1, 2. (i) Na faapefea ona tatou faia le filifiliga e auauna iā Ieova? (ii) O ā fesili o le a iloiloina i lenei mataupu?

UA FAIA e le faitau miliona se filifiliga atamai e auauna iā Ieova ma mulimuli i le faaaʻoaʻoga a Iesu. (Mata. 16:24; 1 Pete. 2:21) O le tuuina atu iā Ieova o se filifiliga tāua. O lea, e lē lava le suʻesuʻeina o mataupu faavae o le Tusi Paia. E tatau ona iloilo māeʻaeʻa le Tusi Paia, ma faamalosia lo tatou faatuatua i lo tatou tofi ua folafola mai e Ieova mo le lumanaʻi. E na o i latou e faaauau ona aʻoaʻoina e faatatau iā Ieova ma Iesu o le a mauaina lenā tofi.​—Ioa. 17:3; Roma 12:2.

² Ina ia maua pea se faiā lelei ma Ieova, e tatau ona tatou faia filifiliga atamai e faafiafiaina ai o ia. O lea, o le a taliina i lenei mataupu fesili nei: (1) O le ā lo tatou tofi, ma o le ā lona tāua iā i tatou? (2) E faapefea ona faamautinoa e tatou te maua lenā tofi? (3) O le ā e fesoasoani iā i tatou e faia ai ni filifiliga atamai?

3. O le ā le tofi o le a maua (i) e le ʻaufaauuina (ii) “isi mamoe”?

³ E toʻaitiiti o le a maua le tofi o le ola e lē mafai ona oti i le lagi. O le a latou maua le faaeaga faapitoa o le pule faatasi ma Iesu i lona Malo. (1 Pete. 1:3, 4) O i latou e maua lenā tofi e tatau ona toe fanaufouina. (Ioa. 3:1-3) Ae faapefea “isi mamoe” o loo galulue faatasi ma le ʻaufaauuina, i le talaʻia o le tala lelei o le Malo? (Ioa. 10:16) O le a latou maua le tofi na melea e Atamu ma Eva, o le ola e faavavau i le lalolagi e aunoa ma le oti ma puapuaga.  (Faaa. 21:1-4) Na folafola atu foʻi e Iesu i le pagota o le a maua lona tofi ina ua ia faapea atu: “E moni ou te fai atu iā te oe i le asō, O le a ta faatasi ma oe i le Parataiso.”​—Luka 23:43.

4. O ā faamanuiaga ua tatou olioli ai i le taimi nei?

⁴ E aofia foʻi i lo tatou tofi faamanuiaga o loo tatou maua i le taimi nei. Ua tatou maua le toʻafilemu faapea se faiā lelei ma Ieova, ona o le faatuatua i le taulaga togiola a Iesu. (Roma 3:23-25) Ua tatou malamalama i folafolaga o loo i le Tusi Paia mo le lumanaʻi. E tatou te maua le fiafia ona o le alofa o le ʻauuso i le lalolagi aoao. O se faaeaga foʻi le avea o i tatou ma Molimau a Ieova. O lea, ua iai māfuaaga e tatou te lotofaafetai ai i lo tatou tofi faaleagaga.

5. (i) O le ā o loo taumafai Satani e fai i tagata o Ieova? (ii) E faapefea ona tatou ʻalofia mailei a Satani?

⁵ E taumafai Satani e faaosoosoina tagata o Ieova e faia filifiliga sesē, ma melea ai lo latou tofi faaleagaga. O lea, ia tatou faaeteete i ana mailei. (Nu. 25:1-3, 9) Ua taumafai malosi Satani e faasesēina i tatou, ona ua lata tele mai lona iʻuga. (Faitau le Faaaliga 12:12, 17.) Ina ia teena mailei a Satani, e tatau ona tatou talisapaia lo tatou tofi faaleagaga. (Efe. 6:11) O lea seʻi o tatou aʻoaʻoina ni lesona mai le auala na vaai ai Esau i le tofi o le ulumatua.

6, 7. O ai Esau, ma o le ā le tofi sa tatau ona ia maua?

⁶ Pe ā ma le 4,000 tausaga ua mavae, na fanaua ai e Repeka le masaga o Esau ma Iakopo. Na matuā eseese lenei masaga. Na ʻpoto Esau e tulimanu, ona o ia o le tagata o le vao,’ ae na avea ʻIakopo o se tagata e lē ponā e nofo i faleʻie.’ (Kene. 25:27) O le faamaoni o Iakopo ma lona lē faia o se mea leaga, na avea ai o ia o se tagata e taʻuleleia.

