Pe E te Talisapaia Moni le Meaalofa a le Atua o le Faaipoipoga?

“Ia foaʻi atu e Ieova se meaalofa iā te oulua, ma ia maua e oulua taʻitoʻatasi le mapusaga i le aiga o lana tane.”—RUTA 1:9.

IA SAʻILI TALI:

Aiseā e mafai ai ona tatou faapea atu, na talisapaia e auauna a le Atua i aso ua mavae lana meaalofa o le faaipoipoga?

E faapefea ona tatou iloa e manatu mamafa mai Ieova i le filifiliga e tatou te faia e tusa ai ma se paaga faaipoipo?

O ā fautuaga a le Tusi Paia e faatatau i faaipoipoga o e fuafua e faatatau i lou olaga?

1. Faamatala lagona o Atamu ina ua ia maua se avā.

“O LE ivi lava lenei o oʻu ivi ma le aano o oʻu aano. E taʻua o ia o le Fafine, auā na faia o ia mai i le tane.” (Kene. 2:23) Maʻeu le fiafia o le uluaʻi tagata o Atamu, ina ua ia maua se avā! O lona fiafia na ia lagi faatauloto ai upu e pei ona taʻua i le mau. Ina ua faamoegaseina e Ieova Atamu, sa Ia foafoaina ai lenei fafine lalelei mai i se tasi o ivi ʻasoʻaso o Atamu. Mulimuli ane, na faaigoaina e Atamu lenei fafine iā Eva. Na faatasia e le Atua i laʻua nei i se faaipoipoga fiafia. Ona sa faaaogāina e Ieova se tasi o ivi ʻasoʻaso o Atamu e faia ai Eva, o lea la, ua sili atu ai ona la vavalalata nai lo o se isi lava ulugalii faaipoipo i aso nei.

2. Aiseā e lagona ai e tamāloloa ma fafine le alofa fetosinaaʻi?

² Ona o le atamai e lē mafaatusalia o Ieova, na ia foafoaina ai tagata ina ia mafai ona faaalia le alofa fetosinaaʻi—o se uiga e mafai ona fetosinaaʻi ai tamāloloa ma fafine. Ua taʻua i le The World Book Encyclopedia: “E faamoemoe se tamāloa ma se fafine e faaipoipo, ina ia la fiafia faatasi i se faiā faaleulugalii, ma faatumauina pea le alofa fetosinaaʻi.” Sa masani ona tupu lenā tulaga i le tele o taimi i tagata o Ieova.

NA LATOU LOTOFAAFETAI ONA O LE MEAALOFA O LE FAAIPOIPOGA

3. Na faapefea ona maua le avā a Isaako?

³ Sa matuā faatāuaina e le tagata faamaoni o Aperaamo faaipoipoga. O lea, na auina atu ai lana auauna aupito i matua i Mesopotamia, e saʻili mai se avā mo Isaako. Na maua iʻuga lelei mai i le tatalo sa faia e lenā auauna. Sa avea ma avā pele a Isaako Repeka, o sē e mataʻu i le Atua, ma sa iai lana vaega i le faatulagaga a Ieova ina ia faaauau pea le gafa o Aperaamo. (Kene. 22:18; 24:12-14, 67) Ona o lea tulaga,  e lē faapea o le a tatou manatu ai o so o se tagata lava—po o le ā lava lona faanaunauga lelei—e tatau ona avea ma sē e saʻilia paaga faaipoipo mo isi. I aso nei, ua filifilia e le toʻatele o tagata a latou lava paaga faaipoipo. O le mea moni, e lē faapea o le a filifilia e le Atua se paaga faaipoipo, peitaʻi o le a maua e Kerisiano lana taʻitaʻiga e lē gata i faaipoipoga, ae faapea foʻi isi vala o le olaga, pe afai e latou te tatalo mo lana taʻitaʻiga, ma ia taʻitaʻia i latou e lona agaga.—Kala. 5:18, 25.

4, 5. E faapefea ona e mautinoa sa malosi le alofa sa iai i le teine Sulami ma le tama leoleo mamoe?

