NA VALOIA e Iesu o le a faaumatia atoatoa le malumalu o Ieova. O le mea lenā na tupu ina ua faaumatia Ierusalema i le 70 T.A., e ʻautau a Roma i lalo o le taʻitaʻiga a Tito. (Mata. 24:2) Na faia e le Emeperoa Roma o Julian fuafuaga ina ia toe fausia le malumalu.

Na taʻua Julian o le emeperoa faapaupau mulimuli lea o Roma. O ia o le atalii o le uso o Konesetatino le Sili, ma na aʻoaʻoina o ia e i latou na faapea mai o Kerisiano. Peitaʻi, na ia teena mea na ia aʻoaʻoina, ina ua avea o ia ma emeperoa i le 361 T.A. O loo taʻua i tusi o le talafaasolopito, o ia o se Aposetate, auā na ia teena aʻoaʻoga a le lotu.

Na ʻinoʻino Julian iā i latou na faapea mai o Kerisiano. Atonu o se tasi māfuaaga, na fasiotia e i latou na faapea mai o Kerisiano lona tamā faapea ona tauaiga, i le ono o ona tausaga. Na taʻua e nisi o faitofā i mataupu faalotu e faapea, na uunaʻia e Julian tagata Iutaia e toe fausia le malumalu. Na ia manatu e faamaonia ai o Iesu o se perofeta pepelo. *

E mautinoa sa naunau Julian e toe fausia le malumalu. Peitaʻi, e lē o mautinoa pe na ia amataina galuega o le toe fausia o le malumalu. Ae pe afai o le tulaga lenā, e lē mautinoa foʻi pe aiseā na taofia ai le galuega. Po o le ā lava le mea na tupu, ae na fasiotia Julian a o leʻi atoa le lua tausaga talu ona avea o ia ma emeperoa, ma e leʻi toe fausiaina le malumalu.