Auauna i le Atua o le Saʻolotoga

“O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.”—1 IOA. 5:3.

PE E MAFAI ONA E FAAMATALA?

O le ā le auala o loo manaʻo Satani e tatou te manatu ai e faatatau i tapulaa a le Atua?

Aiseā e tatau ai ona filifili ma le atamai a tatou aumea?

O le ā e fesoasoani iā i tatou ina ia tumau pea ona faamaoni i le Atua o le saʻolotoga?

1. O le ā le auala o loo faaaogāina ai e Ieova lona saʻolotoga, ma o le ā le saʻolotoga na ia tuuina iā Atamu ma Eva?

E NA o Ieova lava e lē faatapulaaina lona saʻolotoga. Peitaʻi, e na te lē faaaogāsesēina lenā saʻolotoga, ma taumafai e pulea so o se gaoioiga e faia e ana auauna. Nai lo o lea, ua ia tuuina mai iā i tatou le saʻolotoga e faia ai filifiliga, ma faamalie ai o tatou faanaunauga saʻo. O se faaaʻoaʻoga, e na o le tasi lava le mea sa faasāina e le Atua Atamu ma Eva ona faia. Sa faatonuina i laʻua ina ia aua neʻi aai i “le laau e iloa ai le lelei ma le leaga.” (Kene. 2:17) O lea la, sa mafai lava ona la faia le finagalo o le Atua, ma maua pea le saʻolotoga.

2. Na faapefea ona melea e o tatou uluaʻi mātua lo la saʻolotoga mai i le Atua?

² E leʻi puleaina e Ieova mea uma sa faia e Atamu ma Eva, ae na ia tuuina atu iā i laʻua le saʻolotoga. Aiseā? Talu ai na foafoaina i laʻua i Lona faatusa, ma tuuina atu foʻi iā i laʻua ni lotofuatiaifo. Na faatalitalia e Ieova o le a la faia le mea tonu, ona o lo la alolofa iā te ia, o Lē na foafoaina i laʻua. (Kene. 1:27; Roma 2:15) O le mea e faanoanoa ai, e leʻi faaalia e Atamu ma Eva le lotofaafetai i Lē na foafoaina i laʻua, faapea le saʻolotoga na la mauaina. Nai lo o lea, na la faia lava le filifiliga i mea e tatau ona fai ma mea e lē tatau ona faia. Na la manatu o le a tele atu lo la saʻolotoga e maua ai, peitaʻi, na avea ai i laʻua ma le la fanau ma pologa i le agasala, ma iʻu atu ai i mafatiaga ma le oti.—Roma 5:12.

3, 4. O le ā le auala o loo taumafai Satani e faasesēina ai i tatou, e faatatau i tapulaa a Ieova?

³ Afai na mafai e Satani ona taaʻina ni tagata lelei atoatoa se toʻalua, faapea foʻi le toʻatele o agelu e tetee atu i le pule silisili ese a le Atua, e mafai foʻi la ona ia faasesēina i tatou. O loo tumau pea lana faufauga lenā. E taumafai o ia e faasesēina i tatou e manatu faapea, e faigatā tele tapulaa a le Atua, ma e lē maua ai so tatou fiafia i le olaga. (1 Ioa. 5:3) O  le auala lenā e manatu ai tagata o le lalolagi, ma pe a fai ma a tatou masani le faifaimea faatasi ma i latou, o le a amata foʻi ona tatou mafaufau faapena. Na taʻua e se tuafafine ua 24 nei ona tausaga: “Na matuā telē se aafiaga leaga iā te aʻu ona o le sesē o aʻu aumea. Sa ou fefe ina neʻi ese oʻu manatu mai manatu o aʻu uō.” O le iʻuga, na faia e lenei tuafafine feusuaʻiga lē mamā. Atonu sa e feagai foʻi ma se omiga faapena mai i au aumea.

⁴ O le mea e faanoanoa ai, e ono avea foʻi nisi i le faapotopotoga Kerisiano ma taaʻiga leaga. Na faapea mai se uso talavou, sa iai nisi o ana uō i le faapotopotoga sa faia tuugātala ma tagata e lē auauna iā Ieova. O le tele lava o le taimi na ia faifaimea faatasi ai ma na talavou, o le tele foʻi lenā o le suia o ona uiga ma pei ai o i latou. Na ia taʻua: ʻNa faasolosolo ina vaivai la ma faiā ma Ieova. Ou te leʻi toe naunau i mea sa aʻoaʻoina i sauniga, ma na seāseā ona ou toe alu i le talaʻiga. O i inā faatoʻā ou iloa ai ua tatau ona ou lē toe faifaimea faatasi ma i latou, ma o le mea lenā sa ou faia.’ Pe e te iloa e mafai ona iai se aafiaga telē a au aumea i lou olaga? Seʻi mātau se faaaʻoaʻoga mai le Tusi Paia.—Roma 15:4.

