Ia Fesoasoani i Tagata Ina ia ʻFeala Mai’ Faaleagaga

“Ua outou iloa le taimi, ua oo mai le itula e tou te feala ai.”—ROMA 13:11.

PE E MAFAI ONA E FAAMATALA?

Aiseā e tāua ai i Kerisiano ona mataala pea faaleagaga?

Aiseā e tatau ai i tagata talaʻi mataala ona faalogologo lelei ma mātau lelei mea?

Aiseā e tatau ai ona faaalia le agalelei ma le agamalu i la tatou faiva?

1, 2. I le ā le itu e manaʻomia ai e le toʻatele o tagata ona feala mai?

I TAUSAGA taʻitasi, e faitau afe tagata e maliliu ona o le tautulemomoe po o le momoe foʻi a o aveina se taavale. O isi ua tutuli mai galuega ona o le moe umi ma tuai ai, po o le momoe foʻi i taimi o galuega. Ae e sili atu le mataʻutia o iʻuga e mafai ona oo i ai, pe a tautulemomoe faaleagaga. Ona o lea, ua faapea mai ai le Tusi Paia: “E fiafia o lē e mataala pea.”—Faaa. 16:14-16.

² A o latalata mai le aso tele o Ieova, o le toʻatele o tagata o loo momoe faaleagaga. E oo lava i nisi o taʻitaʻi lotu, ua latou taʻua a latou ʻaulotu o ni ē o loo momoe faaleagaga. O le ā le uiga o le moe faaleagaga? Aiseā e tāua ai i Kerisiano moni ona mataala pea? E faapefea ona tatou fesoasoani i isi ina ia feala mai faaleagaga?

O LE Ā LE MOE FAALEAGAGA?

3. E faapefea ona e faamatalaina se tagata e lē o mataala faaleagaga?

³ E masani lava o tagata o loo momoe e lē gaoioi. E ese mai ai ē o loo momoe faaleagaga, atonu e tele lo latou taimi e faaalu, ae e lē i mea faaleagaga. Atonu o le tele o taimi e latou te popole ai i mea o le olaga nei po o le saʻilia o faafiafiaga, tulaga aloaʻia, po o le tamaoaiga. Ona o na mea uma, ua faaalia ai lo latou lē manatu mamafa i manaʻoga faaleagaga. Peitaʻi, o tagata e mataala faaleagaga, latou te iloa o loo tatou ola “i aso e gata ai,” o lea, e latou te gaoioi i le tele e mafai ai ina ia faia le finagalo o le Atua.—2 Pete. 3:3, 4; Luka 21:34-36.

4. O le ā le tāua o lenei fautuaga: “Aua neʻi o tatou momoe pea e faapei o isi”?

⁴ Faitau le 1 Tesalonia 5:4-8. Ua apoapoaʻi mai i inei le aposetolo o Paulo i uso talitonu, ina ia aua neʻi “momoe pea e faapei o isi.” O le ā le uiga o lana tala? O se tasi o auala e mafai ai ona tatou “momoe pea,” o le lē amanaʻia lea o tapulaa  tau amio a Ieova. O se isi auala, o le lē amanaʻia lea o le mea moni e faapea, ua lata mai le taimi a Ieova, e faaumatia ai lenei lalolagi amioleaga. E tatau ona tatou faamautinoa, e lē o taaʻina i tatou i amioga ma uiga o na tagata e lē matataʻu i le Atua.

5. O ā ituaiga o manatu e iloa ai ē o loo momoe faaleagaga?

⁵ E manatu nisi, e lē o iai se Atua e faasalaina i latou e tusa ma a latou amioga. (Sala. 53:1) Ae mafaufau nisi e lē o manatu mai le Atua i tagata, o lea la, e leai se māfuaaga e tatou te fiafia ai i le Atua. Peitaʻi, e manatu nisi o le auai i le lotu o le a avea ai i latou ma uō a le Atua. O na tagata uma o loo momoe faaleagaga. E manaʻomia ona latou feala mai. E faapefea ona tatou fesoasoani iā i latou?

E TATAU ONA TATOU MATAALA PEA

6. Aiseā e tatau ai i Kerisiano ona tauivi pea e mataala faaleagaga?

⁶ Ina ia mafai ona fesoasoani i isi e feala mai, e tatau ona tatou mataala foʻi. O le ā e aofia ai i lenā mea? O loo faafesootaʻi e le Afioga a le Atua le moe faafaatusa i “galuega o le pogisa,” e pei o patī e lē taupulea, onāga, feusuaʻiga e lē talafeagai, amioga matagā, femisaaʻi, ma le lotoleaga. (Faitau le Roma 13:11-14.) E faigatā ona ʻalofia na ituaiga o amioga, ae e tāua lava ona mataala. E ono lamatia le ola o se avetaavale, pe afai e na te lē amanaʻia lamatiaga o le moe a o aveina le taavale. Maʻeu le tāua mo se Kerisiano ona iloa e mafai ona iai iʻuga mataʻutia o le moe faaleagaga!

