1, 2. (i) O le ā le uiga o le upu Eperu ua faaliliuina mo le “mamalu”? (ii) O ā fesili o le a talanoaina i lenei mataupu?

O LE ā e tau i ai lou mafaufau pe a e faalogo i le upu “mamalu”? Pe e te mafaufau i le matagofie o foafoaga a Ieova? (Sala. 19:1) Pe e te mafaufau i le mamalu ma le viiga e maua e tagata mauʻoa, atamamai, ma taulau manuia? I le Tusi Paia, o le upu Eperu na faaaogā mo le “mamalu,” e uiga atu i le mamafa o se mea. I aso anamua, sa fua le tāua o se tupe siliva i lona mamafa. O le māfuaaga lea ua faasino atu ai upu ua faaliliuina mo le mamalu, i le tautele ma le tāua o se mea.

² E masani ona faamamaluina e tagata i latou e taʻutaʻua ma iai le tulaga pule. Ae o le ā e silasila i ai Ieova pe a ia faamamaluina se tasi? Ua faapea mai le Faataoto 22:4, “o le iʻuga o le lotomaulalo ma le mataʻu iā Ieova, o le tamaoaiga, o le mamalu ma le ola lea.” Ae na tusi Iakopo e faapea: “Inā faamaulalo ia outou i luma o le silafaga a Ieova, ona faaeaina lea o outou e ia.” (Iako. 4:10) O le ā le mamalu ua tuuina mai e Ieova iā i tatou? O le ā e taofia i tatou mai le mauaina o lenā mamalu? E faapefea ona tatou fesoasoani i isi ina ia maua lenā mamalu?

3-5. O ā auala ua faamamaluina ai i tatou e Ieova?

³ Na talitonu le faisalamo na faamamaluina o ia e Ieova. (Faitau le Salamo 73:23, 24.) E faapefea ona faamamaluina e Ieova tagata usiusitaʻi? E ala i le taʻitaʻia ma faamanuia i latou i le tele o auala. Ua ia fesoasoani i tagata e malamalama i lona finagalo, ma faataga i latou e atiaʻe se faiā māfana ma Ia.​—1 Kori. 2:7; Iako. 4:8.

⁴ Ua tuuina mai e Ieova le ʻoa tautele po o le  faiva faa-Kerisiano. (2 Kori. 4:1, 7) E viia Ieova pe a tatou auai i le talaʻiga. O le faia faapea o le a tatou fesoasoani ai i isi, ma faamamaluina ai i tatou e Ieova. Ua folafola mai e Ieova: “Ou te faamamaluina o ē e faamamaluina aʻu.” (1 Samu. 2:30) E faamamaluina e Ieova i latou e auai i le faiva e ala i le tuuina iā i latou o se igoa lelei, e faamaonia ai lona finagalo malie. E taʻuleleia foʻi i latou e isi i le faapotopotoga.​—Faata. 11:16; 22:1.

⁵ O le ā le faamoemoe mo ē e usiusitaʻi iā Ieova? Ua folafola mai e le Tusi Paia e faapea: “Ona ia faaeaina lea o oe ina ia fai ma ou tofi le laueleele. E te vaai atu foʻi i le faaumatiaga o tagata amioleaga.” (Sala. 37:34) Ua iai i auauna a Ieova le faamoemoe pupula o le ola e faavavau.​—Sala. 37:29.

6, 7. Aiseā na lē talitonu ai le toʻatele o Iesu o le Mesia?

⁶ Aiseā e faafaigatā ai ona tatou maua le mamalu mai iā Ieova? O se tasi o vala, o le soona faatāua lea o manatu o ē e leai sa latou faiā lelei ma Ieova. Na faapea mai Ioane na faatuatua le toʻatele o taʻitaʻi iā Iesu. “Peitaʻi, ona o le ʻau Faresaio, ua latou lē faailoa mai ai o ia, ina neʻi tutuliese i latou mai i le sunako. Auā ua sili lo latou naunau i le viiga mai i tagata, nai lo o le viiga mai i le Atua.” (Ioa. 12:42, 43) Sa lē tatau ona faatāua e na taʻitaʻi manatu o le ʻau Faresaio.