NA IA FAALILIUINA LOTO O TAGATA

5, 6. O le ā le auala na faasesēina ai e Apisaloma isi tagata, ae pe na taulau lana faufauga?

⁵ O loo iai i le Tusi Paia le tele o faaaʻoaʻoga o i latou na avea o ni taaʻiga leaga i isi. O se tasi o i latou o Apisaloma, se tasi o atalii o le tupu o Tavita, ma o se alii e aulelei tele. Peitaʻi, i le pei o Satani, na amata ona tuputupu aʻe i lona loto se faanaunauga leaga. Sa manaʻo o ia e avea ma tupu nai lo o lona tamā, e ui lava e leai sana aiā i lenā tulaga. * Ina ia maua le mea sa ia manaʻo i ai, na taumafai Apisaloma e faatalitonu tagata, e sili atu lona naunau e fesoasoani iā i latou nai lo o le tupu. E pei lava ona faia e le Tiapolo i le faatoʻaga i Etena, sa faapena foʻi ona faatalitonuina e Apisaloma tagata e faapea, o loo ia manatu mamafa iā i latou, ae i le taimi e tasi, sa ia faia se tala taufaaleaga e faatatau i lona tamā.—2 Samu. 15:1-5.

⁶ Pe na taulau le faufauga a Apisaloma? Ioe, o le tulaga lenā na iai, ae e leʻi taulau atoatoa, auā o loo taʻua i le Tusi Paia: ʻUa faaauau ona faaliliuina e Apisaloma iā te ia o loto o tagata Isaraelu.’ (2 Samu. 15:6) Sa faasesēina e Apisaloma le toʻatele o tagata, ae o le iʻuga, na faatoʻilaloina o ia. O lona faamaualuga na iʻu ai i le oti, faapea le faitau afe o tagata na ia faasesēina.—2 Samu. 18:7, 14-17.

7. O ā lesona e mafai ona tatou aʻoaʻoina mai i le faaaʻoaʻoga a Apisaloma? (Tagaʻi i le ata i le itulau e 14.)

⁷ Aiseā na faigofie ai ona faasesēina na tagata Isaraelu? Atonu sa latou faanaunau i le mauaina o mea sa folafola atu e Apisaloma iā i latou. Pe atonu foʻi na taaʻina i latou i ona foliga vaaia. Po o le ā lava le māfuaaga, ae o le mea mautinoa lenei: E latou te leʻi faamaoni iā Ieova ma le tupu na ia tofiaina. I aso nei, o loo faaauau pea ona faaaogā e Satani tagata e pei o Apisaloma, e taumafai ina ia faasesēina auauna a Ieova. Atonu e faapea mai, ua faasāsā naʻuā tapulaa a Ieova, pe faapea mai foʻi, e sili atu ona fiafia olaga o ē e lē auauna iā Ieova. Pe a e faalogo i na faamatalaga, po o le a e iloa ua na o ni talapepelo, ma faaauau pea ona faamaoni iā Ieova? Po ua e iloa e na o le “tulafono lelei atoatoa” a Ieova, le tulafono a le Keriso, o le a mafai ona e mauaina ai le saʻolotoga moni? (Iako. 1:25) Pe afai o le tulaga lenā, ia faatāuaina lenā tulafono, ma aua lava neʻi faasesēina oe e faaaogā sesē lou saʻolotoga o se Kerisiano.—Faitau le 1 Peteru 2:16.

