Filemu i le Afe Tausaga E oo i le Faavavau
Filemu i le Afe Tausaga E oo i le Faavavau
“Ina ia pule aoao le Atua i le aoao o mea.”—1 KORI. 15:28.
PE E MAFAI ONA E FAAMATALA?
O le ā se aafiaga o le faataunuuga o mau nei iā te oe?
1. O le ā le faamoemoe o loo tulimataʻia e le “motu o tagata e toʻatele”?
SEʻI mafaufau i mea matagofie o le a faia e se faigāmalo malosi i le lumanaʻi. O le a pule lona tupu ma le faamasinotonu ma agalelei, mo le afe tausaga. E tele mea mataʻina o loo tulimataʻia e le “motu o tagata e toʻatele,” pe a sao mai le “puapuaga tele.” O le a aumaia e le puapuaga tele le iʻuga i lenei faiga leaga o mea.—Faaa. 7:9, 14.
2. O le ā ua tofo i ai le fanau a tagata a o faagasolo le 6,000 tausaga ua mavae?
2 A o faagasolo le 6,000 tausaga ua mavae, e na o tigā ma mafatiaga ua aumaia e pulega faaletagata. Ua loa ona taʻua i le Tusi Paia: “Ua pule le tagata i le isi tagata ma ua matuā afāina ai o ia.” (Fai. 8:9) O le ā ua tatou vaaia i le lalolagi i aso nei? Ua faateteleina taua, fouvalega, le mativa, suiga tetele i le tau, le faaleagaina o le siʻosiʻomaga ma le tele o isi faafitauli. O lea, ua lapataʻia ai e taʻitaʻi o malo tagata lautele, a lē faia ni suiga i le taimi lenei, o le a oo le lalolagi i se tulaga malapagā.
3. O le ā o le a tupu i le Pulega o le Afe Tausaga?
3 E ala i le Malo o le Atua, o le a toe faafoʻisia e Iesu Keriso le Tupu faa-Mesia ma ē o le a latou pule faatasi, tagata ma le lalolagi i se tulaga lelei atoatoa. I le Pulega o le Afe Tausaga, o le a faataunuu ai le folafolaga faamāfanafanaloto a Ieova o loo i le Isaia 65:17, “o loo oʻu faia le lagi fou ma le lalolagi fou, e lē toe manatua mea sa iai muamua, e lē toe alu aʻe foʻi i le loto.” O ā mea matagofie o le a tutupu i le lumanaʻi? Ua fesoasoani valoaga a le Tusi Paia iā i tatou, e malamalama ai i nei mea matagofie, e ui lava “e lē vaaia” i le taimi lenei ae faataunuuina lava.—2 Kori. 4:18.
ʻFAUSIA FALE MA TOTŌ TOGĀVINE’
4. O le ā se tasi o faafitauli taatele ua fesagaʻia e tagata i aso nei?
4 E mananaʻo tagata uma e maua ni fale lelei, peitaʻi, o se faafitauli taatele i aso nei le lē lelei o fale e nonofo ai. O le toʻatele ua nonofo i aai tumutumu, a o nisi ua nonofo i nofoaga faataufusi ma fale ua pala ma lē toe saogalemu. E moomoo le toʻatele o tagata i ni fale lelei e maua ai le fiafia ma le saogalemu.
5, 6. (a) E faapefea ona faataunuu le Isaia 65:21 ma le Mika 4:4? (e) E faapefea ona tatou maua na faamanuiaga?
5 Ua faailoa mai i le valoaga a Isaia, le faataunuuina e le Pulega o le Malo, o moomooga o tagata ina ia maua ni o latou lava fale. E pei ona valoia e Isaia: “O le a latou fausia fale ma nonofo ai, e latou te totō foʻi togāvine ma latou aai i ona fua.” (Isa. 65:21) E lē na o le mauaina o le fale o le tagata lava ia le vala mataʻina o le a faataunuuina, auā o loo nonofo le toʻatele i aso nei i o latou lava fale. Peitaʻi, e latou te lagona le atuatuvale, ona o le taatele o le talepe fale, pe lē gafatia foʻi le tausiaina o a latou fale i le lumanaʻi. Ae maʻeu se suiga mataʻina o le a aumaia e le Malo o le Atua. E pei ona valoia e le perofeta o Mika: “E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—Mika 4:4.
