1, 2. (i) O ā faalogona o auauna a Ieova, a o ola ma soifua ai i lenei faiga o mea? (ii) O le ā le nofoaga saogalemu mo auauna a le Atua?

 PE E iai se taimi e te mafaufau ai o oe o se tagata ese i lenei lalolagi? O faalogona na o auauna a Ieova mo le tele o tausaga. O se faaaʻoaʻoga, a o tolauapi tagata o Ieova i Kanana, sa latou “folafola atu i le lautele e faapea, o i latou o tagata ese ma aumau.”​—Epe. 11:13.

² O Kerisiano faauuina, o “tagatānuu o le lagi.” E latou te vaai iā i latou o ni “tagata ese ma ē e aumau” i lenei faiga o mea. (Fili. 3:20; 1 Pete. 2:11) E faapena foʻi “isi mamoe,” ʻe lē o ni tagata o le lalolagi i latou, e pei foʻi o Keriso, e lē o se tagata o le lalolagi o ia.’ (Ioa. 10:16; 17:16) E ui i lea, e iai se nofoaga e sili ona saogalemu mo i latou, e lē mafai ona vaaia e mata. O le ā lenā nofoaga? Na faapea mai Mose i le Salamo 90:1: “Ieova e, ua fai oe ma mea e matou te nonofo ai i lea tupulaga ma lea tupulaga.” Na faapefea ona avea Ieova ma ʻmea e nonofo ai’ ana auauna i aso anamua? O le ā le auala ua avea ai o ia ma nofoaga saogalemu mo ana auauna i le taimi lenei, faapea le lumanaʻi?

3. O le ā ua faatusaina i ai Ieova i le Salamo 90:1, ma aiseā?

³ E faatusa Ieova i nisi taimi i le Tusi Paia i mea e tatou te vaaia, ina ia malamalama lelei ai i ona uiga. I le Salamo 90:1, ua faatusa Ieova i se nofoaga e malu ai. O le aiga o se nofoaga e maua ai  le alofa, filemu, faapea le puipuiga. O Ieova o le faaaʻoaʻoga sili o le alofa. Ua talafeagai ai ona faatusaina o ia i se nofoaga saogalemu. (1 Ioa. 4:8) O ia o le Atua o le filemu, o lē saunia se mea e ʻnonofo ai ma le saogalemu’ ana auauna faamaoni. (Sala. 4:8) O lea, seʻi mātau le auala na ia feutagaʻi ai ma augātamā faamaoni, e amata mai iā Aperaamo.

4, 5. Sa faapefea ona avea Ieova ma nofoaga saogalemu mo Aperaamo?

⁴ Na fetalai Ieova iā Aperaamo: ʻIa e tuua lou atunuu, o lou aiga, ae malaga atu i le atunuu ou te faasino atu iā te oe.’ Pe afai na popole Aperaamo ina ua faalogo i lenā fetalaiga, atonu na toe mou atu na lagona ina ua toe fetalai Ieova: ʻOu te faia oe ma nuu tele, ou te faamanuia iā te oe, ou te matuā faamamaluina foʻi lou igoa. Ou te faamanuia atu i ē o faamanuia iā te oe, ou te faamalaia atu i lē ua fetuu iā te oe.’​—Kene. 12:1-3.

⁵ Na faataunuu e Ieova lana folafolaga e avea o ia ma nofoaga saogalemu mo Aperaamo ma ana fanau. (Kene. 26:1-6) O se faaaʻoaʻoga, na ia taofia Farao ma Apimeleko mai le faaleagaina o Sara, faapea le taumafai e fasiotia Aperaamo. Sa ia puipuia foʻi Isaako ma Repeka. (Kene. 12:14-20; 20:1-14; 26:6-11) Ua faapea mai le Salamo 105:14, 15, e leʻi tuuina atu e Ieova i se tagata e faoa a latou mea, “ae na ia aʻoaʻia tupu ona o i latou, e faapea: ʻAua neʻi o outou fetagofi atu i ē ua ou faauuina, aua foʻi neʻi o outou faia se mea leaga i aʻu perofeta.’”