8. O ā nisi o faaaʻoaʻoga e faaalia ai, e lē maua se fiafia pe a lē usiusitaʻi i tapulaa a Ieova?

⁸ O loo avea le ʻautalavou ma taulaʻiga autū a Satani. Na faapea mai se uso ua silia ma le 30  ona tausaga, e faatatau i le taimi a o talavou: “Na ou manatu i tapulaa tau amio a Ieova o se faasāsāaga, ae e lē o se puipuiga.” O le iʻuga, na ia faia ai amioga lē mamā tau feusuaʻiga, ae e leʻi maua ai sona fiafia. Na ia taʻua: “Na oo iā te aʻu lagona o le nofosala ma le salamō mo le tele o tausaga.” Pe a toe mafaufau i le taimi a o talavou, na tusi se tasi o tuafafine: “E te lagonaina le faanoanoa ma le leai o se aogā, pe a uma ona faia feusuaʻiga lē mamā. E ese le faagalogatā o lenā mea, e ui ua 19 tausaga talu ona tupu.” Na faapea mai foʻi se isi tuafafine: “O āuga na oo i ē pele iā te aʻu ona o aʻu amioga, na matuā aafia ai loʻu mafaufau, loʻu itu faaleagaga, ma oʻu faalogona. Pagā le leaga o le lē mauaina o le finagalo malie o Ieova.” E lē manaʻo Satani e te mafaufau i iʻuga e oo i ai ona o le faia o le agasala.

9. (a) O ā fesili e mafai ona fesoasoani iā i tatou, e iloilo ai le auala o loo tatou manatu ai iā Ieova, ma ana tulafono ma mataupu silisili? (e) Aiseā e tāua ai ona tatou iloaina lelei le Atua?

⁹ E pei ona faaalia i na faaaʻoaʻoga, e mataʻutia iʻuga e oo iai pe a lē usiusitaʻi i le Atua. O le faanoanoaga, o le toʻatele o talavou faapea foʻi tagata matutua i le upu moni, e faatoʻā iloa le mataʻutia o le lē usiusitaʻi i le Atua, pe a latou tofo i mafatiaga. (Kala. 6:7, 8) O lea, ia fesili ifo iā te oe lava: ʻPo o oʻu iloa togafiti o loo faaaogā e Satani ina ia faasesēina ai aʻu? Faamata o oʻu vaai iā Ieova o saʻu Uō e sili ona vavalalata, o lē e faamatalaina mai i taimi uma le mea moni, ma e manatu mamafa mai mo loʻu lelei? Po ua ou talitonu atoatoa, e lē mafai ona ia taofia le foaʻiina mai o se mea e aogā moni, ma e matuā faafiafiaina ai aʻu?’ (Faitau le Isaia 48:17, 18.) Ina ia  mafai ona e tali atu ioe i na fesili, e manaʻomia ona e iloaina lelei mea e faatatau iā Ieova. E manaʻomia foʻi ona e iloa, o tulafono ma mataupu silisili o loo i le Tusi Paia, ua faaalia ai le alofa o Ieova mo oe, ae e lē faapea o loo ia taumafai e aveesea lou saʻolotoga.—Sala. 25:14.

TATALO MO SE LOTO E ATAMAI MA USIUSITAʻI

10. Aiseā e tatau ai ona tatou taumafai e faataʻitaʻi i le tupu talavou o Solomona?

¹⁰ A o talavou Solomona, na tatalo atu ma le lotomaulalo e faapea: “Ua na o aʻu o se tamaitiiti. Ou te lē iloa ona ulufafo ma ulufale.” Ona ia talosaga atu lea mo se loto e atamai ma usiusitaʻi. (1 Tu. 3:7-9, 12) Na tali mai Ieova i lana tatalo faamaoni, ma e tali mai foʻi Ieova pe a tatou tatalo atu mo se loto e atamai ma usiusitaʻi. E lē faapea o le a faavavega ona foaʻi mai e Ieova iā te oe le tofā mamao ma le atamai. Peitaʻi, e mafai ona ia foaʻiina atu le atamai, pe a e tinoū i le suʻesuʻeina o lana Afioga, tatalo mo le agaga paia, ma mulimuli i taʻiala ma faatonuga o loo auala mai i faapotopotoga Kerisiano. (Iako. 1:5) Ona o Ieova, ua mafai ai ona avea ana auauna e oo lava i talavou ma ē e sili atu ona atamamai, nai lo o ʻtagata popoto ma atamamai’ o lenei lalolagi, faapea i latou e lē amanaʻiaina ana fautuaga.—Luka 10:21; faitau le Salamo 119:98-100.

11-13. (a) O ā ni lesona tāua e tatou te aʻoaʻoina mai i le Salamo 26:4, Faataoto 13:20, ma le 1 Korinito 15:33? (e) E faapefea ona e faatatauina na mataupu silisili faale-Tusi Paia?

