Ia Gaoioi Pea e Pei o ni Tagatānuu o le Malo!

“Ia tusa a outou gaoioiga ma le tala lelei.”—FILI. 1:27.

O LE Ā LAU TALI?

O ai e mafai ona avea ma tagatānuu o le Malo o le Atua?

O le ā le uiga o le aʻoaʻoina o le gagana, talafaasolopito ma tulafono o le Malo?

E faapefea ona faaalia e tagatānuu o le Malo le fiafia i tapulaa a le Atua?

1, 2. Aiseā na iai se uiga faapitoa o le fautuaga a Paulo i le faapotopotoga i Filipi?

NA FAALAEIAU e Paulo le faapotopotoga i Filipi ia ʻtusa a latou gaoioiga ma le tala lelei.’ (Faitau le Filipi 1:27.) I le gagana Eleni, e uiga atu le upu “gaoioiga” i le “gaoioi pea e pei o ni tagatānuu.” Sa iai se uiga faapitoa o lenā faaupuga i le faapotopotoga i Filipi. Aiseā? E foliga mai o tagata Filipi, sa avea o ni tagatānuu Roma. Sa mitamita i le avea o i latou ma tagatānuu o Roma, auā sa faamanuiaina ma puipuia i latou i lalo o le tulafono a Roma.

² E iai se māfuaaga e sili atu ona tāua na mitamita ai sui o le faapotopotoga i Filipi. Na faamanatu atu e Paulo i Kerisiano faauuina, o i latou o tagatānuu “o le lagi.” O tagatānuu o le Malo o le Atua, lea e sili atu i lo o se isi lava malo faaletagata. (Fili. 3:20) O lea, ua latou maua ai le puipuiga ma faamanuiaga e sili atu.—Efe. 2:19-22.

3. (a) O ai e mauaina le avanoa e avea ai o ni tagatānuu o le Malo? (e) O le ā o le a tatou iloiloina i lenei mataupu?

³ O le fautuaga a Paulo ia “gaoioi pea e pei o ni tagatānuu,” o loo faasino patino atu i ē o le a pule ma Keriso i le lagi. (Fili. 3:20) E mafai foʻi ona faasino atu iā i latou o le a avea ma tagatānuu o le Malo o le Atua i le lalolagi. Aiseā? Ona o loo tatou auauna uma i le Tupu e toʻatasi o Ieova, ma e tutusa tapulaa o loo tatou ola ai. (Efe. 4:4-6) I aso nei, e taumafai tagata ina ia agavaa e avea ma tagatānuu o se atunuu e lelei le tamaoaiga. Maʻeu la le sili atu ona tāua o le avanoa e avea ai ma tagatānuu o le Malo. E faateleina lo tatou talisapaia o lenā faaeaga, e ala i le faatusatusa o agavaa e manaʻomia ina ia avea ai se tasi ma tagatānuu o se malo faaletagata, faapea  le Malo o le Atua. Seʻi o tatou iloiloina nei ni vala se tolu e tatau ona faia, pe afai e tatou te mananaʻo e faatumauina pea lenā faaeaga.

O AGAVAA E MANAʻOMIA

4. O le ā le gagana mamā, ma e faapefea ona tatou “tautatala” ai?

⁴ Aʻoaʻo le gagana. E manaʻomia e nisi malo mai i tagata o loo talosaga e avea o ni tagatānuu, ia tautatala i le gagana autū a le atunuu. E tusa po ua avea se tasi ma tagatānuu o se atunuu, ae e tele tausaga e taumafai ai pea e aʻoaʻoina le gagana fou. Atonu e vave ona latou malamalama i tulafono o le kalama, ae e ono umi se taimi e aʻoaʻoina ai le faaleoga saʻo o upu. I se tulaga talitutusa, e manaʻomia e le Malo o le Atua mai i ona tagatānuu, ona aʻoaʻoina le “gagana mamā.” (Faitau le Sefanaia 3:9.) O le ā lenā gagana? O le upu moni e faatatau i le Atua ma ana fuafuaga. E tatou te “tautatala” i le gagana mamā, pe a usiusitaʻi i tulafono ma mataupu silisili a le Atua. Atonu e vave ona aʻoaʻoina e tagatānuu o le Malo o le Atua aʻoaʻoga faavae o le Tusi Paia ma papatisoina. Peitaʻi, e tusa lava po ua uma ona papatiso, ae e tatau pea ona faaleleia atili le auala e “tautatala” ai i le gagana mamā. I le ā le itu? E manaʻomia e i tatou uma taʻitoʻatasi, ona ola e ōgatusa ma mataupu silisili o le Tusi Paia.

