E Leoleomaluina i Tatou e Ieova mo le Faaolataga

“Outou . . . o ē ua leoleomaluina e le mana o le Atua i le faatuatua mo le faaolataga, lea ua saunia e faaalia mai i le taimi mulimuli.”—1 PETE. 1:4, 5.

O LE Ā LAU TALI?

O le ā le auala ua tosina ai i tatou e Ieova i le tapuaʻiga moni?

E faapefea ona tatou talia le taʻitaʻiga a Ieova e ala mai i ana fautuaga?

Ua faapefea ona saunia e Ieova faalaeiauga mo i tatou?

1, 2. (a) E faapefea ona tatou mautinoa o le a fesoasoani mai Ieova ina ia tatou tumau ma le faamaoni? (e) O le ā le tele e silafia ai e Ieova i tatou taʻitoʻatasi?

“A O LĒ e tumau seʻia oo i le iʻuga, o le a faaolaina o ia.” (Mata. 24:13) Na faamanino mai e Iesu i na upu, ina ia mafai ona faasaoolaina i tatou pe a oo mai le sala faafaamasinoga a le Atua i lenei lalolagi a Satani, e manaʻomia ona tatou faamaoni seʻia oo i le iʻuga. Peitaʻi, e lē faapea ai e faatalitalia e Ieova i tatou e tumau ona o so tatou lava malosi po o se tomai. Ua faamautinoa mai e le Tusi Paia iā i tatou: “E faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.” (1 Kori. 10:13) O le ā o loo faatatau i ai nei upu?

² E faamautinoa e Ieova e tatou te lē oo atu i se faaosoosoga e sili atu nai i lo o le mea e tatou te lavātia. E mafai ona Ia faia faapea, ona e na te silafia mea uma e faatatau iā i tatou, e aofia ai luʻi e tatou te fesagaʻia, o o tatou uiga, ma le tele e mafai ona tatou lavātia. Pe e faapena le auala e silafia lelei ai e Ieova i tatou? Ioe. Ua taʻua i le Tusi Paia, e silafia lelei e Ieova i tatou taʻitoʻatasi. E silafia lelei e Ieova a tatou faasologa i aso taʻitasi ma a tatou masaniga. E na te suʻesuʻe foʻi o tatou manatu ma faanaunauga o o tatou loto.—Faitau le Salamo 139:1-6.

3, 4. (a) Na faapefea i mea na tutupu iā Tavita, ona iloa ai o loo uaʻi mai Ieova i tagata taʻitoʻatasi? (e) Ua faapefea ona faailoa mai le naunau o Ieova iā i tatou i aso nei?

³ Pe e moni lava e mafai ona naunau totino mai Ieova iā i tatou o ni tagata faatauvaa? Na fefulifulisaʻi le mafaufau o Tavita i lenei fesili, ina ua ia faapea atu iā Ieova: “Ina ua ou vaai atu i lou lagi, o galuega a ou tamatamaʻilima, o le masina ma fetu na e saunia, o ai ea le tagata faatauvaa ua  e manatu mai i ai?” (Sala. 8:3, 4) Sa ono mafaufau Tavita i lenei fesili pe a manatunatu i le auala na silasila ai Ieova iā te ia. I le avea ai o ia ma uii a Iese, sa silasila Ieova iā te ia o “se tagata e malie i ai lona finagalo,” ma aveesea o ia “mai i le mulimuli atu i le lafu mamoe, e avea ma taʻitaʻi” iā Isaraelu. (1 Samu. 13:14; 2 Samu. 7:8) Seʻi mafaufau la i faalogona o Tavita ina ua ia iloa, o loo uaʻi mai Lē na foafoaina mea uma i ona manatunatuga, e ui o ia o se leoleo mamoe talavou!

⁴ O se mea e maofa ai pe a manatunatu i le naunau mai o Ieova iā i tatou i aso nei. Ua ia aoaoina tagata tapuaʻi moni “o mea ua manaʻomia mai i atunuu uma,” ma ua ia fesoasoani i ana auauna ina ia tumau i le faamaoni. (Ha. 2:7) Ina ia malamalama atili pe faapefea ona fesoasoani mai Ieova iā i tatou ina ia tumau i le faamaoni, seʻi tatou toe tomānatu i le auala na tosina mai ai e Ieova tagata i le tapuaʻiga moni i le taimi muamua.

