O Oe o se Auauna Pule Faamaoni
O Oe o se Auauna Pule Faamaoni
ʻE lē o toe pule outou iā te outou.’—1 KORI. 6:19.
O LE Ā LAU TALI?
O ā matafaioi o auauna pule i aso anamua?
O le ā e manaʻomia e le Atua mai i ana auauna pule?
I le avea ai ma auauna pule, o le ā le auala e tatou te manatu ai i le auaunaga iā Ieova?
1. O le ā le manatu o tagata i le upu pologa?
E IOE le toʻatele i aso nei, i le manatu na tusia e se tusitala Eleni i le pe ā ma le 2,500 tausaga ua mavae. Na ia faapea mai: “E leai se tasi e fia pologa.” Pe a taʻu le upu pologa, e muamua lava oso aʻe i le mafaufau, tagata o loo faileagaina ma saisaitia. O mea lelei uma e maua mai e pologa i a latou galuega, e ʻaeʻae ai o latou matai.
2, 3. (i) O le ā le vaaiga e tatau ona iai i auauna a le Atua? (ii) O ā fesili e faatatau i le avea ai ma auauna pule a le Atua o le a talanoaina?
2 Peitaʻi na fetalai Iesu, o ona soo po o Kerisiano moni, o ni auauna po o ni pologa lotomaulalo. E lē o i latou o ni ē e faatauvaa, auā ua faamamaluina, maufaatuatuaina ma faaaloalogia i latou. O se faaaʻoaʻoga, a o leʻi maliu Iesu, na ia valoia o le a tuuina atu faaeaga ma tiute tauave i le “pologa faamaoni ma le faautauta.”—Mata. 24:45-47.
3 E taʻua foʻi le pologa faamaoni ma le faautauta o le “auauna pule.” (Faitau le Luka 12:42-44.) O le toʻatele o Kerisiano faamaoni o loo soifua i aso nei, e lē aofia ai i lenā vasega o le auauna pule faamaoni. Peitaʻi, o loo taʻua i le Tusi Paia, e iai uma o latou tiute tauave i le avea ma auauna pule a le Atua. O ā mea e aofia ai i na tiute tauave? O le ā lau vaaiga e faatatau i na tiute tauave? Ina ia taliina na fesili, seʻi o tatou iloiloina muamua matafaioi a auauna pule, i aso anamua.
MATAFAIOI A AUAUNA PULE
4, 5. O ā tiute tauave o auauna pule i aso anamua? Aumai ni faaaʻoaʻoga.
4 I aso anamua, e tele ina tofia se auauna pule, e masani lava o se pologa maufaatuatuaina, e vaavaaia meatotino a le aiga, po o mataupu tau pisinisi a lona matai. E latou te mauaina le tele o le pule, ma sa tofia foʻi e vaavaaia meatotino ma tupe, faapea isi auauna. O le tulaga lenā sa iai Elisara. Na tuuina atu iā te ia se galuega e sili ona tāua. Sa tofia o ia e Aperaamo e vaavaaia le tele o ana meatotino, ma atonu sa auina atu foʻi o ia i Mesopotamia, e saʻili mai se avā mo Isaako.—Kene. 13:2; 15:2; 24:2-4.
5 Sa tofia foʻi Iosefa o lē na tupuga mai iā Aperaamo, e vaavaaia meatotino a Potifara. (Kene. 39:1, 2) Mulimuli ane, sa iai foʻi se auauna pule a Iosefa, ma sa tofia ʻe vaaia lona maota.’ Sa ia faia foʻi tapenapenaga mo le taliina o uso o Iosefa. Na faatonuina foʻi o ia e faatulaga le ave faagaoiina o le ipu siliva. E mautinoa, o auauna pule o ni ē sa matuā maufaatuatuaina.—Kene. 43:19-25; 44:1-12.
6. O ā tiute tauave ua tuuina atu i toeaina?
6 I senituri mulimuli ane, na taʻua ai e Paulo i le Tito 1:7, o le a avea toeaina o le faapotopotoga ma “auauna pule a le Atua.” Ua tofia i latou e tausia “le lafu mamoe a le Atua,” e ala i le avatuina o faatonuga, faapea le taʻimua i faapotopotoga. (1 Pete. 5:1, 2) E eseese tiute tauave o toeaina. O se faaaʻoaʻoga, e tofia le toʻatele o i latou e auauna i se faapotopotoga, ae auauna ovasia femalagaaʻi i le tele o faapotopotoga. Peitaʻi e vaavaaia e sui o Komiti o Lālā, faapotopotoga i atunuu taʻitasi. E ui i le eseese o tiute tauave, ae e tatau ona latou faatinoina ma le faamaoni, ona e latou te “fai atu se tala” i le Atua, e pei ona taʻua i le Eperu 13:17.