⁷ Na maliu Aperaamo ina ua 15 tausaga o Iakopo ma Esau. Peitaʻi na manatua e Ieova lana folafolaga na faia iā Aperaamo. Na toe faia e Ieova lenā folafolaga iā Isaako, o le a maua e atunuu uma faamanuiaga e ala mai i le “fanau” a Aperaamo. (Faitau le Kenese 26:3-5.) Na faailoa e Ieova i lenā folafolaga, o le a tupuga mai iā Aperaamo le “fanau” o loo taʻua i le Kenese 3:15, po o le Mesia. O Esau o le ulumatua a Isaako. Na ia maua le aiā e faataunuu ai le folafolaga na faia e Ieova iā Aperaamo. Sa mafai ona tupuga mai iā te ia le Mesia. Ae pe na talisapaia e Esau lenā tofi?

8, 9. (i) O le ā le filifiliga na faia e Esau i lona tofi? (ii) O le ā na iloa mulimuli ane e Esau e faatatau i lana filifiliga, ma na faapefea ona ia tali atu?

⁸ Ina ua sau Esau i se tasi aso mai le vao, na ia vaaia Iakopo o loo fai lana sitiū. Ona ia faapea atu lea: ʻFaamolemole, seʻi aumai faavave sina sitiū mūmū, ua ou matuā lēlavā lava!’ Ona tali atu lea o Iakopo: “Ia faatau muamua mai iā te aʻu lou tofi o le ulumatua!” O le ā le filifiliga na faia e Esau? Na ia faapea atu: “O le ā le aogā o lea tofi iā te aʻu?” Na sili ona tāua iā Esau le sitiū, nai lo o lona tofi o le ulumatua. Ina ia faamautinoa e Iakopo ua faatau e Esau lona tofi, na ia faapea atu: “Ia e tautō muamua mai iā te aʻu.” E leʻi  toe faatuai Esau, ae faatau loa lona tofi o le ulumatua. Na ʻavatu loa e Iakopo iā Esau le falaoa ma le sitiū, ua ia ʻai ma inu. Ona ia tulaʻi lea ma alu. O lea, ua ʻinoʻino Esau i le tofi o le ulumatua.’​—Kene. 25:29-34.

⁹ Ina ua afu le soifua o Isaako, sa faamautinoa e Repeka e maua e Iakopo le tofi o le ulumatua na faatau i ai e Esau. Ina ua iloa e Esau le valea o lana filifiliga sa fai, ona ia tauanau lea o Isaako e faapea: ʻLoʻu tamā e, ia e faamanuia mai foʻi iā te aʻu, pe e lē o totoe ea se faamanuiaga mo aʻu?’ Ina ua faailoa i ai e lē mafai ona toe suia le faamanuiaga ua ave iā Iakopo, ona tagi leotele lea o Esau ma alu ese.​—Kene. 27:30-38.

10. O le ā le silafaga a Ieova iā Esau ma Iakopo, ma aiseā?

¹⁰ O le ā e tatou te aʻoaʻoina mai iā Esau? Na sili ona tāua iā te ia ona faanaunauga faaletino, nai lo o faamanuiaga sa ono ia maua mai lona tofi. E leʻi talisapaia e Esau le tofi o le ulumatua, ma e leʻi alofa foʻi iā Ieova. E leʻi mafaufau foʻi i le iʻuga e oo i ana fanau ona o lana filifiliga. Peitaʻi na talisapaia e Iakopo lona tofi. Na ia faia foʻi filifiliga atamai ina ia puipuia ai. O se faaaʻoaʻoga, na lotomalie Iakopo e mulimuli i le faatonuga a ona mātua ina ua saʻilia sana avā. (Kene. 27:46–28:3) E leʻi faigofie iā Iakopo ona faia lenā vala. Peitaʻi, na faamanuia e Ieova lona usitaʻi, e ala i le tupuga mai iā te ia o le Mesia. O le ā le silafaga a Ieova iā Esau ma Iakopo? Na fetalai Ieova: “Na ou alofa iā Iakopo, ae na ou ʻinoʻino iā Esau.”​—Mala. 1:2, 3.

