Taulau Manuia i le Olaga

ʻO le a manuia ou ala, ma e gaoioi ma le poto.’—IOSUA 1:8.

O LE Ā LAU TALI?

O le ā le taulau manuia na mauaina e Solomona?

O le ā le itu na taulau manuia ai Paulo?

E faapefea ona e maua le taulau manuia moni?

1, 2. (i) O ā manatu o tagata e faatatau i se olaga taulau manuia? (ii) E faapefea ona e iloa lau vaaiga e faatatau i le taulau manuia?

E ESEESE lava taofi o tagata, pe a fesiligia po o le ā le uiga o le mauaina o se olaga taulau manuia. E manatu nisi e uiga atu i le mauaina o se galuega e lelei le totogi, po o le maualuga foʻi o tulaga tauaʻoaʻoga. Ae manatu isi, e taulau manuia le olaga o se tasi, pe a lelei le auala e feutagaʻi ai ma aiga, uō po o ē faigaluega faatasi. Peitaʻi, e ono manatu se auauna a le Atua, e taulau manuia pe a maua faaeaga i le faapotopotoga, ma tele iʻuga lelei mai i le auaunaga.

² Ae o le ā sou manatu e faatatau i le mauaina o se olaga taulau manuia? Seʻi mafaufau i nisi e te manatu i ai o loo taulau manuia, ma e te faaaloalogia ma vaai maualuga i ai. O le ā se uiga mataʻina e tutusa uma ai i latou? Po o i latou o ni ē e taualoa, pe taʻutaʻua foʻi? O au tali i na fesili, o le a iloa ai mea o loo i lou loto, ma e telē se aafiaga o lenā mea i au filifiliga, faapea ou sini i le olaga.—Luka 6:45.

3. (i) Sa faapefea ona taulau manuia le olaga o Iosua? (ii) O le ā o le a tatou talanoaina?

³ Pe e silasila Ieova iā i tatou o ni ē e taulau manuia? O le mea lenā e sili ona tāua, auā e faalagolago lo tatou ola i lona finagalo malie. Na tuuina atu iā Iosua le galuega faigatā o le taʻitaʻia o le fanauga a Isaraelu i totonu o le Nuu Folafolaina. Sa faatonuina o ia e Ieova ina ia faitau le Tulafono a Mose “i le ao ma le pō,” ma ia mulimulituʻi i mea o loo tusia ai. I le Iosua 1:7, 8, sa faamautinoa atu ai e Ieova iā Iosua e faapea, “ona manuia ai lea o ou ala, ma e gaoioi ai ma le poto.” O le mea moni, sa taulau manuia le olaga o Iosua. Ae faapefea i tatou? E faapefea ona tatou  iloa o loo ōgatusa o tatou manatu ma le silafaga a Ieova, e faatatau i le taulau manuia? Ina ia tali na fesili, seʻi o tatou iloiloina olaga o ni tane se toʻalua o loo taʻua i le Tusi Paia.

PE NA TAULAU MANUIA SOLOMONA?

4. Aiseā na taulau manuia ai le olaga o Solomona?

⁴ Sa faamanuiaina ma taulau manuia Solomona mo le tele o tausaga, ona o lona mataʻu ma usiusitaʻi iā Ieova. Na ia talosaga iā Ieova mo le atamai e taʻitaʻia ai le nuu. O lea, na faamanuiaina ai o ia i le atamai ma le tele o le ʻoa. (Faitau le 1 Tupu 3:10-14.) O lona atamai ʻe sili atu nai lo o le atamai o tagata uma i Sasaʻe, ma le atamai uma o Aikupito.’ Na taʻutaʻua foʻi o ia “i nuu uma o loo siʻomia ai.” (1 Tu. 4:30, 31) A tuu mai i aso nei, o le tupe maua a Solomona i le tausaga, e silia ma le tasi le piliona tālā Amerika. (2 No. 9:13) Sa maoaʻe lona tomai i le taulimaina o mataupu, fausiaina o fale, faapea faiga faapisinisi. Ioe, sa taulau manuia le olaga o Solomona, a o ia mauaina pea le finagalo malie o Ieova.—2 No. 9:22-24.