7. O le ā se aafiaga iā i tatou pe afai e iai se vaaiga sesē e uiga i tagata?

⁷ O se faataʻitaʻiga, e ono manatu se Kerisiano, e teena e tagata uma o le oganuu le tala lelei, ma e lē taitai suia o latou manatu. (Faata. 6:10, 11) E ono manatu o ia, ʻPe afai e lē talilelei mai tagata, aiseā la e manaʻomia ai fua ona tinoū e fesoasoani iā i latou?’ O le mea moni, atonu o loo momoe faaleagaga le toʻatele i aso nei, ae e mafai lava ona suia o latou tulaga ma uiga. E iai lava nisi e feala ma talilelei mai. E mafai ona tatou fesoasoani iā i latou, pe afai e tatou te mataala foʻi, e ala i le taumafai e faataʻitaʻi ni auala fou e taʻu atu ai le feʻau o le Malo, i se uiga e talia gofie ai e tagata. E aofia ai foʻi i lo tatou mataala faaleagaga, le manatuaina o le māfuaaga e tāua ai la tatou faiva.

AISEĀ E TĀUA AI LA TATOU FAIVA?

8. Aiseā e matuā tāua tele ai la tatou faiva faa-Kerisiano?

⁸ Ia manatua, po o le ā lava le tali mai a tagata, o la tatou galuega talaʻi e faamamaluina ai Ieova, ma e iai se vaega tāua i le galueaʻiina ma le faataunuuina o Lona finagalo. E lē o toe umi ona oo mai lea o le faasalaga tonu i ē e lē usiusitaʻi i le tala lelei. O le a faavae le faamasinoina o tagata i le auala e latou te tali mai ai i la tatou galuega talaʻi. (2 Tesa. 1:8, 9) E lē gata i lea, e lē o se mea atamai mo se Kerisiano ona manatu e lē o manaʻomia ona maelega i le talaʻiga, talu ai o le a “toetutū mai tagata amiotonu ma tagata amiolētonu.” (Galu. 24:15) Ua tatou malamalama mai i le Afioga a le Atua o ē e faamasinoina o ni “ʻoti,” o le a oo atu i le “faaumatiaga e faavavau.” O la tatou galuega talaʻi e faailoa atu ai le alofa mutimutivale o le Atua, lea e mafai ai e tagata ona suia o latou olaga, ma maua “le ola e faavavau.” (Mata. 25:32, 41, 46; Roma 10:13-15) Pe ana faapea e tatou te lē talaʻi, e faapefea la ona maua e tagata le avanoa e faalogo ai i le feʻau lea e iʻu atu ai i le ola?

9. Ua faapefea ona aogā iā te oe ma isi le faia o se sao i le talaʻia o le tala lelei?

⁹ E aogā foʻi iā i tatou le talaʻia o le tala lelei. (Faitau le 1 Timoteo 4:16.) O le talanoa atu i isi e uiga iā Ieova ma le faamoemoe o le Malo, e mafai ona faamalosia ai lou faatuatua, lou alofa mo le Atua, ma fesoasoani iā te oe e atiaʻe ai uiga faa-Kerisiano. O le faailoa atu o lou tuutoina atu i le Atua e ala i le faia o se sao i le talaʻiga, o le a saosaolaumea i lou mauaina o le fiafia. O le toʻatele o ē na maua le faaeaga e aʻoaʻoina ai isi i le upu moni, na maua le olioli i le vāai atu i  le auala na mafai ai e le agaga o le Atua, ona fesoasoani i ē fou ina ia suia o latou olaga.

IA MĀTAU LELEI MEA

10, 11. (a) O le ā le auala na faaalia ai e Iesu ma Paulo le mataala ma le mātauina lelei o mea? (e) Ia aumai se faataʻitaʻiga e iloa ai e mafai ona faaleleia la tatou faiva, ona o le mataala ma le mātau lelei o mea.

