Ia Ta‘ita‘ia Oe e Ieova i le Sa‘olotoga Moni
Ia Taʻitaʻia Oe e Ieova i le Saʻolotoga Moni
“[Ia] vaavaai totoʻa i le tulafono lelei atoatoa o le saʻolotoga.”—IAKO. 1:25.
PE E MAFAI ONA E FAAMATALA?
O le ā le tulafono lea o loo sauniunia ai tagata ina ia maua le saʻolotoga moni, ma o ai e aogā i ai?
O le ā e tatau ona tatou faia ina ia maua ai le saʻolotoga moni?
O le ā le saʻolotoga o le a maua e i latou uma e faaauau ona usiusitaʻi iā Ieova?
1, 2. (a) O le ā le mea ua tupu i le saʻolotoga o tagata, ma aiseā? (e) O le ā le saʻolotoga o loo faamoemoe i ai auauna a Ieova?
O LOO tatou ola ma soifua i se vaitaimi ua faateteleina ai le matapeʻapeʻa, amioleaga, ma sauāga. (2 Timo. 3:1-5) O na tulaga, ua faia ai e faigāmalo nisi tulafono fou, faateleina fuainumera o leoleo, ma faapipii masini puʻeata i nofoaga eseese ina ia mafai ai ona iloa gaoioiga a tagata o loo fai. I nisi o atunuu, ua faapipii e tagata ni faailoilo eletise i totonu o o latou fale, faaopoopo loka i faitotoʻa, ma faaeletiseina pa uaea, ina ia faamautinoa ai lo latou saogalemu. Ua lē toe feoaʻi le toʻatele o tagata i le po, pe faataga foʻi a latou fanau e taaalo na o i latou i fafo, ona ua lē malupuipuia. Ua faaalia manino mai ai, ua tau leai se saʻolotoga o tagata, ma e foliga mai o le a faateteleina pea le leaga.
2 I le faatoʻaga i Etena, na faapea mai ai Satani, e faatoʻā maua e tagata le saʻolotoga moni, pe afai e ola e aunoa ma le pule a Ieova. O mea na tutupu talu mai lenā taimi, ua faamaonia ai le matuā pepelo o Satani! O le mea moni, o le a atili ai ona pagatia tagata, pe afai e faaauau pea ona latou lē usitaʻia tapulaa tau amio, ma taʻiala faaleagaga ua faataatitia mai e le Atua. O loo pagatia ai foʻi auauna a Ieova ona o ia tulaga leaga. Peitaʻi, e iai lo tatou faamoemoe, o le a iai le taimi e faasaʻolotoina ai le fanau a tagata, mai le faapologaina i le agasala ma le tulaga iʻuvale, ma maua ai “le saʻolotoga mamalu o le fanau a le Atua,” e pei ona taʻua i le Tusi Paia. (Roma 8:21) O le mea moni, ua leva ona sauniunia e Ieova ana auauna mo lenā saʻolotoga. I le ā le auala?
3. O le ā le tulafono ua tuuina mai e Ieova i soo o Keriso, ma o ā fesili o le a tatou iloiloina?
3 O loo maua le tali i le faamatalaga a le tusitala o le Tusi Paia o Iakopo, lea na ia taʻua ai “le tulafono lelei atoatoa o le saʻolotoga.” (Faitau le Iakopo 1:25.) I isi faaliliuga o le Tusi Paia, o loo faaupuina ai lea fuaitau o “le tulafono e faasaʻolotoina ai i tatou” (The New English Bible), ma “le tulafono o le saʻolotoga ua atoatoa ona lelei” (Tusi Paia Samoa-Faaliliuga o le 1969). E masani ona manatu tagata i tulafono o se mea e faasāsā ai, ae e lē maua ai se saʻolotoga. O le ā tonu la “le tulafono lelei atoatoa o le saʻolotoga”? E faapefea ona faasaʻolotoina i tatou e lenā tulafono?
