O le ā le Auala E te Avatuina ai Fautuaga?

Pe sa iai se taimi na fesili atu ai se tasi iā te oe mo se fautuaga? O se faataʻitaʻiga, po ua fesili atu se tasi iā te oe i fesili nei: ʻO le ā e ao ona ou faia? Pe e tatau ona ou alu i lea faatasiga? Pe e tatau ona ou saʻilia lea galuega? Pe e tatau ona faia se ma tuugātala ma lea tagata?’

E ono fesili atu se tasi iā te oe mo se fesoasoani, i le faia o filifiliga atonu e aafia ai lana faiā ma ana uō, lona aiga, aemaise Ieova. Po o le a faavae au fautuaga i ou lava manatu, po o manatu o le Tusi Paia? O le ā lau auala masani e fesoasoani ai i tagata i le faia o filifiliga? E tusa lava pe e foliga mai e tāua le fesili a le tagata pe e leai, ae o loo faapea mai le Faataoto 15:28, “o le loto o lē e amiotonu e mafaufau loloto ina ia tali atu.” Seʻi tomānatu i auala e mafai ai e mataupu silisili e lima o le Tusi Paia o loo mulimuli mai, ona fesoasoani iā i tatou i le auala e avatu ai fautuaga.

1 Ia Iloa le Tulaga Moni.

“Pe a tali atu se tasi i se mataupu ae e leʻi faalogo i ai, o lona lava valea lea ma le faamāina.”—FAATA. 18:13.

Ina ia tuuina atu se fautuaga lelei, e tatau ona tatou malamalama muamua i le tulaga ma le manatu a lē o loo talosaga mai. Ina ia faataʻitaʻi: Pe a vili atu se tasi ma fesili atu i le auala sili e taunuu ai i lou fale, o le ā e ao ona e iloa muamua ina ia fesoasoani atu ai? Pe e te fautuaina o ia i le auala sili e ao ona uia, e aunoa ma le malamalama muamua i le nofoaga o loo iai lenā tagata? E mautinoa e leai! E faapena foʻi pe a e manaʻo e avatu fautuaga talafeagai, e manaʻomia ona iai le poto masani i le tulaga ma le manatu o lē o loo talosaga mai. Atonu e iai ni uiga ma tulaga e faatatau i lenā tagata e te lē o malamalama i ai. Ae pe a e iloa lelei na mea, e ono iai se aafiaga i le auala e te avatu ai le fautuaga. Pe a tatou lē malamalama lelei i le tulaga o lenā tagata, e tatou te ono avatua la se fautuaga e mātua faasesēina ai lea tagata.—Luka 6:39.

Iloilo po o le ā le Tele o Ana Saʻiliʻiliga na Faia. Atonu o se tulaga atamai foʻi le fai atu i le tagata i nisi o fesili nei: “O ā mataupu silisili faale-Tusi Paia e te iloa e aogā i lenei mataupu?” “O ā iʻuga lelei ma iʻuga lē lelei o loo e iloaina e faatatau i lau filifiliga?” “O ā ni saʻiliʻiliga ua māeʻa ona e faia?” “O ā fesoasoani ua uma ona faia e isi mo oe, e pei o toeaina o le faapotopotoga, ou mātua, po o lē o loo faia lau suʻesuʻega faale-Tusi Paia?”

O le a fesoasoani tali o na fesili iā i tatou e iloa ai, po o le ā le tele o taumafaiga a le tagata na faia i le saʻilia o tali. E lē gata i lea, o le a fua a tatou fautuaga e tusa ai o faamatalaga atonu na fai mai e isi. Atonu foʻi e tatou te malamalama ifo e pau lava le mea o loo manaʻo i ai le tagata, o le avatu lea o faamatalaga e logolelei iā te ia.—2 Timo. 4:3.

2 ʻAlofia le Vave Tali Atu.

“Ia faalogologo lelei tagata uma, ae aua le vave ona tautala.”—IAKO. 1:19.

 E iai taimi atonu e tatou te mafaufau ai, o le a aogā le vave tali atu i le tagata o loo saʻilia se fesoasoani. Ae pe e atamai lenā tulaga, aemaise pe a tatou fautuaina lenā tagata i se mataupu e leʻi faia i ai ni a tatou saʻiliʻiliga māeʻaeʻa? Ua taʻua i le Faataoto 29:20: “Pe na e iloa se tagata e vave ona tautala ae e lē mafaufau muamua? E tele atu le faamoemoe mo le tagata valea nai lo o ia.”