⁴ E leʻi manaʻo se teine Sulami lalelei mai i Isaraelu, e uunaʻia o ia e isi ina ia avea ma se tasi o avā a le tupu o Solomona. Na faapea mai o ia: “Tama fafine a Ierusalema e, ou te faatautō iā te outou, ia aua neʻi outou taumafai e fafagu pe faagaee le alofa i totonu iā te aʻu, seʻia faitalia lava ia.” (Pese 8:4) Sa malosi le alofa i le va o le teine Sulami ma le tama leoleo mamoe. Na faapea mai le teine ma le lotomaulalo: “O aʻu, ua na o se fua o le laau i Sarona, o le lili i le fanua laugatasi.” Peitaʻi, na faapea mai le tama leoleo mamoe: “E pei o le lili i vao tuitui, e faapena laʻu uō teine i tama teine”! (Pese 2:1, 2) Na alofa faamaoni le tasi i le isi.

⁵ Talu ai sa faamuamua e le teine Sulami ma le tama leoleo mamoe lo laʻua alofa i le Atua, na mautinoa ai foʻi le malosi o le a iai le fusi o le la faaipoipoga. O le mea moni, na faapea atu le teine Sulami i le tama leoleo mamoe e pele iā te ia: “Ia e tuu aʻu e pei o se faamaufaailoga i lou loto, e pei o se faamaufaailoga i lou lima; auā ua malosi le alofa e pei o le oti, o le faamaoni foʻi e maumauaʻi e pei o le Tuugamau. O lona mumū e pei o le mumū o le afi, o le afi mū saesae a Ioa [ona e mai iā te ia]. E lē mafai e vai e tele ona tineia le alofa, e lē mafai foʻi ona tafiesea e vaitafe. Afai e avatu e se tagata ana mea tāua uma mai i lona fale ona o le alofa, e inosia lava na mea e tagata.” (Pese 8:6, 7) O lea la, pe afai ua mafaufau se auauna a Ieova e faaipoipo, e tatau ona faaalia le tuutoina ma le faamaoni o le tasi i le isi, e pei o le teine Sulami ma le tama leoleo mamoe.

O SE FILIFILIGA E TĀUA I LE ATUA

6, 7. E faapefea ona tatou iloa e manatu mamafa mai le Atua i le filifiliga e tatou te faia mo se paaga faaipoipo?

⁶ E manatu mamafa Ieova i le filifiliga e te faia e tusa ai ma se paaga faaipoipo. Na faatonuina tagata Isaraelu e uiga i tagatānuu o Kanana e faapea: “Aua tou te faaipoipo atu iā i latou. Aua e te avatu lou afafine ma lona atalii, aua foʻi e te aumaia lona afafine ma lou atalii. Auā latou te faaliliuina o outou atalii mai i le mulimuli atu i le Atua, ma latou auauna atu foʻi i isi atua; ona matuā toʻasā ai lea o Ieova iā te outou, ma ia faaumatia ai loa outou.” (Teu. 7:3, 4) I senituri mulimuli ane, na folafola e le ositaulaga o Esera e faapea: “Ua outou lē faamaoni ina ua outou faiavā i fafine ese, e faaopoopo ai i le nofosala o Isaraelu.” (Esera 10:10) Na faapea atu foʻi le aposetolo o Paulo i ona uso Kerisiano: “Ua noanoatia le avā i aso uma e ola ai lana tane. Ae afai ua oti lana tane, ona saʻoloto lea o ia e faaipoipo i lē ua loto i ai, tau lava o lē ua i le Alii.”—1 Kori. 7:39.

⁷ Pe afai e faaipoipo se auauna tuuina atu a Ieova i se tagata e lē talitonu, o se gaoioiga lea o le lē usiusitaʻi i le Atua. Na lē faamaoni tagata Isaraelu i aso o Esera, ina ua latou “faiavā i fafine ese.” E manino lava le faamatalaga a le Tusi Paia, po o ai e tatau ona faaipoipo i ai se Kerisiano. O se gaoioiga sesē le taumafai e fai se faamolemolega, ina ia lē usitaʻia ai taʻiala a le Atua. (Esera 10:10; 2 Kori. 6:14, 15) O se Kerisiano e faaipoipo i se tagata e lē talitonu, e lē o se faaaʻoaʻoga lelei, ma e na te lē talisapaia moni le meaalofa a le Atua o le faaipoipoga. Pe afai ua uma ona papatiso se auauna a le Atua ae toe faaipoipo atu i se tagata lē talitonu, e mafai ona aveesea ai ona faaeaga i le faapotopotoga. O se gaoioiga lē talafeagai le faatalitalia o faamanuiaga, ae o loo ʻaiʻoi atu foʻi i le tatalo e faapea:  ʻIeova e, na ou loto lava e lē usiusitaʻi iā te oe. Ae faamanuia mai pea iā te aʻu faamolemole.’

