1, 2. (a) Pe e te fiafia e fai ni filifiliga? (e) O ā ni ou faalogona i nisi o filifiliga sa e faia?

E TATOU te feagai ma filifiliga i aso uma. O ā ni ou faalogona i filifiliga o loo e fesagaʻia? E naunau nisi e faia a latou lava filifiliga ma e manatu e iai a latou aiā e faia ai faapea. O nisi e lē mautonu i le faia o filifiliga tāua i le olaga. Ae o nisi e saʻili atu i tusi po o tagata atamamai mo fautuaga, pe faaalu foʻi le tele o tupe i le saʻilia o fesoasoani mo a latou filifiliga.

² E iloa e le toʻatele e iai nisi filifiliga e lē mafai ona latou faia, ae e tele isi filifiliga e mafai ona latou faia i le olaga. (Kala. 6:5) Peitaʻi ia manatua, e tatou te lē faia filifiliga atamai i taimi uma.

3. O ā taʻiala ua tatou maua e faia ai a tatou filifiliga, ae o le ā le luʻi i nisi taimi?

³ I le avea ma auauna a Ieova, e tatou te fiafia ona ua Ia tuuina mai taʻiala manino e faatatau i le tele o mataupu tāua i le olaga. A tatou mulimuli i na taʻiala, e mafai ona tatou faia filifiliga e faafiafia ai Ieova ma maua ai aogā. Peitaʻi, e lē o aumaia i le Tusi Paia taʻiala maʻoti i tulaga ma faafitauli uma. O lea, o le ā e fesoasoani iā i tatou? O se faataʻitaʻiga, ua faapea mai le Efeso 4:28 e aua le gaoi. Ae o le ā e aofia ai i le gaoi? E manatu nisi e lē afāina le ave o se meatotino faatauvaa, ma pe afai o loo manaʻo moni iai le tagata. E faapefea ona tatou faia ni filifiliga i tafa o le olaga e lē o iai ni taʻiala manino? O le ā e fesoasoani iā i tatou?

4. O le ā le fautuaga e masani ona tatou maua pe a faia se filifiliga?

⁴ Pe a tatou faia se filifiliga tāua, atonu e fautua  mai se isi uso e tatau ona tatou mafaufau lelei. E talafeagai lenā fautuaga ma e lē tatau ona tatou vavevave, auā ua lapataʻi mai le Faataoto 21:5 “o i latou e faataalise ona faia mea e iʻu ai i le mativa.” O le ā le uiga o le iai o se mafaufau lelei? Pe e faasino atu i le faaalu o le taimi e mafaufau loloto ai, fetuutuunaʻi ma faia ai se filifiliga atamai? O vala uma na e mafai ona faia ai se filifiliga atamai. Peitaʻi, e iai isi mea e aofia i le iai o se mafaufau lelei.​—Roma 12:3; 1 Pete. 4:7.

5. Aiseā e tatou te lē maua ai se mafaufau e lelei atoatoa?

⁵ E leai se tasi o i tatou e fanau mai ma se mafaufau e lelei atoatoa. Talu ai e tatou te agasala ma lē lelei atoatoa, o lea e lē lelei atoatoa ai foʻi o tatou mafaufauga. (Sala. 51:5; Roma 3:23) O le toʻatele o i tatou na ʻfaatauaso’ e Satani a o leʻi aʻoaʻoina e faatatau iā Ieova ma ana tapulaa amiotonu. (2 Kori. 4:4; Tito 3:3) O lea, e tusa pe umi o mafaufau se tasi e faia se filifiliga atamai, e mafai lava ona ia faia se filifiliga sesē.​—Faata. 14:12.

6. O le ā e fesoasoani iā i tatou e atiaʻe se mafaufau lelei?

⁶ E tatou te lē lelei atoatoa, peitaʻi e lelei atoatoa Ieova i mea uma. (Teu. 32:4) Ua saunia mai e Ieova mea uma e mafai ona suia ai o tatou mafaufauga ma maua ai se mafaufau lelei. (Faitau le 2 Timoteo 1:7.) Ona o i tatou o Kerisiano, e tatou te mananaʻo e mafaufau, fefulifulisaʻi ma gaoioi i se auala saʻo. O lea, e tatau ona tatou taumafai e pulea o tatou mafaufauga ma faalogona, ma faataʻitaʻi i le auala e mafaufau ma gaoioi ai Ieova.

