Ia Avea Pea o ni “Ē e Aumau”
Ia Avea Pea o ni “Ē e Aumau”
“Ou te ʻaiʻoi atu iā te outou o tagata ese ma ē e aumau, ina ia faamamao pea mai i tuʻinanauga o le tino.”—1 PETE. 2:11.
O LE Ā LAU TALI?
Aiseā ua taʻua ai le ʻaufaauuina o ni ē aumau?
O le ā le itu ua avea ai “isi mamoe” o ni ē aumau?
O le ā ua e tulimataʻia i le lumanaʻi?
1, 2. (i) O ai na taʻua e Peteru o ni “ē ua filifilia”? (ii) Aiseā ua taʻua ai i latou o ni ʻē aumau’?
INA ua mavae le 30 tausaga talu ona afio Iesu i le lagi, ona tusi atu lea o Peteru i ē na ia taʻua ʻo ē aumau’ na nonofo solo i Pono, i Kalatia, i Kapatokia, i Asia, ma Pitunia. Na ia taʻua foʻi i latou o “ē ua filifilia.” (1 Pete. 1:1) Na tusi atu Peteru i ē na fanauina i se faamoemoe ola i le lagi, ma pule faatasi ma Keriso. (Faitau le 1 Peteru 1:3, 4.) Peitaʻi, aiseā na taʻua ai e Peteru i latou o ni “ē e aumau” ma ni “ē ua filifilia”? (1 Pete. 2:11) Aiseā e faatupu manatu ai lenei mataupu, auā e toʻaitiiti le aofaʻiga o Molimau a Ieova o loo i le lalolagi e taʻua o le ʻaufaauuina, po o ē ua filifilia?
2 Na talafeagai ona taʻua le ʻaufaauuina i le uluaʻi senituri o ni ē aumau, auā e lē faavavau ona latou iai i le lalolagi. Na taʻua e Paulo, o se tasi o sui o le “lafu mamoe itiiti” e faapea, o i latou o tagatānuu o le lagi. Na ia tusi: “A o i tatou, o tagatānuu o le lagi, o i inā e tatou te faatalitali ai ma le naunau mo se faaola, o le Alii o Iesu Keriso.” (Luka 12:32; Fili. 3:20) Pe a maliliu le ʻaufaauuina, ona latou tuua lea o le lalolagi a Satani, ae mauaina le ola e lē mafai ona oti i le lagi. (Faitau le Filipi 1:21-23.) O lea, e taʻua i latou o ni “ē e aumau,” auā latou te soifua i le lalolagi mo se taimi lē tumau.
3. O le ā le fesili ua lāgā e faatatau i “isi mamoe”?
3 Ae faapefea “isi mamoe”? Pe e iai se faavae faale-Tusi Paia o lo latou faamoemoe e ola ai e faavavau i le lalolagi? (Ioa. 10:16) O le lalolagi lo latou nofoaga tumau. Peitaʻi, ua avea foʻi i latou o ni ē e aumau i lenei faiga o mea. O le ā le itu ua avea ai “isi mamoe” o ni ē aumau?
ʻUA ŌI FAATASI FOAFOAGA UMA’
4. O le ā ua lē taulau taʻitaʻi o malo e faataunuu?
4 O le umi ona iai pea o le faiga leaga o mea a Satani, o le faaauau foʻi lenā ona puapuagatia o Kerisiano ma isi tagata. Peitaʻi, e māfua nei mea uma ona o le fouvalega a Satani i le amataga. E pei ona taʻua i le Roma 8:22: “Ua tatou iloa o loo ōi faatasi pea ma tigā faatasi foafoaga uma e oo mai i aso nei.” E ui lava i taumafaiga a taʻitaʻi o malo, peitaʻi e lē mafai ona latou aveesea puapuaga o le fanau a tagata.
5. O le ā ua filifili le faitau miliona e fai talu mai le 1914, ma aiseā?
5 Talu mai le 1914, ua filifili le faitau miliona e avea ma tagatānuu a le Tupu ua faanofotupuina a le Atua, o Iesu Keriso. E lē mananaʻo nei tagatānuu e fai sa latou vaega, pe lagolagoina foʻi lenei faiga o mea a Satani. Nai lo o lea, ua faaaogā o latou olaga faapea a latou meafaitino e lagolagoina ai le Malo o le Atua.—Roma 14:7, 8.
