“Ia Outou Mataala i le Mea Faafefete a le ʻAu Faresaio”

Na lapataʻia e Iesu ona soo: “Ia outou mataala i le mea faafefete a le ʻau Faresaio, o le faafiaamiotonu lea.” (Luka 12:1) Na taʻua foʻi e Mataio lenā lapataʻiga, ina ia fesoasoani iā i tatou e malamalama ai, na talanoa Iesu e faatatau i aʻoaʻoga sesē a le ʻau Faresaio.—Mata. 16:12.

I nisi taimi, e faatusa ai e le Tusi Paia “mea faafefete” po o le fefete, i se mea e mafai ona iai se aafiaga leaga i se tagata. E lē fesiligia le mea moni o aʻoaʻoga ma amioga a le ʻau Faresaio, sa iai se aafiaga leaga i a latou ʻau faalogologo. Aiseā na mataʻutia ai aʻoaʻoga a le ʻau Faresaio?

1 Sa faasilisilia e le ʻau Faresaio i latou lava i le faafiaamiotonu, ma vaai maualalo i tagata lautele.

Na faamatilatila mai lenei uiga o le faafiaamiotonu naʻuā i se tasi o faataoto a Iesu. Na ia faapea mai: “Ua tū le Faresaio ma tatalo e faapea, ʻLe Atua e, ou te faafetai atu iā te oe ona ua ou lē pei o isi tagata, o ē e faia mea faapiʻopiʻo, o ē e amiolētonu, o ē e mulilulua, ua ou lē pei foʻi o lenei aolafoga. E faalua ona ou anapogi i le vaiaso, ou te avatu le sefuluaʻi o mea uma ou te maua.’ A ua tū mamao mai le aolafoga, ma e leʻi mafai ona tepa aʻe ona mata i le lagi, a ua tuʻituʻi pea lona fatafata ma faapea atu, ʻLe Atua e, ia e alofa mai iā te aʻu le tagata agasala.’”—Luka 18:11-13.

Na viiviia e Iesu le uiga lotomaulalo sa faaalia e le aolafoga, ina ua ia faapea mai: “Ou te fai atu iā te outou, na alu lenei tagata i lona aiga, ua sili ona amiotonu o ia nai lo [o le Faresaio]; auā o sē e faaeaina e ia o ia lava, e faamaulaloina lea, a o sē e faamaulaloina e ia o ia lava, e faaeaina lea.” (Luka 18:14) E ui lava sa iai se talaaga lē faamaoni o le ʻauaolafoga, ae sa taumafai Iesu e fesoasoani i nisi o i latou na, sa iai i lana ʻau faalogologo. Pe ā ma le toʻalua le ʻauaolafoga—Mataio ma Sakaio—sa avea mulimuli ane ma ona soo.

Ae faapefea pe a tatou manatu e sili atu i tatou nai lo o isi ona o tomai ma faaeaga ua aumai e Ieova iā i tatou, pe ona o lo tatou mātauina foʻi o o latou vaivaiga? E tatau ona tatou vave liaʻi ese na ituaiga mafaufauga, auā e pei ona taʻua i le Tusi Paia: “E faapalepale ma e agalelei le alofa. E lē lotoleaga le alofa, e lē gugutu, e lē faafefeteina, e lē amio valea, e lē saʻili mo lona lava lelei, e lē itaitagofie. E lē faitauina mea leaga e fai atu iā te ia. E lē fiafia i le amiolētonu, ae e fiafia i le mea moni.”—1 Kori. 13:4-6.

E tatau ona tutusa o tatou manatu ma le manatu sa i le aposetolo o Paulo. Ina ua māeʻa ona ia taʻua le “maliu mai [o] Keriso Iesu i le lalolagi ina ia faaolaina o ē e agasala,” na ia toe faaopoopo mai: “Na sili lava ona ou agasala i lo o i latou.”—1 Timo. 1:15.

Fesili e manatunatu loloto iai:

Po o oʻu amanaʻia o aʻu o se tagata agasala, ma e faalagolago loʻu faaolaina i le agalelei faifua o Ieova? Po ou te manatu i le tele o tausaga o laʻu auaunaga faamaoni, faaeaga i le faalapotopotoga a le Atua, ma oʻu tomai, e faapea ai ou te sili atu nai lo o isi?

  2 Sa taumafai le ʻau Faresaio e faia mea lelei ina ia iloa atu e tagata ma mafaufau o i latou o ni ē amiotonu. Na latou faaalia le uiga fiamatamuamua, ma na latou mananaʻo i ni taʻu faaviivii mo i latou.