7. E faapefea ona tatou iloa e avea Kerisiano uma ma auauna pule?
7 Ae faapefea isi Kerisiano faamaoni, e lē o auauna o ni toeaina? Na tusi le aposetolo o Peteru e faapea: “E pei ona maua e tagata taʻitoʻatasi se meaalofa, ia faaaogā e auauna ai le tasi i le isi e pei o auauna pule lelei o le agalelei faifua o le Atua, lea ua faaalia i auala eseese.” (1 Pete. 1:1; 4:10) O le agalelei faifua o Ieova, ua tatou maua ai meaalofa, meafaitino, ma tomai eseese. E tatou te faaaogāina na mea mo le lelei o o tatou uso. O lea, e faamamaluina, maufaatuatuaina, ma faaaloalogia i latou uma e iai tiute tauave i le auaunaga i le Atua.
AUAUNA A LE ATUA
8. O le ā se mataupu silisili e tatau ona tatou manatuaina?
8 E tolu ni mataupu silisili o le a tatou talanoaina, i le avea ai o i tatou ma auauna pule. Muamua: E tatou te tali atu iā Ieova, ona o ia e ana i tatou. Na tusi Paulo: ʻE lē o toe pule outou iā te outou, auā e taugatā le tau na faatauina mai ai outou,’ o le toto na faataulagaina o Iesu. (1 Kori. 6:19, 20) E lē faigatā poloaʻiga a Ieova. O lea, e na te faatalitalia i tatou e usitaʻia ana poloaʻiga, ona o ia e ana i tatou. (Roma 14:8; 1 Ioa. 5:3) O i tatou foʻi o pologa a Keriso. E pei o auauna pule i aso anamua, e telē lo tatou saʻolotoga, peitaʻi, e tatou te lē tafili saunoa ai e fai o tatou lava loto. E faatinoina o tatou tiute tauave i le auala ua faataatia mai e Ieova. Po o ā lava faaeaga e tatou te maua, o i tatou uma o auauna a Ieova ma Iesu Keriso.
9. Na faamatala faapefea e Iesu le faiā a le matai ma le pologa?
9 Na faaaogā e Iesu i se tasi taimi se talafaatusa, e faamatala ai le faiā a le matai ma le pologa. Pe a uma galuega a le pologa, pe e faapea atu lona matai e sau loa e ʻai? E leai. Nai lo lea, e faapea atu le matai: “Ia sauni se mea mo aʻu ina ia fai ai laʻu ʻaiga o le pō, ia faamaulu lou ofu kuka ma auauna mai iā te aʻu seʻia uma ona ou ʻai ma ou inu, ona e ʻai ai lea ma e inu.” O le ā le faatatauga o lenei tala? Na fetalai atili Iesu: “O lea, pe a uma ona outou faia o mea uma ua tofia atu e tou te faia, ona outou faapea ane lea, ʻO i matou o ni pologa e lē aogā. O mea ua matou faia, o mea ia e tatau ona matou faia.’”—Luka 17:7-10.
10. E faapefea ona tatou iloa e talisapaia e Ieova a tatou taumafaiga?
10 E mautinoa e talisapaia e Ieova a tatou taumafaiga i le auaunaga. Ua faapea mai le Eperu 6:10, “e lē amiolētonu le Atua e na te lē faagalogalo ai la outou galuega, ma le alofa ua outou faaali mai i lona suafa.” O Ieova o se Atua e fetuutuunaʻi, ma e lē faigatā ana poloaʻiga. O mea e na te talosagaina mai iā i tatou, e mo lo tatou lelei. Ae e tusa ai ma le talafaatusa a Iesu, e lē faamuamua e le pologa ona lava manaʻoga. O lea, e tatau ona faamuamua i o tatou olaga le faia o le finagalo o Ieova, pe afai ua tuuina atu o tatou ola iā te ia.
MEA E MANAʻOMIA E IEOVA
11, 12. (i) O ā uiga e tatau ona tatou faaalia? (ii) O le ā e tatau ona ʻalofia?
11 O le mataupu silisili lona lua: E tutusa tapulaa e tatou te usitaʻia. E lē maua uma e sui o le faapotopotoga nisi o faaeaga, peitaʻi, e iai tiute tauave e tutusa uma ai i latou. O se faaaʻoaʻoga, e tatau ona tatou fealofani, ona e lē gata o i tatou o ni Molimau a Ieova, ae o soo foʻi o Keriso. Na fetalai Iesu, e mātaulia Kerisiano moni ona o le alofa. (Ioa. 13:35) E tatau ona tatou faaalia le alofa e lē gata i lo tatou ʻauuso, ae faapea foʻi i ē e lē talitonu.