UA TOSINA MAI E LE ATUA I TATOU

5. E faapefea ona tosina mai e Ieova tagata i lona Alo? Ia faataʻitaʻi.

⁵ Na fetalai Iesu: “E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu.” (Ioa. 6:44) Ua atagia mai i na upu, ina ia avea ma soo o Keriso, e tatou te manaʻomia le fesoasoani a le Atua. E faapefea ona tosina mai e Ieova ē e pei o ni mamoe i lona Alo? E ala lea i le galuega talaʻi ma lona agaga paia. O se faataʻitaʻiga, a o iai Paulo ma ana paga faamisionare i Filipi, na latou feiloaʻi ai i se fafine e igoa iā Litia, ma amata loa ona latou talanoa iā te ia e faatatau i le tala lelei. Ua taʻua i le Tusi Paia: “Ua tatalaina e Ieova lona loto e talia mea ua fai atu ai Paulo.” Na faaaogā e Ieova lona agaga paia ina ia mafai ai ona ia malamalama ma talia le feʻau. O le iʻuga, na mafai ona papatiso Litia ma lona aiga.—Galu. 16:13-15.

6. Na faapefea ona tosina i tatou uma e le Atua i le tapuaʻiga moni?

⁶ Pe na o Litia na tupu ai lenei mea? E mautinoa e leai. Afai o oe o se Kerisiano ua uma ona tuuina atu, o lona uiga na tosina mai foʻi oe e le Atua i le tapuaʻiga moni. E pei lava ona sa silafia e Ieova se mea tāua i le loto o Litia, e faapena foʻi ona ia silafia se mea lelei o loo iā te oe. Ina ua e faalogo i le tala lelei, sa faaaogā e Ieova lona agaga paia e fesoasoani iā te oe, ina ia malamalama ma talia le feʻau. (1 Kori. 2:11, 12) Ina ua e taumafai e faatatauina mea na e aʻoaʻoina, na ia faamanuia i au taumafaiga e faia lona finagalo. Sa faafiafiaina Lona finagalo ina ua e tuuina atu lou ola iā te ia. O le mea moni, sa fesoasoani Ieova iā te oe i le taimi na e faatoʻā aʻoaʻoina ai le ala i le ola, ma o le a faaauau lava ona ia fesoasoani iā te oe.

7. E faapefea ona tatou iloa o le a fesoasoani mai le Atua iā i tatou ina ia tumau i le faamaoni?

⁷ Na fesoasoani Ieova iā i tatou ina ia amata ona auauna iā te ia, ma e mautinoa o le a faaauau lava ona ia fesoasoani iā i tatou ina ia tumau ai i le faamaoni. E na te silafia lelei, e tatou te leʻi ō mai i le upu moni ona o i tatou lava, ma e lē mafai foʻi ona tatou tumau i le upu moni, e ala i a tatou lava taumafaiga. Na tusi atu le aposetolo o Peteru i Kerisiano faauuina: ʻO outou o ē ua leoleomaluina e le mana o le Atua i le faatuatua mo le faaolataga, lea ua saunia  e faaalia mai i le taimi mulimuli.’ (1 Pete. 1:4, 5) E mafai ona faatatauina upu a Peteru i Kerisiano uma, ma e tāua foʻi la iā i tatou ona malamalama i ai. Aiseā? Talu ai e tatou te manaʻomia uma lava le fesoasoani a le Atua, ina ia tumau ai i le faamaoni iā te ia.

E MAFAI E LE ATUA ONA TAOFIA I TATOU MAI I LE FAIA O SE MEA SESĒ

8. Aiseā e ono faigofie ai mo i tatou ona faia se mea sesē?

⁸ E mafai e faafitauli o le olaga ma aafiaga o le tino agasala, ona taofia i tatou mai le vaai i mea, e pei ona silasila i ai Ieova. Atonu e tatou te faia ai se mea sesē e aunoa ma le iloaina. (Faitau le Kalatia 6:1.) Ua faataʻitaʻia mai lenei mea i se mea na tupu iā Tavita.

9, 10. Na faapefea ona taofia e Ieova Tavita mai le faia o se mea sesē matuiā, ma o le ā o loo Ia faia mo i tatou i aso nei?