5. Aiseā e tatau ai ona tatou aʻoaʻoina le talafaasolopito o le faalapotopotoga a Ieova?

⁵ Suʻesuʻe le talafaasolopito. Atonu e tatau i se tagata o loo naunau e avea ma tagatānuu o se malo, ona aʻoaʻoina le talafaasolopito o lenā atunuu. E tatau foʻi i ē o loo naunau e avea ma tagatānuu o le Malo o le Atua, ona aʻoaʻoina le tele o mea e faatatau i lenā Malo. Seʻi manatu i le faaaʻoaʻoga a atalii o Koru, o ē na auauna i Isaraelu. Sa latou matuā fiafia e talanoa e faatatau iā Ierusalema, lona talafaasolopito, ma le nofoaga o le tapuaʻiga. Na sili atu lo latou maofa i le mea na faaatagia e le aai ma le nofoaga o le tapuaʻiga, nai lo o maa matagofie na fausia ai. Sa taʻua Ierusalema “o le taulaga o le Tupu Sili,” o Ieova, na avea ma nofoaga autū o le tapuaʻiga mamā, sa aʻoaʻoina ai Tulafono a Ieova. Sa faaalia e Ieova le alofa faamaoni i tagata sa i lalo o le pulega a le Tupu o Ierusalema. (Faitau le Salamo 48:1, 2, 9, 12, 13.) I le pei o atalii o Koru, po o iai sou faanaunauga e suʻesuʻe ma faamatala atu i isi le talafaasolopito, o le vaega i le lalolagi o le faalapotopotoga a Ieova? O le tele o mea e te aʻoaʻoina e faatatau i le faalapotopotoga a le Atua, ma le auala ua ia  lagolagoina ai ona tagata, o le tele foʻi lenā o lou mautinoa e faatatau i le Malo o le Atua. O le a faigofie ona faamalosia ai lou faanaunauga e talaʻi le tala lelei o le Malo.—Iere. 9:24; Luka 4:43.

6. Aiseā ua faatalitalia ai e Ieova i tatou, e aʻoaʻoina ma usitaʻia ana tulafono ma mataupu silisili?

⁶ Ia malamalama i tulafono. E faatalitalia e faigāmalo tagatānuu, e aʻoaʻoina ma usitaʻia tulafono o le atunuu. Ua talafeagai foʻi la ona faatalitalia e Ieova tagatānuu o lona Malo, e aʻoaʻoina ma usitaʻia ana tulafono ma mataupu silisili. (Isa. 2:3; Ioa. 15:10; 1 Ioa. 5:3) E iai faalētonu o tulafono e faia e tagata, ma e iai taimi e lē tonu ai, peitaʻi “e lelei atoatoa le tulafono a Ieova.” (Sala. 19:7) Pe e tatou te naunau i le tulafono a le Atua, ma faitauina i aso taʻitasi lana Afioga? (Sala. 1:1, 2) E taʻitasi le tagata ma ave lana lava avega, i le suʻesuʻeina o tulafono a le Atua.