7, 8. O le ā se mea na tupu e iloa ai e mafai ona tatou faia filifiliga lelei, e ui i omiga ma faafitauli?

⁷ Seʻi mafaufau i le faataʻitaʻiga lenei. E masani i nisi tagata e malaga i isi atunuu, ona toe faafoʻi a latou pepe faatoʻā fananau i tauaiga o loo i o latou atunuu moni. O le faia faapea e mafai ai pea ona latou faigaluega. * Sa fanau le tama a se tasi fafine. Ae i le taimi lenā, ua amata ona ia suʻesuʻe ma faatatau mea ua ia aʻoaʻoina mai le Tusi Paia. Sa tauanau e uō ma tauaiga i laʻua ma lana tane, ina ia ave le pepe i lona atunuu e tausia ai e ona mātua e pei ona masani ai. Peitaʻi na iloa e le fafine mai i ana suʻesuʻega, o lona tiute tauave mai le Atua le tausia o lana tama. (Sala. 127:3; Efe. 6:4) Po o le a ia mulimuli i le tū e masani ai, lea e manatu tagata o se mea e tatau ona fai? Po o le a ia faatatau mea ua ia aʻoaʻoina mai le Tusi Paia, e ui o le a ia fesagaʻia ai faigatā tautupe ma faitioga mai i tagata? O le ā lau gaoioiga e fai pe afai o lou tulaga lenā?

⁸ Na matuā lē mautonu le fafine ona o le faatauanau atu a isi tagata. O lea na ia tatalo ai ma sasaa atu ona faalogona iā Ieova ma saʻili mo lana taʻitaʻiga. Ina ua ia talanoa i lona faiaʻoga ma isi i le faapotopotoga, na amata ona ia malamalama ai i le silafaga a Ieova i le mataupu. Na ia iloa ai foʻi o le a telē le aafiaga o lana tama pe afai e lē ola aʻe faatasi ma ona mātua. Ina ua māeʻa ona ia mafaufau i le manatu o le Tusi Paia i lona faafitauli, ona ia filifili loa lea e tuu lana pepe. Na mātauina e lana tane le vave ona fesoasoani atu o le faapotopotoga, ma vaaia le ola fiafia ma mālōlōina o le pepe. O lea, na ia talia ai se suʻesuʻega faale-Tusi Paia ma amata ona auai i sauniga.

9, 10. (a) O le ā e uiga i ai le iai o se mafaufau lelei? (e) E faapefea ona tatou maua le mafaufau lelei?

 ⁹ O se tasi lenā o faaaʻoaʻoga e iloa ai e tele mea e aofia i le iai o se mafaufau lelei, nai lo o le faia o se faaiʻuga e tatou te manatu ai ma isi tagata e fetaui. E tai pei o tatou mafaufau ma loto lē lelei atoatoa o se uati pe a tuai pe vave foʻi. A tatou faaaogāina se uati e tatou te iloa o loo sesē, e iʻu ai i se faafitauli. (Iere. 17:9) Ina ia ʻalofia faafitauli, e tatau ona faamautinoa o loo tutusa o tatou manatu ma faalogona ma tapulaa a le Atua.​—Faitau le Isaia 55:8, 9.

¹⁰ O le fautuaga atamai lenei i le Faataoto 3:5, 6: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.” Mātau le faaupuga “aua le faalagolago i lou lava malamalama,” peitaʻi ia “manatua [Ieova].” E na o Ieova e iai le mafaufau lelei atoatoa. O lea, pe a tatou faia se filifiliga, ia vaai i le Tusi Paia i le silafaga a le Atua i le mataupu ona fai ai lea o le filifiliga saʻo. Pe a tatou mananaʻo e maua le mafaufau lelei, e tatau ona tatou malamalama i le silafaga a Ieova i mataupu.

