“O Ai ea Ou te Fefe i Ai?”
“O Ai ea Ou te Fefe i Ai?”
“E ui ina faasagatau mai iā te aʻu i se taua, ae ou te faatuatua pea iā te ia.”—SALA. 27:3.
E TUSA MA FUAIUPU O LOO MULIMULI MAI, O LE Ā E FESOASOANI IĀ TE OE INA IA ATIAʻE LE LOTOTELE?
1. O ā fesili o le a taliina i le Salamo e 27?
AISEĀ ua faatuputeleina ai le galuega talaʻi, e ui ua faateteleina le leaga o le lalolagi i aso nei? Aiseā e tatou te faaaogā ai le tele o lo tatou taimi ma le malosi i le galuega talaʻi, e ui i le tulaga leaga ua iai le tamaoaiga o le lalolagi? E faapefea ona maua pea le lototele, a o matataʻu le toʻatele o tagata e faatatau i le lumanaʻi? O le pese a le tupu o Tavita o loo faamauina i le Salamo e 27, o le a mafai ona tali ai nei fesili.
2. O ā aafiaga e oo i se tagata ona o le fefe, ae o le ā le manatu e tatau ona iā i tatou?
2 Na amata e Tavita lenei salamo i upu nei: “O Ieova o loʻu malamalama ma loʻu faaolataga, o ai ea ou te mataʻu i ai? O Ieova o le malosi ia o loʻu ola, o ai ea ou te fefe i ai?” (Sala. 27:1) O le fefe tele e mafai ona faavaivaia ai se tasi, ma lē mafai ai ona toe faia se gaoioiga. Peitaʻi o lē e faalagolago iā Ieova, e lototele ma e lē fefe. (1 Pete. 3:14) Pe a avea Ieova ma o tatou malosiaga, “o le a saogalemu ma lē fefe i so o se puapuaga.” (Faata. 1:33; 3:25) Aiseā?
“O IEOVA O LOʻU MALAMALAMA MA LOʻU FAAOLATAGA”
3. I le ā le itu ua avea ai Ieova ma o tatou malamalama, ae o le ā e tatau ona tatou faia?
3 Ua faapea mai le Tusi Paia “o Ieova o loʻu malamalama,” e uiga atu i le aʻoaʻoina o i tatou e Ieova i le upu moni. (Sala. 27:1) E mafai e le malamalama o le molī ona iloa ai se mea e ono lamatia ai i le auala o loo tatou savalia, peitaʻi e lē mafai e lenā malamalama ona aveesea na lamatiaga. E tatau ona tatou gaoioi ma le poto e tusa ma mea ua tatou mātauina. I se tulaga talitutusa, ua faailoa mai e Ieova le uiga o mea ua tatou vaaia o loo tutupu i le lalolagi i aso nei. Ua ia lapataʻia i tatou e faatatau i lamatiaga o loo iai i lenei faiga o mea. Ua ia tuuina mai foʻi taʻiala aogā o le Tusi Paia, peitaʻi e tatau ona faatatauina mea ua tatou aʻoaʻoina. Ua faapea mai le faisalamo: “Ua sili atu loʻu atamai i oʻu fili ona o au poloaʻiga,” ma “ua sili atu le tofā mamao ua iā te aʻu nai lo o oʻu faiaʻoga uma.” Pe a faatatauina taʻiala a le Tusi Paia, o le a avea i tatou ma ni ē e sili atu ona atamamai.—Sala. 119:98, 99, 130.
4. (a) Aiseā na faapea mai ai ma le mautinoa Tavita: “O Ieova o loʻu . . . faaolataga”? (e) O afea o le a faasaoina ai e Ieova ana auauna?
4 Ua faailoa mai e Tavita i le Salamo 27:1, e na te leʻi faagaloina le auala na laveaʻia ai o ia e Ieova i le tele o taimi. O se faataʻitaʻiga, na laveaʻia o ia e Ieova mai i le leona ma le pea. Na fesoasoani foʻi Ieova iā te ia i le faatoʻilaloina o Koliata. Mulimuli ane, na laveaʻia e Ieova Tavita i taimi uma na taumafai ai le tupu o Saulo e fasiotia o ia i se tao. (1 Samu. 17:37, 49, 50; 18:11, 12; 19:10) E lētioa faapea mai ma le mautinoa Tavita: “O Ieova o loʻu . . . faaolataga”! O le a faapena foʻi ona laveaʻia e Ieova ana auauna. E faapefea? O le a ia laveaʻia i latou pe a oo mai le “puapuaga tele.”—Faaa. 7:14; 2 Pete. 2:9.
