I le Lomiga lona XX o le Jewish Antiquities, na faasino atu ai le tusitala o Flavius Josephus i le maliu o “Iakopo le uso o Iesu, lea na taʻua o le Keriso.” Na talitonu nisi faitofā na tusia e Josephus lenā manatu. Peitaʻi, e leʻi talitonu le toʻatele na tusia e Josephus nisi o faamatalaga e faatatau iā Iesu, sa iai i se tasi o tusitusiga na taʻua o le Testimonium Flavianum. E faapea lona faitauina:

ʻI lenā vaitaimi sa iai se tagata atamai e suafa iā Iesu. E tele galuega mamana na ia faia, ma o ia foʻi o se faiaʻoga na fiafia tagata e faalogologo i ai. Na tosina tagata Iutaia ma tagata o Nuu Ese iā te ia. O ia o le Keriso. E leʻi tuua e ona soo o ia, ina ua faasalaina o ia e Pilato i le koluse ona o alii sili o Iuta. Na ia faaali i ona soo ina ua faatūina o ia i le aso lona tolu, e tusa ai ma faamatalaga a perofeta i le tele o mea mataʻina e faatatau iā te ia. O ia o le afuaga o i latou ua taʻua o Kerisiano, lea e oo mai lava i aso nei.’​—Josephus​—The Complete Works, faaliliuina e William Whiston.

Na iai se fefinauaʻiga talu mai le faaiʻuga o le senituri lona 16. O se finauga i le va o ē na talitonu i le saʻo aʻiaʻi o na faamatalaga, faapea i latou e leʻi talitonu na tusia e Josephus na tusitusiga. O lea na suʻesuʻeina ai e Serge Bardet, o se tusitala o le talafaasolopito mai Falani, se mataupu na fefinauaʻi ai mo le tele o senituri. Na ia faamatuaina le tusi na tusia ai lana saʻiliʻiliga o le Le Testimonium Flavianum—Examen historique considérations historiographiques (The Testimonium Flavianum​—A Historical Study With Historical Considerations).

O Josephus, e lē o se Kerisiano. O ia o se tusitala o le talafaasolopito o Iutaia sa talitonu i talitonuga faa-Iutaia. E toʻatele le ʻaufaitofā e lē talitonu e mafai ona taʻua e se tusitala Iutaia Iesu “o le Keriso.” Peitaʻi, na taʻua e Josephus Iesu “o le Keriso.” Na ia faaaogā le taʻu “o le Keriso,” ona sa ia faaaogāina le gagana Eleni. O se faiga e masani ai i tusitusiga Eleni le faaopoopo o le muānauna (o le) i le igoa o se tagata. Sa faasino atu Josephus iā Iesu “o le Keriso.” O se faamaoniga lenā e iloa ai sa soifua moni Iesu. O le māfuaaga lea na faapea mai ai Serge Bardet, e tatau i tagata ona iloilo lenā tulaga.

Ae pe na toe teuteuina e se tasi na tusitusiga e faaaogā ai metotia a Josephus? I le suʻesuʻega a Bardet, na iloa ai e lē mafai ona tupu se mea faapena. O le māfuaaga, e matuā faigatā lava i se tasi ona faataʻitaʻi i tusitusiga a Josephus, ona e matuā tuese lava ana tusitusiga.

O lea, o le ā le māfuaaga o le fefinauaʻiga? Na taʻua e Bardet, na sili ona tetee le toʻatele o faitofā i tusitusiga o loo i le Testimonium, nai lo o isi tusitusiga anamua. O le māfuaaga, e leʻi mananaʻo le toʻatele e talitonu o Iesu o le Keriso.

E lē mautinoa pe na suia e saʻiliʻiliga a Bardet manatu a nisi o faitofā e faatatau i tusitusiga o loo i le Testimonium Flavianum. Peitaʻi, na iai se aafiaga o lenā saʻiliʻiliga iā Pierre Geoltrain, o sē e iai sona tomai faapitoa i talitonuga a Iutaia ma le uluaʻi faa-Kerisiano. Sa ia faifai i le taimi muamua i tusitusiga o loo i le Testimonium, faapea i latou e talitonu i ai. Peitaʻi, na suia lona manatu ona o saʻiliʻiliga a Bardet. Na ia faapea mai, “e lē tatau ona toe manatu se tasi e leʻi tusia e Josephus faamatalaga o loo i le Testimonium Flavianum.”

E ui i lea, e tele atu faamaoniga ua iloa e Molimau a Ieova mai le Tusi Paia, e faamaonia ai o Iesu o le Keriso.​—2 Timo. 3:16.