Ua Lotomalilie e Ofo Atu i Latou Lava—I Ekutoa

SA TATAU iā Bruno, o se uso talavou i Italia, ona faia se filifiliga tāua. O lea faatoʻā māeʻa ana aʻoaʻoga, ma e maualuluga lava ona togi i la latou vasega. Na uunaʻia o ia e ona tauaiga ma faiaʻoga, ina ia saʻilia aʻoaʻoga maualuluga. Peitaʻi, i nai tausaga muamua atu, na tuuina atu ai Bruno iā Ieova, ma ia tautō ai o le a ia faamuamua le faia o le finagalo o le Atua i lona olaga. O le ā le filifiliga sa ia faia? Ua ia faapea mai: ʻSa ou faapea atu iā Ieova i le tatalo, o le a ou ola e tusa ai ma laʻu tautoga ina ia faamuamua o ia i loʻu olaga.’ Ae na toe taʻutino foʻi e Bruno i lana tatalo, e manaʻo ina ia fiafia lona olaga a o auauna iā Ieova, ma ia eseese vala o le auaunaga e galue ai.

 I ni nai tausaga mulimuli ane, sa siitia atu ai Bruno i Ekutoa i Amerika i Saute. Ua ia faapea mai: “Na tali mai Ieova i laʻu tatalo, i le foaʻiina mai o mea e sili atu nai lo o mea na ou faatalitalia.” Ina ua ia taunuu i Ekutoa, sa faateʻia o ia i le feiloaʻi ai ma isi talavou, o ē na siitia atu foʻi i lenā atunuu, ina ia faateleina ai so latou sao i le auaunaga iā Ieova.

O TALAVOU O Ē MAUFAATUATUAINA IEOVA

I le pei o Bruno, ua taliaina foʻi e le faitau afe o isi talavou i le lalolagi aoao le valaaulia a Ieova: “Faamolemole, ia outou tofotofo mai iā te aʻu . . . po ou te lē tatalaina ea faitotoʻa o le lagi ma liligi ifo i o outou luga faamanuiaga seʻia oo ina matuā tele lava.” (Mala. 3:10) Ona o lo latou alolofa i le Atua, ua latou filifili ai e faaaogāina lo latou taimi, malosi, ma tupe e auauna ai iā Ieova, i se atunuu o loo telē ai le manaʻoga mo tagata talaʻi o le tala lelei o le Malo.

E leʻi leva lava talu ona taunuu nei talavou i lenā atunuu fou, ae latou mātauina ai le “telē [o] le galuega o le seleselega, ae e toʻaitiiti le ʻaufaigaluega.” (Mata. 9:37) O se faaaʻoaʻoga, na tusi atu Jaqueline mai Siamani, i le lālā i Ekutoa e faapea: “Ua silia ma le 2 tausaga o oʻu auauna i Ekutoa, ma ua 13 nei aʻu suʻesuʻega faale-Tusi Paia, o le toʻafā o i latou ua auai e lē aunoa i sauniga. Pe e lē o se mea ea lenā e faafiafiaina ai?” Ua faapea mai Chantal mai Kanata: “I le 2008, sa ou siitia atu ai i se vaipanoa i le talafatai o Ekutoa, lea e na o le tasi le faapotopotoga sa iai. O le taimi nei ua tolu faapotopotoga, ma ua silia ma le 30 paeonia i lenā vaipanoa. E leai se isi mea e sili atu nai lo o le vaaia o tagata fou  o loo agaʻigaʻi i luma faaleagaga!” Na ia taʻua atili: “E leʻi leva talu ona ou siitia atu i se aai, e 9,000 futu (2,743 m) le maualuga i le tumutumu o atumauga o Andes. E silia ma le 75,000 tagata o loo nofoia lenā aai, ae e na o le tasi le faapotopotoga. E toʻatele tagata fiafia i lenā oganuu! Ua ou matuā fiafia lava i laʻu auaunaga.”

O FAIGATĀ NA FESAGAʻIA

Ioe, e lē faigofie i taimi uma le auauna ai i se isi atunuu. O le mea moni, e iai nisi o talavou na fesagaʻia tulaga faigatā, a o leʻi siitia atu i se isi atunuu. Na taʻua e Kayla mai le Iunaite Setete e faapea: “Sa faalotovaivaia aʻu i faamatalaga sa faia e nisi i le faapotopotoga, e ui lava e lelei le uunaʻiga sa faia ai. E latou te leʻi malamalama i le māfuaaga na ou manaʻo ai ou te siitia atu i se isi atunuu, e paeonia ai. O nisi taimi, ou te taumānatu, ʻPo o saʻo laʻu filifiliga o loo faia?’” Ae ui i lea, sa filifili pea Kayla e siitia atu i se isi atunuu. Ua ia faapea mai: “Na fesoasoani le tele o taimi na ou tatalo ai iā Ieova, ma talanoaga ma uso ma tuafāfine taʻumatuaina, e iloa ai e faamanuia e Ieova le tagata e faia lana auaunaga ma le lotomalie.”

