Aʻoga Faatiokarate—Faamaoniga o le Alofa o Ieova

O IEOVA o lo tatou “Aʻoaʻo Sili.” (Isa. 30:20) O le alofa ua uunaʻia ai o ia e aʻoaʻoina isi. O se faataʻitaʻiga, o le alofa loloto o Ieova na ia faailoa atu ai iā Iesu “mea uma ua ia faia.” (Ioa. 5:20) O le alofa foʻi o Ieova mo i tatou, ua ia tuuina mai ai se ʻlaulaufaiva ua aʻoaʻoina,’ ina ia faamamalu ai o ia ma fesoasoani ai i isi.—Isa. 50:4.

O le faataʻitaʻi i le alofa o Ieova, ua faaaogā ai e le Komiti Tauaʻoaʻoga a le Vaega Pule, ni aʻoga se sefulu e toleni ai i latou e faanaunau ma agavaa e auai. Pe e te vaai i nei aʻoga o se faamaoniga o le alofa o Ieova?

O lea, seʻi o tatou autalu nisi o faamatalaga e faatatau i nei aʻoga, faapea manatu a nisi o i latou na auai ai. Ia fesili ifo le tagata lava ia, ʻE faapefea ona ou maua aogā mai nei aʻoaʻoga a Ieova?’

 AOGĀ O AʻOAʻOGA A IEOVA

Ona o Ieova ʻo se Atua alofa,’ ua ia saunia ai ni toleniga e aogā i o tatou olaga, fesagaʻia ai luʻitau, ma maua ai le olioli i le faiva. (2 Kori. 13:11) E pei o soo o Keriso i le uluaʻi senituri, ua faaauupegaina i tatou e fesoasoani i isi, ma “aʻoaʻoina i latou ia tausia mea uma” ua poloaʻiina ai i tatou.—Mata. 28:20.

E ui e lē mafai ona tatou auai i nei aʻoga uma, peitaʻi e mafai ona tatou maua aogā mai nisi o nei aʻoaʻoga. E mafai foʻi ona tatou faatatau taʻiala faale-Tusi Paia mai aʻoaʻoga e mafai ona tatou auai ai. E faaleleia atili foʻi la tatou faiva, e ala i le galulue faatasi ma i latou ua aʻoaʻoina lelei e Ieova.

Ia fesili ifo iā te oe lava, ʻPe mafai ona ou aapa atu ma auai i nisi o nei aʻoga?’

O se faaeaga i auauna a Ieova le auai ma le lagolagoina o nei aʻoaʻoga tāua. O lea, ia faamalosia e nei aʻoaʻoga lau faiā ma Ieova, ma faaauupegaina oe e faataunuu ou faaeaga, aemaise le talaʻia o le tala lelei.

[Ata i le itulau 13]

ILOILOINA NISI O AʻOAʻOGA FAATIOKARATE

Aʻoga o le Faiva Faatiokarate

Fuafuaga: Ia toleni ai tagata talaʻi ina ia avea ma faiaʻoga agavaa ma uigā o le tala lelei.

Le Umi: Faaauau pea.

Nofoaga: Maota mo Sauniga. Agavaa: O ē ua auaumea faatasi ma le faapotopotoga, talia aʻoaʻoga o le Tusi Paia, ma ola e tusa ai ma mataupu silisili faa-Kerisiano.

Le Auala e Talosaga ai: Talanoa i le ovasia o le Aʻoga o le Faiva Faatiokarate.

Na faapea mai Sharon, o lē na pē lona tino i le amyotrophic lateral sclerosis (ALS): “Na toleniina aʻu e le Aʻoga o le Faiva Faatiokarate i le auala e suʻesuʻe ai se mataupu, ma faia ai se lauga i se auala e sologa lelei. Na aʻoaʻoina ai foʻi aʻu e tatau ona taulaʻi atu i manaʻoga faaleagaga o isi, nai lo o oʻu lava manaʻoga.”

