Fesili Mai le ʻAufaitau

A o ma leʻi mauaina le upu moni, na ma faaaogāina ai ma loʻu toʻalua le in vitro fertilization, ona sa ma naunau e maua sa ma pepe. O lea na faamalō ai ma teu nisi o fua ua uma ona faafeusuaʻi (embryos), ae e leʻi faaaogāina. Pe e tatau ona teu pea nei fua na faafeusuaʻi, pe e mafai ona lafoaʻia?

▪ O se tasi lenei o mataupu lavelave, ae e tāua tele ona faia e se ulugalii se faaiʻuga lelei pe a filifili e faaaogā le in vitro fertilization (IVF). E tali le ulugalii iā Ieova, i le filifiliga e la te faia. O lea, seʻi o tatou iloiloina lenei auala ua faaaogāina e tagata e maua ai ni fanau.

I le 1978, o le taimi muamua lea na faaaogā ai e se fafine mai Egelani, lenei auala e lē masani ai e maua ai sana pepe. Sa iai se totoga o le fafine na faalētonu (Fallopian tubes), ua lē mafai ai ona faafeusuaʻi ona fua ma le sua o lona toʻalua pe a feusuaʻi. Na faia se taotoga e aumai ai i fafo fua o le fafine, ina ia faafeusuaʻi ma le sua o lona toʻalua i totonu o se ipu. Ona faaaogā lea o se vailaau faapitoa e fesoasoani ai i le afuafua o se pepe, a o leʻi tuuina i totonu o le toʻala fanau o le fafine. O loo ola i le taimi lenei le tama teine a lea fafine. O laasaga ma auala eseese mo lenei togafitiga, e taʻua o le in vitro fertilization (IVF), ona e faafeusuaʻi fua o le fafine ma le sua o le tamāloa i totonu o se ipu.

E eseese auala e faia ai lenei togafitiga i atunuu eseese. Peitaʻi o le IVF e tele ina aofia ai vala nei: E faaaogāina e le fafine ni vailaau e faatupuina ai ona fua faaautama. Ae talosagaina le tamāloa e milimili lona totogasā ina ia aumaia ai lona sua, ona taumafai lea e faafeusuaʻi fua o le fafine ma le sua o le tamāloa. Atonu e tele ni fua e mafai ona ola ma afuafua ai se tamaitiiti. I ni nai aso mulimuli ane, ona taumafai lea e suʻesuʻe ina ia maua ni fua ua afuafua e mālōlōina. Ae atonu o le aso lona tolu, e tuu ai i totonu o le toʻala fanau o le fafine le sili atu ma le tasi o nei fua ua afuafua, ina ia telē le avanoa e mafai ona maʻitaga ai le fafine. E maʻitaga le fafine pe a faaauau pea ona afuafua fua ua tuuina i totonu o lona toʻala fanau.

Ae faapefea fua ua afuafua ae e leʻi tuuina i totonu o le toʻala fanau o le fafine, e aofia ai ma fua  e foliga mai e lē mālōlōina? O le a lē toe aogā nei fua pe a lē faia i ai se fuafuaga. O lea, e tatau ona faamalō ma teu nei fua. O le māfuaaga, e sili atu ona taugofie pe a toe faaaogā nei fua i se isi taimi e manaʻomia ai. Peitaʻi, o lenei vala e aliaʻe mai ai le tele o fesili. E pei o le ulugalii na taʻua i le amataga, o nisi ua lē mautonu i le fuafuaga e fai i fua ua teuina. Atonu ua lē toe mananaʻo nisi e toe fai nisi tamaiti. O le matutua ma le tulaga tautupe, o le a lē toe mananaʻo ai nisi ulugalii e faaaogā lea togafitiga. E popole nisi ona e ono tauave e le fafine ni pepe se tele i le taimi e maʻitaga ai. * Ae atili ona faigatā le tulaga o mea, pe a toe faaipoipo pe maliu se tasi o paaga faaipoipo. E tele faafitauli e aliaʻe mai ai, ma e faaauau pea ona totogi e nisi ulugalii le teuina o nei fua mo le tele o tausaga.