E FIAFIA I TAPULAA A LE ATUA

7. Aiseā e usitaʻia ai e tagatānuu o le Malo tulafono a Ieova?

⁷ Ina ia avea pea o ni tagatānuu o le Malo, e tatau ona tatou iloaina tapulaa a le Atua ma fiafia i ai. E talitonu le toʻatele e saʻo tulafono ma tapulaa a atunuu o loo latou nonofo ai. Peitaʻi, e latou te solia se tulafono e faigatā ona usitaʻia, pe a lē iloa mai e se tasi. E latou te usitaʻia tulafono ona o le vaaiga a tagata. (Kolo. 3:22) E maualuluga tapulaa e ola ai tagatānuu o le Malo o le Atua. O lo tatou alolofa iā Ieova, e tatou te usitaʻia ai ma le fiafia ana tulafono, e tusa lava pe e lē iloa mai e se tasi.—Isa. 33:22; faitau le Luka 10:27.

8, 9. E faapefea ona iloa e te fiafia moni i tulafono a le Atua?

⁸ E faapefea ona iloa e te fiafia moni i tulafono a le Atua? Seʻi iloilo le auala e te tali atu ai pe a fautuaina oe, i se mataupu e fitoitonu iā te oe lava, e pei o lāʻei ma teuga. A o leʻi avea ma tagatānuu o le Malo, atonu sa e fiafia i ofu e lē onomea pe faatosina. Peitaʻi, a o tuputupu aʻe lou alofa mo le Atua, ua e iloa ai e tatau ona e lāʻei i se auala e faamamaluina ai o ia. (1 Timo. 2:9, 10; 1 Pete. 3:3, 4) Atonu ua e manatu i ou lāʻei ua onomea ma talafeagai. Ae faapefea pe a faapea atu se toeaina ua faatausuai nisi i le faapotopotoga ona o le auala o loo e lāʻei ai? Po o le a e ita, musuā ma tetee atu? O se tasi o tulafono faavae o le Malo o le Atua, o le faaaʻoaʻo lea o tagatānuu uma iā Keriso. (1 Pete. 2:21) Na tusi Paulo e faapea, “auā e oo lava i le Keriso, na te leʻi faafiafia i lona lava loto,” e faapena foʻi i tatou, ʻia taʻitasi ma faafiafia i lona tuaoi i le mea lelei, ina ia atiaʻe ai o ia.’ (Roma 15:2, 3) Ina ia tausia pea le filemu o le faapotopotoga, e tatau i se Kerisiano taʻumatuaina ona ʻalofia le faia o se mea e aafia ai lotofuatiaifo o isi, e ala i le lotomalie e gauaʻi atu.—Roma 14:19-21.

⁹ O le ā sou manatu e faatatau i feusuaʻiga ma faaipoipoga? Atonu e lē afāina i ē e leʻi avea ma tagatānuu o le Malo o le Atua, le tauatane, tauafafine, o ata ma faiga matagā tau feusuaʻiga, mulilua ma le tatalaina o faaipoipoga. Peitaʻi, e ese mai ai tagatānuu o le Malo o le Atua. E ui sa ola le toʻatele o Kerisiano i ni olaga lē mamā tau feusuaʻiga, ae ua latou iloa nei, o feusuaʻiga ma faaipoipoga o ni meaalofa mai i le Atua. E tāua iā i latou tapulaa maualuluga a Ieova, ma e talitonu, e lē tatau ona avea ma tagatānuu o le Malo i latou e faaauau pea ona faia amioga lē mamā. (1 Kori. 6:9-11) E latou te iloa foʻi o le loto e taufaaʻoleʻole. (Iere. 17:9) O lea, e latou te talisapaia ai lapataʻiga maʻoti,  lea e fesoasoani iā i latou e faatumauina ai pea tapulaa maualuluga tau amio.

E TALISAPAIA LAPATAʻIGA

10, 11. (a) O ā lapataʻiga ua aumaia e le Malo o le Atua? (e) O le ā sou manatu e faatatau i na lapataʻiga?