Na faapea mai Arnie, o sē ua loa tausaga o avea ma ovasia asiasi: “A o oʻu tuputupu aʻe, sa fesasiaʻi laʻu tautala ma e faigatā ona ou vaai saʻo i isi pe a talanoa. Peitaʻi, na fesoasoani lenei aʻoga iā te aʻu e maua ai le toʻa ma iloa e iai loʻu aogā. O lenei aʻoga na toleni ai aʻu e Ieova, i le auala e faaaogā ai mānavaga talafeagai. Ou te faafetai ona o le avanoa ua mafai ona ou vivii ai iā Ieova, i le faapotopotoga ma laʻu auaunaga.”

 Le Aʻoga e Ulufale ai i Peteli

Fuafuaga: Ia fesoasoani i tagata fou e taulau i la latou auaunaga i le Peteli.

Le Umi: 45 minute i vaiaso taʻitasi, mo le sefulu ono vaiaso. Nofoaga: Peteli.

Agavaa: E tatau ona avea ma sui nofo mau i le aiga Peteli pe e tauofo mo se taimi umi lē tumau, mo le tasi le tausaga pe e sili atu.

Le Auala e Talosaga ai: E otometi lava ona auai sui fou o le Peteli.

Na faapea mai Demetrius, o lē na auai i lea aʻoga i le vaitau o le 1980: “Na faaleleia e lea aʻoga le auala e faia ai aʻu suʻesuʻega totino, ma sauniunia ai aʻu mo le olaga i le Peteli. O faiaʻoga, mataupu sa fai le aʻoga, ma fautuaga aogā, na ou iloa ai o le finagalo o Ieova ia ou taulau manuia i laʻu auaunaga i Peteli.”

Na faapea mai Kaitlyn: “Na fesoasoani iā te aʻu e iloa o le mea e sili ona tāua, o le malosi i le itu faaleagaga. Na fesoasoani foʻi iā te aʻu e faateleina ai loʻu talisapaia mo Ieova, lona maota, ma lana faalapotopotoga.”

Aʻoga o le Faiva o le Malo

Fuafuaga: Ina ia toleni ai ovasia femalagaaʻi, toeaina, ma auauna o le faiva i nisi taimi, ina ia tausia lelei o latou tiute tauave i le faapotopotoga. (Galu. 20:28) E talanoaina ai mea tutupu i le vaipanoa ma manaʻoga o faapotopotoga. E faia lenei aʻoga pe a mavae ni nai tausaga e pei ona fuafuaina e le Vaega Pule.

Le Umi: Na faia i tausaga talu ai nei mo ovasia femalagaaʻi mo le lua aso po o le lua ma le ʻafa aso. E tasi ma le ʻafa aso mo toeaina, ae tasi le aso mo auauna o le faiva.

Nofoaga: E masani lava ona faia i se Maota mo Sauniga po o le Maota mo Fonotaga.

Agavaa: E tatau ona avea o se ovasia femalagaaʻi, toeaina po o se auauna o le faiva.

Le Auala e Talosaga ai: E valaaulia e le ovasia matagaluega toeaina ma auauna o le faiva. Ae valaaulia e le ofisa o le lālā ovasia femalagaaʻi.

Na taʻua e Quinn (taumatau): “E ui i le tele o faamatalaga na maua mai lea aʻoga i se taimi puupuu, ae na fesoasoani i toeaina e maua ai pea le olioli, ma faaauau pea ona faia ʻfaatamatane’ le auaunaga iā Ieova. E tusa lava po o le ā le umi talu ona avea se tasi ma toeaina, e fesoasoani le toleniga e ʻautasi’ ai o latou manatu, ma avea ai o ni leoleo mamoe lelei.”

Na faapea mai Michael: “Na faamalosia e lenei toleniga loʻu itu faaleagaga, ma malamalama ai i lapataʻiga e faatatau i lamatiaga. Na aumaia ai foʻi taʻiala i auala e leoleoina ai le lafu. Maʻeu le agalelei o Ieova i lona fesoasoani mai iā i matou.”

 Aʻoga mo le Auaunaga Paeonia

Fuafuaga: Ina ia fesoasoani i paeonia e “faataunuu atoatoa la latou faiva.”—2 Timo. 4:5.

