Pe E te Manatua?

Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

E faapefea ona tineia le afi o le lē pulea o le tautala?

E tatau ona tatou iloiloina o tatou loto. Nai lo o le masalosalovale, e lelei ona iloilo po o le ā le māfuaaga o lo tatou faitioina o se uso. Atonu e tatou te faitioina o ia, ona o lo tatou fiamatamuamua. Po o le ā lava le māfuaaga, o lo tatou faitioina o isi, e lē foʻia ai se faafitauli.—8/15, itulau e 21.

Na faaalia faapefea i le Tulafono le silafaga a le Atua i fafine?

Sa tele le saʻolotoga na maua e fafine Isaraelu, ma sa aʻoaʻoina foʻi i latou. Sa faaaloalogia ma faamamaluina i latou, ma na puipuia foʻi a latou aiā tatau.—9/1, itulau e 5-7.

O ā mea e muamua tutupu a o leʻi amataina le aso o Ieova?

(1) O le a iai le alaga: “Ua filemu ma saogalemu!” (2) Osofaʻia ma faaumatia e faigāmalo “Papelonia le Aai Tele.” (3) Osofaʻia auauna a Ieova. (4) O le taua iā Amaketo. (5) Lafoina Satani ma temoni i le tō e lē gata.—9/15, itulau e 4.

O ā aogā o lo tatou lē iloaina tonu o le taimi e oo mai ai le iʻuga?

(1) E faaalia ai faanaunauga moni o o tatou loto. (2) Ua tatou maua ai le avanoa e faafiafia le finagalo o Ieova. (3) E faaalia ai e tatou te lotomalilie e faamuamua le faia o le finagalo o Ieova, ma fesoasoani i isi. (4) E fesoasoani iā i tatou e faalagolago atoatoa ai iā Ieova, ma faatatauina i o tatou olaga lana Afioga. (5) E tatou te iloa ai le auala e tutumau ai e ui i tofotofoga, ma faamalosia ai lo tatou faatuatua.—9/15, itulau e 24-25.

E faapefea ona tatou faaaogā le Kenese 3:19, e fefulifulisaʻi ai ma se tasi e talitonu i le afi i Seoli?

O loo taʻua i le mau, pe a oti Atamu e toe foʻi atu o ia i le efuefu, ae e lē o se afi i Seoli.—10/1, itulau e 13.

E tusa ai ma le Faaaliga 1:16, 20, o ai e faasino atu i ai “fetu e fitu” o loo i le aao taumatau o Iesu?

E faasino atu i toeaina faauuina, ae e mafai foʻi ona faasino atu i toeaina i le faapotopotoga.—10/15, itulau e 14.

Pe a iai ni aitalafu a se aiga, o ā ni gaoioiga e mafai ona latou faia?

E tatau i se ulugalii faaipoipo ona talanoa lelei e uiga i aitalafu. Ia faasoa lelei tupe. Pe e mafai ona faatele tupe maua, pe faaitiitia foʻi tupe faaalu? E tatau ona la iloilo po o lē fea aitalafu e totogi muamua. Atonu e la te taumafai e feutagaʻi ma lē o loo aitalafu i ai mo se isi fuafuaga. Peitaʻi, e manaʻomia ona la iloa lelei le tulaga o loo iai, ma ia faatulaga saʻo tupe. (1 Timo. 6:8)—11/1, itulau e 19-21.

Na faaalia faapefea e Iesu le uiga lotomaulalo lea o loo taʻua i le Isaia 50:4, 5?

O loo taʻua i na fuaiupu, o lē ua iai “le laulaufaiva o ē ua aʻoaʻoina,” e lē “liliu i le isi itulagi.” Na lotomaulalo Iesu ma naunau e uaʻi atu i lona Tamā a o Ia aʻoaʻoina o ia. Na vaaitino Iesu i le lotomaulalo o Ieova, i le auala na ia faaalia ai le alofa mutimutivale i le fanau a tagata.—11/15, itulau e 11.

Na faapefea i se faailoga tusi a le malo o Estonia, ona molimau atu i le faamaoni o Molimau a Ieova?

I le 2007, na tuuina mai ai e le Falemeli a le Malo o Estonia se faailoga tusi, lea e manatua ai le faatamaʻiaga o tagata Estonia i lalo o le pulega a Stalin. O loo iai i lea faailoga tusi le numera e 382, lea e faasino atu i tagata Molimau a Ieova ma a latou fanau na ave faapagota i le 1951 i nofoaga o faasalaga e mamao ese mai o latou aiga i Estonia.—12/1, itulau e 27-28.