1. (a) O ā auala e tali mai ai tagata i faamanatuga, ma aiseā? (e) O le ā le auala e tali atu ai se tagata faamaualuga i fautuaga?

E ESEESE auala e tali ai tagata i faatonuga. Atonu e talileleia e se tasi se faamanatuga mai i sē e iai le pule, ae ono teena se fautuaga mai i se uō po o se tagata e lē taualoa. Pe a maua fautuaga ma aʻoaʻiga, e ono mapuna aʻe faalogona mafatia, faanoanoa, māsiasi, pe atonu foʻi e uunaʻia ai e faia se gaoioiga ma faia se faaleleiga. Aiseā e eseese ai auala e tali mai ai tagata? O se tasi o māfuaaga o le faamaualuga. Pe a maua e se tagata faamaualuga ni fautuaga, e manatu i ai e lē aogā iā te ia. E oo ai ina ia teena fautuaga ma lē maua ai aogā.​—Faata. 16:18.

2. Aiseā e talisapaia ai e Kerisiano moni fautuaga mai i le Afioga a le Atua?

² E talisapaia e Kerisiano moni fautuaga aemaise pe a faavae mai i le Afioga a le Atua. Ua aʻoaʻoina i tatou i faamanatuga a Ieova ma tatou maua ai le atamai aogā. Ua fesoasoani foʻi iā i tatou e ʻalofia ai lamatiaga e pei o le pupū i meafaitino, feusuaʻiga lē mamā, lē pulea o le ʻava malosi ma le faaaogāina o fualaau faasāina. (Faata. 20:1; 2 Kori. 7:1; 1 Tesa. 4:3-5; 1 Timo. 6:6-11) E lē gata i lea, e tatou te olioli ona o le ʻlelei o o tatou loto’ ona o le usitaʻia o faamanatuga a le Atua.​—Isa. 65:14.

3. O le ā e tatau ona atagia mai i o tatou uiga e tusa ai ma upu a le faisalamo?

³ Ina ia faatumau la tatou faiā tautele ma le Tamā faalelagi, e tatau ona tatou faatatauina pea fautuaga atamai a Ieova i o tatou olaga. Maʻeu le matagofie pe a tatou faataʻitaʻi i le uiga sa i le faisalamo, o lē na faapea mai: “Ua fai ma oʻu tofi au faamanatuga  i aso uma lava, auā o mea ia e fiafia i ai loʻu loto.” (Sala. 119:111) Pe e tatou te fiafia i tulafono a Ieova? Pe e tatou te vaai i ai i nisi taimi o se avega mamafa? E tusa pe iai nisi taimi e faigatā ai ona tatou talia fautuaga, ia aua neʻi lotovaivai ai. E mafai ona atiaʻe lo tatou maufaatuatuaina o le atamai o le Atua. O lea, seʻi o tatou iloiloina auala e tolu e mafai ai ona tatou faia faapea.

4. O le ā se mea e leʻi suia i le olaga o Tavita?

⁴ Na iai taimi na sologa lelei ma faigatā ai le olaga o Tavita, ae na ia maufaatuatuaina atoatoa pea Lē na Foafoaina o ia. Na ia faapea mai: “Ieova e, ou te tuuina atu loʻu ola iā te oe. Loʻu Atua e, ou te faatuatua atu iā te oe.” (Sala. 25:1, 2) O le ā na fesoasoani iā Tavita e atiaʻe ai le maufaatuatuaina o lona Tamā faalelagi?

5, 6. O le ā ua faailoa mai i le Tusi Paia e faatatau i le faiā a Tavita ma Ieova?

⁵ E toʻatele tagata e faatoʻā tatalo lava i le Atua pe a feagai ma faigatā. Peitaʻi e leʻi faapena Tavita. E faapefea pe afai e faatoʻā alu atu sau uō po o sou tauaiga iā te oe pe a ia manaʻomia se fesoasoani? E te ono fesiligia le māfuaaga ua ia faia ai faapea. Peitaʻi, sa faaatagia mai i le faiā a Tavita ma Ieova, lona alofa ma le faatuatua i le Atua i lona olaga i taimi uma.​—Sala. 40:8.