11. (i) Aiseā e talafeagai ai le fautuaga a Paulo mo Kerisiano? (ii) Aiseā na taʻua ai e Paulo le faitaaga, ina ua ia taʻua le faaaʻoaʻoga a Esau?

¹¹ E tatou te aʻoaʻoina se lesona mai iā Esau. Na lapataʻi Paulo i Kerisiano ina “ia leai sē e faitaaga po o se tasi na te lē talisapaia mea paia, e pei o Esau o lē na lafoaʻia lona tofi o le ulumatua ina ia maua ai se ʻaiga e tasi.” (Epe. 12:16) E tatau ona tatou talisapaia mea paia, ina ia mafai ai ona teena faaosoosoga ma puipuia lo tatou tofi faaleagaga. Ina ua talanoa Paulo e faatatau iā Esau, aiseā na ia taʻua ai le faitaaga? O le gaoioi e pei o Esau ma faataga faanaunauga faaletino e pulea i tatou, o le a tatou lolo ai e faia le agasala e pei o le faitaaga. O le iʻuga, o le a melea lo tatou tofi.

12. (i) Ua faapefea ona taumafai Satani e faaosoosoina i tatou? (ii) O ā faaaʻoaʻoga faale-Tusi Paia e mafai ona fesoasoani pe a faaosoosoina i tatou?

¹² E tatou te faia taumafaiga ina ia ʻalofia ai le faaosoosoina o i tatou e faia gaoioiga lē mamā. Pe a faaosoosoina, e tatou te tatalo i le fesoasoani a Ieova ina ia teena ai. (Mata. 6:13) O loo tatou taumafai e faamaoni i lenei lalolagi leaga. Peitaʻi, o loo taumafai foʻi Satani e faaleagaina la tatou faiā ma Ieova. (Efe. 6:12) O Satani o le atua o lenei faiga o mea. Ua ia iloa le auala e faaaogā ai faaosoosoga e maileia ai i tatou. (1 Kori. 10:8, 13) O le ā lau gaoioiga e fai pe a faaosoosoina oe e faamalie ou tuʻinanauga i se auala lē talafeagai? Po o le a vave ona e lolo atu e pei o Esau? Po o le a vave ona e sola ese e pei o Iosefa, ina ua faaosoosoina o ia e le avā a Potifara?​—Faitau le Kenese 39:10-12.

13. (i) Ua faapefea ona gaoioi le toʻatele i aso nei e pei o Iosefa? (ii) Ua faapefea ona gaoioi le toʻatele e pei o Esau? (iii) O le ā e tatau ona fai ina ia aua ai neʻi pei i tatou o Esau?

¹³ O loo fesagaʻia e o tatou uso faaosoosoga. Ua faia e le toʻatele filifiliga atamai e pei o Iosefa ma faafiafia ai Ieova. (Faata. 27:11) Peitaʻi ua faia e le toʻatele filifiliga sesē e pei o Esau, ma lē leoleomalu ai lo latou tofi. E toʻatele e faateʻaina ma aʻoaʻia i tausaga taʻitasi ona o le faia o amioga lē mamā. E tāua ai i le taimi nei ona sauniunia o tatou loto e fesagaʻia ai tofotofoga i le lumanaʻi. (Sala. 78:8) O le a tatou iloiloina auala e lua e sauniunia ai i tatou e teena faaosoosoga ma faia filifiliga atamai.

14. O ā fesili e fesoasoani iā i tatou e ʻinoʻino ai i le leaga ae pipii atu i le lelei?

¹⁴ O le laasaga muamua: ia mafaufau i aafiaga o lau agasala. O le malosi o lo tatou alofa mo Ieova, o le loloto foʻi lenā o lo tatou talisapaia o lo tatou tofi faaleagaga. Pe a tatou alolofa i se tagata, e tatou te lē faia se gaoioiga e faatigā ai o ia. Nai lo o lea, e tatou te taumafai malosi e faafiafia o ia. O lea, ia faaalu se taimi e mafaufau ai i āuga o le agasala, ma tigā e oo ai iā i tatou ma isi. Ia fesili ifo le tagata lava ia: ʻE faapefea i aʻu amioga manatu faapito ona aafia ai laʻu faiā ma Ieova? Ae faapefea loʻu aiga? E faapefea ona aafia ai le faapotopotoga? Po o le a ou faatigā i isi tagata ona o aʻu amioga? (Fili. 1:10) E tatau foʻi ona tatou fesili ifo: ʻPe e tutusa le fiafia e maua mai feusuaʻiga lē mamā, ma āuga e oo i ai? Po ou te fia pei o Esau, o lē na tagi leotele ina ua ia iloa le sesē o lana filifiliga sa fai? (Epe. 12:17) O le manatunatu loloto i na fesili, o le a fesoasoani iā i tatou e ʻinoʻino ai i le leaga ae pipii atu i le lelei. (Roma 12:9) O le alofa moni iā Ieova, o le a tatou galulue malosi ai e puipuia lo tatou tofi.​—Sala. 73:28.