¹⁰ E iai taimi e aumaia ai e faigāmalo lapataʻiga e faatatau i meataumafa ma vailaau faafomaʻi. E lē leaga meaʻai ma vailaau uma, ae pe a aafia ai ola o tagata, ona aumaia lea e le malo o ni lapataʻiga e puipuia ai tagatānuu. A lē faia faapea, o lona uiga ua latou faatalalē i lo latou tiute tauave. Ua faapena foʻi ona aumaia e le Malo o le Atua lapataʻiga, e faatatau i lamatiaga e ono aafia ai lo tatou itu faaleagaga ma amioga. O se faaaʻoaʻoga, o le Initaneti o se tasi o auala aogā e fesootaʻi ai, e maua ai faamatalaga tauaʻoaʻoga, ma faafiafiaga. E faaaogā tatau e le faalapotopotoga a le Atua le Initaneti, ma e tele mea lelei ua mafai ona faataunuuina ai. Peitaʻi, o le tele o tuatusi i le Initaneti, ua lamatia ai le itu faaleagaga ma amioga. O tuatusi ua faaalia ai ata ma faiga matagā tau feusuaʻiga, e afāina ai le tulaga faaleagaga o tagatānuu o le Malo. Ua loa ona lapataʻia i tatou e le vasega o le pologa faamaoni e faatatau i nei tuatusi i le Initaneti. Maʻeu lo tatou lotofaafetai mo na lapataʻiga.

¹¹ Ua faaaogāina foʻi e le toʻatele tuatusi i le Initaneti e faauō ai ma isi, ma e aogā pe a faaaogāina ma le atamai. Peitaʻi, e mafai e nei tuatusi ona faaleagaina ai i tatou, ma e ono taaʻina ai se tasi e faifaimea faatasi ma aumea leaga. (1 Kori. 15:33) E lētioa aumaia e le faalapotopotoga a le Atua lapataʻiga talafeagai, i le faaaogāina o na tuatusi. Po ua e faitau i lomiga mai i le pologa faamaoni, e faatatau i le faaaogāina o tuatusi i le Initaneti e faauō ai ma isi? E aogā foʻi telefoni feaveaʻi, pe a faaaogā tatau. Pe na e faitauina lomiga o loo aumaia ai fautuaga e faatatau i le faaaogāina o telefoni feaveaʻi? O se gaoioiga lē atamai le faaaogāina o na tuatusi faapea ma telefoni feaveaʻi, e aunoa ma le faitauina o na mataupu! * E tutusa lenā ma le faaaogāina o se vailaau faafomaʻi, e aunoa ma le faitauina o faatonuga.

12. Aiseā e lē atamai ai le lē amanaʻia o lapataʻiga?

¹² O le lē amanaʻia e se tasi o lapataʻiga mai le pologa faamaoni, e oo ai o ia i mafatiaga faapea foʻi ē pele iā te ia. Atonu ua fai ma masaniga a nisi le matamata i ata matagā tau feusuaʻiga, ma faia amioga lē mamā, ma ua latou manatu e lē o silafia mai e Ieova. Pagā le sesē o lenei manatu, e lē o silasila mai Ieova i a tatou amioga o loo fai. (Faata. 15:3; faitau le Eperu 4:13.) O le alofa mutimutivale o Ieova ua ia faaaogā ai toeaina e fesoasoani iā i latou. (Kala. 6:1) E faalēaogāina e se malo le avea o se tasi ma ona tagatānuu pe a faia ni gaoioiga lē talafeagai. E faalēaogāina foʻi e Ieova le avea o se tasi ma tagatānuu o le Malo, pe afai e solia ma le loto iai Ana tapulaa. * (1 Kori. 5:11-13) Ae e mafai e  i latou e faaalia le salamō ma suia le auala e ola ai, ona maua se faiā lelei ma Ieova, ma avea pea ma tagatānuu o le Malo. (2 Kori. 2:5-8) O se faaeaga le auauna i se Tupu alofa.