¹¹ Ina ia faataʻitaʻi le tāua o le suʻesuʻeina o le Tusi Paia, ma manatunatu loloto i mea o loo tatou faitauina ina ia iloa lelei ai Ieova, seʻi mātau mau o loo mulimuli mai. O loo iai i nei mau taʻitasi se mataupu silisili tāua, e faatatau i le filifilia o a tatou aumea: “Ou te leʻi nofo faatasi ma tagata pepelo; ou te leʻi alu faatasi ma tagata taufaaʻoleʻole.” (Sala. 26:4) “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.” (Faata. 13:20) “O aumea leaga e faaleagaina ai mea lelei ua masani ai tagata.”—1 Kori. 15:33.

¹² O ā ni lesona tāua e mafai ona tatou aʻoaʻoina mai i na mau? (1) E finagalo Ieova ina ia filifili lelei a tatou aumea. E finagalo foʻi o ia ina ia puipuia i tatou mai le faia o amioga e tatou te afāina ai, faapea foʻi la tatou faiā ma ia. (2) E taaʻina e a tatou uō i tatou, a lē i le faia o mea lelei, po o mea leaga. O le tulaga moni lenā e faatatau i le olaga. O le auala o loo tusia ai na fuaiupu, ua faaalia ai o loo taumafai Ieova e pāʻia o tatou loto. Ia mātau, ua tusia na fuaiupu o ni faamatalaga e moni ma tuusaʻo, ae e lē pei o ni tulafono, e faapea mai “aua le faia le mea lea.” E tai pei o loo fetalai mai Ieova iā i tatou: ʻO mea moni nei. O le ā le auala o le a e tali atu ai? O le ā le mea o loo i lou loto?’

¹³ O le manatu mulimuli, talu ai o na mau o ni upu moni faavae, o loo tumau pea la le moni ma le aogā o nei faamatalaga i tagata o loo fesagaʻia tulaga eseese. Ina ia faataʻitaʻi, fesili ifo iā te oe lava i fesili nei: O ā tulaga ou te ono fesootaʻi ai ma “tagata taufaaʻoleʻole”? E faapefea ona ou ʻalofia le faauō atu iā i latou? (Faata. 3:32; 6:12) O ai “tagata atamamai” e finagalo Ieova ou te aumea i ai? Ae o ai “tagata vālea” e tatau ona ʻalofia? (Sala. 111:10; 112:1; Faata. 1:7) O ā aʻu ʻmasaniga lelei’ o le a faaleagaina, pe a sesē ona filifilia aʻu aumea? Pe e na o tagata o le lalolagi e maua ai “aumea leaga”? (2 Pete. 2:1-3) O le ā lau tali i na fesili?

14. E mafai faapefea ona e faaleleia atili la outou Tapuaʻiga a le Aiga i afiafi?

¹⁴ E pei lava o le auala sa e fefulifulisaʻi ai i mau e tolu sa siiina mai, e mafai foʻi ona e faitau i isi mau o le Tusi Paia ina ia e malamalama ai i le silafaga a le Atua, i mataupu e tāua iā te oe ma lou aiga. * Mātua e, ia mafaufau i le talanoaina o na mataupu i Tapuaʻiga a le Aiga i afiafi. Pe a outou faia faapea, ia manatua o lou sini, ia fesoasoani i sui taʻitasi o le aiga ia matuā  talisapaia, le alofa tele o le Atua iā i tatou, e ala i le tuuina mai o ana tulafono ma mataupu silisili. (Sala. 119:72) O le mea moni, e tatau ona avea na suʻesuʻega ma itu e atili faamalosia ai la outou faiā ma Ieova, faapea foʻi la outou faiā faaleaiga.

15. E mafai faapefea ona iloa, o loo e atiaʻeina se loto e atamai ma usiusitaʻi?

¹⁵ E mafai faapefea ona e iloa o loo e atiaʻeina se loto e atamai ma usiusitaʻi? O se tasi o auala o le faatusatusa lea o ou manatu, ma manatu o auauna faamaoni a le Atua i taimi ua tuanaʻi, e pei o le tupu o Tavita, o lē na tusi: “Loʻu Atua e, ou te fiafia e fai lou finagalo, ua i totonu foʻi iā te aʻu lau tulafono.” (Sala. 40:8) Na faapea mai foʻi le tusitala o le Salamo e 119: “Maʻeu lava loʻu naunau i lau tulafono! Ou te mafaufau i ai i le aso atoa.” (Sala. 119:97) O lenā ituaiga o alofa e lē mafai ona atiaʻe i se loto lē usiusitaʻi, e pei ona lē ola lelei o se laau i se eleele papa. E mafai ona atiaʻe lenā alofa, pe a e filigā e suʻesuʻe le Tusi Paia, tatalo, ma manatunatu loloto i ai. O le a tuputupu aʻe lenā alofa, pe a e mātauina i lou olaga le tele o faamanuiaga ona o le usitaʻia o tapulaa a Ieova.—Sala. 34:8.