12 E manaʻomia foʻi ona tatou faaalia amioga lelei, ae ʻalofia uiga ma amioga o loo taʻusalaina i le Tusi Paia. Na taʻua e Paulo i le 1 Korinito 6:9, 10: “O ē e faitaaga, o ē e ifo i tupua, o ē e mulilulua, o tauatane, o tane e momoe ma isi tane, o ē e gāoi, o ē e matapeʻapeʻa, o ē e onanā, o ē e fai upu masoā, ma ē e taufaavalea, e lē fai mo latou tofi le malo o le Atua.” E lē faigofie le taumafai e usitaʻia tapulaa amiotonu a le Atua. Peitaʻi, e tele aogā e maua mai ai, e pei o se olaga fiafia, faiā lelei ma isi, faapea le mauaina o le finagalo malie o Ieova.—Faitau le Isaia 48:17, 18.
13, 14. (i) O le ā le galuega ua tuuina atu i Kerisiano uma? (ii) O le ā la tatou vaaiga i lenā galuega?
13 Sa iai le galuega sa tatau ona faia e auauna pule. E faapena foʻi i tatou, e iai le galuega e manaʻomia ona tatou faia. E finagalo Ieova e tatou te faailoa atu i isi, se meaalofa tautele, o le poto saʻo lea e faatatau i le upu moni. (Mata. 28:19, 20) Na tusi Paulo: “Ia faapea ona manatu tagata iā i matou o ni auauna a Keriso, o ni auauna pule o mea lilo paia a le Atua.” (1 Kori. 4:1) Na iloa lelei e Paulo, o le tausia lelei o “mea lilo paia” po o le upu moni, e aofia ai le faailoaina atu i isi, e pei ona faatonuina e le Matai, o Iesu Keriso.—1 Kori. 9:16.
14 E iloa lo tatou alofa, pe a faailoa atu i isi le upu moni. E silafia lelei e Ieova, e eseese mea e mafai ona tatou faia i le auaunaga. Peitaʻi, o le mea e sili ona tāua iā te ia, o le fai o le mea e gata ai lo tatou mafai. O le faia faapea, ua tatou faaalia ai le alofa lē manatu faapito mo Ieova, faapea o tatou tuaoi.
TĀUA O LE FAAMAONI
15-17. (i) Aiseā e tāua ai i se auauna pule ona faamaoni? (ii) Na faapefea ona faamatala mai e Iesu iʻuga leaga o le lē faamaoni?
15 O le mataupu silisili lona tolu: Ia avea i tatou o ni ē e faamaoni ma maufaatuatuaina. Po o ā lava uiga lelei ma tomai e iai i se auauna pule, ae a lē maufaatuatuaina ma lē faamaoni, e leai se aogā. E tāua tele le faamaoni ina ia avea ai o se auauna pule lelei, auā na faapea mai Paulo: “O le mea e manaʻomia mai i auauna pule, o lo latou faamaoni.”—1 Kori. 4:2.
16 E tauia i tatou pe afai e tatou te faamaoni. O loo atagia mai lenā mataupu silisili, i le talafaatusa a Iesu e faatatau i taleni. Na avatu e le matai le faamālō ma faamanuiaga, i pologa faamaoni sa faafaigaluegaina ana tupe. Peitaʻi, e leʻi faaaogāina e le isi pologa le taleni na tuuina atu iā te ia. O lea, na taʻua ai o ia o sē e “leaga,” “paiē” ma “lē aogā.” Na aveesea le taleni na tuuina atu iā te ia, ma lafo o ia i fafo i le pogisa.—Faitau le Mataio 25:14-18, 23, 26, 28-30.
17 I se isi talafaatusa, na faamatalaina ai e Iesu iʻuga leaga o le lē faamaoni. Na ia fetalai e faapea: “O le tasi tagata mauʻoa, e iai sana auauna pule, ae ua molia atu lenei auauna ona o le faatalalē i le tausia o ʻoa a lona matai. Ona ia aami atu lea iā te ia ma faapea atu, ʻO le ā lenei mea ua ou faalogo ai iā te oe? Ia faamatala mai le tala i mea na e pule ai, auā e te lē toe pule i le aiga.’” (Luka 16:1, 2) O le faatalalē o le auauna pule i le vaavaaia o meatotino a lona matai, na aveesea ai lenā tofiga mai iā te ia. O lea, e lē tatau ona tatou faatalalē i mea ua talosagaina i tatou e fai.