IA FAATĀUA AʻOAʻOGA

13. Ua faapefea ona faatāua e tagatānuu o le Malo aʻoaʻoga?

¹³ E taumafai malosi le tele o faigāmalo e aʻoaʻoina o latou tagatānuu. E latou te faatulagaina aʻoga e aʻoaʻo ai le faitau ma le tusitusi, faapea aʻoga e aʻoaʻo ai tomai faapitoa. E talisapaia e tagatānuu o le Malo o le Atua na aʻoaʻoga. Peitaʻi, e sili atu ona tāua iā i latou aʻoaʻoga mai le faalapotopotoga a Ieova. O se faataʻitaʻiga, ua uunaʻia i tatou e aʻoaʻo le faitau ma le tusitusi, ua faalaeiauina foʻi mātua e faitau atu i a latou fanau a o lāiti. Ua saunia mai e le pologa faamaoni faamatalaga faale-Tusi e ala i Le Olomatamata ma le Ala Mai! E tatou te maua aogā mai aʻoaʻoga ua saunia e Ieova, pe a tatou faitauina i aso taʻitasi itulau o na lomiga.

14. (a) O ā toleniga ua tatou mauaina? (e) O ā fautuaga mo le Tapuaʻiga a le Aiga ua e faatatauina?

¹⁴ E maua e tagatānuu o le Malo i vaiaso taʻitasi aʻoaʻoga ma toleniga mai sauniga a le faapotopotoga. O se faaaʻoaʻoga, ua silia ma le ono sefulu tausaga o fesoasoani le Aʻoga o le Faiva Faatiokarate i tagata aʻoga, ina ia avea o ni faiaʻoga uigā o le Afioga a le Atua. Po ua e auai i lea aʻoga? Ua matuā faatāuaina foʻi e le pologa faamaoni, le faia o Tapuaʻiga a le Aiga i vaiaso taʻitasi mo le faamalosia ai o aiga. Po ua e faatatauina fautuaga o loo aumaia i a tatou lomiga? *

15. O le ā le faaeaga sili ua iā i tatou?

¹⁵ E faia e tagatānuu o malo gaoioiga e faatosina ai tagata e lagolagoina se vaega faaupufai, ma oo ai lava i le ō atu i fale o aiga. Ae o tagatānuu o le Malo o le Atua, e latou te lagolagoina malosi lenā Malo, e ala i le molimau atu i alatetele faapea foʻi mai lea fale i lea fale. E pei ona taʻua i le mataupu ua mavae atu, o Le Olomatamata lea e faasilasilaina ai le Malo o Ieova, o le lomiga lea ua sili ona tele lona tufatufaina atu i le lalolagi aoao. O se faaeaga sili mo i tatou, le faailoa atu lea i isi o le Malo o le Atua. Po o e auai ma le maelega i le galuega talaʻi?—Mata. 28:19, 20.

16. E faapefea ona e faamaonia atu o oe o se tagatānuu lelei o le Malo o le Atua?

¹⁶ Ua toe o se aga ona pulea lea e le Malo o le Atua le lalolagi atoa. O le a pulea tagata uma e tulafono o le Malo o le Atua. I lenā taimi, po o le a avea oe o se tagatānuu lelei o le Malo o le Atua? O le taimi lenei e tatau ona amata ai. Ia faamaonia atu o loo e gaoioi e pei o se tagatānuu o le Malo o le Atua, e ala i le faia o filifiliga e faamamaluina ai Ieova.—1 Kori. 10:31.

[Faaopoopoga i lalo]

[Fesili mo le Suʻesuʻega]

[Faamatalaga faaopoopo i le itulau 14]

Po o e utagiaina lapataʻiga mai i le Tusi Paia e faatatau i le Initaneti?

[Ata i le itulau 12]

I le pei o atalii o Koru, pe e te faaalia le naunau i le tapuaʻiga mamā ma lona talafaasolopito?

[Ata i le itulau 15]

E fesoasoani le Tapuaʻiga a le Aiga, i le avea oe ma ē pele iā te oe o ni tagatānuu lelei o le Malo