Pe E te Manatua?

Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

Pe na maua e Samasoni le malosi mai i lona lauulu?

E lē o le lauulu o Samasoni na ia maua ai le malosi. I le avea ai o se Naseri, sa avea lona lauulu o se faailoga o lana faiā faapitoa ma Ieova. Sa matuā aafia lenā faiā, ina ua ʻoti le lauulu o Samasoni.—4/15, itulau e 9.

O ā vala e tolu e mafai ona iai ni aafiaga lelei i o tatou fatu faafaatusa?

(1) Meaʻai paleni. E manaʻomia ona tatou faamautinoa o loo lava a tatou meaʻai faaleagaga, e pei lava ona manaʻomia e o tatou fatu meaʻai paleni. (2) Faamalositino. E mafai ona faatumauina o tatou loto i se tulaga lelei, pe a tatou maelega i le faiva. (3) Siʻomaga. E mafai ona faaitiitia le tulaga pagatia, pe a auaufaatasi ma o tatou uso talitonu, o ē o loo manatu mamafa iā i tatou.—4/15, itulau e 16.

E mafai faapefea e se ulugalii faaipoipo ona toe atiaʻe le maufaatuatuaina, pe afai ua lē faamaoni se tasi o i laʻua?

E tatau ona (1) faamaoni le tasi i le isi; (2) galulue faatasi; (3) suia masaniga tuai i masaniga fou; ma le (4) ia iloa le taimi e faagalo ai mea ua tuanaʻi.—5/1, itulau e 12-15.

Pe a faia se lauga o se maliu, aiseā e lē mafai ai ona faatatau atu le Salamo 116:15 i lē ua maliu?

Ua faapea mai le mau: “E tautele i le silafaga a Ieova le oti o ona tagata faamaoni.” O loo uiga atu lenā fuaitau i le lē faatagaina e le Atua o le maliliu o ana auauna faamaoni uma, ona e tautele i latou i lana silafaga. O le a ia lē faatagaina le faaumatiaina atoatoa o ana auauna faamaoni uma i le lalolagi.—5/15, itulau e 22.

O ai i latou na taʻua o colporteur?

A o leʻi oo i le tausaga e 1931, na faasino atu le upu “colporteur” iā i latou ua taʻua nei o paeonia.—5/15, itulau e 31.

O ā ni vala e faamaonia ai o le Tusi Paia, e lē tau o se tusi na tusia e tagata lava ia?

O loo iai le tele o valoaga ua faataunuuina. E saʻo aʻiaʻi talafaasolopito o loo faamauina ai. E saʻo aʻiaʻi e tusa ma le faafomaʻi, ma e autasi tusi o loo iai. O loo aogā foʻi i aso nei.—6/1, itulau e 4-8.

E tusa ai ma le Tanielu 2:44, o ai ua faia aʻe ai nei “malo uma”?

O loo faasino atu i malo o loo faaātaina mai e vaega eseese o le faatagata, e pei ona faamatalaina e Tanielu.—6/15, itulau e 17.

O anafea na avea ai le Malo Malosi o Peretania ma Amerika, ma malo malosi lona fitu o le lalolagi e tusa ai ma valoaga a le Tusi Paia?

Na tulaʻi mai lenei malo malosi o le lalolagi, ina ua galulue faatasi Peretania ma le Iunaite Setete i se auala faapitoa, a o faagasolo le Taua Muamua a le Lalolagi.—6/15, itulau e 19.

E faapefea ona faamagalo ma faagalo e le Atua agasala a i latou ua salamō?

O le fetalaiga lenei a Ieova e faatatau iā i latou e finagalo malie i ai: “Ou te lē toe manatuaina a latou agasala.” (Iere. 31:34) E mafai ona ia faamagaloina agasala e ala i le togiola. Pe a faamagalo e Ieova a tatou agasala, e lē taitai ona ia manatua na agasala ina ia toe faasala ai i tatou i le lumanaʻi.—7/1, itulau e 18.

Aiseā e tatou te talitonuina ai vavega o loo taʻua i le Tusi Paia?

E masani ona faatino na vavega i nofoaga faitele, ae lē faia faalilolilo. E leʻi faigatā le auala na faatino ai, ma e leʻi faaaogā ai ni faiga faamaneta. Na faatino ina ia viia ai le Atua ae lē o tagata. E tele ituaiga o vavega na faatinoina, ma e leʻi fesiligia e tagata tetee i na taimi le tutupu moni lava o vavega na latou vaaia. O māfuaaga nei e tatou te maufaatuatuaina ai vavega o loo faamauina i le Tusi Paia.—8/1, itulau e 7-8.