O LE TULAFONO E FAASAʻOLOTOINA AI I TATOU
4. O le ā o loo faasino atu i ai “le tulafono lelei atoatoa o le saʻolotoga,” ma o ai e aogā i ai?
4 E lē o faasino atu “le tulafono lelei atoatoa o le saʻolotoga” i le Tulafono a Mose. Na tuuina atu e Ieova le Tulafono a Mose i tagata Isaraelu, e faailoa atu ai o i latou o tagata agasala, ma na faataunuuina e Keriso lenā Tulafono. (Mata. 5:17; Kala. 3:19) O le ā tonu la le tulafono lea sa taʻua e Iakopo? Na ia faasino atu i “le tulafono a le Keriso,” lea e taʻua foʻi o “le tulafono o le faatuatua,” ma “le tulafono a tagata saʻoloto.” (Kala. 6:2; Roma 3:27; Iako. 2:12, fpl.) O lea la, e aofia i “le tulafono lelei atoatoa” mea uma e manaʻomia e Ieova mai iā i tatou. E maua e Kerisiano faauuina ma “isi mamoe” aogā mai i lenā tulafono.—Ioa. 10:16.
5. Aiseā e lē o se avega mamafa ai le tulafono o le saʻolotoga?
5 E ese mai “le tulafono lelei atoatoa,” mai tulafono a le tele o atunuu. Ua faia aʻe “le tulafono lelei atoatoa,” i poloaʻiga ma mataupu silisili faavae, lea e faigofie ona malamalama i ai ma usitaʻia. (1 Ioa. 5:3) Na fetalai Iesu: “E avegofie laʻu amo, ma e māmā foʻi laʻu avega.” (Mata. 11:29, 30) E lē gata i lea, e lē manaʻomia i “le tulafono lelei atoatoa” se lisi umī o ni faasāsāaga po o ni faasalaga, auā e faavae aʻe i le alofa, ma e tusia i mafaufau ma loto o tagata, ae lē i ni papamaa e pei o tulafono sa tuuina atu iā Mose.—Faitau le Eperu 8:6, 10.
LE AUALA E FAASAʻOLOTOINA AI I TATOU E “LE TULAFONO LELEI ATOATOA”
6, 7. O le ā se mea ua tatou iloa e faatatau i tapulaa a Ieova, ma o le ā ua mafai ona tatou faia ona o le tulafono o le saʻolotoga?
6 Ua faataatia e Ieova tapulaa mo tagata e lē gata mo lo latou lelei, ae faapea foʻi mo lo latou puipuiga. O se faaaʻoaʻoga, o tulafono o le natura, e pei o le tulafono o le kalave. E lē taitai faitio tagata e faapea, ua faapologaina i latou ona o na tulafono. Nai lo o lea, e latou te talisapaia na tulafono, i le iloaina na faia mo lo latou lelei. I se tulaga talitutusa, e ala mai i “le tulafono lelei atoatoa” a le Keriso, ua aumaia ai e Ieova tapulaa tau amio ma taʻiala faaleagaga, mo le lelei o tagata.
7 Ua avea le tulafono o le saʻolotoga o se puipuiga mo i tatou, ae ua mafai ai foʻi ona faamalieina o tatou faanaunauga talafeagai, e aunoa ma le faaleagaina ai o i tatou, pe lē amanaʻia ai foʻi aiā tatau ma saʻolotoga o isi. O lea la, e faatoʻā mafai ona tatou saʻoloto e faia se mea, pe afai e talafeagai mea e tatou te faanaunau i ai. O lona uiga, e tatau ona tatou faanaunau e faia mea e finagalo malie i ai Ieova, ma mea o loo ia manaʻomia mai iā i tatou. I se isi faaupuga, e tatau ona aʻoaʻoina i tatou ina ia fiafia i mea e finagalo malie i ai Ieova, ma ʻinoʻino i mea e inosia e ia. Ua fesoasoani le tulafono o le saʻolotoga iā i tatou ina ia faia faapea.—Amo. 5:15.