6. O le ā le itu ua avea ai Molimau a Ieova o ni tagata ese?
6 Ua avea Molimau a Ieova i aso nei, ma tagatānuu lelei i le silia ma le 200 atunuu. Po o fea lava e latou te nonofo ai, ae e pei i latou o ni tagata ese, po o ni ē aumau. E lē faia ni a latou vaega i faiga faapolotiki ma mataupufai a tagata. E oo lava i le taimi lenei, ua latou manatu iā i latou o ni tagatānuu o le lalolagi fou a le Atua. Ua latou fiafia i le avea ai o i latou o ni ē aumau i lenei lalolagi leaga, lea ua toeitiiti ona faaumatia.
7. (i) E faapefea ona avea auauna a Ieova ma tagatānuu tumau? (ii) O fea o le a avea ai i latou ma tagatānuu tumau?
7 Ua toeitiiti ona faaumatia lea e Iesu o lenei faiga o mea a Satani. O le a aveesea e lana pulega le agasala ma mafatiaga. E lē gata i lea, o i latou e tetee i le pule silisili ese a Ieova. O le a avea ē faamaoni iā Ieova, ma tagatānuu tumau i le lalolagi Parataiso. (Faitau le Faaaliga 21:1-5.) O le a faasaʻolotoina le lalolagi mai mea e mafatia ai, ma maua e tagata ʻle saʻolotoga mamalu o le fanau a le Atua.’—Roma 8:21.
O LE Ā E FAATALITALIA MAI I KERISIANO MONI?
8, 9. O le ā na uiga i ai Peteru e faatatau i le ʻfaamamao ese mai i tuʻinanauga o le tino’?
8 Na faamatala mai e Peteru le auala e tatau ona amioaʻi ai Kerisiano, ina ua ia tusi e faapea: “Le ʻaupele e, ou te ʻaiʻoi atu iā te outou o tagata ese ma ē e aumau, ina ia faamamao pea mai i tuʻinanauga o le tino, o mea lava ia e feteenaʻi ma le loto.” (1 Pete. 2:11) Na ia avatu lenei fautuaga i Kerisiano faauuina, peitaʻi, e mafai foʻi ona faatatau atu i isi mamoe.
9 E iai nisi tuʻinanauga e lē leaga pe a faamalieina e tusa ai ma le finagalo o Ieova, auā o le faia faapea, e tatou te maua ai se olaga fiafia. O se faataʻitaʻiga, e masani ona tatou mananaʻo i se tausamiga susua. E maua foʻi le olioli i a tatou tafaoga, po o faatasiga ma a tatou uō. O se mea masani foʻi le faanaunauga e faamalie faalogona tau feusuaʻiga i le va o ulugalii. (1 Kori. 7:3-5) Peitaʻi, na tautala manino Peteru e faatatau i ʻtuʻinanauga o le tino lea e feteenaʻi ma le loto.’ O lona uiga o tuʻinanauga sesē o le tino, ma e taʻua i nisi faaliliuga o le Tusi Paia, o “faanaunauga agasala.” (New International Version) Ua faailoa mai e Ieova le auala e tatau ona faamalie ai o tatou tuʻinanauga masani. O lea, e lē tatau ona tatou faataga so o se tuʻinanauga o le tino e faaleagaina ai la tatou faiā ma Ieova. E lamatia o tatou ola, pe a sesē le auala e faamalie ai o tatou tuʻinanauga.
10. Ua faapefea ona maileia e Satani Kerisiano ina ia avea ma vaega o lenei lalolagi?
10 E taumafai Satani e faaosooso i tatou e faataʻitaʻi i uiga ma mafaufauga o le lalolagi. O le māfuaaga, e lē manaʻo o ia e tatou te mafaufau o i tatou o ni “ē e aumau” i lenei faiga o mea. E naunau Satani e tatou te aafia i le matapeʻapeʻa, o amioga lē mamā, fia taʻutaʻua, fiamatamuamua ma le uiga lotonuu. E tatau ona tatou iloa, o mailei nei a Satani. E faamaonia e tatou te lē mananaʻo e faia sa tatou vaega i le lalolagi a Satani, pe a tatou maumauaʻi e lē mulimuli i na faanaunauga sesē. E tatau ona faamaonia atu o i tatou o ni ʻē aumau’ i lenei lalolagi. Ia tatou taumafai e ausia lo tatou sini, o le avea lea ma tagatānuu tumau i le lalolagi fou a le Atua.