I le 2008, na taʻua ai e se tagata e tomai i le afuafuaina o pepe, o le toʻatele o ulugalii ua lē mautinoa po o le ā le fuafuaga e fai i fua na teuina. Na ia taʻua i le New York Times e faapea: “E pe ā ma le 400,000 fua (embryos) o loo teuina i vaega eseese o le atunuu, ae o loo faaopoopoina pea i aso uma. . . E mafai ona lelei nei fua mo le silia i le sefulu tausaga pe a lelei ona teuina. Peitaʻi, o le a lē toe aogā uma pe a lē teumaluina.” (O upu e faasisipa e ā matou) O lenei vala e tatau ona manatunatu i ai se Kerisiano. Aiseā?

E tatau i ulugalii Kerisiano e fesagaʻia fesili e aliaʻe mai le faaaogāina o le IVF, ona manatunatu i nisi tulaga tau togafitiga. Atonu e filifili se Kerisiano po o le ā e fai i se tauaiga e lē toe foʻi i se lelei lona gasegase. O loo faalagolago lona ola i se masini, e pei o le masini e faaaogā e mānava ai. E saʻilia e Kerisiano togafitiga faafomaʻi, ona e tāua iā i latou manatu o loo i le Esoto 20:13 ma  le Salamo 36:9, ma e latou te vaai maualuga i le ola. Ua faapea mai le Awake! o Me 8, 1974: “Ona e amanaʻia e Kerisiano o latou lotofuatiaifo, ma faaaloalo i le silafaga a Ieova i le ola faapea tulafono a malo, o le a latou lē taliaina ai faiga e faauma ai le ola o se gasegase e lē toe foʻi i le lelei lona maʻi, ina ia mapu ai.” Ae i nisi tulaga, e pau le mea e faalagolago ai le ola o sē e pele iā i tatou, o se masini faaola. O lea, e filifili sui o le aiga pe e tatau pea ona faaaogā lea masini.

E lē tutusa lenā tulaga ma le ulugalii na faaaogāina le IVF, auā o loo teuina pea i le taimi lenei, fua na afuafuaina. Peitaʻi, e ono fautuaina i laʻua o se tasi o auala e faaaogā, o le lē toe teuina lea o nei fua. O le faia faapea, o le a mafai ona faatamaʻiaina ai. O lea, e filifili le ulugalii po o le ā le faaiʻuga e fai.—Kala. 6:7.

Pe a filifili le ulugalii e faaaogā le IVF, atonu e la te lotomalilie e totogi le tau mo le teuina o nei fua ua afuafua, pe toe faaaogā foʻi e toe maua ai se tamaitiiti i se taimi o i luma. Peitaʻi, e filifili nisi e lē toe teuina nei fua ona e manatu, e pau le mea o loo faalagolago ai le lelei o nei fua, o se masini. E tatau i se ulugalii Kerisiano ona faia se filifiliga, e faaaogā ai o la lotofuatiaifo ua toleniina, ona e la te tali atu iā Ieova. Atonu e la te faia se filifiliga e lē aafia ai o la lotofuatiaifo, peitaʻi e tatau ona la amanaʻia lotofuatiaifo o isi.—1 Timo. 1:19.

Na faapea mai se tasi e iai sona tomai faapitoa i le togafitia o i latou e lē mafai ona maua ni fanau, “e lē mautonu nisi o ulugalii i le faaiʻuga e fai i fua ua afuafua o loo teuina.” Na ia toe faapea mai: “O le toʻatele o ulugalii, e lē iloa po o le ā le faaiʻuga lelei e tatau ona fai.”

E tatau i Kerisiano moni ona matuā vaʻiliʻili āuga uma a o leʻi filifili e faaaogā lenei auala faaonapōnei. Ua fautua mai le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.”—Faata. 22:3.

