Pe e te ioe o Iesu o le Faiaʻoga Sili sa iai i le lalolagi? Atonu sa e taumafai e faataʻitaʻi i nisi o auala sa ia aʻoaʻo atu ai, e pei o le faaaogāina o fesili ma talafaatusa. Pe e te silafia sa masani ona faia foʻi e Iesu faaeseesega?

E toʻatele tagata e latou te faia faaeseesega pe a talanoa, ma e te ono faia foʻi faapena e aunoa ma lou iloaina. E te ono faapea atu: “Na latou fai mai foʻi ua pula le aufaʻi, ae o lea e malō lea faʻi.” Pe e faapea foʻi: “Sa matamuli lava le teine ae o lea ua mataʻataʻata.”

I tulaga faapena, e muamua ona e taʻua se manatu po o se mea moni, ona e faia lea o se faaeseesega e ala i le faaaogā o faaupuga e pei o le ae, peitaʻi, nai lo lea, po o i le isi itu. Pe atonu foʻi e te faia se faaeseesega e ala i le faalautele o le manatu, e fesoasoani ai i isi e malamalama i ou manatu, ma ina ia logo lelei foʻi.

E tusa pe e lē masani ona faaaogā faaeseesega i nisi gagana po o aganuu, ae e mafai ona tatou iloa le tāua o le faia faapea. Aiseā? Auā e anoanoaʻi faaeseesega o loo i le Tusi Paia, ma sa masani ona faaaogā e Iesu. O nisi nei o faaaʻoaʻoga: “Pe a tutu e tagata le molī ma tuu i luga o le tuugāmolī ae lē i lalo o se ato e fua ai mea.” “Ou te leʻi sau e faalēaogā [le Tulafono], ae ia faataunuuina.” “Ua outou faalogo i nei upu, ʻAua e te mulilua.’ Ae ou te fai atu iā te outou, ai se tasi e vaavaai pea i se fafine . . . ” “Ua faapea mai le upu, ʻO le mata e sui ai le mata, ma le nifo e sui ai le nifo.’ Ae ou te fai atu iā te outou: Aua le tetee atu i le tagata amioleaga; ae a pō mai e se tasi lou alafau taumatau ia liliu atu i ai le isi.”​—Mata. 5:15, 17, 27, 28, 38, 39.

E fesoasoani isi faaeseesega o loo iai i isi tusi faale-Tusi Paia, e faalautele ai le uiga o se manatu. Mātua, seʻi manatu i le faaeseesega lenei: “O outou tamā foʻi, aua le faatigā loto i a outou fanau, a ia tausia pea i latou i aʻoaʻiga ma apoapoaʻiga a Ieova.” (Efe. 6:4) Atonu e manino mātua i le fautuaga a Paulo pe ana tau ina faapea mai, ia aʻoaʻo fanau i apoapoaʻiga a Ieova. Peitaʻi, na matuā manino lelei le manatu ina ua ia faaaogā le faaeseesega e ʻaua le faatigā iā i latou, a ia tausia i latou i apoapoaʻiga a Ieova.’

Na toe tusi mai Paulo: ʻTatou te lē o tau ma tagata a o agaga leaga uma i mea o i le lagi.’ (Efe. 6:12) E fesoasoani lenā faaeseesega e te malamalama ai i le faigatā o le tauiviga, ona e tatou te lē o tau ma tagata ae o agaga leaga.

O loo iai i le tusi o Efeso le tele o faaeseesega na taʻua e Paulo, lea e fesoasoani iā i tatou e malamalama ai i manatu o Paulo, ma faamanino mai ai mea e tatau ona tatou faia.

O le iloiloina o le siata o loo iai faaeseesega o loo i le Efeso mataupu e 4 ma le 5, atonu o le a e fiafia i ai ma iloa le tāua o faaeseesega. A o faitau i faaeseesega taʻitasi, ia fesili ifo iā te oe lava: ʻO ā oʻu uiga moni? O le ā le auala ou te tali atu ai pe a iai ni mea e tulaʻi mai? O lē fea itu o le faaeseesega e mafaufau isi e fetaui iā te aʻu?’ Pe a fesoasoani se faaeseesega iā te oe e iloa ai se mea e manaʻomia ona e faaleleia, ia taumafai e faatatau mea ua e aʻoaʻoina.

E mafai ona faaaogā lenei siata mo tapuaʻiga a le aiga. Muamua, ia faitau e sui uma o le aiga le siata, a o leʻi faia le tapuaʻiga a le aiga. A māeʻa lenā, ona faitau lea e se tasi le vaega muamua o se faaeseesega, ae tuu le avanoa pe e manatua e isi le vaega e sosoo ai. O le faia faapea, o le a avea o se talanoaga e fiafia i ai le aiga, i auala lelei e faatatau ai le vaega lona lua o se faaeseesega. O lea, o le iloiloina o faaeseesega, o le a fesoasoani i ē matutua ma talavou e atiaʻe uiga faa-Kerisiano i le aiga ma so o se mea.

O lou iloaina o le tāua o faaeseesega, o le a amata ai ona e mātauina faaeseesega a o faitau le Tusi Paia, ma fesoasoani iā te oe i le talaʻiga. O se faataʻitaʻiga, atonu e mafai ona e faapea atu i lē e ona le fale: “E toʻatele e faapea mai e iai le vaega e ola pea pe a oti le tagata, ae seʻi mātau le faamatalaga a le Tusi Paia.” Pe a o fai foʻi se suʻesuʻega faale-Tusi Paia, e mafai ona e fesili atu: “O le toʻatele o tagata e manatu e tutusa Ieova ma Iesu, peitaʻi o le ā ua ta aʻoaʻoina mai le Tusi Paia? O le ā lou talitonuga?”

E tele mau o le Tusi Paia o loo iai faaeseesega e mafai ona fesoasoani iā i tatou e savavali ai i le ala o le Atua. E mafai foʻi ona tatou faaaogā faaeseesega e fesoasoani ai i isi e aʻoaʻoina upu moni o le Tusi Paia.