¹⁰ Atonu e eseese auala e faaosofia ai le fiafia o tagata i le tala lelei. E tāua tele ai la i auauna Kerisiano ona mataala i so o se vala. E tatou te faaaʻoaʻo iā Iesu. Ona o lona tulaga lelei atoatoa, sa mafai ai ona ia iloa le lē fiafia o se Faresaio, e ui lava e leʻi faaalia mai ona uiga lē fiafia, le salamō moni o se fafine agasala, ma se uiga faataulaga na faaalia e se fafine ua oti lana tane. (Luka 7:37-50; 21:1-4) E mafai ona tali atu Iesu i manaʻoga faaleagaga o tagata taʻitoʻatasi. Peitaʻi, e lē manaʻomia e se auauna a le Atua ona lelei atoatoa, ina ia avea ai ma sē e mātauina lelei mea. Na faataʻitaʻia mai e le aposetolo o Paulo lenā tulaga. Sa fesuisuiaʻi le auala na ia talanoa atu ai, ina ia faigofie ona taliaina le feʻau e tagata e eseese o latou tulaga ma uiga.—Galu. 17:22, 23, 34; 1 Kori. 9:19-23.

¹¹ O lo tatou taumafai ina ia mataala ma mātau lelei mea e pei o Iesu ma Paulo, o le a mafai ai ona iloa lelei le auala e faaosofia ai le fiafia o ē e tatou te feiloaʻi. O se faataʻitaʻiga, pe a e feiloaʻi ma tagata i le faiva, ia mātau mea e iloa ai a latou aganuu, mea e fiafia i ai, po o tulaga o o latou aiga. Atonu e mafai ona e fai atu se faamatalaga faaaloalo a o e amataina se talanoaga, e uiga i se mea o loo latou faia i lenā taimi.

12. Aiseā e tatau ai ona tatou faaeteete i talanoaga e faia a o auai i le faiva?

¹² E taumafai lava se tagata mataala e mātauina lelei mea ina ia ʻalofia mea e tosina ese ai o ia. A o auai i le faiva, o talanoaga ma ē tatou te galulue faatasi e mafai ona faalaeiauina ai. Peitaʻi, e ao ona tatou manatua o le autū o le auai i le faiva i le fanua ina ia talaʻi atu i isi. (Fai. 3:1, 7) O lea la, e tatau ona tatou faaeteete ina neʻi faalavelavea la tatou faiva, ona o ā tatou talanoaga e faia a o ō atu i isi fale. O se tasi o auala lelei e uaʻi atu ai o tatou mafaufau i le talaʻiga, o le talanoaina lea o manatu e tatou te mananaʻo e taʻu atu i ē e faaalia le fiafia. E ui lava atonu e iai taimi e aogā ai le telefoni feaveaʻi iā i tatou i le faiva, ae e tatau ona faamautinoa, o le a lē avea ma faalavelave i taimi e faia ai talanoaga ma lē e ona le fale.

IA FAAALIA LE NAUNAU MONI I TAGATA

13, 14. (a) E faapefea ona tatou iloa mea e fiafia i ai se tagata? (e) O ā auala e mafai ona tatou amataina ai ni talanoaga i le faiva?

¹³ O tagata talaʻi o ē e faaalia le mataala, e faalogologo lelei i ē e latou te feiloaʻi. O ā fesili e mafai ona e lāgā ina ia mafai ai ona faaali mai faalogona o se tasi i le oganuu? Po o popole o ia i le tele o lotu, o soligatulafono i le vaipanoa o loo ia nofo ai, po o le lē taulau o faigāmalo? Pe e mafai ona e faaosofia le fiafia o tagata i mataupu faaleagaga, e ala i le taʻua o le auala ofoofogia na faia ai meaola, po o le auala e aogā ai fautuaga mai i le Tusi Paia? E toetoe o tagata uma e fiafia e tatalo, e oo lava i nisi e lē talitonu e iai se Atua. O le toʻatele e taumānatu po o faafofoga mai se tasi i tatalo. Atonu e naunau nisi e fia malamalama i fesili nei: Pe e faafofoga le Atua i tatalo uma? Afai e leai, o le ā e tatau ona tatou faia ina ia faafofoga mai ai le Atua?

¹⁴ E tele mea e tatou te aʻoaʻoina e uiga i le tomai e amataina ai ni talanoaga, e ala i le mātauina o tagata talaʻi ua iai le poto masani e faia faapea. Ia mātau le auala e latou te ʻalofia ai tulaga o le tuufesilisili po o le isuisu fua. E faapefea i o latou leo ma foliga vaaia ona faaalia atu ai lo latou naunau i manatu o le tagata e ona le fale?—Faata. 15:13.