5. O le ā na taʻua e Solomona e faatatau i ē taulau manuia?

⁵ I le tusi o Failauga, na taʻua ai e Solomona e leʻi faasesēina o ia i le manatu, e na o ē mauʻoa ma taʻutaʻua e mauaina le fiafia ma taulau manuia. Ua ia faapea mai: “Ua oo ina ou iloa e leai se mea e sili atu mo i latou, nai lo o le olioli ma faia le mea lelei i le olaga o se tasi; i le ma lea, ia taʻitasi le tagata ma ʻai ma inu ma fiafia i mea lelei ona o ana galuega mamafa uma. O le meaalofa lea mai i le Atua.” (Fai. 3:12, 13) Na iloa e Solomona, e sili atu ona aogā na meaalofa iā i latou e mauaina le finagalo malie o le Atua, faapea se faiā lelei ma Ia. O lea na ia faapea mai ai: “O le faaiʻuga lenei o mea uma ua faalogo i ai: Ia matataʻu i le Atua moni ma tausi i ana poloaʻiga. Auā o le matafaioi lea a tagata.”—Fai. 12:13.

6. E faapefea i le faaaʻoaʻoga a Solomona, ona tatou malamalama ai i le uiga o le taulau manuia?

⁶ Sa taulau manuia Solomona mo le tele o tausaga, ona o lona mataʻu i le Atua. ʻNa faaauau ona ia alofa iā Ieova i lona savali i faatonuga a Tavita lona tamā.’ (1 Tu. 3:3) Sa faatonuina o ia e le Atua e fausia se malumalu matagofie mo le tapuaʻiga moni, ma na ia tusia foʻi tusi e tolu o le Tusi Paia. E fesoasoani le faaaʻoaʻoga lelei a Solomona a o faamaoni iā Ieova, e tatou te iloa ai le uiga tonu o le taulau manuia, faapea le auala e maua ai. E manatu le toʻatele, e mafai ona taulau manuia se tasi, pe afai e mauʻoa, atamai, taʻutaʻua ma maua le pule. Peitaʻi, na taʻua e Solomona, e faatauvaa na mea, ma o “le ʻai a le matagi.” E lē faamalieina le manaʻo o i latou e saʻilia le tele o tupe, ma e masani ona popole ina neʻi mou atu a latou meafaitino.—Faitau le Failauga 2:8-11, 17; 5:10-12.

7, 8.  Aiseā e leʻi tumau ai pea ona faamaoni Solomona, ma o le ā le iʻuga?

⁷ Peitaʻi, e leʻi tumau pea ona usiusitaʻi Solomona. Ua faapea mai le Afioga a le Atua: ʻUa oo ina toeaina Solomona, ona faaliliuina lea e ana avā o lona loto ina ia mulimuli atu i isi atua; ma e leʻi atoatoa foʻi lona loto iā Ieova lona Atua, e pei o le loto o Tavita lona tamā. Ua faia e Solomona o mea leaga i luma o Ieova, e leʻi matuā mulimuli foʻi o ia iā Ieova e pei o Tavita lona tamā.’—1 Tu. 11:4-6.

⁸ O le lē fiafia o le finagalo o Ieova iā Solomona, na ia fetalai ai e faapea: ʻAuā ua e lē tausia laʻu feagaiga ma aʻu tulafono na ou poloaʻiina ai oe, o le a ou sasaeese ai le malo mai iā te oe, ma  ou tuuina atu i lau auauna.’ (1 Tu. 11:11) Pagā se iʻuga faanoanoa! E ui sa taulau manuia Solomona, ae e leʻi faaauau ona ia faia le mea e sili ona tāua, o le faamaoni lea iā Ieova. O lea, ia fesili ifo le tagata lava ia, ʻPo o le a ou taumafai e faatatauina lesona mai le faaaʻoaʻoga a Solomona, ina ia avea ai o sē e taulau manuia?’