Ia faamautinoa o loo faavae au fautuaga i le atamai e maua mai i le Afioga a le Atua. Ia fesili ifo, ʻPo ua aafia le auala ou te avatu ai fautuaga, i manatu ma le “agaga o le lalolagi”?’ (1 Kori. 2:12, 13) E ao ona manatua, e lē lava le tau ona iai o ni uunaʻiga lelei i le avatuina o fautuaga. Ina ua iloa e le aposetolo o Peteru le faigatā o le tofiga a Iesu, sa ia fautua atu e faapea: “Le Alii e, ia e alofa iā te oe lava, e lē tutupu na mea iā te oe.” O le ā e mafai ona tatou aʻoaʻoina mai i le tali a Peteru? Pe afai e tatou te lē faaeteete, e mafai ona faavae a tatou fautuaga e lē i “manatu o le Atua,” ae “o manatu o tagata.” (Mata. 16:21-23) Maʻeu le tāua o le mafaufau muamua ae e leʻi avatu se fautuaga! Pe e lē moni ea, e sili atu le atamai o le Atua i lo o lo tatou poto masani?—Iopu 38:1-4; Faata. 11:2.

3 Ia Lotomaulalo e Faatatauina le Afioga a le Atua.

“Ou te lē faia se mea i loʻu lava loto; ae e pei ona aʻoaʻo mai e le Tamā iā te aʻu, o mea ia ou te tautala atu ai.”—IOA. 8:28.

Po o le a e fai atu, “Afai o aʻu o oe, ou te . . . ”? E tusa lava pe e foliga mai e faigofie le tali i le mataupu, ae e ao lava ona e faataʻitaʻi i le faaaʻoaʻoga sa faataatia e Iesu o le lotomaulalo. E ui lava e sili atu ona atamai ma agavaa Iesu i lo o se isi lava tagata, ae na ia faapea mai: “Ou te lē tautala atu i oʻu lava manatu, a o le Tamā . . . ua ia tuuina mai le poloaʻiga e tusa ma le mea e taʻu atu ma tautala atu ai.” (Ioa. 12:49, 50) E faavae lava aʻoaʻoga ma fautuaga a Iesu i le finagalo o lona Tamā.

O se faataʻitaʻiga, i le Luka 22:49 o loo taʻua ai, na fesili le ʻausoo iā Iesu mo se fautuaga, pe e tatau ona latou faasagatau atu a o leʻi puʻea o ia. Na faaaogā e se tasi o soo le pelu. Seʻi mātau mai le faamatalaga o loo i le Mataio 26:52-54, e ui i le mea na tupu, ae sa fefulifulisaʻi pea Iesu ma ona soo e faatatau i le finagalo o Ieova. Ona sa silafia e Iesu mataupu silisili o loo i le Kenese 9:6, ma valoaga o loo i le Salamo mataupu e 22 ma le Isaia mataupu e 53, sa mafai ai ona ia avatu fautuaga atamai lea e lē taumatea na faasaoina ai ola ma faafiafia ai Ieova.

4 Ia Faaaogā Lomiga Faale-Tusi Paia.

“O ai la le pologa faamaoni ma le faautauta, o lē ua tofia e lona matai e vaavaaia lana ʻaufaigaluega, e avatu a latou meaʻai i le taimi tatau?” —MATA. 24:45.

 Ua tofia e Iesu se vasega o le pologa faamaoni ma le faautauta, e faasoaina mai meaʻai tāua faaleagaga. A o leʻi avatu se fautuaga i se tasi e faatatau i mataupu tāua, pe e te faaalu se taimi e faia ai ni au saʻiliʻiliga māeʻaeʻa i lomiga faale-Tusi Paia?

I le Faasino Mataupu o loo i le pito i tua o le lomiga o Le Olomatamata mo Tesema 15 i tausaga taʻitasi, e tele mataupu e fesoasoani iā i tatou e maua ai fautuaga. E mafai foʻi ona e talosaga atu i se tasi e fesoasoani iā te oe, i le saʻilia o faamatalaga aogā i le Watchtower Library i le faa-Peretania. * E lē tatau ona galo iā i tatou ona faaaogā nei meafaigaluega e aogā mo saʻiliʻiliga atili. O loo lisiina mai ai le faitau afe o ulutala, lea e iai le tele o mataupu e fesoasoani ai i tagata o loo saʻili mo ni fautuaga. Po o mafai ona e fesoasoani atu i isi i le auala e faaaogāina ai nei meafaigaluega, ina ia faia ai suʻesuʻega ma faatusatusa mataupu silisili o le Tusi Paia, ma faia ai se filifiliga atamai? E pei lava ona mafai e se faafanua ona fesoasoani i se tagata i le filifilia o le auala e uia, ina ia taunuu ai i se nofoaga patino, e faapena foʻi ona fesoasoani lomiga faale-Tusi Paia i se tagata e faia filifiliga e aogā, ina ia taunuu ai i lona sini o le ola e faavavau.

O le toʻatele o toeaina ua latou fesoasoani i tagata talaʻi i le auala e saʻili ai mataupu, e ala i le faaaogāina o nei faasino mataupu e maua i tausaga taʻitasi, po o le Watchtower Library i le CD-ROM, lea e fesoasoani ai i o latou uso ma tuafāfine e fefulifulisaʻi ai i mau o le Tusi Paia. E lē gata e fesoasoani i tagata talaʻi ina ia iloa le auala e foʻia ai mataupu e fitoitonu i le tagata lava ia, ae o le a faamasani ai foʻi i le faia o saʻiliʻiliga, ma faaaogā sauniuniga faaleagaga mai iā Ieova. O lenei auala, “ua faaaogā [ai] o latou mafaufau e iloa le mea saʻo ma le mea sesē ina ua aʻoaʻoina.”—Epe. 5:14.