E SILAFIA LELEI E LO TATOU TAMĀ I LE LAGI

8. Ia faamatala le māfuaaga e tatau ai ona tatou usiusitaʻi i taʻiala a le Atua e faatatau i faaipoipoga.

⁸ E iloa lelei e le tagata na faia se masini le auala e gaoioi ai le masini. E na te aumaia faamatalaga saʻo e faatatau i le auala e tuufaatasia ai vaega eseese o le masini, pe afai e manaʻomia. Ae faapefea pe afai e tatou te lē amanaʻia na faamatalaga, ma tuufaatasia vaega eseese o le masini i la tatou lava auala? E mautinoa lava le leaga o iʻuga e oo iai—pe ailoga foʻi e ola le masini. I se tulaga talitutusa, pe afai e tatou te faanaunau mo se faaipoipoga fiafia, e tatau la ona tatou usitaʻia faatonuga mai iā Ieova, o Lē na faavaeina faaipoipoga.

9. Aiseā e mafai ai ona tatou faapea atu, e malamalama lelei Ieova i faalogona o le tuua toʻatasi, faapea le fiafia e mafai ona maua i totonu o le liʻo o le faaipoipoga?

⁹ E silafia e Ieova mea uma e faatatau i tagata ma faaipoipoga. Na ia tuuina i tagata se manaʻoga tau feusuaʻiga, ina ia mafai ai ona latou “fanafanau ma ia matuā faatoʻateleina.” (Kene. 1:28) E malamalama lelei le Atua i faalogona o le tuua toʻatasi, auā a o leʻi foafoaina le uluaʻi fafine, na ia faapea mai: “E lē lelei mo le tagata ona ola na o ia. Ou te faia se fesoasoani mo ia, o sē e talafeagai lelei mo ia.” (Kene. 2:18) E malamalama atoatoa foʻi Ieova i le fiafia e mafai ona maua i totonu lava o le liʻo o le faaipoipoga.—Faitau le Faataoto 5:15-18.

10. O ā fautuaga e tatau ona mulimuli ai ulugalii faaipoipo Kerisiano e tusa ai o feusuaʻiga?

¹⁰ E leai se faaipoipoga i aso nei e lelei atoatoa, ona o le agasala ma le tulaga lē lelei atoatoa lea na tuufaasolo mai iā Atamu. Peitaʻi, e mafai e auauna a Ieova ona maua le fiafia moni i a latou faaipoipoga, pe afai e usiusitaʻi i le Afioga a le Atua. O se faataʻitaʻiga, seʻi mātau le fautuaga manino a Paulo e faatatau i feusuaʻiga i totonu o le liʻo o le faaipoipoga. (Faitau le 1 Korinito 7:1-5.) E lē faapea o taʻua i le Tusi Paia, e pau lava le aogā o feusuaʻiga ina ia maua ai fanau. E mafai e feusuaʻiga ona faamalieina ai manaʻoga tau faalogona ma manaʻoga faaletino. Ae e matuā lē fiafia le finagalo o le Atua i feusuaʻiga lē talafeagai, e pei o feusuaʻiga e faaaogā ai le gutu ma le alāfeʻau. E mautinoa lava e mananaʻo tane ma avā Kerisiano e taulimaina lea vala tāua o o latou olaga, i se auala faapelepele, ma mafai ai ona faaalia le alofa moni o le tasi i le isi. E tatau foʻi ona la ʻalofia le faia o so o se gaoioiga e lē fiafia ai Ieova.