6 O lea, o le ā e tatau ona fai ina ia tatou ola ai i lalo o le pulega o le Malo? E tatou te mananaʻo uma e maua ni fale e nonofo ai. Peitaʻi, nai lo o le naunau e maua se fale taugatā i le taimi nei, e atamai ona tatou uaʻi atu i folafolaga a Ieova. Na fetalai Iesu e faapea: “E fai lua o alope, e iai foʻi mea e momoe ai manufelelei o le lagi, a o le Atalii o le tagata e leai se mea e moe ai o ia.” (Luka 9:58) Sa mafai e Iesu ona fausia se fale telē, peitaʻi e na te leʻi faia faapea. Aiseā? E leʻi manaʻo o ia e faataga se mea e taaʻina ese ai lona mafaufau, mai i le faamuamuaina o le Malo i lona olaga. Pe e mafai ona tatou mulimuli i lana faaaʻoaʻoga, ma lē faatagaina le saʻilia o meafaitino e avea ma mea e sili ona tāua i o tatou olaga?—Mata. 6:33, 34.
“AAI FAATASI LE LUKO MA LE TAMAʻI MAMOE”
7. O le ā le fuafuaga a Ieova e faatatau i tagata ma meaola?
7 O le tagata o le palealii o foafoaga uma a Ieova i le lalolagi. Na ia faailoa atu i lona Alo ulumatua le māfuaaga na ia foafoaina ai le tagata: “Seʻi o ta faia le tagata i lo taʻua faatusa ia pei o i taʻua, ma ia latou pule i iʻa o le sami, ma manufelelei o le lagi, ma manu lalata, ma le lalolagi atoa, ma meaola fetolofi uma o loo fetolofi i le eleele.” (Kene. 1:26) O le fuafuaga a Ieova mo Atamu ma Eva faapea a la fanau, ia latou tausia ma pulea meaola uma.
8. O le ā se mea ua tatou aʻoaʻoina e faatatau i meaola?
8 Pe e mafai ona maua le filemu i le va o tagata ma meaola? E tausia lelei e le toʻatele o tagata a latou fagafao, ae faapefea le va o tagata ma manufeʻai o le vao? O suʻesuʻega a saienitisi e faatatau i le natura o manufeʻai, na iloa ai e iai foʻi faalogona o meaola. E tatou te mātauina le fefefe ma le feʻai o nei meaola pe a faamataʻuina i latou, ae faamata e iai nisi o latou faalogona? Na toe faapea mai saienitisi, o le auala e tausia aʻe ai fanau ma toloaʻi a nei meaola e atagia mai ai lo latou alofa.
9. O ā suiga o le a iai i le va o meaola ma tagata i le lumanaʻi?
9 E lē tatau ona faateʻia i tatou i le faamatalaga a le Tusi Paia e faapea, o le a iai le filemu i le va o meaola ma tagata i le lumanaʻi. (Faitau le Isaia 11:6-9; 65:25.) O le ā le māfuaaga? Auā ina ua māeʻa le Lolo, ona fetalai atu lea o Ieova iā Noa e faapea: “E faaauau ona fefefe iā te outou o meaola uma o i le lalolagi.” O le māfuaaga lea o le sesegi o meaola i nisi o taimi, ona e mo lo latou lava puipuiga. (Kene. 9:2, 3) Ae o le a aveesea e Ieova le fefefe o meaola i le lumanaʻi, ona maua lea o le filemu i le va o meaola ma tagata, e pei o lana fuafuaga i le amataga. (Ho. 2:18) Maʻeu le matagofie o lenā taimi mo i latou o le a soifua i le lalolagi!
ʻSOLOIESEA LOIMATA UMA’
10. Aiseā e tatou te fetagisi ai?
10 Ina ua vaai Solomona i “gaoioiga sauā uma o loo faia i lalo o le lā,” ona ia faapea mai lea ma le faanoanoa, “faauta foʻi! o loimata o ē o loo sauāina ae ua leai se tasi e faamāfanafana iā i latou.” (Fai. 4:1) Ae ua sili atu ona leaga le tulaga o mea i aso nei. E maligi o tatou loimata ona o māfuaaga eseese. E moni e iai taimi e maligi ai loimata o le fiafia, ae o le tele o taimi, e maligi o tatou loimata pe a tumu o tatou loto i le faanoanoa.
