1, 2. O le ā e faaauau pea ona tatou faia?

NA FAAPEA mai se tuafafine ua toeitiiti 35 tausaga talu ona faaipoipo: “E malamalama lelei laʻu tane iā te aʻu, e pei foʻi ona ou malamalama iā te ia. Ae a o faagasolo tausaga, e faaauau pea ona faamasani le tasi i le isi.” E tatou te ioe i le moni o lenā manatu i a tatou paaga faaipoipo ma a tatou uō.

² E tatou te fiafia e iloa lelei ē e pele iā i tatou. Peitaʻi e sili atu le fiafia i le aʻoaʻoina e faatatau i la tatou Uō sili o Ieova. E ui i lea, e lē mafai ona tatou malamalama i mea uma e faatatau iā te ia. (Roma 11:33) O le a faaauau ona tatou aʻoaʻoina uiga o Ieova e oo i le faavavau, ma atili faalolotoina ai lo tatou talisapaia o na uiga.​—Fai. 3:11.

3. O le ā o le a iloiloina i lenei mataupu?

³ Na fesoasoani le mataupu ua mavae e faaloloto lo tatou talisapaia o uiga o Ieova, o le faigofie ona faalatalata iā te ia ma le lē faailogatagata. O le a iloiloina i lenei mataupu uiga o Ieova o le aao mafola ma le magafagafa. E fesoasoani iā i tatou ia malamalama e “agalelei Ieova i mea uma lava,” ma alofa mutimutivale “i ana galuega uma.”​—Sala. 145:9.

4. O le ā e uiga i ai le aao mafola?

⁴ O le ā le uiga o le aao mafola? Ua faapea mai le Galuega 20:35, “e sili le fiafia e maua i le foaʻi atu i lo o le talia mai.” O le tagata e aao mafola e  fiafia e faaaogā lona taimi, malosi ma meatotino e fesoasoani ai i isi. O le aao mafola e lē fuaina i le taugatā o le meaalofa, ae o le uunaʻiga lelei e faia ai. (Faitau le 2 Korinito 9:7.) E leai se isi faaaʻoaʻoga e sili atu nai lo o lo tatou “Atua fiafia” o Ieova.​—1 Timo. 1:11.

5. Ua faapefea ona faaalia e Ieova le aao mafola?

⁵ Ua faapefea ona faaalia e Ieova le aao mafola? Ua faapea mai le Tusi Paia, “e agalelei Ieova” i tagata uma lava. E foaʻi mai e Ieova mea e manaʻomia e tagata, e aofia ai ma ē e lē tapuaʻi iā te ia. E “na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.” (Mata. 5:45) O lea ina ua talanoa atu Paulo i ē lē talitonu, na ia faapea atu e faia e Ieova mea lelei, “auā na ia foaʻi mai le timu mai i le lagi ma fuata o le tau, na foaʻi mai foʻi le anoanoaʻi o meaʻai ma ua tutumu ai o outou loto i le olioli.” (Galu. 14:17) E aao mafola Ieova i tagata uma.​—Luka 6:35.

6, 7. (i) O ai e sili ona fiafia Ieova e fesoasoani i ai? (ii) O le ā se faataʻitaʻiga e faaalia ai e tausia e Ieova manaʻoga o ana auauna?

⁶ E matuā fiafia Ieova e tausia manaʻoga o ana auauna. Na faapea mai le tupu o Tavita: “Sa ou talavou, a o lenei ua ou toeaina, ae ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.” (Sala. 37:25) Ua tofo le toʻatele o Kerisiano faamaoni i le tausiga a Ieova i o latou olaga.

⁷ O se faataʻitaʻiga, sa feagai se tuafafine paeonia e igoa iā Nancy ma se tulaga faigatā. Sa manaʻomia ona totogi le lisi o lona fale e $66 (tālā Amerika) i le aso na sosoo ai. Peitaʻi ua leai sana tupe. Na ia tatalo iā Ieova e faatatau i le mataupu ma alu loa i lana galuega. Ae o le aso lea e masani ona lē pisi ai le faleʻaiga. Peitaʻi, na faateʻia o ia i le toʻatele o tagata na ō atu i lenā pō. E toʻatele na fiafia i lana auaunaga, ma na maua ai sana tupe faaopoopo. Ina ua faitau lana tupe i lenā pō, sa maua lana $66. Na mautinoa e Nancy na foaʻi e Ieova iā te ia le mea tonu na ia manaʻomia.​—Mata. 6:33.

8. O le ā le meaalofa sili a Ieova mo le fanau a tagata?

⁸ O le meaalofa sili a Ieova mo tagata, o le taulaga togiola lea a lona Alo. I le Ioane 3:16, na fetalai ai Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē  fano tagata uma e faatuatua iā te ia, a ia maua le ola e faavavau.” O loo faasino atu le upu “lalolagi” i le fanau a tagata. Na foaʻi e Ieova lenā meaalofa i tagata uma e filifili e taliaina. E maua e i latou e faatuatua iā Iesu le ola e faavavau. (Ioa. 10:10) O le faamaoniga sili lenā o le aao mafola o Ieova.