11. Na faapefea ona faamanuiaina Ruta ona o lona faia o mea i le auala a Ieova?

¹¹ E tatau ona maua le olioli i faaipoipoga, ae lē o lagona lē fiafia ma oo ai ina fiu. Aemaise e tatau ona avea le aiga o se Kerisiano, ma nofoaga e maua ai le mālōlōga ma le filemu. Seʻi mātau le mea na tupu i le 3,000 tausaga ua mavae,  a o toe foʻi i Iuta ia Naomi, Orepa ma Ruta, o avā a lana fanau tama, o i latou uma nei ua feoti a latou tane. Sa augani atu Naomi iā i laʻua ina ia toe foʻi i o la nuu. Na nofo pea le fafine Moapi o Ruta faatasi ma Naomi. Sa faamaoni pea Ruta i le Atua moni, ma sa ia mautinoa i ʻse taui sili ona lelei mai iā Ieova, o lē na sulufaʻi atu i ai Ruta i lalo o Ona apaʻau.’ (Ruta 1:9; 2:12) O le talisapaia moni e Ruta o le meaalofa a le Atua o le faaipoipoga, na avea ai o ia ma avā a Poasa, o se tagata tapuaʻi moni o Ieova. Pe a toe faatūina mai Ruta i le lalolagi fou a le Atua, o le a fiafia o ia i le iloaina, o ia o se tasi na tupuga mai ai Iesu Keriso. (Mata. 1:1, 5, 6; Luka 3:23, 32) Maʻeu le tele o faamanuiaga na ia maua ona o le faia o mea i le auala a Ieova!

FAUTUAGA AOGĀ MO SE FAAIPOIPOGA TAULAU MANUIA

12. O fea e mafai ona maua ai fautuaga aogā e faatatau i faaipoipoga?

¹² Ua faailoa mai e Lē na faavaeina faaipoipoga, mea e manaʻomia ona tatou malamalama i ai e faatatau i le auala e taulau manuia ai se faaipoipoga. E leai se tagata e tutusa sona malamalama i lea tulaga, e pei o Ieova. E saʻo i taimi uma le Tusi Paia, ma e pau lava le auala e mafai ai e se tasi ona maua fautuaga aogā e faatatau i faaipoipoga, o le mulimuli lea i taʻiala mai le Tusi Paia. O se faaaʻoaʻoga, na tusi le aposetolo o Paulo: “Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.” (Efe. 5:33) E malamalama lelei Kerisiano taʻumatuaina i fautuaga faapena mai i le Tusi Paia. Peitaʻi, ua tulaʻi mai ai se fesili, Po o le a latou faatatauina le Afioga a Ieova? E mafai ona latou faia faapea, pe afai e latou te talisapaia moni lava le meaalofa a Ieova o le faaipoipoga. *

13. O le ā e ono iʻu iai pe afai e lē mulimuli le tane i le fautuaga o loo i le 1 Peteru 3:7?

¹³ E ao i se tane Kerisiano ona feutagaʻi ma le alofa ma lana avā. Na tusi le aposetolo o Peteru: “Ia faapea outou tane, ia faaauau ona nonofo faatasi ma i latou e tusa ma le poto, ia āva i fafine e pei o se ipu e sili ona vaivai, auā o outou foʻi o suli faatasi ma i latou i le meaalofa foaʻifua o le ola, ina ia lē faalavelavea ai a outou tatalo.” (1 Pete. 3:7) E mafai ona faalavelavea tatalo a se tane, pe afai e na te lē faatatauina fautuaga a Ieova. E ono matuā afāina le tulaga faaleagaga o le ulugalii faaipoipo, ma atonu o le a iʻu atu ai i le lofitūina i lagona mafatia, finauga, ma gaoioiga e lē taupulea.

14. O ā aafiaga e oo i se aiga ona o gaoioiga a se avā alofa?

¹⁴ O se avā e taʻitaʻiina i le Afioga a Ieova ma lona agaga paia, e mafai ona faia taumafaiga uma ina ia avea lona aiga ma nofoaga e saogalemu ma fiafia. O se faalogona masani mo se tane e mataʻu i le Atua, ona faaalia le alofa i lana avā ma puipuia o ia i le itu faaletino ma le faaleagaga. E naunau le avā i le alofa o lana tane, o lea e tatau ai ona ia faaalia uiga e faigofie ai ona faia faapea e le tane. Ua taʻua i le Faataoto 14:1: “Ua atiaʻe e le fafine atamai lona fale, a o le fafine valea ua ia lepeti i lalo lona fale i ona lava lima.” E tele mea e mafai ona faia e se avā e atamai ma alofa, ina ia mafai ai ona lelei ma fiafia lona aiga. E na te faaalia foʻi lona talisapaia  moni o le meaalofa a le Atua o le faaipoipoga.