Le Umi: Lua vaiaso.

Nofoaga: E filifilia e le ofisa o le lālā; e masani lava o se Maota mo Sauniga.

Agavaa: O ē ua tasi le tausaga pe sili atu foʻi o avea ma paeonia sauatoa. *

Le Auala e Talosaga ai: E otometi lava le auai o paeonia ua agavaa, ma e logo atu e le ovasia matagaluega.

Na faapea mai Lily (ata i le itu taumatau): “Na fesoasoani lenei aʻoga i le auala ou te fesagaʻia ai faafitauli i laʻu auaunaga ma loʻu olaga. Na faaleleia le auala e faia ai aʻu suʻesuʻega, aʻoaʻo atu ai, ma faaaogā ai le Tusi Paia. Na lava saunia ai aʻu e fesoasoani atu i isi, lagolagosua i toeaina, ma saosaolaumea i le tuputupu aʻe o le faapotopotoga.”

Na taʻua e Brenda o lē na auai faalua i lea aʻoga: “Na fesoasoani iā te aʻu e faia soʻu sao atoatoa i le auaunaga, toleniina atili ai loʻu lotofuatiaifo, ma uaʻi i le fesoasoani atu i isi. E ese le agalelei o Ieova.”

Aʻoga mo Toeaina o le Faapotopotoga

Fuafuaga: E fesoasoani i toeaina i le taulimaina o o latou tiute tauave i le faapotopotoga. E lē gata i lea, ia malamalama atili i mea e manaʻomia mo le tapuaʻiga iā Ieova.

Le Umi: Lima aso.

Nofoaga: E filifilia e le ofisa o le lālā se Maota mo Sauniga po o se Maota mo Fonotaga.

Agavaa: E tatau ona avea ma toeaina.

Le Auala e Talosaga ai: E valaaulia e le ofisa o le lālā toeaina agavaa.

O manatu o nisi na auai i le vasega lona 92 na faia i le Iunaite Setete:

“E tele aogā na ou maua mai lenei aʻoga. Na fesoasoani e faaleleia ai oʻu uiga, faapea le auala ou te tausia ai mamoe a Ieova.”

“Ua ou lava sauni e faaaogā le Tusi Paia e fesoasoani ai i isi.”

“O le a aogā lenei toleniga i loʻu olaga atoa.”

Aʻoga mo Ovasia Femalagaaʻi ma a Latou Avā

Fuafuaga: E fesoasoani i ovasia matagaluega ma ovasia itumalo ina ia faaleleia atili o latou tomai e auauna ai i faapotopotoga, a o “galulue mamafa i le upu ma le aʻoaʻo atu.”—1 Timo. 5:17; 1 Pete. 5:2, 3.

Le Umi: Lua masina.

Nofoaga: E filifilia e le ofisa o le lālā.

Agavaa: E tatau ona avea o se ovasia matagaluega po o se ovasia itumalo.

Le Auala e Talosaga ai: E valaaulia e le ofisa o le lālā ovasia femalagaaʻi ma a latou avā.

Na faapea mai Ioelu, o lē na auai i le vasega muamua i le 1999: “Na faateleina ai lo matou talisapaia o le auala o loo taʻitaʻia ai e Iesu le faalapotopotoga. Na iloa ai le tāua o le faalaeiauina o le ʻauuso o loo matou auauna i ai, ma faamalosia ai le autasi i faapotopotoga. Na toe faamanatu mai, e ui e avatu e le ovasia femalagaaʻi fautuaga ma faasaʻoga, ae o le sini autū ia iloa e uso, o loo alofa mai Ieova iā i latou.”

 Aʻoga Faale-Tusi Paia mo Uso Nofofua

Fuafuaga: Ina ia sauniuni ai toeaina ma auauna o le faiva e leʻi faaipoipo mo nisi tofiga faaopoopo i le faalapotopotoga a Ieova. O le toʻatele o ē e faauu o le a tofia e galulue i oganuu o manaʻomia ai se fesoasoani i o latou lava atunuu. E toʻaitiiti e mafai ona tofia i isi atunuu pe a talafeagai ma o latou tulaga. O isi o le ʻaufaauu e mafai ona tofia o ni paeonia faapito lē tumau i oganuu maotua.