8, 9. O ā aogā e maua e i latou e usiusitaʻi i le tulafono o le saʻolotoga? Aumai se faataʻitaʻiga.
8 Ona o lo tatou tulaga lē lelei atoatoa, e matuā faigatā ai mo i tatou ona puleaina o tatou faanaunauga sesē. Ae pe a tatou usiusitaʻi ma le faamaoni i le tulafono o le saʻolotoga, e mafai lava ona tatou maua sina saʻolotoga i le taimi lenei. O se faataʻitaʻiga, sa matuā faigatā mo se tamāloa e suafa iā Jay, ona tuu le ulaula tapaa. Ina ua amata ona ia suʻesuʻeina le Tusi Paia, sa ia aʻoaʻoina ai e lē fiafia le finagalo o le Atua i lana masaniga o loo fai. O lea, sa tatau ai ona ia faia se filifiliga. Po o le a faaauau pea ona puleaina o ia e lona faanaunauga e ulaula, po o le a ia usitaʻi iā Ieova? Na ia faia se filifiliga atamai e auauna i le Atua, e ui lava sa faigatā tele mo ia ona tuu le ulaula tapaa. O ā ni ona faalogona ina ua mafai ona ia tuuina lenā masaniga? Sa ia faapea mai: “Na ou matuā fiafia lava, ua ou saʻoloto.”
9 O le saʻolotoga o loo ofoina mai e le lalolagi, ua atili ai ona faia e tagata mea e faamalie ai o latou tuʻinanauga. Ae e pei ona aʻoaʻoina e Jay, e iʻu ai i le faapologaina o tagata i le agasala. O i latou e usiusitaʻi i le tulafono o le saʻolotoga mai i le Atua, e filifili ina ia taʻitaʻia i latou e le agaga o le Atua, ma ua iʻu ai i le faasaʻolotoina, ma maua ai le “ola ma le filemu.” (Roma 8:5, 6) O fea sa maua ai e Jay le malosi e tuu ai lana ulaula tapaa? E lē o sona lava malosi, ae o le malosi mai le Atua. Na ia taʻua: “Sa ou suʻesuʻeina e lē aunoa le Tusi Paia, tatalo mo le agaga paia, ma saʻili atu i le taʻitaʻiga alofa na faaalia mai e le faapotopotoga Kerisiano.” E mafai ona fesoasoani nei sauniuniga iā i tatou uma, ina ia maua ai le saʻolotoga moni. Seʻi o tatou iloilo pe faapefea ona tupu lenā mea.
IA VAAVAAI TOTOʻA I LE AFIOGA A LE ATUA
10. O le ā le uiga o le “vaavaai totoʻa” i le tulafono a le Atua?
10 I se vaega o le Iakopo 1:25, e tatou te faitau ai e faapea: ʻO lē e vaavaai totoʻa i le tulafono lelei atoatoa o le saʻolotoga, ma tausisi i ai o le a fiafia o ia ona o lona faia o lea galuega.’ O le upu Eleni ua faaliliuina “vaavaai totoʻa,” e uiga atu i le “punou i lalo ina ia iloilo lelei se mea,” lea e manaʻomia ai ni taumafaiga filigā. Ioe, pe afai e tatou te mananaʻo e taaʻina o tatou mafaufau ma loto i le tulafono o le saʻolotoga, e tatau ona faia la tatou vaega, e ala i le tinoū e suʻesuʻe le Tusi Paia, tatalo ma manatunatu loloto i mea o loo tatou faitauina.—1 Timo. 4:15.
11, 12. (a) Na faapefea ona faamamafa e Iesu le tāua o le taʻitaʻia e le upu moni o o tatou olaga? (e) E pei ona taʻua i le faataʻitaʻiga, o le ā le lamatiaga e tatau ona ʻalofia, aemaise lava mo le ʻautalavou?