UIGA AGALELEI MA LE TOMAI

15. Aiseā e tatau ai ona faaalia le agalelei a o tatou taumafai e talaʻi atu?

¹⁵ Pe e te fiafia pe a fafagu oe a o gase lau moe? O le toʻatele e lē fiafia pe a faafuaseʻi ona fafagu i latou. E masani lava e sili atu ona fiafia  tagata pe a fafagu i latou i se auala lemū. E talitutusa foʻi lenā ma taumafaiga e fafagu mai tagata i se uiga faaleagaga. O se faataʻitaʻiga, o le ā le auala sili e tali atu ai i se tagata pe a faaalia mai lona lē fiafia i le talaʻiga? Ia avatu le faamalō i se auala agalelei ona o ona manatu faaalia, aemaise lona tautala saʻo, ona e alu ese lea ma le filemu. (Faata. 15:1; 17:14; 2 Timo. 2:24) O ou uiga agalelei, atonu o le a uunaʻia ai lenā tagata e tali lelei mai i le isi taimi, e toe asiasi atu ai se Molimau a Ieova.

16, 17. E faapefea ona tatou faaaogāina le tofā mamao i la tatou faiva?

¹⁶ I isi tulaga, atonu e mafai ona e tali atu pe a faaalia mai se uiga lē lelei, ina ia mafai ona faaauau ai pea se talanoaga. E ono faapea mai se tasi, “Leai faafetai. O lea e iai laʻu lava lotu,” po o le, “Ou te lē o fia faalogo,” ona e foliga mai o le auala faigofie lea e faamuta ai se talanoaga. Peitaʻi, o le iai o le tomai ma le faaalia pea o le agalelei, atonu o le a e lāgā ai se fesili faatupu manatu, lea o le a faaosofia ai le fiafia o lē e ona le fale i mea faaleagaga.—Faitau le Kolose 4:6.

¹⁷ E iai taimi e tatou te feiloaʻi ai ma tagata e faapea mai e lē maua se avanoa e talanoa ai ona o le pisi, o lea, e lelei ona tatou amanaʻia le tulaga o le tagata ma tuumuli ese loa. Ae e iai taimi, atonu e te faaaogā ai le tofā mamao, ina ia mafai ai ona fai atu se faamatalaga puupuu ma uigā. Ua malamalama lelei isi ʻautalaʻi i le aogā o le suʻe o le Tusi Paia, faitau se mau faatupu manatu, ona tuu lea o se fesili e taliina i le isi asiasiga—ia lē silia ma le minute le umi e faia ai. Ona o le pupuu o taulimaga, ua mafai ai ona faaosofia le fiafia o lē e ona le fale, ma ia iloa ai e maua lava le avanoa e faia ai se talanoaga puupuu. Aiseā e lē taumafai ai e faia lenā mea pe a talafeagai ma le tulaga o loo iai?

18. O le ā atonu e tatou te faia ina ia matuā uigā le auala e avatu ai se molimau lē fuafuaina?

¹⁸ Pe a tatou feiloaʻi ma tagata a o faagasolo le olaga i aso faisoo, e masani lava ona tatou faaosofia lo latou fiafia i le tala lelei, pe afai e tatou te nofosauni e avatu se molimau lē fuafuaina. E masani ona ave nisi o lomiga e le toʻatele o uso ma tuafāfine. E ono iai lava se mau patino o le Tusi Paia e latou te manatuaina e faaaogā, pe a maua se avanoa e avatu ai se molimau. Atonu e mafai ona e talanoa atu i le ovasia o le auaunaga, po o paeonia o lau faapotopotoga, i le auala e mafai ai ona e faia faapea.

UUNAʻIA MA LE AGALELEI O TATOU TAUAIGA

19. Aiseā e lē tatau ai ona tatou faavaivai i a tatou taumafaiga e fesoasoani i o tatou tauaiga?

¹⁹ O le tulaga masani lava, e tatou te mananaʻo e fesoasoani i o tatou tauaiga ina ia talia le tala lelei. (Iosua 2:13; Galu. 10:24, 48; 16:31, 32) E ono faaitiitia lo tatou maelega, pe afai e teena a tatou uluaʻi taumafaiga. Atonu e tatou te mafaufau faapea, ailoga e mafai ona suia uiga o o tatou tauaiga, e tusa lava po o ā a tatou gaoioiga ma faamatalaga e fai atu. Peitaʻi, e ono iai lava se suiga i olaga ma manatu o ou tauaiga, ona o mea tutupu. Pe atonu foʻi e iai ni taunuuga lelei, pe a faaleleia lou tomai i le auala e faamatalaina ai le upu moni.