SE OLAGA TAULAU MANUIA

9. Pe na taulau manuia le olaga o Paulo i manatu o tagata o le lalolagi? Faamatala.

⁹ Sa eseese le olaga o le aposetolo o Paulo mai le tupu o Solomona. E leʻi iai sona nofoālii, pe faiʻaiga faatasi foʻi ma tupu. Sa iai taimi na ia lagona ai le fia ʻai, fia inu, mālūlū faapea le lē lavalavā. (2 Kori. 11:24-27) Na ia tuua ona tofi maualuluga sa iai i le lotu Iutaia, ina ua ia talitonu o Iesu o le Mesia. O lea, sa itagia ai o ia e taʻitaʻi lotu Iutaia, ma faafalepuipuiina, sasaina, ma fetogi ai o ia i maa. Sa upuleagaina, sauāina ma taʻuleagaina Paulo faatasi ma ona uso Kerisiano. O lea, na ia faapea mai ai i le 1 Korinito 4:11-13: “Ua avea i matou ma otaota o le lalolagi, ma mea ua lafoaʻiina mai i mea uma, ua oo mai lava i aso nei.”

10. O le ā le ituaiga o olaga na ono maua e Paulo?

¹⁰ Sa ola aʻe Paulo i se aiga e taualoa, ma na aʻoaʻoina o ia e Kamalielu, o se tasi o faiaʻoga aloaʻia. O lea na ia tusi ai e faapea: “Na sili loʻu agaʻigaʻi i luma i le lotu Iutaia nai lo o le toʻatele o laʻu tupulaga.” (Kala. 1:14) Sa ia malamalama ma lelei lana tautala i le faa-Eperu ma le faa-Eleni. Sa ia maua foʻi le tele o le saʻolotoga ma faamanuiaga, ona o ia o se tagatānuu o Roma. I le vaaiga a le lalolagi, e foliga mai sa sologa lelei le olaga o Paulo. Na semanū e na te maua se tulaga taualoa, pe ana ia saʻilia pea se lumanaʻi manuia i le lalolagi. Peitaʻi, sa ia filifilia se olaga e foliga mai, ua ia poto poto toe valea, i manatu o ona tauaiga. Aiseā?

11. O ā mea sa sili ona tāua iā Paulo, ma aiseā?

¹¹ O le alofa o Paulo iā Ieova, na sili atu ai ona tāua iā te ia le faia o Lona finagalo, nai lo o le saʻilia o ʻoa ma se tulaga taʻutaʻua. Sa ia maua le poto saʻo e faatatau i le upu moni. O lea, sa ia faatāuaina ai le taulaga togiola, le faiva faa-Kerisiano, faapea lona faamoemoe i le lagi. I le vaaiga a le lalolagi, e leai se aogā o na mea. Sa malamalama Paulo, sa tatau ona foʻia le tuuaʻiga a Satani e faapea, e mafai ona ia faaliliueseina tagata mai le tapuaʻi atu i le Atua. (Iopu 1:9-11; 2:3-5) Po o ā lava faigatā na ia fesagaʻia,  ae sa maumauaʻi Paulo e faamaoni iā Ieova, ma faaauau ona tapuaʻi atu iā te Ia. E lē tau mafaufau o tagata i na vala, pe a latou faavasegaina le taulau manuia.