15. O le ā le fautuaga o loo aumaia i le Efeso 5:22-25?

¹⁵ O tane ma avā e faavae a latou faaipoipoga i le faaaʻoaʻoga a Iesu i le auala e feutagaʻi ai ma lana faapotopotoga, ua latou faaalia foʻi le lotofaafetai i le meaalofa a le Atua o le faaipoipoga. (Faitau le Efeso 5:22-25.) Maʻeu le tele o faamanuiaga e mafai ona olioli ai ulugalii faaipoipo, pe afai e alofa moni le tasi i le isi, ma aua lava neʻi faatagaina le faamaualuga, le lē fetalanoaaʻi, po o se isi lava uiga e lē faa-Kerisiano e faaleagaina ai a latou faaipoipoga!

AUA NEʻI TUUESEESEINA I LAʻUA E SE TASI

16. Aiseā e filifili ai nisi Kerisiano e nofofua pea?

¹⁶ E ui lava e fuafua le toʻatele o tagata e iai le taimi e faaipoipo ai, ae e iai auauna a Ieova e nofofua pea, ona ua lē mafai ona maua se paaga e talafeagai ma i latou ma finagalo malie iai Ieova. E iai isi tagata e maua le meaalofa mai i le Atua o le nofofua, lea ua mafai ai ona tuuina atu o latou ola atoa i le auaunaga iā Ieova, e aunoa ma le faalavelavea o le mafaufau i tiutefai o se faaipoipoga. Ioe, e ui lava e mafai e le tagata nofofua ona fiafia i lona olaga, ae e tatau ona ōgatusa ma tapulaa tau amio a Ieova.—Mata. 19:10-12; 1 Kori. 7:1, 6, 7, 17.

17. (a) O ā upu a Iesu e tusa ai ma faaipoipoga e ao ona tatou manatua? (e) Pe afai ua amata ona manaʻonaʻo se Kerisiano i se paaga faaipoipo a se isi tagata, o le ā le gaoioiga e ao ona ia vave faia?

¹⁷ E tusa po o i tatou o ni ē nofofua po ua faaipoipo foʻi, e ao lava ona tatou manatua upu nei a Iesu: “Tou te leʻi faitaulia ea o lē [le Atua] na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ʻO le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata.” (Mata. 19:4-6) O se agasala le manaʻonaʻo i le paaga faaipoipo a se isi tagata. (Teu. 5:21) Pe afai ua amata ona tuputupu aʻe lea faanaunauga leaga i so o se Kerisiano, e tatau ona ia vave gaoioi e liaʻi ese, e tusa lava pe na te lagona ai le tigā, ona o le faatagaina o ia faanaunauga manatu faapito e tuputupu aʻe. (Mata. 5:27-30) E tāua tele ona faasaʻo na manatu sesē, ma taofia faanaunauga leaga o le loto taufaaʻoleʻole.—Iere. 17:9.

18. O le ā sou manatu i le auala e tatau ona tatou vaai ai i le meaalofa a le Atua o le faaipoipoga?

¹⁸ E oo lava i ē e itiiti pe leai foʻi so latou iloa e uiga iā Ieova le Atua, ma lana meaalofa matagofie o le faaipoipoga, ua latou faaalia le lotofaafetai mo lea sauniuniga. Ua tatau ai ona sili atu mo i tatou o ē ua tuuina atu i “le Atua fiafia,” o Ieova, ona olioli i mea uma ua ia saunia, ma faamaonia atu e tatou te talisapaia moni lava lana meaalofa o le faaipoipoga!—1 Timo. 1:11.

[Faaopoopoga i lalo]

[Fesili mo le Suʻesuʻega]

[Faamatalaga faaopoopo i le itulau 6]

O se faaipoipoga e taulau manuia e faamamaluina ai Ieova, ma e mafai ona aumaia ai le fiafiaga sili i tagata taʻitoʻatasi o le aiga

[Ata i le itulau 5]

Na faaalia e Ruta le talisapaia mo le meaalofa a le Atua o le faaipoipoga

[Ata i le itulau 7]

Po o e faaalia le talisapaia moni i le meaalofa a Ieova o le faaipoipoga?