E tele ina maua e tagata suʻesuʻe mai toega o mea, ni faamaoniga e fesootaʻi atu i nisi o loo taʻua i le Tusi Paia. I le 2011, na tusia ai e ni tagata faitofā Isaraelu se lipoti i se suʻesuʻega, o se pusa e teu ai ponaivi o tagata oti, ua 2,000 tausaga talu ona iai.

O lenei pusa o loo iai tusitusiga nei: “O Miriama le afafine o Iesua le atalii o Kaiafa, le ositaulaga o Maasia mai Beth ʹImri.” O Kaiafa le ositaulaga sili, lea na aofia i le faapuapuagatiaina ma le fasiotia o Iesu. (Ioa. 11:48-50) Ua faapea mai le tusitala o le talafaasolopito o Flavius Josephus, o lenā ositaulaga o Iosefa po o Kaiafa. O sona tauaiga e ona le pusa lea na maua. Na maua muamua se isi pusa, ma na manatu o le ositaulaga e ana, ona o loo iai le faaupuga, Yehosef bar Caiapha, po o lona uiga, o Iosefa le atalii o Kaiafa. * O lea, o Miriama o se tauaiga o Kaiafa.

E tusa ma faamatalaga mai le Israel Antiquities Authority (IAA), o le pusa na teu ai ponaivi o Miriama, na maua mai ni gāoi na eliina tuugamau o tagata anamua. O suʻesuʻega i lenei pusa faapea faamatalaga o loo tusia ai, ua faamaonia ai le saʻo aʻiaʻi o nei faamatalaga.

Ua iloa mai i lenei pusa se isi mea fou. O loo taʻua ai “Maasia,” o le vaega lona 24 o le vaevaega o ositaulaga, na galulue feauauaʻi i le malumalu i Ierusalema. (1 No. 24:18) E tusa ma faamatalaga a le IAA, o tusitusiga i lenā pusa ua faailoa mai ai o le aiga o Kaiafa, e mai i le vaega o Maasia.

O loo taʻua foʻi i tusitusiga Beth ʹImri. Na taʻua e le IAA, e mafai ona faasino atu i le igoa o le aiga ositaulaga, po o atalii o Imere. O i latou na tupuga mai ai, na aofia i le vaega o Maasia. (Esera 2:36-37; Nee. 7:39-42) Ae e mafai foʻi ona faasino atu Beth ʹImri, i le nuu po o le nofoaga na tupuga mai ai Miriama ma lona aiga. Po o le ā lava le tulaga, ae o faamatalaga e faatatau i lenei pusa, ua faamaonia ai sa iai moni tagata o loo taʻua i le Tusi Paia, faapea o latou aiga.