6. (i) O le ā le faatonuga sa avatu e Isaako iā Iakopo? (ii) O ā faalogona o Iakopo e faatatau i lenā faatonuga?

⁶ Na tausia foʻi e Ieova Iakopo. Ina ua saʻilia sana avā, na faapea atu Isaako lona tamā: “Aua e te faaipoipo atu i se afafine o tagata Kanana. Ia e tulaʻi ma alu atu i Patanarama i le aiga o Petueli le tamā o lou tinā, ma faaipoipo atu i se afafine o Lapana.” (Kene. 28:1, 2) Na usitaʻi Iakopo i lenā faatonuga ma tuua lona aiga, ae alu i se faigāmalaga umi i Karana. (Kene. 28:10) Atonu sa ia taumānatu, po o le ā le umi o le a tuua ai lona aiga. Pe faamata o le a talia o ia e Lapana, ma avatu iā te ia se avā e mataʻu i le Atua? Pe afai o faalogona na o Iakopo, e mautinoa  sa mou mālie atu ina ua taunuu i Lusa, lea pe tusa ma le 60 maila (100 km) le mamao mai Peresepa. Aiseā?

7. Na faapefea ona faalaeiauina Iakopo i le faaaliga sa ia vaaia?

⁷ Na fetalai Ieova iā Iakopo i se miti i Lusa: “Ou te faatasi ma oe ma tausia oe i lou ala o loo e alu ai ma toe aumaia oe i lenei laufanua, auā ou te lē tuua oe seʻia ou faia mea ua ou fai atu ai iā te oe.” (Kene. 28:15) Seʻi mafaufau i le naunau o Iakopo e vaai i le faataunuuga o lenā folafolaga. E mautinoa na matuā faamalosia ai o ia. E tatou te malamalama i na faalogona, pe afai na tatou tuua o tatou aiga atonu ina ia auauna ai i se isi vaipanoa. E mautinoa na tatou tofo i le tausiga a Ieova.

8, 9. Na faapefea ona avea Ieova ma nofoaga saogalemu mo Iakopo, ma o le ā ua tatou aʻoaʻoina mai ai?

⁸ Na faafeiloaʻia ma le māfana e Lapana Iakopo, ina ua ia taunuu i Karana. Sa ia tuuina atu Lea ma Rasela e fai ma avā a Iakopo. Peitaʻi, sa agaleaga Lapana iā Iakopo, e ala i le suia faasefulu o lona totogi. (Kene. 31:41, 42) E ui i lea, sa onosaia e Iakopo nei faiga lē tonu, ma faatuatuaina le tausiga a Ieova. O le faamaoniga, e faatonuina e Ieova Iakopo e toe foʻi i Kanana, “ua tele ana lafumanu, o ana auauna teine, o auauna tane, o kamela ma asini.” (Kene. 30:43) O lona lototalisapaia na ia tatalo ai: “E lē tatau iā te aʻu lou alofa faamaoni ma le agalelei uma ua e faaalia i lau auauna, auā na ou sopoʻia na o aʻu ma loʻu tootoo lenei Ioritana, a o lenei ua lua aʻu vaega.”​—Kene. 32:10.

⁹ Ua moni ai le tatalo a Mose i le Salamo 90:1 e faapea: “Ieova e, ua fai oe ma mea e matou te nonofo ai i lea tupulaga ma lea tupulaga.” O loo taʻua i le Iakopo 1:17, “e lē fesuisuiaʻi pe liliu” Ieova. O loo faaauau ona avea Ieova ma nofoaga saogalemu mo ana auauna faamaoni. I le ā le itu?

