Na Latou Faalauiloa Atu ma le Lototele le Afioga a le Atua!

Lototele ma le lē fefe e ui i teteega. Ua faaalia nei uiga e Kerisiano moni e pei ona faailoa mai i a tatou lomiga, o le ʻAvatu se Molimau Māeʻaeʻa’ e Faatatau i le Malo o le Atua ma le Jehovah’s Witnesses—Proclaimers of God’s Kingdom. I le pei o o tatou uso tapuaʻi i le uluaʻi senituri, e tatou te liliu atu iā Ieova e ala i le tatalo mo lona agaga ma lana fesoasoani, ina ia tatou talaʻi atu ma le lototele lana afioga.—Galu. 4:23-31.

Na tusi se tasi o uso e faatatau i la tatou galuega talaʻi a o faagasolo le taua muamua a le lalolagi, e faapea: “Na matuā malolosi auauna a Ieova i le tufatufaina atu o le tusi lona fitu, o le Studies in the Scriptures, lea na faaulutalaina o le The Finished Mystery. Na matuā mataʻina le tulaga na oo i ai lenei galuega. Na tatalaina i le 1918 le Tala o le Malo Nu. 1. Na sosoo ai ma le Tala o le Malo Nu. 2, lea na faamatala ai le māfuaaga na faasā ai e le malo le tusi, o le The Finished Mystery. Na sosoo mulimuli mai ai le Tala o le Malo Nu. 3. Na tele ina tufatufaina atu nei lomiga e le vasega faauuina faamaoni. Na manaʻomia tele le faatuatua ma le lototele ina ia tufaina atu ai nei Tala o le Malo.”

O loo maua e tagata talaʻi fou o le Malo i aso nei le tele o toleniga mo le faiva, ae e leʻi faapena aso ua mavae. Na faamatala e se uso Polani o loo nofo i Amerika, le taimi muamua na auai ai i le faiva i le 1922 e faapea: “E na o aʻu sa ou talaʻi atu i le ofisa o se fomaʻi, ae ou te leʻi iloa le auala e ofo atu ai lomiga ma e lē lelei laʻu gagana Peretania. Sa tatala mai e se teine tausimaʻi le faitotoʻa. E lē mafai ona galo iā te aʻu lenā mea na tupu, auā sa ou fiafia ae na ou fefe foʻi. O le taimi lava na tatala ai laʻu ato, sa salalau uma mai i fafo aʻu tamaʻitusi i luma o le teine tausimaʻi. Ou te lē iloa laʻu tala na fai atu, ae na tuuina atu ni tusi iā te ia. I le taimi na uma ai la ma talanoaga, sa ou maua le lototele ma ou lagona le faamanuiaina o aʻu e Ieova. E tele aʻu tamaʻitusi na tufa atu i lenā aso i lenā aai o pisinisi.”

Na faapea mai se tuafafine: “E tusa o le 1933, na faaaogāina ai e le toʻatele o uso ia taavale e iai masini faaleotele leo e faasalalau ai le feʻau o le Malo.” I se tasi o mea na tupu, sa talaʻi ai lenei tuafafine ma se ulugalii Molimau i se vaipanoa maugā i Kalifonia, i Amerika. Na ia taʻua e faapea: “Na ave e le uso le taavale i luga i le mauga, ae na matou nonofo pea i le aai. Ina ua ia tāina i le fonokalafi le feʻau na puʻeina, sa pei o loo sau le feʻau mai i le lagi. Na taumafai tagata o le aai e suʻe le uso ae e latou te leʻi maua o ia. Ina ua uma ona tā le record (una lapotopoto e faapitoa e puʻe ai leo), ona matou talaʻi atu loa lea i tagata. Sa matou faaaogāina isi taavale e lua o loo iai masini faaleotele leo, ae e leʻi fia faalogo le toʻatele i le feʻau. Peitaʻi, e leai se mea na mafai ona latou faia ona sa lagona mai i o latou fale le feʻau. Na matou iloa le saʻo o le metotia na saunia e Ieova i le taimi saʻo. Na manaʻomia le lototele  i le faaaogāina o lenei auala, lea na mafai ai ona faalauiloa atu le feʻau o le Malo, ma viia ai le suafa o Ieova.”