O se luʻi mo le isi toʻatele le aʻoaʻoina o se gagana fou. Na faapea mai Siobhan mai i Aialani: “Sa faigatā mo aʻu ona faamatala atu oʻu manatu i le gagana fou. Sa tatau ona ou aʻoaʻoina ina ia onosaʻi, tinoū e aʻoaʻoina le gagana, ma aua le popole tele pe a sasi saʻu faamatalaga e fai.” Ua faapea mai foʻi Anna mai Estonia: “O le taumafai e faamasani i le vevela o le tau, le pefu o le aai, ma le leai o ni vaivevela e tāʻeele ai, e lē mafai ona faatusalia i le faigatā o le aʻoaʻoina o le gagana Sepania. O le tele o taimi na ou lagona ai le fiu. Ae sa tatau ona ou aʻoaʻoina, ina ia uaʻi atu i mea lelei ua mafai ona ou ausia, nai lo o mea sesē na ou faia a o aʻoaʻoina le gagana.”

O le isi faigatā e lē tatau ona manatu māmā i ai, o le misia lea o aiga ma uō. Ua taʻutino mai Jonathan mai le Iunaite Setete e faapea: “E leʻi leva talu ona ou taunuu mai i inei, ae amata ona ou lagona le lotovaivai, ona o le nofo valavala ai ma aiga ma uō. Peitaʻi na mafai ona ou manumalo i na faalogona, e ala i le uaʻi atu i aʻu lava suʻesuʻega o le Tusi Paia, ma laʻu faiva. E leʻi umi lava, ae toe maua loʻu olioli ona o mea mataʻina na tutupu i le faiva i le fanua, faapea aʻu uō fou sa maua i le faapotopotoga.”

O le isi faigatā, o le tau faamasani lea i le tulaga o le soifuaga o se isi atunuu. Atonu o le a ese le olaga o le a iai i inā, mai i le olaga sa iai i lou atunuu. Ua faapea  mai Beau mai i Kanata: “I le taimi muamua, e te manatu māmā i le faaaogāina o le eletise ma le vai. Ae i le taimi lenei, e iai taimi e maua ai na mea, a o nisi taimi e lē maua ai.” E masani foʻi ona vaaia i le tele o atunuu tau atiaʻe le mativa, le tulaga faalētonu o auala o femalagaaʻiga, ma tagata e lē iloa faitau pe tusitusi. O le uaʻi atu i uiga lelei o tagata, na fesoasoani lenā iā Ines mai i Oseteria e feagai ai ma na tulaga. Ua ia faapea mai: “O i latou o ni tagata e talimālō, agamalu, lotofesoasoani, ma lotomaulalo. Ae sili atu i lenā, e latou te matuā naunau e aʻoaʻoina atili mea e faatatau i le Atua.”

ʻO SE FAAMANUIAGA SEʻIA OO INA MATUĀ TELE LAVA’

E ui ua faia e nei talavou o loo auauna i Ekutoa se faataulaga tele, ae ua latou iloa e saunia e Ieova mea “e matuā sili atu i lo o mea” na latou faatalitalia. (Efe. 3:20) O le mea moni, ua latou lagonaina lo latou maua ʻo se faamanuiaga seʻia oo ina matuā tele lava.’ (Mala. 3:10) O a latou faamatalaga nei e faatatau i la latou faiva:

Bruno: “Na amata laʻu auaunaga i Ekutoa i le nofoaga matagofie o le Amazon. Mulimuli ane, na ou fesoasoani i galuega o le toe faatelēina o le ofisa o le lālā i Ekutoa. O lea, ua ou auauna nei i le Peteli. A o iai i Italia, sa ou filifili ai e faamuamua Ieova i loʻu olaga, ma o le mea moni ua ia faataunuuina loʻu faanaunauga ina ia fiafia loʻu olaga a o faia laʻu auaunaga, ma ia eseese vala o lana auaunaga ou te galue ai.”

