Faaaogāsesēina o le Tusi Paia

UA FAAPEA mai le Eperu 4:12: “O loo ola le afioga a le Atua ma e matuā malosi foʻi.” O upu na a Paulo ua faamatilatila mai ai le mana o loo i le Tusi Paia, e pāʻia ai loto o tagata ma suia o latou olaga.

Peitaʻi, na lē manino lenā manatu, ina ua aliaʻe mai ē fulitua i le upu moni, i le mavae o le maliliu o le ʻauaposetolo. (2 Pete. 2:1-3) Mulimuli ane, na amata ona talitonu taʻitaʻi lotu, e iai se mana faivavega i le Afioga a le Atua. Na tusi le polofesa o Harry Y. Gamble e faatatau i le “faaaogāsesēina o le Tusi Paia e faia ai vavega.” Na ia taʻua le faamatalaga a le Faatamā o le Lotu o Origen e faapea, “e aogā ona faalogo i upu paia: pe afai e mamana upu e faaaogāina e tagata faapaupau i a latou faiga faataulāitu, e sili atu la le mana o loo iai i le Afioga a le Atua.” I le faaiʻuga o le senituri lona fā, na tusi ai John Chrysostom e faapea, “e lē mafai ona afea e le tiapolo se fale o loo iai tusi o le Evagelia.” Na ia taʻua atili, e asoaina foʻi e nisi, vaega o tusitusiga mai Evagelia, ma le manatu e puipuia ai i latou mai agaga leaga. Sa toe taʻua e Gamble, na manatu Augustine o se faiaʻoga i le lotu Katoliko e faapea, “pe afai e tigā le ulu o se tagata, e tatau ona tuu se kopi o le tusi o Evagelia a Ioane i lalo o lona aluga.” Sa faaaogāsesēina le Tusi Paia ma le manatu e puipuia ai se tasi mai agaga leaga. Po o lou talitonuga foʻi lenā?

E iai se isi auala e masani ona faaaogāsesēina ai le Tusi Paia. O le suʻe lea i ai, pe a manaʻomia se taʻitaʻiga. O le mau lava e muamua tau i ai le vaai, ona manatu lea o le fesoasoani lenā. O se faataʻitaʻiga, na taʻua e Gamble, na faalogo Augustine i se tamaitiiti o faapea: “Faitau.” Ona faitau loa lea e Augustine le Tusi Paia. O le mau muamua na ia faitauina, na ia manatu o le faatonuga lea mai le Atua.

Po ua e faalogo o faia e nisi lenā gaoioiga? E latou te tatalo i le Atua pe a feagai ma faafitauli, ona suʻe loa lea i le Tusi Paia. O le mau lava e muamua tau i ai le vaai, e latou te manatu o le tali lenā o le faafitauli. Atonu e lelei o latou faanaunauga. Peitaʻi, e lē o le auala lenā e saʻili ai e se Kerisiano le taʻitaʻiga mai le Tusi Paia.

Na faamautinoa atu e Iesu i ona soo, o le a ia auina mai iā i latou ʻle fesoasoani, o le agaga paia lea e aʻoaʻo iā te i latou i mea uma, ma faamanatu atu i o latou mafaufau mea uma na ia taʻu atu.’ (Ioa. 14:26) E ese lenā mai le auala o loo faaaogāsesēina ai le Tusi Paia. Auā o lenā auala, e lē tau manaʻomia ona iai se malamalamaga i le Tusi Paia.

Ua avea ma masaniga le faaaogāsesēina o le Tusi Paia i le tele o auala. Peitaʻi, o loo taʻusalaina e le Tusi Paia le saʻili atu i fetu. (Levi. 19:26; Teu. 18:9-12; Galu. 19:19) E ui “o loo ola le afioga a le Atua ma e matuā malosi foʻi,” ae e tatau lava ona tatou faaaogā i se auala talafeagai. E lē mafai ona faaleleia olaga o tagata pe a faaaogāsesēina le Tusi Paia. O lea, e tatau ona aʻoaʻo i latou i le poto saʻo e faatatau i le Tusi Paia. O lenā poto ua fesoasoani i le toʻatele e suia a latou amioga, tuua olaga leaga sa iai, faaleleia tulaga o o latou aiga, ma faatumauina se faiā māfana ma le Tusitala o le Tusi Paia.