9. E faapefea ona tatou faataʻitaʻi i le aao mafola o Ieova?

 ⁹ E faapefea ona tatou faataʻitaʻi i le aao mafola o Ieova? Ua foaʻi mai e Ieova le tele o mea e tatou te fiafia ai. O lea, e tatau foʻi ona tatou naunau e foaʻi atu i isi. (1 Timo. 6:17-19) E tatou te fiafia e foaʻi atu i o tatou aiga, uō ma i latou e manaʻomia le fesoasoani. (Faitau le Teuteronome 15:7.) O le ā e fesoasoani iā i tatou e faaalia le limafoaʻi? O nisi e vaai i ni avanoa e foaʻi atu ai, pe a latou maua se meaalofa. Ua avea Molimau a Ieova ma faaaʻoaʻoga lelei o le limafoaʻi.

10. O le ā se tasi o auala e tatou te faaalia ai le limafoaʻi?

¹⁰ O se tasi o auala sili e faaalia ai le limafoaʻi, o le faaaogā lea o lo tatou taimi ma le malosi e fesoasoani ma faalaeiau ai i isi. (Kala. 6:10) Ia fesili ifo le tagata lava ia: ʻPe ou te naunau e faalogo atu i isi? Pe ou te naunau e fesoasoani atu pe a manaʻomia e se tasi laʻu fesoasoani? O le ā se taimi mulimuli na ou faamālō ai i se tasi o loʻu aiga po o le faapotopotoga foʻi? Pe a faaauau ona tatou “foaʻi atu,” o le a atili ai ona tatou vavalalata atu iā Ieova ma a tatou uō.​—Luka 6:38; Faata. 19:17.

11. O ā ni auala e tatou te faaalia ai le limafoaʻi iā Ieova?

  ¹¹ E tatau foʻi ona tatou limafoaʻi iā Ieova. Ua faalaeiau i tatou e le Faataoto 3:9 ina ia faamamaluina Ieova i a tatou “ʻoa.” O a tatou “ʻoa” e aofia ai le taimi, malosi ma tupe e faaaogā i la tatou auaunaga. E mafai foʻi e fanau iti ona faia foaʻi iā Ieova. Na faamatala e se uso e igoa iā Jason, pe a faia se foaʻi a lo latou aiga i le sauniga, e masani ona tuu e lana fanau le foaʻi i le pusa mo meaalofa. “E latou te fiafia i ai ona latou te manatu o loo latou ʻfoaʻi mo Ieova.’” Pe a amata ona fai e tamaiti foaʻi iā Ieova a o lāiti, o le a latou faia foʻi faapea pe a avea ma tagata matutua.​—Faata. 22:6.

12. O le ā le uiga o le magafagafa?

¹² O se isi uiga matagofie o Ieova o le magafagafa. O le ā le uiga o le magafagafa? (Tito 3:1, 2) O le tagata e magafagafa e faigofie ona lolo atu. E lē soona tausisi i tulafono, inainā pe maumauaʻi i ona manatu. E feutagaʻi foʻi ma isi i se auala agalelei. E nofosauni e faalogo i manatu o isi, e gauaʻi i o latou manaʻoga talafeagai, ma e fetuutuunaʻi ona manatu.

13, 14. (i) E faapefea ona faaalia e Ieova le magafagafa? (ii) O le ā tatou te aʻoaʻoina mai le auala na feutagaʻi ai Ieova ma Lota?

¹³ E faapefea ona faaalia e Ieova le magafagafa? E fetuutuunaʻi Ieova i faalogona o ana auauna, ma faataga i latou e faamalie o latou manaʻoga i se auala talafeagai. Seʻi mafaufau i le auala na ia feutagaʻi ai ma Lota. Ina ua filifili Ieova e faaumatia Sotoma ma Komoro, na ia faatonuina Lota e sola i le mauga. Peitaʻi na talosaga Lota pe e mafai ona sola i se isi nofoaga. Pe a manatu i ai, na talosaga Lota iā Ieova ina ia sui lana faatonuga.​—Faitau le Kenese 19:17-20.

¹⁴ A tatou faitau i lenā tala, atonu e tatou te mafaufau e leʻi malosi le faatuatua o Lota, ma e leʻi usitaʻi. Sa lē tatau ona fefe Lota auā na mafai ona faasaoina o ia e Ieova. Ae na fetuutuunaʻi Ieova ma faataga o ia e sola atu i se isi aai, e ui na finagalo Ieova e faaumatia foʻi lenā aai. (Faitau le Kenese 19:21, 22.) E magafagafa Ieova ma e lē maumaututū i lona finagalo.

15, 16. E faapefea i le Tulafono ona faaalia ai le magafagafa o Ieova? (Tagaʻi i le ata i luga aʻe o le mau autū)

¹⁵ Na faaalia foʻi le magafagafa o Ieova i le Tulafono na tuuina atu iā Isaraelu. O se faataʻitaʻiga, sa mafai ona faaaogā ni manutagi po o ni lupe se lua e fai ai le taulaga, pe afai sa lē gafatia se mamoe po o se ʻoti. Ae faapefea pe a lē gafatia ni manutagi po o ni lupe? Sa faataga e Ieova ona faaaogā le falaoamata. Peitaʻi i lalo o le Tulafono, e na o le “falaoamata lelei” e ave i malo faaaloalogia, sa mafai ona faaaogā. (Kene. 18:6) E faapefea i lenā faataʻitaʻiga ona faaalia ai le magafagafa o Ieova?​—Faitau le Levitiko 5:7, 11.