12. Aiseā e tatau ai ona e faamoemoe pea iā Ieova?

¹² Po o lou faanaunauga foʻi lenā? E lē faigofie ona tatou tausisi i le faamaoni. Peitaʻi, e tatou te maua faamanuiaga a Ieova faapea lona finagalo malie, pe afai e tatou te faamaoni pea iā te ia. (Faata. 10:22) O le faia faapea, o le a tatou tofo ai i aogā i le taimi lenei, ae faapea foʻi i le lumanaʻi. (Faitau le Mareko 10:29, 30.) E lē faalagolago lo tatou faamoemoe “i ʻoa e lē tumau, ae i le Atua o lē e foaʻi maia le tele o mea iā i tatou ina ia tatou fiafia ai.” E tatou te ʻteua oloa mo i tatou lava o le faavae lelei lea mo le lumanaʻi, ina ia tatou taofimau ai i le ola moni.’ (1 Timo. 6:17-19) O lea, pe a tatou toe tepa i tua, e mautinoa na tatou filifilia se olaga e sili ona taulau manuia.

O LE MEA E IAI LO OUTOU ʻOA

13. O le ā le fetalaiga a Iesu e faatatau i le faaputuina o ʻoa?

¹³ I le Mataio 6:19-21, na fetalai ai Iesu e faatatau i ʻoa e faapea: “Aua tou te toe faaputuina mo outou ʻoa o le lalolagi, auā o loo iai mogamoga ma le ʻele e faaumatia ai, o loo iai foʻi tagata gāoi e osofaʻi atu ma gaoia. A ia outou faaputu ʻoa i le lagi e lē o iai ni mogamoga po o le ʻele e faaumatia ai, e leai foʻi ni tagata gāoi e osofaʻi atu ma gaoia. O le mea e iai lo outou ʻoa, e iai foʻi ma o outou loto.”

14. Aiseā e lē atamai ai le saʻilia o ʻoa a le lalolagi?

¹⁴ E tele mea e ono faasino atu i ai ʻoa. E ono aofia ai mea sa taʻua e Solomona, e pei o le tulaga taualoa, taʻutaʻua po o le mauaina o le pule. E taitutusa le fetalaiga a Iesu, ma le manatu na taʻua e Solomona i le tusi o Failauga e faapea, e lē tumau ai pea ʻoa a le lalolagi. E faigofie ona mou atu ma faaleagaina na ʻoa. Na tusi le polofesa o F. Dale Bruner e faapea: “O le tulaga taʻutaʻua e lē tumau, auā e sau ma toe mou atu. O le tagata e taʻutaʻua i le asō, e lē amanaʻia taeao. E mafai ona e mauʻoa i le asō, ae e mativa taeao. . . . O le alofa o [Iesu] i tagata, na ia ʻaiʻoi mai ai e ʻalofia le fia taʻutaʻua ona e iʻu ai i mafatiaga. E finagalo o ia [e] fiafia [ona] soo. ʻE lē tumau pea le taulau manuia o se tagata, talu ai o loo suia le tulaga o le lalolagi.’” E ui ina malamalama le toʻatele i lenā mea, ae lē suia ai o latou manatu. Ae faapefea oe?

15. O le ā le ituaiga o taulau manuia e tatau ona tatou saʻilia?

¹⁵ Ua aʻoaʻoina e nisi taʻitaʻi lotu e faapea, e tatau ona taofia so o se taumafaiga lava mo le saʻilia o se olaga taulau manuia. Peitaʻi, e lē o le uiga lenā o le fetalaiga a Iesu. Sa ia timaʻia ona soo e suia mea e latou te faamuamua, ma  fautuaina i latou e faaputu “ʻoa i le lagi,” lea e lē mafai ona faaleagaina. E tatau ona tatou taumafai malosi, ina ia avea o ni ē e taulau manuia i le silafaga a Ieova. Ua atagia mai i upu a Iesu, o i tatou lava e faia le filifiliga, po o le ā e tatau ona faamuamua.