Ua fia papatiso se ulugalii o loo faia se la suʻesuʻega faale-Tusi Paia. Peitaʻi e lē mafai ona lesitala faaletulafono le la faaipoipoga, ona e lē o ausia e le tamāloa agavaa e mafai ona nofo ai i le atunuu. E lē mafai ona lesitala faaletulafono le faaipoipoga a se tasi e leʻi nofomau i le atunuu. Pe e mafai ona la sainia le Faalauiloaga o se Tautoga o le Faamaoni, ina ia papatiso ai?

▪ Atonu e mafai ona avea ma fofō o le faafitauli, peitaʻi e lē o le auala faale-Tusi Paia lenā e taulima ai. Ina ia iloa le māfuaaga e lē mafai ai ona faaaogā lea auala, seʻi o tatou iloilo le fuafuaga o le Faalauiloaga o se Tautoga o le Faamaoni. E lē gata i lea, o le ā foʻi le auala ma le taimi e faaaogā ai.

O lenei faalauiloaga o se maliega tusitusia, e sainia i luma o molimau e se ulugalii e lē mafai ona faaipoipo, ona o le māfuaaga o le a faamatala mulimuli mai. I lenā faalauiloaga, e la te taʻutino ai e faamaoni le tasi i le isi. E lē gata i lea, o le faanaunauga e lesitalaina faaletulafono le faaipoipoga pe a mafai. E vaai i ai le faapotopotoga ua aloaʻia faaletulafono lenei faiā, ona ua la tautō i luma o le Atua faapea tagata, o le a faamaoni le tasi i le isi.

O le ā le taimi ma le māfuaaga e faaaogā ai le Faalauiloaga o se Tautoga o le Faamaoni? O le faaipoipoga o se faatulagaga paia na faia e Ieova. Na fetalai Iesu: “O ē ua faatasia e le Atua, aua neʻi  tuueseeseina e se tagata.” (Mata. 19:5, 6; Kene. 2:22-24) Na ia toe faapea atili mai i le Mataio 19:9, “ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.” O lea, o le “faitaaga” po o le faia o feusuaʻiga lē mamā, o le faavae faale-Tusi Paia lea mo le tatalaina o se faaipoipoga. O se faataʻitaʻiga, afai e faia e le tane nisi faiā faaleulugalii i fafo atu o le faaipoipoga, ona mafai lea e le avā ona tatala le faaipoipoga, ma toe faaipoipo ai.

E iai nisi atunuu na malosi ai le taaʻiga a lotu, na lē mafai ai ona tatalaina faaipoipoga e tusa ai ma māfuaaga faale-Tusi Paia. Peitaʻi na aʻoaʻoina e na lotu, e lē mafai ona tatalaina faaipoipoga e tusa lava po o le ā le māfuaaga. I na atunuu e leai foʻi se tulafono e mafai ona tatala ai se faaipoipoga, e oo lava i le māfuaaga na taʻua e Iesu. Peitaʻi, i nisi atunuu e mafai ona tatala faaipoipoga, ae e tele ma lavelave laasaga e uia. Atonu e tele tausaga ona faatoʻā mafai lea ona tatala se faaipoipoga. I lea auala, ua faafaigatā ai e lotu ma faigāmalo ona talia mea e ōgatusa ma le finagalo o le Atua.—Galu. 11:17.

O se faaaʻoaʻoga, atonu e nonofo se ulugalii i se atunuu e lē mafai pe faigatā ona faagaoioi ai talagā faaipoipoga. E faatoʻā mafai ona faaaogā e se ulugalii le Faalauiloaga o se Tautoga o le Faamaoni, pe a lē taulau a la taumafaiga fitā e tatala a la faaipoipoga muamua. E lē gata i lea, e tatau ona la agavaa e faaipoipo i le silafaga a Ieova. O lenā fuafuaga o se faatulagaga alofa a le faapotopotoga Kerisiano, mo i latou o loo nonofo i na atunuu. Peitaʻi, e lē mafai ona faaaogā lenei faatulagaga i atunuu e mafai ona fai ai talagā faaipoipoga, e tusa pe lavelave ma taugatā.