Beau: “Ua matuā sili atu ona vavalalata la ma faiā ma Ieova a o oʻu auauna ai i Ekutoa, ona ua mafai ona faaaluina le tele o loʻu taimi i gaoioiga faaleagaga. I le taimi e tasi, ua ou maua se isi faamanuiaga o le malaga lea i le tele o nofoaga mataʻina—o se mea ua leva ona ou moomoo i ai.”

Anna: “I le avea ai o se tuafafine nofofua, ou te leʻi mafaufau e mafai ona ou ola i se olaga e pei o se misionare. Ae o lea ua ou iloaina nei, e mafai lava ona tupu lenā tulaga. Ou te faafetaia Ieova ona o lana faamanuiaga, ua ou maua ai le fiafia i le faia o tagata ma soo, fausia Maota mo Sauniga, ma maua ni uō fou.”

Elke: “A o ou iai i loʻu atunuu o Oseteria, sa masani ona ou tatalo iā Ieova ina ia maua saʻu suʻesuʻega faale-Tusi Paia. Ae o lea ua 15 aʻu suʻesuʻega faale-Tusi Paia ua maua! Ou te lagona le matuā faamalieina i le vaaia o foliga fiafia o aʻu tagata suʻesuʻe o loo agaʻigaʻi i luma faaleagaga.”

Joel: “O se tulaga e fiafia ai le siitia atu i se isi atunuu, e auauna ai iā Ieova. E te aʻoaʻoina ai le faalagolago iā te ia i le tele o taimi, ma o se mea e faafiafiaina ai le vaaia o lana faamanuiaga i au taumafaiga! I laʻu tausaga muamua i inei talu ona ou siitia mai le Iunaite Setete, na faatupulaʻia ai le fuainumera o le ʻautalaʻi mai i le toʻa 6 i le toʻa 21, i le vaega o loo oʻu auauna ai nei. E toʻa 110 i latou na auai i le Faamanatuga.”

AE FAAPEFEA OE?

Uso e ma tuafāfine talavou, pe e mafai ona e auauna i se isi vaipanoa o loo telē ai le manaʻoga mo tagata talaʻi, a lē o lou lava atunuu, po o se isi foʻi atunuu? O le mea mautinoa, e manaʻomia ona fai lelei ni au fuafuaga, a o leʻi faia lenā filifiliga tāua. Ae sili atu i lenā, e manaʻomia ona malosi lou alofa mo Ieova ma tagata. Pe afai e iā te oe lenā alofa ma e mafai ona e siitia atu, ia tatalo atu iā Ieova e tusa ai o lou faanaunauga ina ia auauna i se isi atunuu. E lē gata i lea, ia talanoa i ou mātua ma toeaina i lau faapotopotoga e tusa ai o lou faanaunauga. Atonu foʻi o le a e filifili e mafai ona e auauna iā Ieova i lenā auala, lea e maua ai le fiafia ma le lotomalie.

[Faamatalaga faaopoopo i le itulau 3]

“Na fesoasoani le tele o taimi na ou tatalo ai iā Ieova, ma talanoaga ma uso ma tuafāfine taʻumatuaina, e iloa ai e faamanuia e Ieova le tagata e faia lana auaunaga ma le lotomalie.”—Kayla mai le Iunaite Setete

[Pusa/​Ata i le itulau 6]

Auala e sauniuni ai ina ia auauna i se isi vaipanoa

• Fai ma au masani le faia o au suʻesuʻega totino

• Toe iloilo La Tatou Faiva o le Malo o Aokuso 2011, i le itulau e 4-6

• Talatalanoa atu iā i latou sa auauna foʻi i isi atunuu

• Suʻesuʻe le aganuu ma le talafaasolopito o le atunuu

• Fai ni lesona e aʻoaʻoina ai le gagana fou

[Pusa/​Ata i le itulau 6]

O nisi o ē e auauna i isi atunuu e latou te tausia i latou lava i le itu tau tupe e ala i le . . .

• faigaluega mo ni nai masina i tausaga taʻitasi i o latou lava atunuu

• nofototogi isi tagata i o latou fale

• vaaia e se isi tagata a latou pisinisi

• faigaluega e ala i le faaaogāina o le Initaneti

[Ata i le itulau 4, 5]

1 Jaqueline mai Siamani

2 Bruno mai Italia

3 Beau mai Kanata

4 Siobhan mai Aialani

5 Joel mai le Iunaite Setete o Amerika

6 Jonathan mai le Iunaite Setete o Amerika

7 Anna mai Estonia

8 Elke mai Oseteria

9 Chantal mai Kanata

10 Ines mai Oseteria