenei matagaluega e teu ai faamaumauga o talafaasolopito, ua pei o se “pusa o talaaga” mo i tatou. O loo teu ai foʻi ni lomiga tuai, o tala mataʻina o mea na tutupu, ma mea e toe faamanatu mai ai aso ua leva. O nei mea tāua o ni “mavaega,” ua faailoa mai ai iā i tatou le talafaasolopito o Molimau a Ieova, ma e faamausalī ai foʻi le faamoemoe mo le lumanaʻi o lo tatou aiga faaleagaga.

Ua matou fiafia e valaaulia oe e te iloiloina nei Faamaumauga mo Tusitusiga e ala i le mataupu fou lenei o “Mea Iloga o lo Tatou Talafaasolopito.” O le a faasolosolo ona lomia lenei faasologa o mataupu i lomiga mo suʻesuʻega o Le Olomatamata. I se mekasini o loma nei, o le a lomia se mataupu faatasi ma ni ata e faamatala e tali ai fesili faapenei: O le ā le mea e taʻua o le Dawn Mobile? O ai na faaaogāina? O anafea na faaaogā ai, ma mo le ā le fuafuaga?

E pei lava o faamatalaga e te maua i se pusa o talaaga, o Faamaumauga nei e faamatala mai ai e uiga i lo tatou tupuaga ma o tatou augātamā faaleagaga—e uiga i le faatuatua ma le lototele o i latou na muamua iā i tatou, le olioli ma luʻi o le auauna i lo tatou Tamā alofa faalelagi, aemaise le taʻitaʻiga ma le lagolagosua e lē mavae a le Atua mo ona tagata. (Teu. 33:27) E matou te mautinoa o le a faaauau ona faamanuia e Ieova taumafaiga filigā e puipuia lo tatou tofi faaleagaga, ina ia tatou autasi ma faamalolosi i le faataunuuina o lona finagalo.

[Pusa/​Ata i le itulau 31]

Se Iloiloga Totoʻa

A o sauniunia a tatou lomiga faa-Kerisiano, DVD ma isi lomiga faale-Tusi Paia, e masani ona faaaogā faamaumauga o talafaasolopito ua teuina, e a tatou tusitala, tusiata, ma ē e faia saʻiliʻiliga. O lea la ua faia e le matagaluega e Teuina Faamaumauga mo Tusitusiga taumafaiga fitā ma le faaeteete ina ia aoaoina ma faasao le tele o mea tāua eseese o talafaasolopito, e maua mai i ofisa o lālā, matagaluega a Peteli, faapotopotoga, tagata eseese ma isi nofoaga. Seʻi mātau le aotelega o lenei galuega:

Aoaoina ma Iloiloina: O loo faaauau pea ona faaopoopo mai ni mea fou mataʻina i lenei tuufaatasiga o mea tāua o le talafaasolopito. E tele ina foaʻifua mai nei mea pe tuuina atu e faaaogā e tagata eseese mai i aiga ua faitau fia tausaga o auauna ma le faamaoni iā Ieova. O le iloiloina ma le faaeteete o nei mea eseese e fesoasoani ina ia faalauaʻitele ai lo tatou malamalamaga e uiga i lo tatou talafaasolopito, ma i latou na ola i lenā taimi.

Faamaopoopo ma Faatulagaina: E faitau afe ni mea eseese o loo teu i le matagaluega o Faamaumauga mo Tusitusiga, ma o nisi o nei mea e sili atu i le selau tausaga. E tele ituaiga o mea e tatau ona faamaopoopo ma faatulagaina lelei auā le faia o saʻiliʻiliga.

Toe Faaleleia ma Faasaoina: E faaaogā faiga faaonapōnei e faaleleia ma faasaoina ai tusi ma isi mea tuai. I le faaaogāina o polokalame faapitoa, e mafai ona tuu uma i le komepiuta nei tusi, ata, nusipepa, ata tifaga ma isi mea ua puʻeina. Ona mafai lea i taimi e faia ai saʻiliʻiliga ona suʻe ma matamata i nei mea i luga o le komepiuta, ina ia ʻalofia ai le faaaogā soo neʻi teʻi ua leaga ni mea e matuā tāua i le talafaasolopito.

Teuina ma le Toe Faaaogā: E teu faalelei i se nofoaga faapitoa ia faamaumauga i se auala e maopoopo, ma puipuimalu, neʻi leiloloa, susū pe faaleaga foʻi i le lā. O loo teuina i se polokalame i le komepiuta se lisi atoa o nei faamaumauga tautele ina ia faafaigofie le toe iloilo ma maua mai o mea mataʻina mai lo tatou talafaasolopito.

[Ata i le itulau 32]

1. O se ata o loo faasilasila mai ai le “Photo-Drama of Creation.” 2. O lisi o tusiga. 3. Taavale e faaaogā ai mea faaleotele leo. 4. Faavaa o le Watch Tower o Aperila 15, 1912. 5. O faamaumauga a le falepuipui e uiga iā J. F. Rutherford. 6. O le maikorofoni na faaaogā e le WBBR. 7. Fonokalafi. 8. Ato e ave ai tusi. 9. Faamaumauga. 10. Feʻau faauaealesi mo J. F. Rutherford.