20. Aiseā e tāua ai le faautauta pe a talanoa atu i tauaiga?

 ²⁰ E ao ona tatou manatu mamafa i faalogona o o tatou tauaiga. (Roma 2:4) Pe e lē tatau ona tatou talanoa atu iā i latou i se auala agalelei, e pei o le auala e talanoa ai i ē e tatou te feiloaʻi i le faiva i le fanua? Ia talanoa atu i se auala agamalu ma le faaaloalo. Nai lo o le faaalia o ni uiga faafiaamiotonu, e tatau ona faaalia atu i au amioga, ua mafai e le upu moni ona suia lou olaga i le lelei. (Efe. 4:23, 24) Ia faailoa atu ma le manino, le auala ua faatamaoaigaina ai faaleagaga lou olaga e Ieova, o lē e “aʻoaʻo oe i mea e aogā iā te oe.” (Isa. 48:17) E tatau ona mātauina e ou tauaiga, o oe o se Kerisiano o loo fai ma faaaʻoaʻoga lelei.

21, 22. Faamatala mai se mea na tupu e faaalia ai le tāua o le faaauau pea ona faia o taumafaiga, e fesoasoani ai i tauaiga i le itu faaleagaga.

²¹ Talu ai nei, na tusi se tuafafine e faapea: “Sa ou taumafai lava e molimau atu i oʻu uso ma tuagane e toʻa 13, e ala i amioga lelei ma le auala e talanoa atu ai e uiga i le upu moni. O tausaga uma lava ou te tusi atu ai iā i latou uma. Peitaʻi, mo le 30 tausaga, e na o aʻu lava o lo matou aiga sa Molimau a Ieova.”

²² Na taʻua atili e le tuafafine: “I se tasi aso, sa ou telefoni i se tasi o oʻu uso o lē e mamao le mea o loo nofo ai. Na ia faapea mai sa ia talosagaina lana faifeʻau e la te suʻesuʻeina faatasi le Tusi Paia, ae e leʻi faia faapea e le faifeʻau. Ina ua ou fai i loʻu uso ou te fiafia e fesoasoani iā te ia, sa ia faapea mai: ʻIa ua lelei, ae o laʻu tala lea: E lē taitai avea aʻu ma Molimau a Ieova.’ Ina ua uma ona ou lafo atu iā te ia le tusi O ā Aʻoaʻoga Moni a le Tusi Paia?, ona ou telefoni lea i ai i le tele o aso. Peitaʻi, e na te leʻi faitauina lava le tusi. Na iʻu lava ina ou talosaga atu iā te ia e avane lana tusi, ma pe ā ma le 15 minute na ma faitau ma talanoaina ai nisi o mau o le Tusi Paia, o loo siiina mai i le tusi. Ina ua mavae nisi o ma talanoaga i le telefoni, na manaʻo ai loa e silia ma le 15 minute le umi e faia ai le suʻesuʻega. Ona amata lea ona ia telefoni mai e faia lana suʻesuʻega, o isi taimi e vili mai i le taeao ou te leʻi ala, a o isi taimi e faalua i le aso ona vili mai. Na papatisoina o ia i le tausaga na sosoo ai, ae na amata ona paeonia i le tausaga na mulimuli ane ai.”

23. Aiseā e lē tatau ai ona tatou faavaivai i le taumafai e fafagu tagata mai i le momoe faaleagaga?

²³ O se tomai le fesoasoani i tagata ina ia feala mai i le momoe faaleagaga, ma e manaʻomia ai taumafaiga filigā. Peitaʻi, o loo tali mai pea tagata agamalu i a tatou taumafaiga i le fafaguina o i latou faaleagaga. I se fua faatatau, e silia ma le 20,000 tagata e papatisoina i masina taʻitasi, ina ia avea ma Molimau a Ieova. O lea, seʻi o tatou teuloto le fautuaga a le aposetolo o Paulo iā Arekipa: “Ia vaavaai lelei ina ia faataunuuina le faiva lea na e talia o se soo o le Alii.” (Kolo. 4:17) O le a fesoasoani le isi mataupu o loo sosoo mai i le ʻautalaʻi, ina ia malamalama i le uiga o le talaʻi ma le faanatinati.

[Fesili mo le Suʻesuʻega]

[Pusa i le itulau 13]

AUALA E FAATUMAUINA AI PEA LOU MATAALA

▪ Faaalu le tele o le taimi i le faia o le finagalo o le Atua

▪ ʻAlofia galuega o le pogisa

▪ Ia mataala i lamatiaga o le moe faaleagaga

▪ Ia saʻo pea le vaai i tagata o la outou oganuu

▪ Ia faataʻitaʻi ni auala fou e talaʻi atu ai i isi

▪ Ia manatua le tāua o lau faiva