Le Umi: Lua Masina.

Nofoaga: E filifilia e le ofisa o le lālā; e masani lava o se Maota mo Fonotaga po o se Maota mo Sauniga.

Agavaa: O uso nofofua e i le va o le 23 i le 62 tausaga o loo lelei le soifua mālōlōina, ma e naunau e auauna i nofoaga o loo telē ai le manaʻoga. (Mare. 10:29, 30) E tatau ona paeonia sauatoa ia lē itiiti ifo i le lua tausaga. E lē gata i lea, ia lē itiiti ifo i le lua tausaga sosoo o auauna o se toeaina, po o se auauna o le faiva.

Le Auala e Talosaga ai: E maua faamatalaga i se fono e faia i le taimi o le fonotaga matagaluega, mo i latou e fia auai.

Na faapea mai Rick o lē na auai i le vasega lona 23 i le Iunaite Setete: “Na fesoasoani le agaga paia e faia ni suiga tetele i loʻu olaga, ina ua ou matuā uaʻi i mataupu sa fai i le aʻoga. Pe a tuuina mai e Ieova se faaeaga, e na te lagolagoina i tatou a o faataunuuina. Na aʻoaʻoina ai aʻu e uaʻi i le faia o le finagalo o Ieova nai lo o le uaʻi iā te aʻu lava, ma o le a ia faamalosia aʻu.”

Na faapea mai Andreas, lea o loo galue i Siamani i le taimi lenei: “Na ou manatu e pei o se vavega le auala o loo faagaoioi ai le faalapotopotoga a Ieova i aso nei. Na sauniunia aʻu e le toleniga mo se galuega tele. E lē gata i lea, na ou aʻoaʻoina mai i faaaʻoaʻoga a le Tusi Paia le mea moni lenei: O le auauna i oʻu uso ma Ieova, e maua ai le fiafia moni.”

Aʻoga Faale-Tusi Paia mo Ulugalii Kerisiano

Fuafuaga: Ia toleni faapitoa ai ulugalii faaipoipo ina ia aogā atili iā Ieova ma lana faalapotopotoga. O le toʻatele o le ʻaufaauu, o le a tofia e auauna i o latou lava atunuu i vaega o loo manaʻomia tele ai le fesoasoani. O isi e mafai ona tofia i isi atunuu, pe a talafeagai ma o latou tulaga. Ae o isi e mafai ona tofia o ni paeonia faapito lē tumau, i oganuu maotua.

Le Umi: Lua Masina.

Nofoaga: E faia lenei aʻoga i le Iunaite Setete, ma e amata atu iā Setema 2012, o le a faia i atunuu ua filifilia, ma e masani ona fai i se Maota mo Fonotaga po o se Maota mo Sauniga.

Agavaa: O ulugalii faaipoipo e i le va o le 25 i le 50 tausaga e lelei le soifua mālōlōina, e mafai ona auauna i so o se mea lava e manaʻomia ai, ma lotomalilie e faataunuu le mau lenei: “O aʻu lenei! Inā auina atu ia aʻu.” (Isa. 6:8) E tatau foʻi ona sili atu i le lua tausaga talu ona faaipoipo, ma auauna faataimi atoa e lē itiiti ifo ma le lua tausaga sosoo. E lē gata i lea, ia lē itiiti ifo i le lua tausaga sosoo o auauna le tane o se toeaina, po o se auauna o le faiva.

Le Auala e Talosaga ai: E maua faamatalaga i se fono e faia i le taimi o le tauaofiaga itumalo, mo i latou e fia auai. Afai e leai se fono e faia i tauaofiaga i lou atunuu, ae o loo e naunau e talosaga mo lea aʻoga, ia tusi atu i le ofisa o le lālā mo nisi faamatalaga.