⁶ Seʻi mafaufau i le viiviia ma le talisapaia e Tavita o Ieova i lona faapea mai: “Ieova e lo matou Alii, maʻeu lava le silisili o lou suafa i le lalolagi uma, ua taʻutaʻua foʻi lou mamalu e sili i luga o le lagi!” (Sala. 8:1) Po ua e mātauina le māfana o le faiā a Tavita ma lona Tamā faalelagi? O le talisapaia e Tavita o le mamalu ma le matagofie o le Atua, na uunaʻia ai o ia e viiviia Ieova i le “aso atoa.”​—Sala. 35:28.

7. O le ā le aogā o le faalatalata atu i le Atua i le tatalo?

⁷ I le pei o Tavita, e manaʻomia ona tatou talanoa atu e lē aunoa iā Ieova ina ia atiaʻe ai lo tatou maufaatuatuaina o ia. Ua taʻua i le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8) O le faalatalata atu i le Atua i le tatalo, o se tasi o auala sili e tatou te maua ai lona agaga paia.​—Faitau le 1 Ioane 3:22.

8. Aiseā e tatau ai ona tatou ʻalofia le tautū i faaupuga masani pe a tatalo?

⁸ Pe e te tautū i faaupuga masani pe a e tatalo? A o leʻi tatalo, ia faaalu se taimi e mafaufau lelei ai i upu e faaaogā. Pe a tatou faaaogā soo ni faaupuga masani i a tatou talanoaga ma nisi o uō i taimi uma, atonu o le a latou lē fia faalogo mai. E faafofogaina e Ieova tatalo mai le loto a ana auauna faamaoni. Peitaʻi, e tatau ona ʻalofia le tautū i a tatou upu pe a tatalo atu iā te ia.

9, 10. (a) O le ā e tatau ona faaaofia i a tatou tatalo? (e) O le ā e fesoasoani iā i tatou e tatalo ai iā Ieova mai le loto?

⁹ Pe a tatou mananaʻo e faalatalata atu i le Atua, e lē lava le tau ina tatalo i mea masani o le olaga. O le tele e sasaa atu ai o tatou faalogona iā Ieova, o le a tatou matuā maufaatuatuaina ai o ia. Ua taʻua i le Tusi Paia mea e tatau ona faaaofia i a tatou tatalo: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.” (Fili. 4:6) E mafai ona taʻua i a tatou tatalo so o se mea e aafia ai o tatou ola po o la tatou faiā ma le Atua.

 ¹⁰ E tāua ona iloiloina tatalo a tane ma fafine faamaoni o loo faamauina i le Tusi Paia. (1 Samu. 1:10, 11; Galu. 4:24-31) O loo faamauina i le tusi o Salamo tatalo faatauanau ma pesega iā Ieova, o loo faaleo ai faalogona e pei o le mafatia ma le fiafia. O le iloiloina o na tatalo, e fesoasoani iā i tatou e tatalo ai iā Ieova mai le loto.

11. Aiseā e manaʻomia ai ona tatou mafaufau loloto i fautuaga mai i le Atua?

¹¹ Na taʻua e Tavita: “E maufaatuatuaina le faamanatuga a Ieova, e atamai ai le tagata e leai se poto masani.” (Sala. 19:7) E tusa pe leai so tatou poto masani, ae e mafai ona maua le atamai pe a usitaʻia tulafono a le Atua. E manaʻomia ona tatou mafaufau loloto i nisi o fautuaga faale-Tusi Paia, ina ia faamaoni ai i vala uma o le olaga. E aofia ai omiga i aʻoga ma galuega, usitaʻia tapulaa a le Atua e faatatau i le toto, solitū o ni Kerisiano, ma le faatatauina o mataupu silisili o le Tusi Paia e faatatau i laʻei ma teuga. O le malamalama i le silafaga a le Atua i na mataupu, o le a tatou nofosauni ai e faafetaiaʻia faafitauli ma mautinoa ai le gaoioiga e tatau ona fai. O le mafaufau loloto ma sauniuni mamao, o le a tatou ʻalofia ai le tele o faanoanoaga.​—Faata. 15:28.