Peitaʻi na lapataʻi Iesu: “Ua latou faia galuega uma ona o le vaaiga a tagata, auā ua latou faatetelē tamaʻi pusa e tuu ai tusitusiga paia ia e fusi i o latou tino, ina ia puipuia ai i latou, ma faalautetele foʻi fele i pito o latou ofu. Ua latou fiafia i nofoaga sili i faigaʻai, ma nofoa pito i luma i sunako, ma faafeiloaʻiga aloaʻia i nofoaga faitele, ma taʻua i latou e tagata o Aʻoaʻo.” (Mata. 23:5-7) Sa eseese o latou manatu ma le finagalo o Iesu. E ui o ia o le Atalii lelei atoatoa o le Atua, ae sa ia faaalia le lotomaulalo. I se tasi taimi na taʻua ai o ia e se tasi tamāloa, o lē e “lelei,” ae na faapea atu Iesu: “Aiseā ua e taʻua ai aʻu e lelei? E leai se tasi e lelei ua na o le toʻatasi, o le Atua lea.” (Mare. 10:18) I se isi mea na tupu, sa mulumuluina ai e Iesu vae o ona soo, ma na ia faataatia ai se faaaʻoaʻoga o le lotomaulalo mo ona soo.—Ioa. 13:1-15.

O se Kerisiano moni e tatau ona auauna atu i ona uso talitonu. (Kala. 5:13) E talafeagai lelei lenā manatu mo i latou e fia agavaa e avea ma ovasia i le faapotopotoga. O se mea lelei pe a “fia aapa atu se tasi i le tofi o se ovasia,” peitaʻi e tatau ona uunaʻia se tasi e aapa atu i lenā sini, ona o le faanaunauga e fia fesoasoani atu i isi. O lenei “tofi” e lē o se tulaga e manatu ai o le a sili atu ai nai lo o isi, pe ina ia maua ai se tulaga pule. O i latou o loo auauna o ni ovasia e tatau ona “lotomaulalo,” e pei o Iesu.—1 Timo. 3:1, 6; Mata. 11:29.

Fesili e manatunatu loloto iai:

Pe e fai ma aʻu masaniga le fiafia iā i latou e iai tofiga i totonu o le faapotopotoga, ona o le faanaunauga o le fia taʻutaʻua pe ina ia maua ai nisi faaeaga faaopoopo? Pe e fai ma aʻu masaniga le uaʻi atu i vala o le auaunaga i le Atua, e ono mafai ona taʻutaʻua ai ma maua ai viiga mai i isi? Po o oʻu taumafai ina ia ou sili atu nai lo o isi?

  3 O tulafono ma aganuu a le ʻau Faresaio na avea ai le Tulafono ma avega mamafa i tagata lautele.

Na aotele e le Tulafono a Mose vala uma e fesootaʻi atu i le tapuaʻiga a tagata Isaraelu iā Ieova. E ui i lea, e leʻi auʻiliʻilia mai ona vala uma. O se faataʻitaʻiga, na faasāina i le Tulafono ona faia ni galuega i le Sapati, peitaʻi e leʻi matuaʻi faamatala auʻiliʻilia mai galuega e mafai ona fai, ma mea e lē mafai ona fai i lenā aso. (Eso. 20:10) O lea, na faaopoopo ai e le ʻau Faresaio a latou lava tulafono ma aganuu, ona sa latou manatu e lē lava faamatalaga na tuuina mai e faatatau i vala eseese o le Tulafono. Ae sa usitaʻia e Iesu Tulafono a le Atua, nai lo o tulafono faasāsā naʻuā na faaopoopo e le ʻau Faresaio. (Mata. 5:17, 18; 23:23) Sa ia malamalama i māfuaaga na aumai ai le Tulafono a le Atua, ma na ia silafia lelei na finagalo le Atua ia faaalia e tagata le alofa mutimutivale ma le agalelei. Na magafagafa Iesu e ui lava i le lē taulau o ona soo i nisi taimi. O se faataʻitaʻiga, e ui sa uunaʻia e Iesu ona soo ina ia mataala i le po na puʻea ai o ia, ae sa latou momoe pea. E ui i lea, na ia faapea atu ma le agaalofa: “Ua naunau i ai le loto, a ua vaivai le tino.”—Mare. 14:34-42.

Fesili e manatunatu loloto iai:

Po o oʻu taumafai e fai ni tulafono faasāsā naʻuā ma taumafai ia usitaʻia e isi? Po o oʻu taumafai e faatonu isi e fai mea i le auala ou te mafaufau e saʻo? Po o oʻu faatalitalia ni mea se tele mai isi, nai lo o mea e latou te gafatia?

Sa matuā eseese aʻoaʻoga a Iesu ma le ʻau Faresaio. Pe e iai ni vala o e mātauina e manaʻomia ona faaleleia? Afai o lea, aiseā e le taumafai ai loa e fai na suiga?

[Ata i le itulau 28]

Sa fusi e le ʻau Faresaio tamaʻi pusa e tuu ai tusitusiga paia i o latou tino.—Mata. 23:2, 5

[Ata i le itulau 29]

I le lē pei o le ʻau Faresaio faamaualuluga, e tatau i toeaina Kerisiano lotomaulalo ona auauna atu i isi

[Ata i le itulau 30]

I le pei o Iesu, pe e te faaalia le magafagafa i mea e te faatalitalia mai i isi?