Na faapea mai Elika ma Korina (taumatau), lea na auai i le vasega muamua i le 2011: “Maʻeu se suiga na maua mai i lea valu vaiaso, ma o se avanoa lelei mo ulugalii o loo naunau e faatele so latou sao i le auaunaga iā Ieova. Ua ma maumauaʻi e iai se vaaiga paleni i le olaga, ma faaaogā tatau le taimi.”

Aʻoga Faale-Tusi Paia a le Olomatamata o Kiliata

Fuafuaga: Ina ia toleniina le ʻauaʻoʻoga e galulue o ni misionare i oganuu e toʻatele tagata e nonofo ai, ia avea o ni ovasia femalagaaʻi, pe avea foʻi ma tagata Peteli. O le manulauti, ia faamalosia ma faamaopoopo le galuega talaʻi ma ofisa o lālā.

Le Umi: Lima masina.

Nofoaga: Nofoaga mo Aʻoaʻoga a le Olomatamata i Patterson i Niu Ioka, i le Iunaite Setete o Amerika.

Agavaa: O ulugalii faaipoipo o loo auauna i vala o le auaunaga faapitoa faataimi atoa, e pei o misionare e leʻi auai i le aʻoga, paeonia faapito, ovasia femalagaaʻi po o sui o le aiga Peteli. Sa auauna faatasi e lē itiiti ifo i le tolu tausaga sosoo. E tatau ona lelei le tautala, faitau, ma le tusitusi i le gagana faa-Peretania.

Le Auala e Talosaga ai: E valaaulia e le Komiti o le Lālā ulugalii ina ia talosaga.

Ua auauna i le taimi lenei i Aferika, Lade ma Monique mai le Iunaite Setete. Na faapea mai Lade: “Na sauniunia e le Aʻoga i Kiliata i maʻua ina ia mafai ona ō atu i so o se vaega o le lalolagi, ma auauna faatasi ai ma uso ma tuafāfine peleina.”

Na faaopoopo mai Monique: “Na ou maua le fiafia i laʻu auaunaga, a o oʻu faatatauina mea na ou aʻoaʻoina mai le Afioga a le Atua. O le fiafia na ou maua, o se faamaoniga lenā o le alofa o Ieova.”

Aʻoga mo Sui o Komiti o Lālā ma a Latou Avā

Fuafuaga: E fesoasoani iā i latou o loo auauna i Komiti o Lālā, ina ia vaavaaia lelei le tausiga o aiga Peteli, uaʻi atu i mataupu o le auaunaga e aafia ai faapotopotoga, ma le vaavaaia o matagaluega ma itumalo i a latou oganuu, faapea galuega faaliliu, lolomia o tusi, ma le felaʻuaʻiga o lomiga.

Le Umi: Lua masina.

Nofoaga: Nofoaga mo Aʻoaʻoga a le Olomatamata i Patterson i Niu Ioka, i le Iunaite Setete o Amerika.

Agavaa: E tatau ona avea ma sui o le Komiti o le Lālā po o se sui o le Komiti o le Atunuu, po o se tasi o le a avea ma sui o na komiti.

Le Auala e Talosaga ai: E valaaulia e le Vaega Pule uso ma a latou avā.

O loo auauna nei Lowell ma Cara mai le vasega lona 25 i Nigeria. Na faapea mai Lowell: “Na faamanatu mai iā te aʻu, e tusa po o le ā le tele o galuega, ma ituaiga galuega e tuuina mai, ae o le fai o mea i le auala a Ieova, e faafiafiaina ai lona finagalo. Na faamatilatila foʻi i le aʻoga le tāua ona faataʻitaʻi iā Ieova, i le faaalia o le alofa i ana auauna.”

Na faaopoopo mai Cara: “O se tasi nei o manatu na ou manatunatu ai: Pe afai e lē mafai ona ou faamatala le mataupu i se auala faigofie, e tatau ona ou matuā suʻesuʻe muamua, ae ou te leʻi taumafai e aʻoaʻoina isi.”

[Faaopoopoga i lalo]