12. O ā mea e mafaufau loloto iai, e fesoasoani iā i tatou e usitaʻia ai faamanatuga a le Atua?

¹² Po o atagia atu i o tatou olaga, o loo tatou mataala pea faaleagaga a o faatalitali i le faataunuuina o folafolaga a le Atua? O se faataʻitaʻiga, po ua tatou talitonu moni lava ua toe o se aga ona faaumatia lea o Papelonia le Aai Tele? Po o moni pea iā i tatou faamanuiaga i le lumanaʻi e pei o le ola e faavavau i se lalolagi parataiso? Po o tatou maelega pea i le faiva, nai lo o le faatāua o mea e tatou te mananaʻo ai i le olaga? Po o tāua pea iā i tatou le faamoemoe o le toetū, le faapaiaina o le suafa o Ieova, ma le faasilisilia o lana pule silisili ese? O le mafaufau loloto i na fesili, e fesoasoani iā i tatou e faaauau ai ona fai ma o tatou ʻtofi faamanatuga a le Atua i aso uma lava.’​—Sala. 119:111.

13. Aiseā na faigatā ai ona malamalama Kerisiano i le uluaʻi senituri i nisi o mea? Aumai se faataʻitaʻiga.

¹³ E tatou te lē malamalama atoatoa i nisi o mea o loo taʻua i le Tusi Paia, auā e leʻi oo i le taimi atofaina a Ieova e faamalamalama mai ai. E leʻi malamalama le ʻauaposetolo i le uiga o le fetalaiga na masani ona faia e Iesu, e tatau ona oo iā te ia puapuaga ma oo atu ai i le oti. (Faitau le Mataio 12:40; 16:21.) Na faatoʻā latou malamalama ina ua mavae le maliu o Iesu. Ina ua toe faatūina o ia ma liutino tagata ma faaali atu i ona soo, ona ia “matuā faamatala atu lea iā i latou o Tusitusiga Paia, ina ia latou malamalama ai.” (Luka 24:44-46; Galu. 1:3) Na faatoʻā malamalama foʻi soo o Iesu o le a faavaeina le Malo o le Atua i le lagi, ina ua liligi ifo le agaga paia iā i latou i le Penetekoso 33 T.A.​—Galu. 1:6-8.

14. O le ā le faaaʻoaʻoga lelei na faataatia e uso i le amataga o le senituri lona 20?

¹⁴ E faapena foʻi i le amataga o le senituri lona 20, sa tele manatu sesē sa iai i Kerisiano moni e uiga i “aso e gata ai.” (2 Timo. 3:1) O se faataʻitaʻiga, na manatu nisi e aveina aʻe i latou i le lagi i le 1914, peitaʻi e leʻi taunuu lenā mea. O lea, na latou saʻiliʻili ai pea i le Tusi  Paia ma iloa ai, e manaʻomia ona latou faia se tauiviga tele mo le galuega talaʻi. (Mare. 13:10) I le 1922, na faatonu ai e J. F. Rutherford o lē na taʻimua i le galuega talaʻi, i latou na auai i le tauaofiaga i Cedar Point i Ohio i Amerika e faapea: “Faauta, ua pule le Tupu! O outou o ona sui, ma e tatau ona faailoa atu o ia i le lautele. O lea, ia faalauiloa, faalauiloa, faalauiloa, le Tupu ma lona Malo.” Mai i lenā taimi ma faasolo mai ai, ua lauiloa auauna a Ieova i aso nei i le talaʻia o le “tala lelei o le malo.”​—Mata. 4:23; 24:14.

15. Aiseā e tāua ai ona mafaufau loloto i le auala na feutagaʻi ai Ieova ma ona tagata?

¹⁵ E tāua ona tatou mafaufau loloto i auala matagofie na feutagaʻi ai Ieova ma ona tagata, i taimi ua mavae ma aso nei. O le a faamalosia ai lo tatou mautinoa e faataunuu e Ieova ana fuafuaga i le lumanaʻi. O le mafaufau loloto i folafolaga a Ieova, o le a moni ai iā i tatou na folafolaga ma mautinoa ai o le a faataunuuina.

16. O ā faamanuiaga e tatou te maua pe a galulue malolosi i le auaunaga?

¹⁶ O Ieova o le Atua e galue mamafa. Na fesili le faisalamo: “Ioa e, o ai ea e malosi e pei o oe? E malosi foʻi lou aao, ua faaeaina foʻi lou aao taumatau.” (Sala. 89:8, 13) O lea, po o ā lava o tatou tulaga, e talisapaia ma faamanuia e Ieova i tatou pe a tatou faia le mea sili i le auaunaga. Ua ia silafia o loo tatou faamalolosi pea ma lē aai i “meaʻai a le paiē.” (Faata. 31:27) E tatou te faataʻitaʻi i Lē na Foafoaina Mea, pe a faaauau ona tatou maelega i le auaunaga. O le faia  faapea, e tatou te maua ai le fiafia ma faafiafiaina ai Ieova.​—Faitau le Salamo 62:12.