11 I le taimi e tasi, e tatau ona tatou “tausisi,” pe ia tumau i le faatatauina o le Afioga a le Atua. E tatau ona taʻitaʻia o tatou olaga i le upu moni. Na iai se fetalaiga a Iesu e talitutusa ma lenā manatu, ina ua ia faapea atu i nisi o ē na talitonu iā te ia: “O outou o oʻu soo moni pe a outou tumau i aʻu upu, ma e iloa e outou le upu moni, e tuusaʻoloto foʻi outou e le upu moni.” (Ioa. 8:31, 32) Ua taʻua i se lomifefiloi, o loo uiga atu le upu “iloa,” i le talisapaia lea e se tasi “o mea ua ia ʻiloaina’ ona e tāua iā te ia.” O lea la, e tatou te “iloa” lelei le upu moni, pe a taʻitaʻia ai o tatou olaga. Ona mafai lea ona tatou faapea atu, ʻo loo galue le afioga a le Atua’ iā i tatou. E fesoasoani lenā mea iā i tatou e faia ai pea suiga i o tatou uiga, ina ia mafai ai ona faaatagia atili atu uiga o lo tatou Tamā i le lagi.—1 Tesa. 2:13.
12 Ia fesili ifo iā te oe lava, ʻPo o oʻu iloaina lelei le upu moni? Po o taʻitaʻia e le upu moni loʻu olaga? Po o oʻu manaʻonaʻo pea i nisi o “saʻolotoga” o loo ofoina mai e le lalolagi?’ Pe a toe mafaufau i le taimi a o talavou, na tusi ai se tuafafine na tausia aʻe e ni mātua Kerisiano: “Pe a e ola aʻe i le upu moni, e te talitonu o loo soifua Ieova. Ae iā te aʻu lava ia, ou te leʻi iloa lelei o ia, ma ou te leʻi ʻinoʻino i mea e inosia e ia. Ou te leʻi mafaufauina e aafia lona finagalo i mea ou te faia. Sa ou lē iloa le tāua o le saʻilia o lana taʻitaʻiga pe a ou feagai ma faafitauli. Sa ou faalagolago i loʻu lava malamalama, lea ua ou iloaina o se gaoioiga e matuā lē atamai, ona e itiiti lava mea sa ou iloaina.” O le mea e fiafia ai, sa iloa mulimuli ane e le tuafafine le matuā sesē lava o ona mafaufauga, ma sa ia faia loa ni suiga tetele i lona olaga. Na avea foʻi o ia o se paeonia sauatoa.
E MAFAI E LE AGAGA PAIA ONA FAASAʻOLOTOINA OE
13. E faapefea ona faasaʻolotoina i tatou e le agaga paia o le Atua?
13 I le 2 Korinito 3:17, e tatou te faitau ai e faapea: “O le mea e iai le agaga o Ieova, e iai le saʻolotoga.” Ua faapefea ona faasaʻolotoina i tatou e le agaga paia? E fesoasoani le agaga paia iā i tatou ina ia atiaʻe uiga e pei o le “alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.” (Kala. 5:22, 23) Pe a aunoa ma na uiga, aemaise le alofa, e lē mafai ona maua e tagata se saʻolotoga moni—o se mea moni o loo vaaia i le lalolagi i aso nei. O le mea e mataʻina ai, ina ua uma ona taʻua e le aposetolo o Paulo vala o le fua o le agaga, ona ia toe faapea mai lea: “E lē faatulafonoina mea faapena.” O le ā le uiga o lana faamatalaga? E lē mafai e se tulafono ona taofia le tuputupu aʻe o nei uiga i o tatou olaga. (Kala. 5:18) E finagalo Ieova ina ia faaauau pea ona tatou atiaʻe uiga e pei o uiga o Keriso, ma ia faaalia pea seʻia oo i le faavavau.