AMIOGA LELEI
11, 12. O le ā le vaaiga taatele e faatatau i tagata ese, ma o ā manatu masani e faatatau i Molimau a Ieova?
11 Na faaauau ona faamatala e Peteru le uiga o le avea o ni ē aumau i le fuaiupu e 12, e faapea: “Ia outou tausisi i le amiolelei i luma o tagata o le lalolagi auā o le mea lea latou te faia ai tala taufaaleaga e faapea, o outou o tagata amioleaga, ae ina ua latou vāai i a outou amioga lelei, ona latou faamamaluina ai lea o le Atua i le aso o lana asiasiga.” O ē aumau, o ni tagata ese, po o tagata e lē o nonofo i o latou atunuu moni. E upuia isi ona e ese i latou mai i tagata lautele, ma e masani ona manatu iā i latou o ni tagata leaga. Atonu e ese mai o latou foliga vaaia, le auala e tautatala, gaoioi, ma lāʻei ai. Peitaʻi, o a latou amioga lelei, o le a iloa ai e tagata o i latou o ni tagata lelei.
12 E faapena le auala ua ese mai ai Kerisiano moni mai o latou tuaoi. O se faataʻitaʻiga, atonu e ese mea e latou te talanoa ai, faapea a latou faafiafiaga. E masani ona mātaulia i latou i le auala e lāʻei ai. O le māfuaaga lea e tetee ai nisi i Molimau a Ieova. Peitaʻi, e taʻuleleia i latou e isi ona o a latou amioga lelei.
13, 14. E faapefea ona “taʻuamiotonuina le atamai i ana galuega”? Aumai se faataʻitaʻiga.
13 O le a lē upuleagaina i tatou e tagata, pe a tatou faaalia amioga lelei. E na o Iesu le tagata na usiusitaʻi atoatoa iā Ieova. Peitaʻi, na tuuaʻia sesē o ia e tagata i mea leaga. Na faapea mai isi o ia o se tagata ʻai tele, inu tele, ma faifaimea faatasi ma tagata agasala. Peitaʻi, na faamaonia e Iesu le sesē o na tuuaʻiga, e ala i ana amioga lelei. Na ia fetalai i le Mataio 11:19, “e taʻuamiotonuina le atamai i ana galuega.” E faapena aso nei. O se faataʻitaʻiga, na manatu nisi tagata e nonofo latalata ane i le Peteli i Selters, i Siamani, e ese le auala e ola ai sui o le aiga Peteli. Peitaʻi na faapea mai le pulenuu o Selters: “E ui e ese le auala e ola ai Molimau a Ieova i lenā nofoaga, ae e lē o faaleagaina ai le nofo lelei o tagata lautele.”
14 O se isi faaaʻoaʻoga, na tuuaʻia sesē foʻi Molimau a Ieova i Moscow i Rusia. Na faapea mai isi, o Molimau a Ieova o ni ē talepe aiga, uunaʻia tagata e pule i le ola, ma lē taliaina togafitiga faafomaʻi. Peitaʻi iā Iuni i le 2010, na tuuaʻia ai e le Faamasinoga Maualuga o Aiā Tatau i Strasbourg, i Falani, le aiā fua o le aai o Moscow i Molimau a Ieova. E leai foʻi sa latou aiā e taofia ai a latou sauniga. Na faapea mai le Faamasinoga o Aiā Tatau i Europa, e leʻi mafai e le faamasinoga i Rusia ona faamaonia le sesē o tuuaʻiga e faatatau i Molimau a Ieova. Na o latou faaaogā tulafono maumaututū, lea na lē maua ai e Molimau a Ieova le faamasinotonu.
IA GAUAʻI
15. O le ā le mataupu silisili o loo usitaʻia e Kerisiano moni i le lalolagi atoa?
15 O loo faia e Molimau a Ieova i le lalolagi le isi mea na taʻua e Peteru e tatau ona faia e Kerisiano. Na ia faapea mai e tatau i tagatānuu ona gauaʻi “i foafoaga uma a tagata,” e aofia ai tupu ma faigāmalo. (1 Pete. 2:13, 14) E lē o i tatou o ni tagata o le lalolagi. Peitaʻi na faapea mai Paulo, e tatau ona tatou usiusitaʻi i pulega faaletagata “i o latou tulaga eseese,” i tulafono e lē feteenaʻi ma tapulaa a Ieova.—Faitau le Roma 13:1, 5-7.