⁹ A o tuliloaina pea o ia e le tupu o Saulo, na faaalia pea e Tavita le pulea totino e ala i lona lē tauimasui i le tupu lotoleaga. (1 Samu. 24:2-7) E leʻi umi lava, ae lē mafai loa ona pulea e Tavita ona uiga. Ina ua manaʻomia e Tavita ni vai ma meaʻai mo ia ma ona tagata, o lea na ia talosaga atu ai i le tagata Isaraelu o Napalu mo se fesoasoani. Na teena e Napalu le talosaga a Tavita ma faifai iā te ia. O lea na matuā ita ai Tavita, ma manaʻo ai loa e fasiotia Napalu ma tane uma na iā te ia. E leʻi mafaufau Tavita, o le faamasaa toto i luma o le Atua, le fasiotia faatasi ai ma tagata e lē sala. Ae na mafai e le avā a Napalu o Apikaila ona taofia Tavita mai i le faia o lenei mea sesē matuiā. Na iloa e Tavita sa faaaogā e Ieova Apikaila e taofia o ia, o lea na ia faapea atu ai: “Faafetai iā Ieova le Atua o Isaraelu, o lē na auina mai oe i le aso nei e faafetaiaʻi iā te aʻu! Faafetai i lou mafaufau lelei, faafetai foʻi iā te oe o lē ua taofia aʻu i lenei aso mai i le nofosala i le toto, ma ou tauimasui atu i loʻu lava lima.”—1 Samu. 25:9-13, 21, 22, 32, 33.

¹⁰ O le ā se lesona e tatou aʻoaʻoina mai i lenei tala? Na faaaogā e Ieova Apikaila e taofia Tavita mai i le faia o se mea sesē matuiā. I se tulaga talitutusa, o le mea foʻi lenā e faia e Ieova mo i tatou. O le mea moni, e tatou te lē faatalitalia le Atua e na te auina mai se tasi, e taofia i tatou mai i le faia o se mea sesē matuiā. E lē gata i lea, e tatou te lē iloa tonu pe faapefea ona gaoioi Ieova i nisi o tulaga eseese e tulaʻi mai, ma mea o le a ia faatagaina e tutupu i le galueaʻiina ma le faataunuuina o lona finagalo. (Fai. 11:5) Peitaʻi, e tatou te talitonu ma le maumauaʻi e silafia e Ieova o tatou tulaga, ma e fesoasoani mai foʻi iā i tatou ia tumau ma le faamaoni. Ua ia faamautinoa mai iā i tatou: “Ou te foaʻi atu iā te oe le tofā mamao, ma faatonu oe i le ala e ao ona e savali ai. Ou te fautua atu foʻi ma ou vaai iā te oe.” (Sala. 32:8) E faapefea ona tuuina mai e Ieova fautuaga? O ā aogā e tatou te maua mai ai? E faapefea ona tatou mautinoa o loo taʻitaʻia e Ieova ona tagata i aso nei? Ia mātau le auala o loo taliina ai na fesili i le tusi o Faaaliga.

LEOLEOMALUINA E ALA I FAUTUAGA

11. O le ā le tele ua silafia ai e Ieova mea o loo tutupu i faapotopotoga a ona tagata?

¹¹ I le vaaiga o loo faamauina i le tusi o Faaaliga mataupu e 2 ma le 3, na iloilo ai e Iesu Keriso faapotopotoga e fitu i Asia Itiiti. E pei ona faaalia i le vaaiga, e lē gata na silasila Keriso i le faapotopotoga i lona tulaga aoao tetele, ae na ia taulaʻi atu foʻi i ni tulaga patino. I nisi tulaga, na ia taʻua ai foʻi tagata taʻitoʻatasi, ma avatu le faamalō ma fautuaga talafeagai. O le ā ua taʻu mai iā i tatou i lenei mea? Ua faaāta mai i faapotopotoga e fitu Kerisiano faauuina ina ua mavae le 1914. E ui lava sa tuuina atu e Keriso fautuaga e patino i le vaega faauuina, ae e mafai foʻi ona aogā i faapotopotoga a tagata o le Atua o loo i le lalolagi. E mafai ona faapea atu, o loo faaaogā e Ieova lona Alo ina ia taʻitaʻia Ona tagata. E faapefea ona tatou maua aogā mai i lenā taʻitaʻiga?