10. O le ā le auala o loo avea ai Ieova ma o tatou nofoaga saogalemu?

¹⁰ Pe e te lagona le saogalemu pe afai na e molimau faasaga i se vaega e faia soligatulafono? E mautinoa e leai, ma e te manaʻomia ai se puipuiga. E fefefe tagata i le taʻitaʻi o lenā vaega, auā e sauā, fasioti tagata ma taufaaʻoleʻole. O le tulaga lenā o auauna a Ieova i aso nei. O loo latou molimau ma le lototele e faatatau iā Ieova, ma taʻusalaina lona fili sili o Satani. (Faitau le Faaaliga 12:17.) E lē o taulau Satani i le taofia o auauna a Ieova mai le talaʻi atu ma le lototele. O le māfuaaga, o loo faamanuia ma avea pea Ieova ma nofoaga saogalemu mo i tatou, aemaise i nei aso e gata ai. (Faitau le Isaia 54:14, 17.) O lea, aua neʻi faatagaina Satani e aveesea i tatou mai i lo tatou nofoaga saogalemu.

11. O le ā se lesona e tatou te aʻoaʻoina mai i augātamā faamaoni?

¹¹ Na faataatia e augātamā faamaoni se faaaʻoaʻoga lelei mo i tatou. Sa latou nonofo faatasi ma tagata Kanana, ae latou te leʻi mulimuli i o latou ala leaga. (Kene. 27:46) E leʻi taʻitaʻia i latou i ni tulafono. Peitaʻi, sa aʻoaʻoina i latou e faatatau iā Ieova ma ona uiga.  Na faamaonia i o latou olaga, le avea o Ieova ma o latou nofoaga saogalemu. Po o e taumafai e faaaʻoaʻo iā i latou i le auala e filifilia ai au aumea ma faafiafiaga? E faanoanoa, ona e manatu nisi Kerisiano e lē afāina le auala o loo ola ai tagata o le lalolagi a Satani. Pe afai o lou tulaga lenā, e tatau ona e tatalo i lenā mataupu. Ia aua lava neʻi taaʻina oe i le uiga manatu faapito o lenei lalolagi.​—2 Kori. 4:4; Efe. 2:1, 2.

12. (i) O ā sauniuniga ua saunia e Ieova mo i tatou? (ii) O ā ou faalogona e faatatau i na sauniuniga?

¹² Ua aumaia e Ieova sauniuniga faaleagaga e puipuia ai i tatou. Ina ia teena togafiti a Satani, e tatau ona tatou faaaogā atoatoa na sauniuniga. E aofia ai sauniga, tapuaʻiga a le aiga, faapea toeaina. Ua tofia i latou e Ieova e faamalosia i tatou, a o tatou tauivi ma faigatā o le olaga. (Efe. 4:8-12) Na tusi le uso o George Gangas, o se tasi sa avea ma sui o le Vaega Pule e faapea: “Pe a ou faatasi ma tagata o Ieova, e tai pei o loo oʻu faatasi ma loʻu aiga i le parataiso faaleagaga.” Pe e faapena ou lagona?

13. O le ā e tatou te aʻoaʻoina mai le Eperu 11:13?

¹³ Na lotomalilie augātamā faamaoni, e faaesea i latou mai tagata sa latou ola faatasi. Na taʻua i le  palakalafa muamua, sa latou “folafola atu i le lautele e faapea, o i latou o tagata ese ma aumau.” (Epe. 11:13) Po o e maumauaʻi e faaaʻoaʻo iā i latou? E lē faigofie i taimi uma le faia o lenā mea. E feagai ma faigatā i latou uma e mananaʻo e auauna iā Ieova. (Efe. 6:12) Ae e mafai ona tatou taulau, e ala i le fesoasoani a Ieova, faapea le lagolagosua a o tatou uso. O lea, ia maufaatuatuaina Ieova, ma avea o ia ma o tatou nofoaga saogalemu.

14. O le ā le “aai” na faatalitali i ai Aperaamo?

¹⁴ E tāua ona tatou faaaʻoaʻo iā Aperaamo, e ala i le taulaʻi atu pea i le taui. (2 Kori. 4:18) Na tusi Paulo i le Eperu 11:10 e faapea: “Na ia faatalitali atu i se aai e iai ona faavae moni, o le tufuga ma o lē na fausia lea aai, o le Atua lea.” E faasino atu lenā “aai” i le Malo faa-Mesia, lea sa faatalitali i ai Aperaamo. Peitaʻi, ua pule lenā “aai” i le lagi  i le taimi lenei. Ua toe o se aga, ona pule lea o lenā pulega i le lalolagi atoa. Pe e te talitonu i le Malo o le Atua o se pulega moni lava? O le ā se aafiaga o lenā mea iā te oe, faapea mea e faamuamua i lou olaga?​—Faitau le 2 Peteru 3:11, 12.