IA MANATUA TAIMI UMA NA FESOASOANI AI IEOVA IĀ TE OE
5, 6. (a) E faapefea i le manatuaina o mea na tutupu iā i tatou i taimi ua teʻa ona atiaʻe ai le lototele? (e) E faapefea i faamaumauga o auala na feutagaʻi ai Ieova ma ana auauna ona faamalosia ai lou faatuatua?
5 Ua taʻua i le Salamo 27:2, 3 se tasi o vala tāua e fesoasoani iā i tatou e atiaʻe ai le lototele. (Faitau.) Na toe taʻua e Tavita auala na laveaʻia ai o ia e Ieova. (1 Samu. 17:34-37) O le manatuaina o na mea, na ia maua ai le mautinoa e fesagaʻia ai isi tulaga e sili atu ona faigatā. Pe e faapena lou tulaga pe a toe mafaufau i mea na tutupu i lou olaga? O se faataʻitaʻiga, pe sa e tatalo i le tele o taimi i sou faafitauli sa lofitūina ai oe i le faanoanoa? Pe na e mātauina le auala na avatu ai e Ieova iā te oe le atamai ma le malosi ina ia tumau ai i na faigatā? Pe e te manatuaina le auala na fesoasoani ai Ieova iā te oe e foʻia nisi o faafitauli, lea na faafaigatā ai ona e faia le auaunaga iā te ia ma le fiafia? Pe e te manatuaina le auala na ia tatalaina atu ai isi vala o le auaunaga iā te oe? (1 Kori. 16:9) O le ā se aafiaga o le manatuaina o na mea na tutupu iā te oe? O le manatuaina o na mea e faatalitonuina ai pea oe, e fesoasoani mai Ieova ina ia foʻia, pe onosaia foʻi faafitauli ma tulaga e sili atu ona faigatā.—Roma 5:3-5.
6 Ae e faapefea pe a faia e se faigāmalo malosi se faufauga ina ia tafiesea atoatoa ai le faalapotopotoga o Molimau a Ieova? E toʻatele tagata i aso nei sa taumafai e faia lenā tulaga, ae e leʻi taulau manuia. Afai e tatou te manatua auala na laveaʻia ai e Ieova ona tagata i taimi ua tuanaʻi, e faamalosia ai foʻi i tatou ina ia tumau e tusa lava po o ā faigatā tatou te ono fesagaʻia i le lumanaʻi.—Tani. 3:28.
IA TALISAPAIA LE TAPUAʻIGA MONI
7, 8. (a) E tusa ma le Salamo 27:4, o le ā na talosaga atu ai Tavita iā Ieova? (e) O le ā le malumalu sili faaleagaga o Ieova, ma e faapefea ona tatou tapuaʻi ai i aso nei?
7 O lo tatou naunau foʻi mo le tapuaʻiga moni e fesoasoani iā i tatou ina ia maua ai le lototele. (Faitau le Salamo 27:4.) I aso o Tavita, o “le fale o Ieova,” o se fale fetafaʻi. Ae na fuafuaina e Tavita le faatūina o se malumalu matagofie anagatā, e fausiaina e lona atalii o Solomona. I le faitau selau o tausaga mulimuli ane, na faamatalaina ai e Iesu e iai le taimi, o le a lē toe manaʻomia ai ona toe ō atu tagata e tapuaʻi iā Ieova i le malumalu. (Ioa. 4:21-23) Na taʻua e Paulo i le Eperu mataupu e 8 e oo i le 10, na aliaʻe mai le malumalu sili faaleagaga i le 29 T.A. ina ua papatisoina Iesu, ina ia faia le finagalo o Ieova. (Epe. 10:10) O le malumalu sili faaleagaga, o le sauniuniga na faia e Ieova ina ia tatou faalatalata atu iā te ia i le auala e na te taliaina, e ala i le faatuatua i le taulaga togiola a Iesu. E faapefea ona tatou tapuaʻi i lenā malumalu sili faaleagaga? E ala i le tatalo “ma le lotofaamaoni, i le mautinoa atoatoa i le faatuatua,” ma le faalauiloaina i le lautele o lo tatou faamoemoe e aunoa ma le faavaivai. E aofia ai foʻi lo tatou manatunatu, atiaʻe, ma faalaeiauina o tatou uso pe a potopoto faatasi i sauniga, faapea tapuaʻiga faaleaiga. (Epe. 10:22-25) O le talisapaia o faatulagaga mo le tapuaʻiga moni, e faamalosia ai i tatou a o tatou ola i nei aso e sili ona faigatā.