12. E faapefea ona tatou talia le taʻitaʻiga a Ieova?

 ¹² O se tasi o auala e tatou te maua ai aogā mai i le taʻitaʻiga alofa a Ieova, o le faia lea o suʻesuʻega totino. E ala mai i lomiga a le vasega o le pologa faamaoni ma le faautauta, ua saunia mai ai e Ieova le tele o fautuaga faale-Tusi Paia. (Mata. 24:45) Ina ia maua aogā, e tatau ona tatou faaalu se taimi e suʻesuʻe ma faatatau mea ua tatou aʻoaʻoina. O suʻesuʻega a le tagata lava ia, o se tasi lea o auala e mafai ai e Ieova ona “leoleoina [i tatou] ina neʻi paʻuʻū.” (Iuta 24) Pe na iai se taimi na e suʻesuʻeina ai se lomiga ma iloa ai o loo fetaui lelei iā te oe? E tatau ona e taliaina lenā faasaʻoga mai iā Ieova. E pei lava ona faia e se uō se gaoioiga ina ia e uaʻi atu ai a o ia talanoa mai, e faapena foʻi ona faaaogā e Ieova lona agaga e faauaʻi ai i tatou, i vala e manaʻomia ona faaleleia i o tatou uiga ma amioga. Pe a tatou talia le taʻitaʻiga a le agaga paia, o lona uiga ua tatou talia foʻi le taʻitaʻiga a Ieova. (Faitau le Salamo 139:23, 24.) Seʻi o tatou tilofaʻia po o le ā le tele o le taimi ma taumafaiga o loo faaalu i a tatou suʻesuʻega.

13. Aiseā o se gaoioiga atamai ai le iloiloina o le tele o le taimi ma taumafaiga, o loo faaalu i a tatou suʻesuʻega totino?

¹³ O le tele o le taimi e faaalu i mea faafiafia, o le a faaitiitia ai le taimi mo a tatou suʻesuʻega totino. Na faapea mai se uso, e ese le faigofie ona tupu o lenei mea. Aiseā? Na ia taʻua: “Ua sili atu ona tele avanoa ua maua ai faafiafiaga i le taimi nei ma taugofie foʻi, nai lo o se isi lava taimi. Ua mafai ona maua i le TV, komepiuta faapea ma telefoni. O loo siʻomia i tatou e nei faafiafiaga.” Pe a tatou lē faaeteete, o le a amata ona tele atu lo tatou taimi e faaalu i faafiafiaga, seʻia oo ina lē toe iai se taimi e faaalu i suʻesuʻega loloto. (Efe. 5:15-17) E lelei ona fesili ifo le tagata lava ia: ʻO le ā le tele o le taimi o loo oʻu faaalu e suʻesuʻe loloto ai le Afioga a le Atua? Pe faatoʻā suʻesuʻe loloto lava pe a fai saʻu lauga po o se vaega i le sauniga?’ Afai o le tulaga lenā, e tatau ona faaaogā tatau le afiafi lea ua tuuesea mo tapuaʻiga a le aiga, po o suʻesuʻega a le tagata lava ia, ina ia faalolotoina ai lo tatou atamai faaleagaga, lea ua saunia e Ieova e leoleomaluina ai i tatou mo le faaolataga.—Faata. 2:1-5.

FAAMALOSIA I FAALAEIAUGA

14. Ua faapefea ona faailoa mai e le Tusi Paia, e uaʻi mai Ieova i o tatou faalogona?

¹⁴ Na fesagaʻia e Tavita le tele o tulaga faigatā i lona olaga. (1 Samu. 30:3-6) O loo taʻua i le Tusi Paia na silafia e Ieova faalogona o Tavita. (Faitau le Salamo 34:18; 56:8.) E silafia lelei foʻi e le Atua o tatou faalogona. Pe a ʻmomomo o tatou loto’ pe “nutimomoia” foʻi, o le a Ia faalatalata mai iā i tatou. Ua mafai e lenei mea ona aumaia iā i tatou faamāfanafanaga, e pei o Tavita o lē na pese: “Ou te fiafia ma olioli i lou alofa faamaoni, ona ua e silasila mai i loʻu puapuaga; ua e silafia foʻi oʻu mafatiaga.” (Sala. 31:7) Ae e sili atu mea e faia e Ieova nai lo o le tau ina iloa o o tatou popolega. E na te faamalosia i tatou e ala i faamāfanafanaga ma faalaeiauga. O se tasi o auala ua ia faia ai faapea, e ala mai i sauniga faa-Kerisiano.