11. O le ā se tala o loo i le Tusi Paia e sili ona pāʻia ai lou loto?
11 Seʻi faaāta i o tatou mafaufau nisi o tala faamomoiloto o loo i le Tusi Paia. Ina ua maliu Sara i le 127 o ona tausaga, ʻua ulu atu Aperaamo i le faleʻie ua faavauvau ma tagiauē ona o ia.’ (Kene. 23:1, 2) Na “fetagisi leotetele” Naomi, Ruta ma Orepa ina ua latou faamavae. Ae ina ua toe talanoa atu Naomi iā i laʻua, ona “latou toe fetagisi leotetele” lea. (Ruta 1:9, 14) Ina ua maʻi tigāina le tupu o Esekia ma ua talioti, ona ia tatalo lea iā Ieova ma amata ona “tagi masūsū.” Na pāʻia faalogona o Ieova ina ua ia silasila i ona loimata, ona Ia faamālōlōina lea o ia. (2 Tu. 20:1-5) Pe e lē pāʻia o tatou faalogona i faamatalaga a le Tusi Paia e faatatau i le faafitia e Peteru o Iesu? Ina ua māeʻa ona ia faafitia Iesu, ona ia ʻalu lea i fafo ma tagi masūsū,’ ina ua ia faalogoina le vivini o moa.—Mata. 26:75.
12. E faapefea ona aumaia e le pulega o le Malo le mapusaga i tagata?
12 Ua manaʻomia e tagata se mapusaga ma faamāfanafanaga, ona o le tele o mea o loo latou mafatia ai. O le mea lenā o le a tupu i le Pulega o le Afe Tausaga e pei ona valoia i le Faaaliga 21:4, ʻe soloiesea foʻi e le Atua o loimata uma i o latou mata, e lē toe iai se oti, po o se faanoanoa, po o se tagiauē, e lē toe iai se tigā.’ Maʻeu le matagofie o lenā taimi pe a aveesea tigā ma mafatiaga, ae e sili atu ona mataʻina folafolaga a Ieova e faatatau i le aveesea o le maliu ma le oti. E faapefea ona tupu lenā mea?
TOETUTŪ ʻI LATOU O LOO I TUUGAMAU’
13. Ua faapefea ona aafia tagata ona o le agasala a Atamu?
13 Ua pule le oti e pei o se tupu i tagata mai lava i le taimi na agasala ai Atamu. O lea, o le oti o se iʻuga e lē maʻalofia e tagata agasala, ma o se tasi lea o pogai o mafatiaga ma faanoanoaga. (Roma 5:12, 14) Ua ʻfaapologaina ai tagata i o latou olaga atoa ona o le fefefe i le oti.’—Epe. 2:15.
14. O le ā e tupu pe a faaumatia le oti?
14 Ua faailoa mai i le 1 Korinito 15:26, o le a ʻfaaumatia le fili mulimuli, o le oti lea.’ E lua vaega o tagata o le a mauaina aogā. O le a maua e le “motu o tagata e toʻatele” faapea le faitau piliona o le a toe faatutūina mai, le ola e faavavau. O ā ou faalogona a o e faafeiloaʻia i latou o le a toetutū mai? O le mafaufau loloto i tala o loo i le Tusi Paia e faatatau iā i latou na toe faatutūina mai, o le a fesoasoani ai e faaāta i o tatou mafaufau lenā vaaiga mataʻina.—Faitau le Mareko 5:38-42; Luka 7:11-17.
15. O ā ou faalogona pe a e vaaia le toetutū mai o ē pele iā te oe?
15 Seʻi mafaufau i faaupuga nei, “ona matuā olioli ai lea o i laʻua” ma ʻlatou faamamaluina ai lea o le Atua.’ Atonu o faalogona na e oo iā te oe pe ana e iai i inā, aemaise lava pe a toe faatutūina mai ē e pele iā te oe i le lumanaʻi. O se vaaiga o le a aumaia ai le olioli. Na fetalai Iesu i le Ioane 5:28, 29 e faapea, “e oo mai le itula e faalogo ai i latou uma o loo i tuugamau i lona leo ma latou ō mai ai.” E leai se tasi o i tatou ua vaai i lenā mea, ae e mautinoa o se tasi lea o vaaiga o le a lē mafaagaloina iā i tatou.
“PULE AOAO LE ATUA”
16. (a) Aiseā e tatou te naunau ai e talanoa i isi e faatatau i lo tatou faamoemoe? (e) O ā upu a Paulo na faalaeiauina ai uso i Korinito?