⁷ Na faamanino e Iesu le māfuaaga na lē talitonu ai le toʻatele o tagata o ia o le Mesia. (Faitau le Ioane 5:39-44.) Sa faatalitali tagata Isaraelu mo le tele o tausaga i le taunuu mai o le Mesia. Ina ua amata le faiva a Iesu, sa mafaufau nisi i valoaga a Tanielu, ma manatu ua toeitiiti ona taunuu lea o le Mesia. Ae i masina na muamua atu, sa mafaufau nisi iā Ioane le Papatiso, o ia o le Mesia. (Luka 3:15) Peitaʻi, ina ua taunuu le Mesia, e leʻi talitonu i ai i latou na aʻoaʻoina le Tulafono. Aiseā? Na fetalai atu Iesu iā i latou: “E faapefea ona outou talitonu, pe afai tou te talia le viiga mai i tagata, ae tou te lē o saʻilia le viiga mai i le Atua e toʻatasi?”

8, 9. E faapefea ona tatou faatāua le viiga mai i tagata nai lo o le mamalu mai iā Ieova? Ia faaaogā le faataʻitaʻiga i molī.

⁸ E ono faigofie ona tatou faatāua le mamalu e maua mai i tagata nai lo o le Atua. Ina ia faataʻitaʻi, seʻi o tatou faatusatusa le mamalu i le malamalama. E faatumulia le vanimonimo i malamalama eseese. Atonu na faafiafiaina oe i le anoanoaʻi o fetu matagofie sa e vaaia i se pō lagilelei. (1 Kori. 15:40, 41) Peitaʻi, e iai aai e faafaigatā ona e vaaia ni fetu i le pō, ona o le anoanoaʻi o molī. Pe e māfua ona e sili atu le malamalama o molī nai lo o fetu o le lagi? E leai. Peitaʻi, e sili atu ona latalata mai molī o le aai iā i tatou, ma e faafaigatā ai ona tatou vaaia ni fetu. Ina ia mafai ona tatou vaaia le matagofie o fetu, e tatau ona tatou ō ese mai molī o le aai.

⁹ I se tulaga talitutusa, o viiga mai i tagata e tatou te ono lē faatāuaina ai le mamalu mai iā Ieova. E lē talia e nisi le upu moni, ona e popole i manatu o o latou tauaiga ma uō. E ono popole foʻi auauna a Ieova i manatu o tagata. O se faataʻitaʻiga, e tofia se uso e galue i se oganuu e toʻatele tagata e masani ai.  Peitaʻi, e lē iloa e le toʻatele o ia o se Molimau a Ieova. Po o le a ia popole ai ma lē talaʻi atu i lenā vaipanoa? O se isi faaaʻoaʻoga, e ono faifai nisi i se tasi e naunau e faalautele lana auaunaga iā Ieova. Po o le a ia faalogo ea iā i latou e lē faatāuaina la latou auaunaga iā Ieova? Pe atonu na faia foʻi e se tasi se agasala matuiā. Po o le a ia natia lana agasala, ona o le popole i ona faaeaga i le faapotopotoga, faapea ona tauaiga ma uō? O le a ia talosagaina le fesoasoani a toeaina, pe afai e sili atu ona tāua iā te ia lana faauōga ma Ieova.​—Faitau le Iakopo 5:14-16.

10. (i) O le ā e tupu pe a tatou faatāua naʻuā manatu o tagata? (ii) O le ā le iʻuga o le faaalia o le lotomaulalo?

¹⁰ Atonu e te taumafai e avea oe ma Kerisiano taʻumatuaina, peitaʻi, e masani ona avatu e se uso fautuaga iā te oe. E mafai ona e taliaina fautuaga ma maua aogā. Ae e mafai foʻi ona e teena ona o le faamaualuga, soona faatāua naʻuā o oe lava, pe faia foʻi faamolemolega mo au gaoioiga. Seʻi faapea o loo outou galulue ma nisi uso ma tuafāfine i se galuega. Pe e te popole po o ai e mauaina le viiga ona o lenā galuega lelei? Ia manatua, “o lē e lotomaulalo e na te mauaina le mamalu.”​—Faata. 29:23.