16. O le ā le faamautinoaga ua tatou maua?

¹⁶ Pe afai e moni lo tatou faanaunauga ina ia faafiafiaina Ieova, e mautinoa foʻi o le a ia saunia mai mea e tatou te manaʻomia. E ono faataga e Ieova mo sina taimi ona tatou oo i tulaga sa fesagaʻia e Paulo, e pei o le galala i le fia ʻai po o le fia inu. (1 Kori. 4:11) Peitaʻi, e mafai ona tatou mautinoa i le fautuaga atamai a Iesu e faapea: “Ia aua lava neʻi outou popole ma faapea ane, ʻO le ā se mea tatou te aai ai?’ ʻO le ā se mea tatou te inu ai?’ ʻO le ā foʻi se mea tatou te oofu ai?’ Auā o mea uma ia o loo saʻilia ma le naunau e tagata o nuu ese. Ae ua silafia e lo outou Tamā o i le lagi, o mea uma ia o loo outou manaʻomia. O lea, ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.”—Mata. 6:31-33.

TAULAU MANUIA I LE SILAFAGA A LE ATUA

17, 18. (i) E faapefea ona tatou taulau manuia? (ii) O le ā e lē faalagolago i ai le mauaina o le taulau manuia?

¹⁷ O le manatu tāua lenei: E lē faalagolago le taulau manuia, i mea e tatou te ausiaina. O lea, e lē faalagolago lo tatou taulau manuia, i le mauaina o ni tiute tauave faapitoa i totonu o le faapotopotoga. Peitaʻi, e mafai ona tatou taulau manuia, pe a usiusitaʻi ma faamaoni i le Atua. Ua faamautinoa mai e Ieova i le 1 Korinito 4:2 e faapea: “O le mea e manaʻomia mai i auauna pule, o lo latou faamaoni.” E tatau ona tatou tutumau i le faamaoni, auā na fetalai Iesu: “O lē e tumau seʻia oo i le iʻuga, e faaolaina o ia.” (Mata. 10:22) O lo tatou faaolaina, o se faamaoniga maumaututū lenā o lo tatou taulau manuia.

¹⁸ E manino mai la, e leai se sootaga o le faamaoni i le Atua ma tulaga taualoa, maualuluga o aʻoaʻoga, le tele o tupe, po o tatou tomai ma mea e mafai ona ausia. E mafai lava ona tatou faamaoni i le Atua, e tusa po o ā tulaga e tatou te fesagaʻia. Sa eseese tulaga o auauna a Ieova i le uluaʻi senituri, o nisi e taualoa, ae o nisi e matitiva. Peitaʻi, sa aogā iā i latou le fautuaga a Paulo, ina “ia faia mea lelei, ia tamaoaiga i galuega lelei, ia mataalofa ma nofosauni e tufa atu mea i isi.” O le faia faapea, na mafai ai ona latou “taofimau i le ola moni.” (1 Timo. 6:17-19) O le tulaga foʻi lenā mo i tatou. E ui e eseese o tatou tulaga, ae e tatau ona tatou tutumau i le faamaoni, ma ia “tamaoaiga i galuega lelei.” O le faia faapea, o le a tatou taulau manuia ai i le silafaga a Ieova, ma maua le olioli i le iloaina o loo tatou faafiafiaina lona finagalo.—Faata. 27:11.

19. O le ā ua e maumauaʻi e fai ina ia taulau manuia ai?

¹⁹ Atonu e iai mea e tutupu i le olaga e lē mafai ona tatou suia. Peitaʻi, e mafai ona tatou pulea i tatou lava, i le auala e taulimaina ai na tulaga. Po o ā lava tulaga e oo mai, e tauia a tatou taumafaiga pe a tatou faamaoni. E mautinoa o le faamanuia a Ieova, o le a tatou taulau manuia ai i le taimi nei seʻia oo i le faavavau. O lea, ia tāmau i o tatou mafaufau upu a Iesu i Kerisiano faauuina e faapea: ʻIa e faamaoni seʻia oo i le oti, ona ou avatu lea iā te oe le pale o le ola.’—Faaa. 2:10.

[Fesili mo le Suʻesuʻega]

[Ata i le itulau 6]

I le vaaiga a le lalolagi, e foliga mai sa ono sologa lelei le olaga o Paulo

[Ata i le itulau 7]

Na taulau manuia Paulo i le olaga