14. O ā auala ua faapologaina ai e le agaga o le lalolagi tagata?
14 E ono manatu ē o loo puleaina e le agaga o le lalolagi ma faamalieina o latou tuʻinanauga leaga, o loo latou saʻoloto. (Faitau le 2 Peteru 2:18, 19.) Ae o le mea moni, o loo faapologaina i latou. E tatau i faigāmalo ona faia le tele o tulafono, ina ia puleaina ai tuʻinanauga ma amioga a nei tagata. Ua faapea mai Paulo: ʻNa faavaeina le tulafono, e lē mo le tagata amiotonu, ae e mo ē e solitulafono ma ē e lē gauaʻi.’ (1 Timo. 1:9, 10) O i latou foʻi o pologa a le agasala, ua taaʻina e faia “mea na manaʻo i ai le tino,” o se pule sauā. (Efe. 2:1-3) E pei ona maileia o se manu i se maunu, e faapena foʻi tagata e taaʻina e o latou tuʻinanauga sesē, ma avea ai ma pologa o le agasala.—Iako. 1:14, 15.
UA FAASAʻOLOTOINA I TOTONU O LE FAAPOTOPOTOGA KERISIANO
15, 16. O le ā le tāua o lo tatou auaufaatasi ma le faapotopotoga, ma o le ā le saʻolotoga ua tatou maua?
15 O lou auaufaatasi ma le faapotopotoga Kerisiano, e lē pei o le avea oe o se sui auai o se faalapotopotoga tumaʻoti. O le finagalo o Ieova, ua māfua ai ona e iai i totonu o le faapotopotoga. (Ioa. 6:44) Aiseā na ia filifilia ai oe? Pe sa mātauina oe e le Atua o sē e amiotonu, ma mataʻu iā te ia? Atonu e te faapea mai, “E leai!” O le ā tonu la sa silasila i ai le Atua? Na ia silasila i se loto o le a taliagofie lana tulafono o le saʻolotoga, ma o se loto foʻi e gauaʻi atu i lana taʻitaʻiga agalelei. Talu mai le taimi na faatoʻā e auaufaatasi ai ma le faapotopotoga, na tausia oe e Ieova e ala i le aʻoaʻoina o oe e faatatau i lana Afioga. Ua ia faasaʻolotoina oe mai i aʻoaʻoga sesē a lotu ma talitonuga faanuupō, ma aʻoaʻoina oe i le auala e faaaʻoaʻo ai i uiga o Keriso. (Faitau le Efeso 4:22-24.) O le iʻuga, o lea ua e maua nei le faaeaga e faatasi ai ma tagata ua maua le saʻolotoga moni.—Iako. 2:12.
16 Seʻi mafaufau i le mea lenei: Pe e te lagona le fefe, pe a outou faatasitasi ma ē e alolofa iā Ieova ma o latou lotoatoa? A o outou talatalanoa ma uso ma tuafāfine i le Maota mo Sauniga, pe e te lagona le popole ina neʻi gaoia e se tasi au meatotino? E leai! E te lagonaina le saogalemu ma le saʻoloto. Pe faamata e faapena ou lagona pe a e faatasitasi ma nisi tagata, i se isi nofoaga? E mautinoa lava e leai! Peitaʻi, o le saʻolotoga o loo e olioli ai nei faatasi ma tagata o Ieova, ua na o se faaataataga lenā o le saʻolotoga o le a e mauaina i le lumanaʻi.