11. O le ā e tatau ona faia e se tasi ina ia faia ai ni filifiliga atamai?

¹¹ E lē faigofie le faia o se filifiliga atamai ma piiama iai, aemaise lava i tagata papatiso fou ma ē ua amata ona agaʻigaʻi i luma faaleagaga. Peitaʻi e mafai ona faaleleia lenā tulaga. Ua taʻua i le Tusi Paia e pei i latou o “pepe” ua faatoʻā amata ona aʻo le savali. E faasolosolo ona aʻoaʻo le savali a se pepe. E faapena le auala e amata ai ona faia e se tagata fou ni filifiliga atamai. Na faapea mai Paulo o ē matutua, ua “faaaogā o latou mafaufau e iloa le mea saʻo ma le mea sesē ina ua aʻoaʻoina.” O le upu “aʻoaʻoina” ma le “faaaogā,” e atagia mai ai e tatau ona faia pea taumafaiga. O lea, e manaʻomia e tagata fou ona aʻoaʻo pea  le auala e faia ai filifiliga atamai.​—Faitau le Eperu 5:13, 14.

12. E faapefea ona tatou atiaʻe le tomai e faia ai filifiliga atamai?

¹² E tatou te faia i aso taʻitasi ni filifiliga tetele po o ni filifiliga lāiti. I se suʻesuʻega sa faia na iloa ai o le tele o filifiliga e tatou te faia, e faavae mai i mea ua tatou masani ai. O se faataʻitaʻiga, o le filifilia o o tatou laʻei i taeao taʻitasi. E foliga mai o se filifiliga e lē alu se taimi e tau mafaufau ai. Peitaʻi, e tatau ona tatou mafaufau pe e talafeagai lea laʻei mo se auauna a Ieova. (2 Kori. 6:3, 4) Pe a e alu i se faleoloa e faatau se ofu, atonu e te mafaufau o le aʻega fou lea ua iai. Ae pe e te mafaufau e talafeagai lea ofu ma po o lava le tupe e faatau ai? O le atamai o le auala e faia ai filifiliga lāiti, e mafai ona toleni ai le auala e tatou te mafaufau ai. O le faia faapea, o le a tatou faia ai foʻi filifiliga atamai i mea e sili atu ona tāua.​—Luka 16:10; 1 Kori. 10:31.

13. O le ā e fesoasoani iā i tatou e tausisi ai i se filifiliga ua fai?

¹³ E tusa pe e tatou te faia se filifiliga atamai, e lē faigofie ona tatou tausisi pea iai. O se faataʻitaʻiga, ua mananaʻo nisi e taofi le ulaula tapaa, peitaʻi e lē o malosi lo latou faanaunauga e faia ai faapea. E tatau ona tatou naunau e faataunuu le mea ua tatou filifili e fai. E faatusa e nisi le faamalosia o lo tatou faanaunauga e faataunuu se filifiliga, i le auala e faamalosia ai maso o le tino. O le a vaivai maso o le tino pe afai e lē faagaoioia. O le ā e fesoasoani iā i tatou e faamalosia lo tatou faanaunauga e faataunuu se filifiliga ua fai? E manaʻomia ona tatou faalagolago i le fesoasoani a Ieova.​—Faitau le Filipi 2:13.

14. O le ā na fesoasoani iā Paulo i le faia o le gaoioiga saʻo?

¹⁴ Na iloa e Paulo e lē faigofie ona faia le mea saʻo. Na ia faapea mai “ou te loto e fai le mea lelei, a ou te lē iloa ona fai o le mea lelei.” Sa ia naunau e fai le gaoioiga saʻo, ae na ia lē taulau i nisi taimi. Na ia toe faapea mai: “Ou te matuā naunau i le tulafono a le Atua e tusa ma le tagata i totonu, ae ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala o loo i loʻu tino.” Na ia iloa e mafai ona ia taulau manuia auā na ia faapea mai: “Ia faafetaia le Atua ona o lo tatou Alii o Iesu Keriso!” (Roma 7:18, 22-25) Na ia toe tusi mai: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”​—Fili. 4:13.