16 Ua taatia mai se lumanaʻi matagofie mo auauna faamaoni a Ieova. E ui e tatou te leʻi vaaia nei faamanuiaga, ae e tāua le tamau i o tatou mafaufau o na mea. O le faia faapea, e faaauau ai ona tatou faamuamua mea e sili ona tāua, ma lē taaʻina ese ai i tatou e lenei faiga o mea. (Luka 21:34; 1 Timo. 6:17-19) E tatau ona tatou naunau e talanoa e faatatau i lo tatou faamoemoe pe a faia tapuaʻiga a le aiga, o talanoaga ma uso, ma tagata suʻesuʻe ma ē faaalia le fiafia i le upu moni. O le faia faapea o le a moni ai iā i tatou lo tatou faamoemoe. O le auala foʻi lenā sa faalaeiauina ai e le aposetolo o Paulo uluaʻi Kerisiano. Na fesoasoani ana upu iā i latou e malamalama ai i mea o le a faataunuuina i le iʻuga o le Pulega a Keriso i le Afe Tausaga. O lea, seʻi o tatou mafaufau loloto i le uiga o upu a Paulo o loo i le 1 Korinito 15:24, 25, 28.— Faitau.
17, 18. (a) O le ā le auala na avea ai Ieova ma ʻpule i le aoao o mea’ i le amataga? (e) E faapefea ona toe faafoʻisia e Iesu le autasi ma le filemu?
17 E leai nisi upu e sili ona faamatala ai le iʻuga o le Afe Tausaga nai lo o le faaupuga lenei, o le a “pule aoao le Atua i le aoao o mea.” O le ā le uiga o lenā manatu? Pe a toe mafaufau i le faatoʻaga i Etena i le taimi a o lelei atoatoa Atamu ma Eva, na avea i laʻua ma vaega o le ʻauaiga autasi ma filemu o le Atua. Na avea Ieova le Pule Silisili Ese ma ʻpule i le aoao o mea,’ ona sa ia pule tuusaʻo mai i tagata ma agelu. Sa mafai ona maua e tagata ma agelu le avanoa e feutagaʻi tuusaʻo ai ma Ieova, tapuaʻi atu iā te ia ma maua ana faamanuiaga.
18 Na faaleagaina lenā faiā autasi ma filemu, ina ua uunaʻia e Satani le tagata ina ia fouvale iā Ieova. Ae na faasolosolo ona toe faafoʻisia e le Malo faa-Mesia lenā filemu ma le autasi, talu mai le 1914. (Efe. 1:9, 10) O le a amata ona tino mai “mea e lē vaaia” lea e leʻi faataunuuina, a o faagasolo le Pulega i le Afe Tausaga. E ui lava ua tuuina atu iā Iesu “le pule uma i le lagi ma le lalolagi,” peitaʻi e leai sona faanaunauga e fia sili atu i lona Tamā. O lea, pe a māeʻa lenā pulega, ona ia toe ʻtuuina atu lea o le malo i le Atua lona Tamā.’ O le a ia faaaogā le faaeaga ma le pule ua tuuina atu iā te ia e “faamamaluina ai le Atua le Tamā.”—Mata. 28:18; Fili. 2:9-11.
19, 20. (a) E faapefea ona faamaonia e tagatānuu o le Malo lo latou faanaunauga e talia le Pule Silisili Ese a Ieova? (e) O ā mea matagofie e tatou te tulimataʻia i le lumanaʻi?
19 O le a maua e tagatānuu o le Malo le tulaga lelei atoatoa pe a māeʻa le Afe Tausaga. O le a latou mulimuli foʻi i le faaaʻoaʻoga a Iesu o le lotomaulalo, ma taliaina Ieova o le Pule Silisili Ese. E faamaonia le moni o lo latou faanaunauga, pe a latou taulau manuia i le tofotofoga mulimuli. (Faaa. 20:7-10) Pe a mavae lenā, ona tafiesea loa lea e faavavau o tagata ma agelu fouvale uma. Maʻeu se taimi e sili ona fiafia ai! O le a viiaina Ieova e lona ʻauaiga atoa i le lagi ma le lalolagi, ma o le a avea o ia ma “pule aoao i le aoao o mea.”—Faitau le Salamo 99:1-3.
20 Pe e lē uunaʻia ea oe e fai ni au taumafaiga e faia le finagalo o le Atua, ona o mea o le a faataunuuina e le Malo? Ia faamautinoa e te lē tuulafoaʻia le auaunaga iā Ieova, ona o moomooga faivavale o lenei lalolagi. O le ā lau gaoioiga o fai e faamalosia ai lou faanaunauga e talia le Pule Silisili Ese a Ieova? Ia atagia atu i au gaoioiga o lou faanaunauga lenā seʻia oo i le faavavau, ona e olioli ai lea i le filemu ma le autasi e lē gata i le Afe Tausaga, ae oo lava i le faavavau.
[Fesili mo le Suʻesuʻega]
[Ata i le itulau 11]
Pe a māeʻa ona faatino e Iesu ona tofiga o se Tupu, ona ia toe faafoʻi lea ma le lotomaulalo le Malo i lona Tamā