“LE SAʻOLOTOGA MAMALU O LE FANAU A LE ATUA”
17. O le ā le sootaga o le mauaina e le fanau a tagata o le saʻolotoga, ma “le faaalia mai o atalii o le Atua”?
17 Na tusi Paulo e faatatau i le saʻolotoga, lea o le a tuuina mai e Ieova i le lumanaʻi mo ona tagata i le lalolagi. Na ia faapea mai: “O loo faatalitali ma le matuā naunau atu le foafoaga i le faaalia mai o atalii o le Atua.” Ona ia taʻua atili lea: ʻE saʻoloto foʻi le foafoaga mai i le faapologaina i mea leaga, ma maua ai le saʻolotoga mamalu o le fanau a le Atua.’ (Roma 8:19-21) O loo faasino atu “le foafoaga” i le fanau a tagata e iai le faamoemoe e ola e faavavau i le lalolagi, o ē o le a mauaina aogā pe a “faaalia” mai atalii faauuina o le Atua. O le a amata ona faaalia mai “atalii” o le Atua o loo i le lagi, pe a latou fesoasoani iā Keriso i le aumaia o le faaumatiaga i tagata amioleaga uma, ma faasaoina “se motu o tagata e toʻatele” i le lalolagi fou.—Faaa. 7:9, 14.
18. O le a faapefea ona faateleina le saʻolotoga o le a mauaina e le fanau a tagata usiusitaʻi, ma o le ā le saʻolotoga o le a latou olioli ai i le lumanaʻi?
18 O le taimi lenā e faatoʻā maua ai e tagata se saʻolotoga faapitoa. O le a faasaʻolotoina i latou mai i taaʻiga a Satani ma ana temoni. (Faaa. 20:1-3) Maʻeu se mapusaga o le a iai i lenā taimi! O le a amata mai i lenā taimi, ona faaaogā e le 144,000 o ē o le a pule i le lagi o ni tupu ma ositaulaga, le taulaga togiola ina ia faasaʻolotoina ai le fanau a tagata, seʻia oo lava ina aveesea atoatoa le agasala ma le tulaga lē lelei atoatoa. (Faaa. 5:9, 10) Pe a māeʻa ona tofotofoina le faamaoni o le fanau a tagata usiusitaʻi, ona faatoʻā latou maua lea o le saʻolotoga lelei atoatoa, lea sa fuafuaina e Ieova mo i latou—“le saʻolotoga mamalu o le fanau a le Atua.” Seʻi mafaufau i ai. I lenā taimi, o le a lē toe faigatā ona e faia le mea e tonu i le silafaga a le Atua. O le a lelei atoatoa lou tino, loto, ma le mafaufau, ma o le a mafai ona e faaatagiaina atu uiga o le Atua i se tulaga lelei atoatoa.
19. O le ā e tatau ona faaauau ona tatou faia, pe afai e tatou te naunau e maua “le saʻolotoga mamalu o le fanau a le Atua”?
19 Pe e te moomoo i le mauaina o “le saʻolotoga mamalu o le fanau a le Atua”? Pe afai o le tulaga lenā, ia faaauau pea ona taaʻina lou mafaufau ma lou loto i “le tulafono lelei atoatoa o le saʻolotoga.” Ioe, ia suʻesuʻe ma le filigā le Tusi Paia. Ia taʻitaʻia e le upu moni lou olaga. Tatalo mo le agaga paia. Ia maua atoatoa aogā mai le faapotopotoga Kerisiano, ma meaʻai faaleagaga o loo saunia mai e Ieova. Aua foʻi neʻi faasesēina oe e Satani, e pei ona ia faasesēina Eva e manatu, ua faasāsā naʻuā tele tapulaa a le Atua. E ui e poto tele le Tiapolo, ae e mafai lava ona tatou manumalo iā te ia, “auā tatou te lē vālea i ana togafiti.” O le a tatou talanoaina lenā manatu i le mataupu o sosoo mai.—2 Kori. 2:11.
[Fesili mo le Suʻesuʻega]
[Ata i le itulau 9]
Po o oʻu manaʻonaʻo pea i nisi o “saʻolotoga” o loo ofoina mai e le lalolagi?
[Ata i le itulau 9]
Po o taʻitaʻia e le upu moni loʻu olaga?