15. O le ā e fesoasoani iā i tatou e teena faaosoosoga, ma puipuia la tatou faiā ma Ieova?

¹⁵ Lona lua: o le sauniunia lea o i tatou e teena faaosoosoga. Ua saunia e Ieova le tele o auala e fesoasoani iā i tatou ma puipuia ai foʻi la tatou faiā ma ia. O se faaaʻoaʻoga, ua tatou maua aogā mai le suʻesuʻeina o le Tusi Paia, sauniga, galuega talaʻi faapea le tatalo. (1 Kori. 15:58) Pe a faailoa atu o tatou faalogona iā Ieova i le tatalo ma auai i le  talaʻiga, e sauniunia ai i tatou e teena faaosoosoga. (Faitau le 1 Timoteo 6:12, 19.) Ia faia pea a tatou taumafaiga, pe a tatou naunau e teena faaosoosoga. (Kala. 6:7) O loo faamatilatila lenā vala i le mataupu e 2 o le tusi o Faataoto.

16, 17. O le ā e fesoasoani iā i tatou i le faia o filifiliga atamai?

¹⁶ Ua faalaeiauina i tatou e le mataupu e 2 o le tusi o Faataoto, ina ia taumafai malosi e maua le atamai ma le mafaufau lelei. Ua foaʻi mai e Ieova nei uiga e fesoasoani iā i tatou e faia ai filifiliga saʻo. E lē gata i lea, e pulea ai foʻi o tatou faalogona, nai lo o le faamalieina i se auala lē talafeagai. Ae faatoʻā mafai ona tatou faia faapea, pe afai e tatou te naunau moni i ai. Ua faapea mai le Faataoto 2:1-6: “Loʻu atalii e, afai e te talia aʻu upu ma teu i lou loto aʻu poloaʻiga e pei o se oloa tāua, ina ia uaʻi atu ai ou taliga i le atamai, ma faasaga atu ai foʻi lou loto i le faautaga loloto; afai foʻi e te valaau atu mo le malamalama ma ōle atu mo le faautaga loloto, afai e te saʻili pea i ai e pei ona saʻili i le siliva, ma afai foʻi e te suʻesuʻe i ai e pei o le oloa lilo, ona e malamalama ai lea i le mataʻu iā Ieova ma e maua ai le poto i le Atua. Auā o Ieova e na te foaʻi mai le atamai; e mai i lona fofoga foʻi le poto ma le faautaga loloto.”

¹⁷ O le faatatauina o na fautuaga e fesoasoani iā i tatou e faia ai ni filifiliga atamai. E faatoʻā mafai ona teena faaosoosoga, pe afai e faataga afioga a Ieova e suia o tatou tagata lilo i totonu. E lē gata i lea, pe afai e tatou te tatalo pea mo lana taʻitaʻiga, ma saʻili i le atamai o le Atua e pei ona saʻili i le oloa lilo.

18. O le ā e tatau ona tatou maumauaʻi e fai, ma aiseā??

¹⁸ E foaʻi mai e Ieova le poto, malamalama, faautaga loloto, faapea le atamai, pe a tatou saʻili pea i ai. O le atiaʻe o na uiga, e faaleleia ai la tatou faiā ma Ieova. O le malosi foʻi o la tatou faiā ma Ieova, e puipuia ai i tatou pe a feagai ma faaosoosoga. O le mafuta atu pea iā Ieova ma mataʻu iā te ia, o lo tatou taumafai malosi foʻi lea e ʻalofia le faia o le agasala. (Sala. 25:14; Iako. 4:8) O le atamai faapea le faauōga ma Ieova, e fesoasoani iā i tatou e faia filifiliga atamai e faafiafia ai o ia, ma puipuia ai lo tatou tofi.