8 I le lalolagi aoao, ua faateleina ai e auauna faamaoni a Ieova lo latou taimi i le faiva, aʻoaʻoina o isi gagana, ma siitia atu i nofoaga e tau leai ni tagata talaʻi. Ua pei i latou o le faisalamo, e tasi lava le mea ua latou talosaga atu ai iā Ieova. E latou te mananaʻo e tofo i le matagofie o Ieova, ma faia so latou sao i le auaunaga paia e tusa lava po o le ā e tulaʻi mai.—Faitau le Salamo 27:6.
IA MAUFAATUATUAINA LE FESOASOANI A LE ATUA
9, 10. O le ā ua folafola mai i le Salamo 27:10?
9 E tatou te iloa mai i upu a Tavita lona matuā maufaatuatuaina o le fesoasoani a Ieova, i lona faapea mai: “E tusa pe tuua aʻu e loʻu lava tamā ma loʻu lava tinā, ae e talia lava aʻu e Ieova.” (Sala. 27:10) E tusa ma mea na tutupu o loo taʻua i le tusi o 1 Samuelu mataupu e 22, e mafai ona tatou faapea atu e leʻi tuulafoaʻia Tavita e ona mātua. Peitaʻi, o le toʻatele i aso nei o loo tutumau pea a o feagai ma teteega mai i o latou aiga. E ui i lea, ua latou maua le fesoasoani ma le puipuiga, mai le alofa lea e maua i totonu o le faapotopotoga.
10 Ua nofosauni Ieova e tausia ana auauna, pe a tuulafoaʻiina i latou e isi. O lea la, e mafai ona tatou mautinoa o le a Ia tausia ana auauna, pe a fesagaʻi ma tulaga faigatā. O se faataʻitaʻiga, pe a tatou popole pe faapefea ona tausia manaʻoga o o tatou aiga, ia manatua e fesoasoani mai Ieova iā i tatou. (Epe. 13:5, 6) E malamalama Ieova i o tatou tulaga ma silafia mea uma e tatou te manaʻomia.
11. O le ā le aafiaga i isi tagata ona o lo tatou maufaatuatuaina o Ieova? Ia faataʻitaʻi.
11 Seʻi mafaufau i le tulaga o Victoria, o se tagata suʻesuʻe o le Tusi Paia i Laiperia. Na tuua e lona toʻalua o ia ma lana fanau e toʻatolu. E ui i le leai o sana galuega ma se mea e nonofo ai, ae sa faaauau pea ona suʻesuʻe, ma iʻu ai ina papatiso. I se tasi aso, sa maua ai e lana tama teine e 13 tausaga se ato o loo iai se tupe. Ina ia ʻalofia le faaosoosoga, na la filifili ai e lē faitauina le tupe. Nai lo o lea, na vave ona la faafesootaʻia le fitafita e ana le ato tupe. Na faapea atu le fitafita iā i laʻua, pe a faamaoni uma tagata e pei o Molimau a Ieova, semanū e sili atu ona filemu ma lelei le tulaga o le lalolagi. Na faaaogā e Victoria le Tusi Paia, e faailoa atu ai iā te ia le folafolaga a Ieova e faatatau i se lalolagi fou. Ona o le ofo o le fitafita i lona faamaoni, na ia avatu ai se taui tele mo ia mai le tupe na ia toe faafoʻiina atu. E lauiloa Molimau a Ieova ona o lo latou faamaoni. E faamaoni Molimau a Ieova, ona e latou te maufaatuatuaina atoatoa le tausiga a Ieova.
12. Aiseā e faaauau ai pea ona tatou auauna iā Ieova, e tusa lava pe afāina ai a tatou galuega po o alagātupe? Aumai se faaaʻoaʻoga.