AUA LE FAATUSATUSA I TATOU I ISI
18. Aiseā e lē tatau ai ona faatusatusa o tatou tulaga i isi?
18 E iai taimi e tulaʻi mai ai faafitauli, ona o le faatusatusa o o tatou tulaga i isi. O lea, ia fesili ifo le tagata lava ia, ʻO faapeʻī laʻu auaunaga?’ Ua faapea mai le Kalatia 6:4: “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.” O lea, ia fai le mea e gata ai lo tatou mafai, nai lo o le faatusatusa o la tatou auaunaga i isi. O le faia faapea, o le a taofia ai i tatou mai le faafefeteina i le faamaualuga, po o le faavaivaia ai foʻi. O le iloiloina o i tatou lava, e tatou te iloa ai e eseese uma o tatou tulaga. O se faataʻitaʻiga, e iai i latou ua lē toe atoatoa le malosi o le tino, aafia i le tino matua, pe tele foʻi tiute tauave i le olaga. E lē faatalitalia la e tutusa mea uma e tatou te faia. Ae e iai nisi e mafai ona faatele se sao i le auaunaga, peitaʻi e latou te lē o faia faapea. O lea, o ā ni auala e mafai ona faaleleia ai la tatou auaunaga?
19. Aiseā e lē tatau ai ona tatou lotovaivai, pe a tatou lē mauaina nisi o faaeaga?
19 O se isi vala e tatau ona manatunatu i ai, o tiute tauave o loo tatou moomoo ina ia maua. O se faaaʻoaʻoga, atonu e naunau se uso e avea o ia ma toeaina i le faapotopotoga, pe faia foʻi ni lauga i fonotaga ma tauaofiaga. E tatau ona ia galue malosi ina ia agavaa mo na faaeaga. Peitaʻi, atonu e tuai ona ia mauaina na faaeaga, ona o ni māfuaaga e tatou te lē malamalama i ai. O lea, e lē tatau ona lotovaivai ai. O se faaaʻoaʻoga, atonu sa manatu Mose ua ia lava sauni e taʻitaʻia le fanauga a Isaraelu mai i Aikupito. Peitaʻi, e 40 tausaga sa ia faatalitali ai. I lenā taimi atoa, sa ia atiaʻe ai uiga e manaʻomia i le taʻitaʻiina o se nuu faauamaaa.—Galu. 7:22-25, 30-34.
20. O le ā se lesona e tatou te aʻoaʻoina mai iā Ionatana?
20 Peitaʻi, e iai faaeaga e lē mafai lava ona tatou mauaina. O le mea lenā sa tupu iā Ionatana, le atalii o Saulo. Sa ono avea o ia ma tupu o Isaraelu, peitaʻi sa filifilia e Ieova Tavita, o sē e laʻitiiti ifo iā Ionatana. O le ā le auala na tali atu ai Ionatana? E leʻi muimui pe lotoleaga o ia iā Tavita. Nai lo lea, sa ia taliaina le faaiʻuga, ma lagolagoina Tavita e ui lava ina lamatia ai lona ola. I le 1 Samuelu 23:17, na faapea atu ai Ionatana iā Tavita: “E avea lava oe ma tupu o Isaraelu, o aʻu foʻi ou te pito atu iā te oe.” O se lesona lelei lenā mo i tatou. Nai lo o le matauʻa i faaeaga ua maua e isi, ae e tatau ona tatou faia le mea e gata ai lo tatou mafai, i faaeaga ua tatou maua. E mautinoa o le a faamalieina e Ieova manaʻoga talafeagai o ana auauna uma i le lalolagi fou.
21. O le ā le auala e tatau ona tatou manatu ai i la tatou auaunaga?
21 Ia tāmau i o tatou mafaufau, i le avea ai ma auauna pule a Ieova, e lē o faapologaina i tatou e se matai leaga. Nai lo lea, ua ia maufaatuatuaina i tatou, e ala i le tuuina mai o se galuega e sili ona tāua, e pei o le talaʻia o le tala lelei i nei aso e gata ai. Ua ia tuuina mai foʻi le tele o le saʻolotoga, e tatou te filifilia ai le auala e faatinoina ai o tatou tiute tauave. O lea, tau ina ia avea pea i tatou o ni auauna pule faamaoni, ma ia manatua, o se faaeaga tautele le auauna iā Ieova, o Lē silisili ese i le lalolagi aoao.
[Fesili mo le Suʻesuʻega]
[Ata i le itulau 12]
Ia faamaoni i le faatinoina o o tatou tiute tauave