¹⁶ Seʻi faapea o oe o se tagata Isaraelu mativa, ma ua e avatu le falaoamata e fai ai lau taulaga. Atonu e te lagona le matamuli, pe a vaaia isi o loo faaaogāina manu lelei i a latou taulaga. Peitaʻi ia e manatua, e tāua iā Ieova lau taulaga. Sa faataga i le Tulafono ona  faaaogā le “falaoamata lelei.” O lea, atonu e faapea mai Ieova: ʻE ui e lē tutusa lau taulaga ma isi, peitaʻi ua e faia le mea sili e te mafaia.’ E lē faatalitalia mai e Ieova se mea e tatou te lē mafaia. (Sala. 103:14) Maʻeu se faaaʻoaʻoga lelei o le magafagafa.

17. O le ā le ituaiga o tapuaʻiga e talia e Ieova?

 ¹⁷ E faalaeiauina i tatou i le magafagafa o Ieova, ma e na te taliaina a tatou taulaga pe a faia le mea sili e tatou te mafaia. (Kolo. 3:23) Na faapea mai se tuafafine matua mai i Italia: “Ou te fiafia e talanoa i isi e faatatau i Lē na foafoaina mea. O le pogai lea ou te auai ai pea i le talaʻiga ma faia suʻesuʻega faale-Tusi Paia. Ou te faanoanoa pe a itiiti soʻu sao i le faiva, ona o maʻi o le tino. Peitaʻi, ou te iloa e silafia e Ieova loʻu tulaga, e alofa iā te aʻu ma talisapaia foʻi aʻu taumafaiga.”

18. O le ā se auala e mulimuli ai mātua i le faaaʻoaʻoga a Ieova?

¹⁸ E faapefea ona tatou faataʻitaʻi i le magafagafa o Ieova? Seʻi mafaufau i le feutagaʻiga a Ieova ma Lota. Sa iā Ieova le aiā e faatonu ai Lota i le nofoaga e sola ai. Peitaʻi na ia agalelei iā Lota, faafofoga a o faaleo atu ona manatu, ma faataga o ia e sola i se isi nofoaga. Mātua, pe mafai ona outou mulimuli i le faaaʻoaʻoga a Ieova? Ia faalogo i le manatu o lou alo, ona faia lea o se faaiʻuga talafeagai. E faapefea ona fai lenā mea? Na taʻua i le Olomatamata o Setema 1, 2007, pe a faia e mātua ni tulafono, ia faalogo i manatu o le fanau. O se faataʻitaʻiga, ua mananaʻo mātua e faatulaga se taimi e sau ai lona alo i le fale i le afiafi. E fai e mātua le faaiʻuga, peitaʻi ia faalogo i se manatu o le tamaitiiti ona faatulaga ai lea o se taimi patino. Pe e suia foʻi e mātua lenā taimi patino, pe a lē feteenaʻi le manatu o le tamaitiiti ma mataupu silisili. O le talanoa o mātua i fanau a o leʻi faia se faaiʻuga, e malamalama ai le tamaitiiti ma naunau e usitaʻi.

19. E faapefea ona faataʻitaʻi toeaina i le magafagafa o Ieova?

¹⁹ E tatau foʻi ona taumafai toeaina e faataʻitaʻi i le magafagafa o Ieova. E mafai ona faia faapea e ala i le lē faatalitalia o ni mea se tele mai uso ma tuafāfine. Ia manatua na tāua iā Ieova taulaga a tagata Isaraelu matitiva. Atonu ona o maʻi o le tino ma le tulaga matua, e ono itiiti ai le sao e faia e nisi i le faiva. O le ā e tatau ona fai pe a lotovaivai se tasi ona o na tulaga? E tatau i toeaina ona fesoasoani iā i latou e iloa e tāua iā Ieova le mea sili ua latou mafaia.​—Mare. 12:41-44.

20. O le ā e uiga i ai le magafagafa i le auaunaga iā Ieova?

²⁰ E manatu nisi o le magafagafa, e uiga atu i le faifailemū i le auaunaga i le Atua. (Mata. 16:22) Peitaʻi, ia tatou finafinau ma manatua fetalaiga a Iesu, ina ʻia faamalolosi’ i le auaunaga. (Luka 13:24) Ia paleni la tatou vaai. E fiafia Ieova pe a tatou faia le mea sili i le auaunaga. Ae ia manatua, e na te lē faatalitalia se mea e lē oo i ai lo tatou malosi. O se faaeaga iā i tatou le auauna i se Atua e magafagafa. O le a talanoaina i le mataupu e sosoo ai isi uiga matagofie o Ieova.​—Sala. 73:28.