15. Aiseā e tatau ai ona tatou maumauaʻi e fai le mea saʻo?

¹⁵ Ia tatou filifili e fai le mea saʻo ma tausisi iai ina ia faafiafia ai Ieova. O le tala lenei a le perofeta o Elia na fai atu i tagata na tapuaʻi iā Paala, ma tagata Isaraelu na liliuese i le Mauga o Karamelu: “O le ā ea le umi e tou te faalētonu ai i manatu eseese e lua? Afai o Ieova o le Atua moni, ia outou mulimuli atu iā te ia; ae afai o Paala, ia outou mulimuli atu iā te ia.” (1 Tu. 18:21) Na iloa e tagata Isaraelu e na o Ieova e tatau ona tapuaʻi iai. Peitaʻi na latou ʻfaalētonu pea i manatu e lua,’ ona sa latou taumafai e tapuaʻi iā Ieova ma Paala. Ae sa ese mai ai Iosua. I tausaga na muamua atu na ia faapea mai ai: ʻAfai e leaga iā te outou le auauna iā Ieova, inā outou filifili ia i le aso nei po o  ai e tou te auauna i ai. A o aʻu ma loʻu aiga, e matou te auauna iā Ieova.’ (Iosua 24:15) O le ā le faamanuiaga na maua e Iosua ma ē na mulimuli iā te ia? Na faataga i latou e ulu atu i le Nuu Folafolaina, lea na “tafe ai le suāsusu ma le meli.”​—Iosua 5:6.

16, 17. O ā faamanuiaga e tatou te maua pe a faia le finagalo o Ieova?

¹⁶ Seʻi mafaufau i le mea lenei, o se uso faaipoipo faatoʻā uma ona papatiso e toʻatolu lana fanau lāiti. E itiiti lona totogi i le galuega, ae sa ia filifilia ona e mafai ona mālōlō ai i le faaiʻuga o le vaiaso, e auai ai ma lona aiga i sauniga ma le talaʻiga. I se tasi aso, na tauanau ai o ia e se isi tagata i le galuega ina ia siitia atu i se isi kamupani e lelei le totogi, ma maua ai isi faamanuiaga. Na mafaufau lelei le uso ma tatalo iā Ieova e faatatau i lana filifiliga. Na ia iloa ai pe a alu i lea galuega, o le a faigatā ona maua se faaiʻuga o le vaiaso e mālōlō ai. Pe ana o oe lenā, o le ā lau gaoioiga e fai?

¹⁷ Ina ua mafaufau le uso i le aafiaga o le la faiā ma Ieova i lana filifiliga, ona ia lē filifilia lea o le galuega e telē le totogi. Pe e te manatu na ia salamō i lana filifiliga sa fai? E leai. Nai lo o le mafaufau i le mauaina o le tele o tupe, sa ia mafaufau i le sili atu ona tāua o le vavalalata o lona aiga iā Ieova. Na fiafia le ulugalii ina ua faailoa atu e lo la alo teine e 10 tausaga, e alofa iā i laʻua faapea uso ma tuafāfine, ae sili ai lona alofa iā Ieova. Na ia manaʻo e tuuina atu iā Ieova ma papatiso. Sa ia maua aogā mai le faaaʻoaʻoga a lona tamā o le faamuamua o le tapuaʻiga iā Ieova i le olaga.

18. Aiseā e tāua ai ona tatou faia filifiliga atamai i aso uma?

¹⁸ E pei ona taʻitaʻia e Mose le fanauga a Isaraelu i le toafa, ua faapena foʻi ona taʻitaʻia e Iesu tagata o le Atua i lenei faiga o mea a Satani mo le tele o tausaga, lea ua toe o se aga ona faaumatia lea. Na taʻitaʻia e Iosua Isaraelu i le Nuu Folafolaina, o le a faapena foʻi ona taʻitaʻia e Iesu ona soo i le lalolagi fou amiotonu. (2 Pete. 3:13) O lea, e lē atamai ai ona tatou toe foʻi i o tatou mafaufauga tuai, faapea a tatou masaniga, tapulaa, ma sini sa iai muamua. O le taimi lenei e tatau ona tatou malamalama lelei ai po o le ā le finagalo o le Atua mo i tatou. (Roma 12:2; 2 Kori. 13:5) Ia faia filifiliga atamai ma maua ai faamanuiaga a Ieova seʻia oo i le faavavau.​—Faitau le Eperu 10:38, 39.