17, 18. E faapefea ona faamalosia lo tatou faatuatuaina o Ieova pe a mulimuli i ana faatonuga? Aumai se faataʻitaʻiga.

¹⁷ E faapefea i galuega o le faatuatua ona faamalosia lo tatou maufaatuatuaina o Ieova? A o ulu atu Isaraelu i le Nuu Folafolaina, na faatonu e Ieova ositaulaga na tauaveina le atolaau o le feagaiga ina ia savavali i le Vaitafe o le Ioritana. A o latalata atu le nuu, na latou vaaia ai le tatafe o le vai ona o le tetele o timuga. Pe na latou faatutū ni faleʻie ma faatalitali mo ni vaiaso seʻi māui le vai? E leai, sa latou maufaatuatuaina Ieova ma mulimuli i ana faatonuga. Ua taʻua i le Iosua 3:12-17: ʻUa fufui vae o ositaulaga i le auvai, ona tū ai lea o le vai o loo tafe ifo mai i luga. Ona tutū ai lea o ositaulaga i le ilitivai mātūtū i le ogatotonu o Ioritana, a o savavali atu Isaraelu uma.’ Maʻeu le fiafia o tagata Isaraelu a o vāai atu i lenei vaaiga ofoofogia! Na faamalosia lo latou faatuatua iā Ieova, ona o le mulimuli i ana taʻiala.

¹⁸ E lē o toe faia e Ieova ni vavega mo ona tagata i aso nei. Peitaʻi, e faamanuia e Ieova i tatou pe a faaalia le faatuatua ma mulimuli i ana faatonuga. E faamalosia e le agaga paia i tatou e talaʻi atu le feʻau o le Malo i le lalolagi aoao. Na folafola e Iesu, o le Molimau sili a Ieova, o le a ia lagolagoina le galuega tāua a ona soo: ʻO le mea lea, ia outou ō atu e fai tagata o nuu uma lava ma soo. Ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.’ (Mata. 28:19, 20) E toʻatele auauna matamumuli a Ieova na maua le lototele e talanoa ai i tagata i le talaʻiga, ona o le agaga paia o le Atua.​—Faitau le Salamo 119:46; 2 Korinito 4:7.

19. E ui e itiiti mea e tatou te mafaia, ae o le ā le faamautinoaga ua tatou maua?

¹⁹ Ua itiiti mea e faia e nisi i le auaunaga ona o maʻi po o le soifua matua. Peitaʻi, ua latou mautinoa e malamalama le “Tamā o le alofa mutimutivale, ma le Atua o faamāfanafanaga uma” i o latou tulaga. (2 Kori. 1:3) E talisapaia e Ieova a tatou taumafaiga uma i le auaunaga. Ia manatua, o le faatuatua i le taulaga togiola a Keriso e mafai ona faaolaina ai i tatou.​—Epe. 10:39.

20, 21. O ā nisi o auala e faaalia ai lo tatou maufaatuatuaina o Ieova?

²⁰ O la tatou tapuaʻiga, e aofia ai le faaaogāina o o tatou taimi, malosi ma meafaitino i le tele e mafai ai i le auaunaga i le Atua. E tatou te fiafia e faia le mea sili i le galuega talaʻi, ma fesoasoani i isi e “maua le poto saʻo i le upu moni.” (1 Timo. 2:4; 2 Timo. 4:5) O le faamamaluina ma le viiviia o Ieova, e faatamaoaigaina faaleagaga ai i tatou. (Faata. 10:22) E fesoasoani foʻi e tatou te maufaatuatuaina atoatoa ai Lē na Foafoaina i tatou.​—Roma 8:35-39.

²¹ E pei ona talanoaina, e lē otometi ona tatou maufaatuatuaina Ieova ina ia maua ai taʻiala atamai. O lea, ia faamalosia lou maufaatuatuaina o Ieova e ala i le tatalo. Ia mafaufau loloto i le auala na ia faataunuu ai ana folafolaga i le taimi ua teʻa faapea le lumanaʻi. Ia faaauau foʻi ona atiaʻe lou maufaatuatuaina o Ieova e ala i le faia o galuega e fesootaʻi atu i le tapuaʻiga. E tumau e faavavau faamanatuga a Ieova. O le uaʻi atu i na faamanatuga, e maua ai le ola e faavavau.