I vaitausaga o le 1930 ma le amatamataga o tausaga o le 1940, sa faaaogā ai i le faiva le fonokalafi ma lauga faale-Tusi Paia na puʻeina. Na faapea mai se tasi o tuafafine Kerisiano: “Na talaʻi se tuafafine talavou mai i lea fale i lea fale ma faaaogā se fonokalafi. Ina ua amata ona ia tāina le fonokalafi i se tasi o fale, sa matuā ita le tamāloa ma kiki i fafo le fonokalafi mai i le faapaologa, ae e leʻi iai se record na leaga. Na iloa mai e ni tamāloloa se toʻatolu o loo faia la latou taumafataga o le aoauli i totonu o le taavale le mea na tupu, ma latou talosagaina ai le tuafafine e tā le record seʻi o latou faalogologo i ai, ma na latou taliaina foʻi ana lomiga. Na tauia o ia e ui i le faileagaina.” Na matuā manaʻomia le lototele ina ia onosaia ai nei teteega.

Na faapea mai lenā lava tuafafine: “Ou te manatua le amataga o le galuega mekasini i auala tetele i le 1940. I le taimi muamua, sa iai ni savaliga i tafā ala ma e savavali uso ma tuafāfine i se laina, ma ave ni faailoilo o loo iai ni faamatalaga e faapea, ʻReligion Is a Snare and a Racket’ (O Lotu o se Mailei ma o se Faiga Faapiʻopiʻo), ma le ʻServe God and Christ the King’ (Auauna i le Atua ma Keriso le Tupu). I le taimi e tasi, sa tufa fua atu foʻi ni sāvali i tagata. E ui lava sa manaʻomia le lototele e fai ai lenei galuega, ae sa mafai ona faalauiloa atu ai i le lautele le suafa o Ieova faapea ma ona tagata.”

Ua faapea mai se isi tuafafine: “E matuā faigatā ona faia le galuega mekasini i aai lāiti. O i inei na amata ai ona malolosi teteega i Molimau. . . . Na manaʻomia le lototele a o tutū i magāala ma faaali atu mekasini, ma valaau atu faaupuga na fautuaina i matou e faalauiloa atu. Peitaʻi, e tau lē misia lava se Aso Toonaʻi. O nisi o taimi e faaalia mai ai uiga faaleuō o tagata, a o isi taimi e siʻomia i matou e se vaega o tagata ua matuā feita mai, ma e masani ona matou ō ese ina ia ʻalofia ai i latou.”

E ui i teteega na mātauina i le vaitaimi o le Taua Lona Lua a le Lalolagi, ae sa faaauau pea ona talaʻi atu ma le lototele Molimau a Ieova. A o faagasolo se tauiviga e 43 aso le umi, e mai iā Tesema 1, 1940, seʻia oo iā Ianuari 12, 1941, e pe ā ma le 50,000 tagata talaʻi i Amerika na tufaina atu le toetoe lava valu miliona o tamaʻitusi.

O le toʻatele o uso ma tuafāfine matutua o loo i le faalapotopotoga a le Atua, o loo latou manatua lelei pea luʻi na latou fesagaʻia i aso ua mavae lea na manaʻomia ai le lototele. O loo manatua pea e nisi o i latou, se faaupuga e faaalia ai lo latou lototetele—Ia faaauau pea ona talaʻi ma le lototele seʻia oo i le iʻuga! E tatou te lē o mautinoa, pe faapefea ona faasalalau atu le feʻau mai iā Ieova, a o leʻi oo mai le iʻuga o lenei faiga amioleaga. Peitaʻi, e ala i le fesoasoani a Ieova, o le a faaauau pea ona tatou faalauiloa atu ana afioga ma le faatuatua ma le lototele.

[Faamatalaga faaopoopo i le itulau 9]

E manaʻomia pea le lototele a o auai i le galuega talaʻi o le Malo