O le lē malamalama i le faaaogāina o lenei faalauiloaga, ua talosaga ai nisi e nonofo i atunuu e mafai ona tatala ai faaipoipoga, e sainia lenei maliega tusitusia ma ʻalofia ai le mau gaogaosā.

Ae i lenei mataupu, o loo fia faaipoipo le ulugalii o loo nonofo faapouliuli. O loo mafai ona la faaipoipo. Peitaʻi o le faafitauli, e lē mafai ona lesitalaina faaletulafono le faaipoipoga a se tasi e lē ausia agavaa e nofomau ai i le atunuu. (I le tele o atunuu, e faatagaina i le tulafono ona faia se faaipoipoga, e tusa lava pe lē agavaa se tasi o le paaga e nofomau i le atunuu.) Ae i le atunuu o loo nonofo ai le ulugalii na taʻua i le amataga, o loo faataga e le malo ona tatala le faaipoipoga. O lea, e lē mafai la ona sainia lenei Faalauiloaga o se Tautoga o le Faamaoni. O loo mafai e le ulugalii ona toe faaipoipo, ma e lē o manaʻomia ona tau faia se tatalaga faaipoipoga. Ae faapefea le tulaga o le tamāloa? E tatau ona la faimalaga atu e faaipoipo i le atunuu e faigofie mo le tamāloa ona faaipoipo ai. Pe atonu e mafai foʻi ona ia faaipoipo, pe a mātauina o loo fai ana taumafaiga e mafai ona ia nofomau ai i lea atunuu.

E tatau i le ulugalii ona ola e ōgatusa ma tapulaa a Ieova, faapea tulafono a Kaisara. (Mare. 12:17; Roma 13:1) O le faia faapea, o le a mafai ai ona la agavaa mo le papatisoga.—Epe. 13:4.

[Faaopoopoga i lalo]

[Pusa i le itulau 15]

ISI AUALA E FAIA AI LE IVF

O nisi o auala e faia ai le IVF e feteenaʻi ma le silafaga a le Atua. O se faataʻitaʻiga, o nisi taimi e faafeusuaʻi fua o le fafine ma le sua o se isi tamāloa. Ona tuu lea o nei fua ua afuafua i totonu o le toʻala fanau o le fafine. (E faaaogāina e ulugalii fafine lenei auala i nisi taimi.) Pe atonu foʻi e malie le fafine e faaaogā fua ua afuafua, na maua mai le faafeusuaʻiga o fua o se isi fafine ma le sua o lona toʻalua.

I nisi taimi e tuuina i totonu o le toʻala fanau o le fafine, se fua na afuafua e lē maua mai i lona fua po o le sua foʻi o lona toʻalua. I nisi tulaga, e faafeusuaʻi fua ma le sua o se ulugalii faaipoipo e faaaogā ai le IVF. A māeʻa lenā, ona tuu lea o na fua ua afuafua i totonu o le toʻala fanau o se isi fafine (surrogate), ina ia mafai ona ia fanauina le pepe mo le ulugalii. *

O nei auala e lē taliaina e auauna a Ieova, ona e latou te faaaloalo i le faatulagaga lenei: “Aua lava neʻi e faamatuu atu lou sua i le avā a lau uō, ma lē mamā ai.” (Levi. 18:20, 29; Faata. 6:29) Pe a aofia i lenei faafeusuaʻiga le fua po o le sua o se tasi e lē i totonu o le liʻo o le faaipoipoga, e tutusa lenā ma le upu o loo taʻua i le Tusi Paia o le por·neiʹa, po o feusuaʻiga lē mamā. O nei auala ua faaaogā sesē ai totogasā.—Mata. 5:32; 1 Kori. 5:11; 6:9, 18; Epe. 13:4.

[Faaopoopoga i lalo]

[Ata i le itulau 14]

[Faamatalaga faaopoopo i le itulau 14]

E tatau i se ulugalii Kerisiano ona faia se filifiliga, e faaaogā ai o la lotofuatiaifo ua toleniina, ona e la te tali atu iā Ieova

[Ata i le itulau 17]