11. O le ā e tatau ona tatou faia pe a viiviia i tatou e isi, ma aiseā?

¹¹ E tatau i toeaina ma isi uso o loo aapa atu mo faaeaga i le faapotopotoga, ona faaeteete i le manaʻonaʻo i viiga mai i tagata. (1 Timo. 3:1; 1 Tesa. 2:6) O le ā e tatau ona faia e se uso, pe a viiviia o ia ona o se mea lelei na ia faia? E lē tatau ona ia faatū se maa faamanatu mo ia lava, e pei ona faia e le tupu o Saulo. (1 Samu. 15:12) Pe e mafaufau o ia o le fesoasoani a Ieova ua ia taulau manuia ai i le taimi nei faapea le lumanaʻi? (1 Pete. 4:11) O o tatou faalogona moni pe a viiviia e isi i tatou, e iloa moni ai le ituaiga mamalu o loo tatou mananaʻo i ai.​—Faata. 27:21.

12. O le ā na taofia nisi tagata Iutaia mai le faalogo atu iā Iesu?

¹² O o tatou faanaunauga sesē, e ono faafaigatā ai ona tatou maua le mamalu o Ieova. O le iʻuga, e tatou te lē fia faalogo ai i le mea moni i nisi taimi. (Faitau le Ioane 8:43-47.) O se faataʻitaʻiga, na faailoa e Iesu na teena o ia e nisi tagata Iutaia, ona sa latou faanaunau e faia le manaʻo o lo latou tamā le Tiapolo.

13, 14. (i) E faapefea ona gaoioi ai o tatou faiʻai pe a tautatala tagata? (ii) O ai e tatau ona tatou faalogo i ai?

¹³ O o tatou faanaunauga e mafai ona aafia ai la tatou faalogo. (2 Pete. 3:5) Na foafoaina e Ieova i tatou ma le tomai e mafai ona lē amanaʻia ai nisi o leo e tatou te faalogoina. Pe a e faalogologo lelei i le taimi lenei, atonu e tele ni leo na e faalogoina i ni minute ua mavae, ae e te leʻi amanaʻiaina. E iai i o tatou faiʻai le tomai e faalogoina ai ni leo eseese, ma mafai ai foʻi ona tatou uaʻi atu i se leo patino. Ae e faigatā i le faiʻai ona fai lenā mea pe a tautatala tagata. Ua iloa e tagata suʻesuʻe, e tasi lava le tagata e mafai ona tatou uaʻi i ai pe a tautala. O lona uiga, pe a tautatala ni tagata se toʻalua, e tasi lava le tagata e mafai ona tatou faalogo i ai. O lea, e te filifili po o ai e te fia faalogo i ai. I taimi o Iesu, na mananaʻo tagata Iutaia e faia le manaʻo o le Tiapolo. O le  māfuaaga lenā na latou lē fia faalogo ai iā Iesu.

¹⁴ I se auala faafaatusa, e mafai ona tatou faalogo i le “atamai” po o le “valea.” (Faata. 9:1-5, 13-17) E tatou te filifili po o ai e tatou te faalogo i ai. E faalagolago lenā mea iā i tatou, po o ai o loo tatou mananaʻo e faamalieina. E tatou te fia faalogo ma mulimuli iā Iesu, pe afai o i tatou o ana mamoe. (Ioa. 10:16, 27) Ua faapea mai Iesu e ʻfiafia ona soo i le upu moni.’ (Ioa. 18:37) “E lē iloa e mamoe leo o tagata ese.” (Ioa. 10:5) E maua e i latou e lotomaulalo e mulimuli iā Iesu le mamalu mai le Atua.​—Faata. 3:13, 16; 8:1, 18.

15. Na faapefea i puapuaga o Paulo ona faamamaluina ai isi?

¹⁵ O lo tatou tutumau, o se tasi lea o auala e fesoasoani ai i isi e maua le mamalu o le Atua. Na tusi Paulo i le faapotopotoga i Efeso e faapea: “Ou te talosaga atu ai, ia aua neʻi outou faavaivai i nei puapuaga ua oo iā te aʻu ona o outou, auā o nei mea e faamamaluina ai outou.” (Efe. 3:13) Na faapefea i puapuaga o Paulo ona faamamaluina ai le faapotopotoga i Efeso? O lona auauna i ona uso e ui i puapuaga, na faailoa atu ai e sili ona tāua i le olaga o se Kerisiano lana auaunaga. Pe ana faavaivai Paulo, atonu e ono mafaufau uso e lē tāua la latou faauōga ma Ieova, o la latou faiva, faapea lo latou faamoemoe. O le tumau o Paulo, na faailoa atu ai o le avea ma soo o Keriso e sili atu nai lo o se isi lava faataulaga.

