Mea Iloga o lo Tatou Talafaasolopito

“Na Mātaulia ai Aʻu”

Ina ua taunuu Charlotte White o se tagata talaʻi faataimi atoa i Louisville i Kentucky, i le Iunaite Setete o Amerika, sa iloagofie o ia e tagata i lana atopaʻu e fai uili.

I LE 1908, sa mātauina e tagata le tuafafine o White ona o se mea fou na latou vaaia iā te ia e taʻua o le Dawn-Mobile, se atopaʻu e fai uili o loo iai tusi o le Millennial Dawn. Na faapea mai o ia: “Na talanoa tagata e uiga i lenei mea fou na latou vāai i ai ma na mātaulia ai aʻu.”

Na iloa e Tagata Aʻoga o le Tusi Paia, e pei ona sa faaigoa ai Molimau a Ieova i na aso, le manaʻomia ona talaʻia atu o upu moni tāua na latou aʻoaʻoina mai i le suʻesuʻe ma le filigā i le Tusi Paia. E toʻatele na maua aʻoaʻoga o le Tusi Paia, e ala i se faasologa o tusi e faaulutalaina o le Millennial Dawn (lea na mulimuli ane taʻua o le Studies in the Scriptures). O nisi o Kerisiano na lotomalilie ma sa mafai ona oo atu i aai ma nuu maotua, ina ia ofo atu nei tusi sa taʻua foʻi o le “Helping Hands for Bible Students,” i isi foʻi na naunau e faitau i ai.

I le 1908, na ofoina atu ai e le tuafafine o White ma isi tagata talaʻi maelega nei faasologa o tusi e ono, mo le $1.65 (tālā Amerika). Nai lo o le tuu saʻo atu o le tusi i le tagata, na latou faamau i lalo le aofaʻiga o tusi e manaʻo ai le tagata ona latou toe foʻi atu lea—aemaise i aso totogi—e tiliva atu tusi ma maua mai le tupe e totogi ai le lomiaina o le tusi. Na faitio mai se tasi o tagata tetee e faatatau i le itiiti o le tau na foaʻi mo tusi!

O loo manatua e Malinda Keefer lona otaina o  tusi e i le va o le lua selau i le tolu selau, e tiliva atu i tagata i le vaiaso e tasi. Peitaʻi, ona o le naunau o tagata i faasologa o tusi o le Dawns, sa tulaʻi mai ai ni faafitauli. E 740 itulau o le tusi lona ono! Na faamatalaina i se tasi o Olomatamata: “E fā sefulu pauna [18 kg] le mamafa o tusi e 50,” ma e “matuā mamafa” lava, aemaise lava mo tuafāfine.

Ina ia faafaigofie ona tiliva atu le Dawn, sa fausia e le uso o James Cole se uʻamea e iai ni uili ma tuu ai i luga se atopaʻu. Ona ua lē o toe amoina nei tusi mamafa, na faapea mai lē na fausia lenei ato: “Ua lē o toe tigā oʻu tauʻau.” Sa ia faalauiloa atu lenei fausaga fou i ē na auai i le tauaofiaga a Tagata Aʻoga o le Tusi Paia i le 1908, na faia i Cincinnati i Ohio. I pito e lua o le uʻamea lea e faalava, o loo iai le igoa Dawn-Mobile, ona o loo iai i totonu o nei ato ia tusi o le Millennial Dawn. E leʻi leva ae masani uso ma tuafāfine i le tosoina i le lima e tasi o lenei atopaʻu o loo tumu i tusi. E mafai ona fetuunaʻi le maualuga o le ato ma e mafai ona toso i luga o le auala. Pe a uma le talaʻiga i le aso, e mafai ona faamoe uili i autafa o le ato ina ia faigofie ai ona feaveaʻi.

E $2.50 (tālā Amerika) le tau o le Dawn-Mobile, ae sa ave fua mo tuafāfine na talaʻi faataimi atoa. O le tuafafine o Keefer lea o loo i inei lona ata, sa tomai tele o ia e faaaogā le isi lima e toso ai le Dawn-Mobile, ae e taʻitaʻi i le isi lima le ato o loo tumu foʻi i tusi. Ina ua maua le toʻatele o tagata fiafia e nonofo i se aai e ʻeli ai le koale i Pennsylvania i Amerika, sa masani ona toe foʻi faatolu pe e faafā i le aso e tasi e ui atu i se auala laupapa, e tiliva atu tusi.

I le 1987, na fausia ai e se pailate o vaalele se ato malaga e fai ni uili, lea ua tele ina faaaogā ma vaaia i malae vaalele ma ala tetele o aai pisi. Ae e pe ā ma le selau tausaga ua mavae na mātaulia ai Tagata Aʻoga maelega o le Tusi Paia i a latou Dawn-Mobiles, ma na tosina mai ai tagata i la latou galuega a o faalauiloa atu upu moni tāua o le Tusi Paia.

[Faamatalaga faaopoopo i le itulau 32]

Sa masani ona toe foʻi faatolu pe e faafā i le aso e tasi le tuafafine o Keefer e ui atu i se auala laupapa, e tiliva atu tusi

[Faamatalaga faaopoopo i le itulau 32]

Sa faafaigofie ai ona tiliva atu le Dawn