12 Seʻi faaāta faalogona o Tomasi, o se tagata talaʻi e leʻi papatiso i Sierra Leone. Na ia galue o se faiaʻoga, peitaʻi na toetoe lava atoa le tausaga e leʻi maua sona totogi. Ina ia maua lona totogi, na tatau ona faia se faatalanoaga ma le pule o le aʻoga. O le pule aʻoga o se patele, ma na ia faapea atu iā Tomasi, e lē taliaina i le aʻoga talitonuga o Molimau a Ieova. Na ia taʻua atili, pe a manaʻo e tumau i lana galuega, e lē tatau ona toe avea o ia ma Molimau a Ieova. Na tuua e Tomasi le galuega, e ui lava e leʻi maua lona totogi. Mulimuli ane, na maua se isi ana galuega, o le toe faaleleia o leitiō ma telefoni feaveaʻi. O le tele o nei faaaʻoaʻoga, ua faaalia ai pe afai e tatou te maufaatuatuaina Ieova, e lē tatau la ona popole i mea e manaʻomia mo le tausiga o i tatou. Ua tatou iloa e tausia e Ieova i tatou, ona o ia na foafoaina mea uma, ma puipuia ona tagata.
13. Aiseā e faaaluina ai e uso ma tuafāfine i atunuu e faalētonu le tamaoaiga, le tele o le taimi i le talaʻiga?
13 O loo faia se sao tele o uso ma tuafāfine i le galuega talaʻi i le tele o atunuu e faalētonu le tamaoaiga. Aiseā? Na tusi mai se ofisa o le lālā e faapea: “O le toʻatele o tagata e taliaina suʻesuʻega faale-Tusi Paia, e leai ni galuega, ma e tele taimi e suʻesuʻe ai a o faagasolo le aso. E tele foʻi le taimi mo uso e auai ai i le galuega talaʻi. O le toʻatele o tagata aemaise lava i latou o loo nonofo i vaega o loo matuā faigatā ai lava le soifuaga, e lē tau faailoaina atu iā i latou, ua tatou ola ma soifua i aso e gata ai, ona o le faigatā o le siʻomaga o loo latou ola ai.” I se tasi o atunuu, o le toʻatele o le ʻautalaʻi e silia ma le taʻitolu suʻesuʻega a le tagata. Na tusi se misionare ua silia ma le 12 tausaga o auauna i lenā atunuu e faapea, o le toʻatele o le ʻautalaʻi e tele le taimi e talaʻi ai, ma faia suʻesuʻega faale-Tusi Paia, ona e lē tele ni mea e faalavelave iā i latou.
14. O ā auala o le a puipuia ai e le Atua le motu o tagata e toʻatele?
14 Ua folafola mai e Ieova o le a ia fesoasoani, puipuia, ma laveaʻia ona tagata o se faalapotopotoga i le itu faaletino ma le faaleagaga, ma e tatou te maufaatuatuaina o ia. (Sala. 37:28; 91:1-3) O le a iai se motu o tagata e toʻatele o le a faasaoina mai “le puapuaga tele.” (Faaa. 7:9, 14) O le a puipuia e le Atua lenā motu o tagata e toʻatele, e ala i le lē faatagaina o se tasi e tafiesea atoatoa i latou uma, a o faagasolo aso e gata ai o lenei faiga o mea. O le a saunia e Ieova mea uma latou te manaʻomia ina ia tutumau ai i tofotofoga, ma puipuia la latou faiā ma ia. O le a puipuia foʻi e Ieova ona tagata a o faagasolo Amaketo.
“IEOVA E, IA E FAATONU MAI AʻU I LOU ALA”
15, 16. E faapefea ona tatou mauaina aogā pe a faatatauina taʻiala mai le Atua? Ia faataʻitaʻi.