16, 17. (i) E faapefea ona faamaonia e tatou te lē tetee i faigāmalo? (ii) O ā manatu o nisi taʻitaʻi o malo e faatatau i Molimau a Ieova?
16 Ua avea Molimau a Ieova o ni ʻē aumau’ i lenei faiga o mea. Peitaʻi, e lē avea lea ma māfuaaga e latou te tetee ai i faigāmalo, pe faitioina isi tagata. Ua aafia lotu i faiga faapolotiki i aso nei. Peitaʻi, e ese mai ai Molimau a Ieova, auā e lē iai so latou leo i faiga faapolotiki, po o mataupufai a tagata. E latou te lē taumafai foʻi e uunaʻia taʻitaʻi o malo e suia le auala e faia ai a latou pulega. E ui i lea, e leai se faanaunauga o Molimau a Ieova e tetee i faigāmalo, pe uunaʻia foʻi tagata e faia faapea.
17 Ua faaalia e Molimau a Ieova le “āva i le tupu,” e ala i lo latou usiusitaʻi i faigāmalo. (1 Pete. 2:17) E iai nisi taimi e manatu ai taʻitaʻi o malo, o Molimau a Ieova e lē o ni tagata leaga. O se faataʻitaʻiga, na ave le faamālō a se tagata sa i le palemene a Siamani, e faatatau i amioga lelei na faaalia e Molimau a Ieova i le taimi o pulega a le ʻau Nasi. E leʻi maluelue lo latou faatuatua e ui lava i sauāga. E lē gata i lea, sa latou feutagaʻi ma isi pagota i se auala lelei. Na ia toe faapea mai, e tāua tele nei uiga i atunuu e pei o Siamani, ona ua faatupulaʻia le faileagaina o tagata e ese atunuu e ō mai ai, ma ese foʻi o latou manatu faapolotiki.
FAAALIA LE ALOFA
18. (i) Aiseā o se mea masani ai mo i tatou le faaalia o le alofa o le tasi i le isi? (ii) O ā manatu o isi tagata e faatatau i Molimau a Ieova?
18 Na tusi mai Peteru: “Ia alolofa i le ʻauuso atoa, ia matataʻu i le Atua.” (1 Pete. 2:17) O le matataʻu ma le faaaloalo o Molimau a Ieova i le Atua, e latou te lē faatigā ai iā te ia. Peitaʻi, e latou te naunau e faia lona finagalo. O se fiafiaga iā i latou le iai i totonu o se ʻauuso e tapuaʻi faatasi iā Ieova. E iā i latou le ʻalofa i le ʻauuso atoa,’ lea ua seāseā ona maua i le lalolagi i aso nei. O le māfuaaga lea e faateʻia ai isi tagata. O se faataʻitaʻiga, na maofa se tamaʻitaʻi e faigaluega i se ofisa malaga i Amerika, i le fealofani o le ʻauuso i se tauaofiaga faavaoatunuu na faia i Siamani i le 2009. Na faaalia e uso i Siamani le alofa i o latou uso mai isi atunuu i le taimi o le asiasiga. Na ia faapea atili mai, e leai se isi faalapotopotoga e pei o Molimau a Ieova. Pe e masani ona e faalogo o talanoa faapena tagata, pe a latou mātauina Molimau a Ieova?
19. O le ā ua tatou maumauaʻi e fai, ma aiseā?
19 Ua faamaonia ma le maumauaʻi e Molimau a Ieova, o i latou o ni “ē aumau” i lenei faiga o mea a Satani. E iai faavae maumaututū o lo latou faamoemoe e avea o ni tagatānuu moni o le lalolagi fou a le Atua. Po o e tulimataʻia lenā faamoemoe?
[Fesili mo le Suʻesuʻega]
[Ata i le itulau 20]
E tatou te lē o tauivi e faasaoina le lalolagi a Satani
[Ata i le itulau 20]
O loo tatou faalauiloa atu le lalolagi fou a le Atua
[Ata i le itulau 22]
Ua fesoasoani le upu moni o le Tusi Paia e autasia se aiga i Rusia