5 ʻAlofia le Taumafai e Faia Filifiliga mo Isi.

“E tauave e le tagata lava ia lana avega.”—KALA. 6:5.

I le iʻuga, e filifili lava le tagata ia po o lē fea fautuaga ma timaʻiga e mulimuli i ai. Ua tuu mai e Ieova iā i tatou uma le filifiliga saʻoloto, ina ia filifili ai pe usiusitaʻi i ana mataupu silisili pe e leai. (Teu. 30:19, 20) E tele mataupu silisili o le Tusi Paia e aafia i nisi o tulaga, ae o le mea moni, e faia lava e lē o loo talosaga mai mo se fautuaga lana lava filifiliga. E fua i le mataupu ma le matua o lē o loo talosaga mai mo sa tatou fautuaga, o lea atonu e tatou te fesili ifo ai, ʻPe e talafeagai mo aʻu le taliina o lenei fesili?’ O nisi o mataupu e sili ona taulimaina e toeaina o le faapotopotoga, ae afai o lē o loo talosaga mai o se talavou, e sili la ona taulima e ona mātua.

[Faaopoopoga i lalo]

[Pusa/​Ata i le itulau 8]

Mataupu e Suʻesuʻe Faatasi i le Tapuaʻiga a le Aiga

Ina ia avea o se mataupu mo suʻesuʻega, aiseā e lē faia ai ni au saʻiliʻiliga i tali o nisi o fesili sa fesiligia ai oe? O ā ni lomiga ma ni mataupu silisili o le Tusi Paia na e mauaina, e mafai ona fesoasoani ai i le taliina o le fesili a lenā tagata? O se faataʻitaʻiga, e ono fesili atu se uso po o se tuafafine iā te oe mo se fautuaga, e faatatau i le faia o se tuugātala lea e iʻu ane i se faaipoipoga. Pe a faaaogāina nei faasino mataupu e maua i tausaga taʻitasi lea o loo i le itulau mulimuli o Le Olomatamata, ia suʻe i tamaʻi ulutala “Mataupu mo Suʻesuʻega,” po o le “Olaga faa-Kerisiano ma Uiga.” E te maua foʻi faamatalaga aogā i le “Publications Index” o le Watchtower Library i le faa-Peretania, i luga o CD-ROM i lalo o ulutala “Dating” (Faia o se Tuugātala), po o le “Marriage” (Faaipoipo). Ona suʻe lea i se tamaʻi ulutala o loo maua ai se faamatalaga, e fetaui tonu i le tulaga o le tagata. E te ono maua foʻi isi tamaʻi ulutala i lalo o le faaupuga “See also” (Tagaʻi foʻi), lea o le a fesoasoani iā te oe ina ia maua ai nisi faamatalaga atili e faatatau i le mataupu o loo e saʻilia.

[Pusa i le itulau 9]

E tatou te faafetaia Ieova, ona ua ia faaaogāina lana faalapotopotoga e fesoasoani mai ai iā i tatou, i le avatuina ma le mauaina o fautuaga e sili ona lelei. Ua faapea mai le Failauga 12:11: “O upu a ē e atamamai ua pei o tui e tui ai povi, o i latou foʻi e toʻaʻaga e aoaoina faamatalaga poto ua pei o fao ua faamauina; o upu a ē e popoto ua tuuina mai e le leoleo mamoe e toʻatasi.” “O tui e tui ai povi,” o laau ia e maʻai le isi itu, ma e faaaogā e taʻitaʻiina ai manu. O fautuaga lelei ma alofa, e tai pei lava o se tui e tui ai povi, ona e taʻitaʻia ai i tatou i le ala saʻo. E pei lava foʻi ona mautū ma malosi le fausaga o se fale ona “o fao ua faamauina,” e faapena foʻi ona fesoasoani fautuaga lelei i se tagata ina ia faia ni filifiliga e lelei ma mautū. E fiafia ē e atamamai e manatunatu loloto i “faamatalaga poto,” lea e faaalia ai le atamai o lo latou “leoleo mamoe e toʻatasi” o Ieova.

E tatau ona tatou faaaʻoaʻo i lo tatou Leoleo Mamoe o Ieova, pe a avatu ni fautuaga. E tatou te fiafia e faalogo atu i ē fesili mai mo ni fautuaga, ma fesoasoani atu iā i latou i le tele e tatou te mafai ai. Pe afai e faavae a tatou fautuaga i mataupu silisili o le Tusi Paia, e mautinoa o le a aogā i isi ma e ono fesoasoani iā i latou e maua ai le ola e faavavau.