15 Ina ia faatumauina lo tatou lototele, e manaʻomia ona aʻoaʻoina pea i tatou e le Atua. Na faapea mai Tavita: “Ieova e, ia e faatonu mai aʻu i lou ala, ma taʻitaʻi iā te aʻu i le ala o le amio saʻo ona o oʻu fili.” (Sala. 27:11) O le gaoioi e ōgatusa ma lea tatalo, o lo tatou uaʻi atu lea ma le faaeteete, ma faatatau so o se taʻitaʻiga mai le Tusi Paia, e ala mai le faalapotopotoga a Ieova. O se faaaʻoaʻoga, o le toʻatele ua faatatauina le fautuaga atamai ina ia faafaigofie o latou olaga. Ua totogi a latou aitalafu ma faatau ese mea e lē manaʻomia. O lea, ina ua faalētonu le tamaoaiga o le lalolagi, ua tuuitiitia faafitauli tautupe e popole i ai. E latou te lē o toe soona galulue mamafa foʻi e totogi mea e lē manaʻomia moni, ma ua faateleina ai lo latou sao i le faiva. E lelei ona fesili ifo le tagata lava ia, ʻPo o vave ona ou faatatauina mea uma o loo oʻu faitauina i le Tusi Paia, ma lomiga a le pologa faamaoni ma le faautauta, e ui lava e manaʻomia ai ona ou faia se faataulagaina totino?’—Mata. 24:45.
16 O le faatonutonuina ma le taʻitaʻia o i tatou e Ieova i le ala o le amio saʻo, o le a leai ai se māfuaaga mo i tatou e matataʻu ai. Sa taumafai se paeonia sauatoa i le Iunaite Setete e talosaga mo se isi tulaga i le galuega, ina ia mafai ai pea e ia ma lona aiga atoa, ona auai i le auaunaga faataimi atoa. Ae na faapea mai lē na vaaia le galuega, e lē mafai ona ia maua lenā tulaga e aunoa ma se tikeri mai le iunivesite. Pe ana tupu se mea faapena iā te oe, pe o le a e salamō i lou filifilia o le auaunaga faataimi atoa, nai lo o le auai atu i iunivesite? Ina ua faateʻa lē na vaaia le galuega ina ua mavae le lua vaiaso, ona fesiligia lea e le tamāloa fou na vaaia le galuega le uso e faatatau i ona sini. Na faailoa atu e le uso, o i laʻua ma lona toʻalua o ni faifeʻau talaʻi faataimi atoa a Molimau a Ieova, ma e mananaʻo e faaauau pea i lea galuega. A o leʻi toe fai atu se isi faamatalaga a le uso, na faapea mai le tamāloa: “Na ou mātauina e iai se mea e ese mai ai oe! Ina ua toeitiiti lava oo i le taimi e maliu ai loʻu tamā, e toʻalua nisi o le tou ʻautalaʻi na asiasi atu ma faitau le Tusi Paia iā te ia i aso uma. Na ou faapea ifo ai iā te aʻu lava, o le a ou fesoasoani i se Molimau a Ieova pe a ou maua se avanoa e faia ai faapea.” I le taeao na sosoo ai, na maua ai e le uso le tulaga na musu le tamāloa na vaaia muamua le galuega e tuuina atu iā te ia. O le mea moni, pe a tatou faamuamua manaʻoga o le Malo i o tatou olaga, o le a faamautinoa e Ieova, e tatou te maua mea e manaʻomia mo le tausiaina o i tatou.—Mata. 6:33.
E TĀUA LE FAATUATUA MA LE FAAMOEMOE
17. O le ā e fesoasoani iā i tatou ina ia fesagaʻia le lumanaʻi ma le mautinoa?
17 Ua fesoasoani mai Tavita iā i tatou, ia malamalama i le tāua o le iai o le faatuatua ma le faamoemoe i le faapea mai: “Pe ana ou lē faatuatua i le vaai atu i le lelei o Ieova i le nuu o tagata ola, semanū ua leai soʻu faamoemoe!” (Sala. 27:13) E faapeʻī o tatou olaga pe ana leai so tatou faamoemoe, ma tatou lē malamalama i mea o loo taʻua i le Salamo e 27? O lea la, i nei aso e gata ai, e manaʻomia ona faaauau pea ona tatou tatalo iā Ieova e foaʻi mai le malosi, ma faasaoina i tatou iā Amaketo.—Faitau le Salamo 27:14.
[Fesili mo le Suʻesuʻega]
[Ata i le itulau 23]
Na maua e Tavita le malosi i lona manatuaina o auala na laveaʻia ai o ia e Ieova
[Ata i le itulau 25]
Pe e tatou te vaai i le tulaga faalētonu tau tamaoaiga o se avanoa e faalautele ai la tatou faiva?