IA FINAFINAU MO LOU SAʻOLOTOGA FAA-KERISIANO!

16. Pe afai e tatou te mananaʻo e manumalo i le tauiviga e faatumauina pea lo tatou saʻolotoga, o le ā e tatau ona tatou manatuaina?

¹⁶ O loo fetauaʻi pea atunuu mo le mauaina o le saʻolotoga. E tatau foʻi la ona e matuā finafinau, ina ia faatumauina pea lou saʻolotoga o se Kerisiano! Ia manatua, e lē na o Satani ma le agaga taufaasesē o lenei lalolagi ni ou fili. E tatau foʻi ona e tauivi ma ou lava vaivaiga, lea e aofia ai le loto taufaaʻoleʻole. (Iere. 17:9; Efe. 2:3) Peitaʻi, e mafai ona e manumalo e ala i le fesoasoani a Ieova. E lua ni iʻuga lelei e maua, pe a e filifili e fai le mea tonu. Muamua, o le a e faafiafiaina le finagalo o Ieova. (Faata. 27:11) Lona lua, o taimi uma lava e te tofo ai i aogā o le usitaʻia o le “tulafono lelei atoatoa o le saʻolotoga,” o le a atili ai ona e maumauaʻi e tumau pea i le ala i le ola e faavavau. I le lumanaʻi, o le a e mauaina ai le tele o le saʻolotoga, lea na folafolaina mai e Ieova iā i latou uma e faamaoni iā te ia.—Iako. 1:25; Mata. 7:13, 14.

17. Aiseā e lē tatau ai ona tatou lotovaivai pe a faia se mea sesē, ma o le ā le fesoasoani ua saunia mai e Ieova?

¹⁷ O le mea moni, o le tele o taimi e tatou te faia ai mea sesē. (Fai. 7:20) Pe a tupu lenā tulaga, aua neʻi e lotovaivai ai pe manatu faapea ua leai sou aogā. Pe a e faia se mea sesē, ia uia laasaga e manaʻomia ina ia toe faasaʻo ai, e aofia ai i nisi taimi le saʻilia o le fesoasoani a toeaina. Na tusi Iakopo, o a latou “tatalo e faia i le faatuatua e malosi ai le tagata maʻi, ma o le a faatūina o ia e Ieova. E faamagaloina foʻi o ia pe afai ua agasala.” (Iako. 5:15) Ia manatua, e alofa mutimutivale le Atua, ma o lona finagalo na māfua ai ona e iai i totonu o le faapotopotoga, ona sa ia silafia se mea lelei e faatatau iā te oe. (Faitau le Salamo 103:8, 9.) O le a faaauau pea ona fesoasoani mai Ieova iā te oe, a o e taumafai e auauna iā te ia ma le lotoatoa.—1 No. 28:9.

18. E faapefea ona tatou gaoioi e ōgatusa ma le tatalo a Iesu o loo i le Ioane 17:15?

¹⁸ I le pō mulimuli o le soifuaga o Iesu, na tatalo ai o ia faatasi ma ona aposetolo faamaoni e toʻa 11, ma na ia talosaga atu i lona tamā ina ia puipuia i latou. Na ia fetalai i nei upu faagalogatā: “Ia leoleo iā i latou ona o lē ua leaga.” (Ioa. 17:15) E leʻi faapea e na o ona aposetolo na popole i ai Iesu, ae e aofia ai foʻi ma ona soo uma i aso nei. O lea la, e mafai ona tatou mautinoa ua taliaina e Ieova le tatalo a Iesu, e ala i le puipuia o i tatou a o faagasolo nei vaitaimi faigatā. ʻE fai Ieova ma talita mo ē e savavali i le faamaoni. E na te leoleoina foʻi le ala o ona tagata faamaoni.’ (Faata. 2:7, 8) E lē faigofie i taimi uma ona usitaʻia tapulaa a Ieova. Ae e na o i latou lava e usiusitaʻi iā Ieova, e mauaina le ola e faavavau ma le saʻolotoga moni. (Roma 8:21) E ono ese ni manatu o isi tagata, ae aua lava neʻi faasesēina ai oe!

[Faaopoopoga i lalo]

[Fesili mo le Suʻesuʻega]

[Ata i le itulau 14]

E faapefea ona tatou mātauina i latou e pei o Apisaloma i aso nei, ma o le ā le auala e ʻalofia ai i latou?