16. O ā puapuaga na fesagaʻia e Paulo i Lusa?

¹⁶ Seʻi mafaufau i le aafiaga o le maelega ma le tumau o Paulo i ona uso. I le Galuega 14:19, 20, ua faailoa mai ai le mea na tupu iā Paulo i Lusa: “Ua taunuu ane tagata Iutaia mai i Anetioka ma Ikonio, ma latou faaoso i le motu o tagata. Ona latou fetogi ai lea o Paulo i maa ma toso o ia i tua o le aai, ma le manatu ua oti o ia. Peitaʻi, ina ua siʻosiʻomia o ia e le ʻausoo, ona ia tū lea i luga ma alu atu i le aai. I le aso na sosoo ai, ua la ō atu ai ma Panapa i Teipe.” Seʻi mafaufau i le savaliga a Paulo i le aso na sosoo ai mo le 60 maila (100 km), a o lea faatoʻā māeʻa ona fetogia o ia i maa, ma toetoe ina oti ai.

17, 18. (i) Pe na malamalama Timoteo i le tele o puapuaga na fesagaʻia e Paulo? (ii) O le ā le aafiaga o le tumau o Paulo iā Timoteo?

¹⁷ E lē o taʻua i le tusi o Galuega pe na iai faatasi Paulo ma Timoteo i le  taimi na fetogia ai o ia. Peitaʻi, na iloa e Timoteo le mea na tupu iā Paulo. I le tusi lona lua a Paulo iā Timoteo na ia faapea atu ai: “Ua e mulimulituʻi i aʻu aʻoaʻoga, o loʻu olaga.” Na iloa e Timoteo le taimi na fetogia ai Paulo i Lusa. E lē gata i lea, o le taimi foʻi na toso ai o ia e tagata Iutaia i fafo o le aai o Anetioka, ma na taumafai foʻi nisi e fetogia o ia i Ikonio.​—2 Timo. 3:10, 11; Galu. 13:50; 14:5, 19.

¹⁸ Na iloa e Timoteo le tumau o Paulo i sauāga, ma e tele ni lesona na ia aʻoaʻoina mai ai. Ina ua asiasi Paulo i Lusa, na ia mātauina ai le avea o Timoteo ma faaaʻoaʻoga lelei i le faapotopotoga, auā “ua taʻuleleia o ia e uso i Lusa ma Ikonio.” (Galu. 16:1, 2) Mulimuli ane, na agavaa Timoteo e tauave le tele o isi tiute tauave.​—Fili. 2:19, 20; 1 Timo. 1:3.

19. E faapefea i lo tatou tutumau ona fesoasoani i isi?

¹⁹ O le a fesoasoani lo tatou faia pea o le finagalo o Ieova, i le avea ai o talavou ma auauna taʻumatuaina. E mātau e talavou le auala e tatou te molimau ai i le talaʻiga, faapea le auala e taulimaina ai faafitauli o le olaga. Na onosaia e Paulo le tele o mea, ina ia fesoasoani ai i tagata e maua le ola e faavavau.​—2 Timo. 2:10.

20. Aiseā e tatau ai ona tatou saʻilia pea le mamalu mai le Atua?

²⁰ E anoanoaʻi māfuaaga ua alagatatau ai ona tatou “saʻilia le viiga mai i le Atua e toʻatasi.” (Ioa. 5:44; 7:18) E foaʻi e Ieova le “ola e faavavau i ē e saʻilia le mamalu.” (Faitau le Roma 2:6, 7.) O lo tatou tutumau e mafai ona fesoasoani i isi e tumau ai ma le faamaoni, ma maua le ola e faavavau. O lea, ia aua neʻi faatagaina se mea e taofia i tatou, mai le mauaina o le mamalu mai le Atua.