15. O le ā se lesona ua mafai ona tatou aʻoaʻoina mai i le mea na tupu iā Asafo?

¹⁵ O le mea na tupu iā Asafo, e mafai ona fesoasoani iā i tatou ina ia malamalama ai i le  tāua o le auai i sauniga. O le mafaufau pea o Asafo i le puapuagatia o tagata amiolelei, ma le taulau manuia o tagata amioleaga, na faavaivaia ai o ia. Sa manatu o ia e leai se aogā e auauna ai iā Ieova. Na ia faamatalaina ona lagona ina ua ia faapea mai: “Na matuā tigā loʻu loto ma na matuā tigā ai oʻu faalogona.” O le iʻuga, na toetoe lava a faamaamulu ai o ia mai le auauna atu iā Ieova. O le ā na fesoasoani iā Asafo ina ia maua ai se vaaiga paleni? Na ia faapea mai: “[Na] ou alu atu i le afioaga paia [malumalu] o le Atua.” Na mafai ona toe sagatonu lana vaai e ala i le auaufaatasi ma tagata tapuaʻi o Ieova. Na ia iloa, o le taulau manuia o tagata amioleaga e mo na o sina taimi puupuu, ma o le a faia e Ieova le faamasinogatonu. (Sala. 73:2, 13-22) I nisi taimi e tatou te manatu ai foʻi e pei o Asafo. E mafai ona faavaivaia i tatou, ona o faigatā mai i lenei lalolagi lē faamasinotonu a Satani. O le auai faatasi ma o tatou uso ma tuafāfine i sauniga, o le a faafouina ai i tatou ma fesoasoani e faatumauina ai lo tatou fiafia i le auaunaga iā Ieova.

16. E faapefea ona aogā iā i tatou le faaaʻoaʻoga a Hana?

¹⁶ Ae faapefea pe a faigatā ona e auai i sauniga ona o loo iai se faafitauli i totonu o le faapotopotoga? Atonu o le a lē toe maua ni ou faaeaga i le auaunaga ma iʻu ai i le faalumaina, po o se feeseeseaʻiga foʻi i le lua va ma se isi i le faapotopotoga. Afai o le tulaga lenā, ia tilofaʻia le faataʻitaʻiga a Hana ina ia maua ai se fesoasoani. (Faitau le 1 Samuelu 1:4-8.) Sa faatigā Penina le isi avā a lana tane iā te ia. Sa atili ona faigatā lenei tulaga iā Hana, i tausaga taʻitasi pe a ō lo latou aiga e ofo taulaga iā Ieova i Sailo. Ona o le matuā mafatia tele o Hana, ʻna tagi ai o ia ma lē ʻai ai.’ Peitaʻi, e leʻi avea lenā tulaga e taofia ai o ia mai i le alu atu i le nofoaga e tapuaʻi ai iā Ieova. Na tāua iā Ieova le faamaoni o Hana, ma faamanuia iā te ia.—1 Samu. 1:11, 20.

17, 18. (a) O ā auala e tatou te maua ai faalaeiauga mai sauniga a le faapotopotoga? (e) O ā ni ou faalogona i le tausiga faapelepele a Ieova ua saunia mo lo tatou faaolataga?

¹⁷ E tatau i Kerisiano i aso nei ona faaaʻoaʻo iā Hana. E tatau ona tatou auai e lē aunoa i sauniga. Ua tatou talitonuina le aogā o faalaeiauga ua tatou maua mai i sauniga. (Epe. 10:24, 25) E faamāfanafanaina i tatou i uiga faaleuō o o tatou uso ma tuafāfine i sauniga. O manatu mai i lauga ma tali, e mafai ona pāʻia ai o tatou loto. O talanoaga a o leʻi amata pe māeʻa foʻi le sauniga, e mafai ona atiaʻe ma faamāfanafanaina ai i tatou. (Faata. 15:23; 17:17) Pe a tatou vivii iā Ieova e ala i pesega, o le a faagaeetia ma faamalosia ai i tatou. Pe afai o loo aafia i tatou i “popolega o [le] loto,” o taimi na e tatou te manaʻomia tele ai faalaeiauga mai i sauniga, lea ua saunia mai ai e Ieova ana “faamāfanafanaga,” ma faamalosia ai i tatou ina ia tumau i le faamaoni.—Sala. 94:18, 19.

¹⁸ Talu ai ua tatou saogalemu i le tausiga faapelepele a lo tatou Atua, ua pei ai o tatou lagona o le faisalamo o Asafo, o lē na pese iā Ieova: “Ua e taofia loʻu lima taumatau. E te taʻitaʻia aʻu i lau fautuaga.” (Sala. 73:23, 24) Maʻeu lo tatou lotofaafetai i le leoleomaluina o i tatou e Ieova mo le faaolataga!

[Fesili mo le Suʻesuʻega]

[Ata i le itulau 28]

Ua tosina mai foʻi oe e Ieova

[Ata i le itulau 30]

Ua leoleomaluina i tatou i le faatatauina o fautuaga a le Atua

[Ata i le itulau 31]

Ua faatumauina i tatou i faalaeiauga e tatou te maua