15. O le ā le iʻuga o i latou e faatuatuaina lenei faiga o mea?

¹⁵ O le a faateteleina “puapuaga,” a o tatou lalata atu i le iʻuga o lenei lalolagi. (Mata. 24:7, 8) O le a matuā leaga le tulaga o mea, a o faagasolo le puapuaga tele. Atonu o le a faaleagaina mea uma ma matataʻu ai tagata. (Sapa. 3:16, 17) Ua faapea mai le Faaaliga 6:15-17, e latou te sulufaʻi atu “i totonu o ana ma papa o mauga.” O lea, e lē faasaoina tagata pe a taumafai e lalafi i ana. E lē mafai foʻi e faalapotopotoga faaletagata ona laveaʻia i latou.

16. O le ā la tatou vaaiga i le faapotopotoga Kerisiano, ma aiseā?

¹⁶ E avea pea Ieova ma nofoaga saogalemu mo ona tagata. Ua faapea mai le Sapakuka 3:18, o le a tatou ʻfiafia i le Atua o le faaolataga.’ E tatou te lē iloa le auala e avea ai Ieova ma o tatou nofoaga saogalemu, a o faagasolo le puapuaga tele. E pei o le nuu o Isaraelu ina ua tuua Aikupito, e faapena le maopoopo ma le mataalia o le “motu o tagata e toʻatele” i faatonuga mai iā Ieova. (Faitau le Esoto 13:18; Faaa. 7:9) Atonu o le a auala mai faatonuga a Ieova i faapotopotoga. O loo taʻua i le Isaia 26:20 “potu i totonu,” ma atonu e faasino atu i faapotopotoga i le lalolagi atoa. (Faitau le Isaia 26:20.) Pe e tāua iā te oe sauniga? Pe e vave ona e tali atu i faatonuga a Ieova, lea e auala mai i le faapotopotoga?​—Epe. 13:17.

17. E faapefea ona avea Ieova ma nofoaga saogalemu mo ē na faamaoni pea e oo i le oti?

¹⁷ E avea Ieova ma nofoaga saogalemu mo ē na faamaoni e oo i le oti, a o leʻi oo i le puapuaga tele. O le ā le uiga o lenā manatu? Ina ua mavae le maliliu o Aperaamo, Isaako ma Iakopo, na fetalai Ieova iā Mose e avea pea o ia ma o latou Atua. (Eso. 3:6) Na toe taʻua e Iesu na upu, ma na ia faapea mai: “O ia o le Atua, o ē e ola ae lē o ē ua oti, auā ua latou ola uma iā te ia.” (Luka 20:38) O lea, e silasila Ieova iā i latou na faamaoni pea e oo i le oti, e pei o loo feola pea, ona e mautinoa e toe faatutūina i latou.​—Fai. 7:1.

18. E faapefea ona avea Ieova ma nofoaga saogalemu mo ona tagata i le lalolagi fou?

¹⁸ O le a avea foʻi Ieova ma nofoaga saogalemu mo ona tagata i le lalolagi fou. Ua faapea mai le Faaaliga 21:3: “Faauta! Ua iai i tagata le faleʻie o le Atua, e mau o ia ma i latou.” E faasino lea i le faaaogāina e Ieova o Iesu e pule i le lalolagi i le afe tausaga. Pe a māeʻa ona faia e Iesu le finagalo o Ieova mo le lalolagi i le iʻuga o le afe tausaga, ona ia toe faafoʻi lea o le Malo i lona Tamā. (1 Kori. 15:28) O le a pulea e Ieova tagata lelei atoatoa i lenā taimi. E tatou te tulimataʻia lenā taimi matagofie. O lea, seʻi o tatou faaaʻoaʻo i augātamā faamaoni, i le avea o Ieova ma o tatou nofoaga saogalemu.